نئجه «یوخ» دئمگین یول‌لاری
یازار : میرزه عبدالصمد ملکی | بؤلوم : اجتماعی
+0 به یه ن
 | ||
سیزین‌ده یوخ دئمک چتینلیگیز اولسا بو یازینی اوخوساز سیزه فایدالی اولار. اؤز واختیزی اؤز برنامه‌زله صرف ائله‌مک ایسته‌سز بعضاً «یوخ» دئیه بیلمه‌لیسیز. بونون اوچون نئچه ساده یول وار: صادق اولون. صادق اولماق ادبسیز اولماق معناسیندا دئییل. صداقت لاپ یاخشی سیاستدیر. مثلاً سیزدن اوشاغیزین مدرسه‌سینده داوطلب ایشلرین گؤرولمه‌سی ایستنسه، چوخ صداقتله دئیه بیلرسیز: «گؤیلوم بو ایشی گؤرمگی ایسته‌مه‌سینه رغماً بیر سئری محدودیتلر مانع اولور و شرمنده‌لیکله بو ایشی قبول ائلیه بیلمیرم». همیشه حقیقتی ظریف یول‌لارلا دئمک اولار. بو مرحله‌ده صراحت و صداقت لاپ تأثیرلی استراتژی ساییلیر. حتی بو یول سیزه چتین گلیرسه، آیری یول‌لاری امتحان ائلیه بیلرسیز. اغراق ائله‌یین. قئیین - قودا ایله شام یئمگه حالیز اولماسا، حالسیزلیق و مریضلیقکدن یاخشی بهانه تاپیلماز. مسلماً هئچ کس شدتلی آنفولانزا توتموش بیری ایله بیر سوفره باشیندا اوتورماق ایسته‌مز. بئله‌لیکله بیرینی اینجیتمه‌دن چوخ راحت اونلارین دعوتینه یوخ دئیه بیلرسیز. باشیز شولوغ اولسون. بو گونلر هامی‌نین باشی شولوغ اولور و هئچ کسین باش قاشیماغا واختی اولمور. بو دا یوخ دئمگه آیری بیر بهانه. بیری‌نین دعوتینی رد ائله‌مک ایسته‌سز لاپ یاخشی یول بو اولار کی گؤره‌جگیز ایشلرین لیستینی اونا گؤستره‌‌سیز کی باشیزین نه قدر شولوغ اولدوغونو او دا بیلسین. متأسف اولون. بعضاً ده بیر دعوتین ردّی اوچون بهانه گتیرمک ایسته‌میرسیز. آما یئنه نگران قالمایین. اونلارا بو دعوتی قبول ائلیه بیلمه‌دیگیز اوچون نه قدر متأسف اولدوغوزو بیان ائله‌سز «یوخ»ون آجیلیغی‌نین بیر آزی آلینار. تأسف و عذر خواهلیق آیریلاری ایله همدل اولماغین لاپ یاخشی یوللاریندان ساییلیر. اوّل‌دن یوخ دئمگه حاضر اولون. یوخ دئمک هنرینی اوّل‌دن اؤیرنین. یوخاریداکی یول‌لارین هر بیرینی استفاده ائلیه بیلرسیز آما هامیسندان مهم اؤزوزه و زمانیزا ارزش وئرمگیزدیر. دوزگون بیر تصمیمین توتماسی اوچون زمان قازانماقدان قورخمایین. اطرافداکیلاریز سیزین اونلارلا برابر اولماق اوچون چالیشمازا ارزش قایلدیلر حتی جوابیز یوخ اولسا بئله. بونا گؤره اوّل‌دن یوخ دئمگه تمرینیز اولسون. | ||