din xadimi دین خادمی

شلاله‌لر*Şəlalələr

سرسكند دیزه شلاله‌سی چوخدا اوجا اولمایان بو شلاله, میشودا شبستره تابع اولان سرسكند دیزه كندی‌نین 2 كیلومترلیگینده یئرله‌شیب. بو آبشارین سویو میشو اوجالیقلاریندان گلیر و یاغیشلی فصل‌لرده سویو چوخ اولار. اونون گؤزل منظره‌سی و اطرافدا كی گؤرمه‌لی یئرلری اوستانین طبیعی جاذیبه‌لریندن ساییلیر. خارابا دگیرمان شلاله‌سی خارابا دگیرمان (آسیاب خرابه) شرقی آذربایجانین گؤرمه‌لی یئرلریندن ساییلیر. بو شلاله, داغیلمیش بیر دگیرمانین قالیقلاری‌نین اولدوغونا گؤره, خارابا دگیرمان آدینا معروف اولوب. بو اورك آچان یئره چاتماق اوچون, مرند-جولفا جادّه‌سیندن علمدار گرگر شهرینه وارید اولوب, ایران و آذرباجان جمهوریّتی مرزینده بیر خاكی جادّه‌دن كئچمكله بیر فرعی یولونان صفالی بیر دره‌یه گئتمك اولار كی بو شلاله‌نین قرار تاپان یئریدیر. تبریزدن جولفا-علمدار جادّه‌سینه جن 106 كیلومتردیر و علمداردان خارابا دگیرمانا دا 27 كیلومتر خاكی یولدور. بو منطقه‌ده بیر بولاق وار كی سویو كَمكی داغیندان گلیر. بولاغین قاینایان یئرینده انجیر آغاجلاری وار. سو, گؤزل بیر شلاله‌یه تبدیل اولاندان سونرا دره‌نین آشاغیسیندا كیچیك بیر چایا قاریشیر و دره‌نین شیمالینا طرفه گئدیر. دره‌ آشاغیسی‌نین ساغ طرفینده چوخلی شلاله‌لر یارانیب. دیوارلارین هامیسینی یوسون (خزه) اؤرتوب. یوزلرجه كیچیك و بؤیوك شلاله‌نین شیریلتیسی, گؤزل منظره و سرین هاوا, اورانین اورگه یاتان جاذیبه‌لریندن ساییلیر. خارابا دگیرمان  شلاله‌سینین اوجالیغی 10 متردیر و اطرافی‌نین مساحتی تقریباً 200 متردیر عیش‌آباد شلاله‌سی بو شلاله‌نین اوجالیغی 15 متردیر و مرندین مركزی بخشینده میشو داغلاریندا عیش آباد كندی‌نین كناریندا یئرله‌شیب. اورا گئدن یولون بیر قیسمتی ماشین یولو و بقیه‌سی داغ یولودور. 300 متر موربع وسعتی وار و داغ و دره یانیندا گؤزل طبیعی منظره یارالدیب.

	ارزروم شهری‌نین فرهنگی مركزی, تبریزده ایشه باشلادی
ائل نیوزون وئردیگی معلوماتا گؤره, ارزروم شهری‌نین فرهنگی فعالیتلر مركزی, تبریزین مشروطه بازاریندا ایشه باشلادی. تبریز شهرداری‌نین دئدیگینه گؤره بو مسأله نئچه مودّت ایدی كی ایكی شهرین باجیلیق عقدی جیدّیله‌شمه‌سیله مطرح اولموشدو. بو ایش باعیث اولاجاق ایكی شهرین مسئوللاری نین نظرلرینده اولان هدفلر داها راحات الده اولسون.

شعبان یاریسی, لیله‌القدر گئجه‌سینه تای فظیلتلی* Şəban yarısı, lleylətolqədr gecəsinə tay fəziltli

آللاهین آخیرینجی حوجتی حضرت ولی عصر(عج) 255 هیجری قمری ایلی شعبان یاریسیندا دونیایا گؤز آچدی و بو احتیمال وار كی بو گئجه قدر گئجه‌سی اولسون. ایمام صادق (ع) بو باره‌ده بویوروب: نئجه‌كی آللاه پیغمبره (ص) قدر گئجه‌سی باغیشلادی, بیزه‌ده شعبان یاریسین باغیشلاییب. شعبان‌ یاریسی‌نین گئجه‌سی, چوخ موبارك گئجه‌دیر. پیغمبر اكرم (ص) بیر حدیثده بویوروبلار: شعبان یاریسی گئجه‌سی اجل‌لر یازیلیر و روزی‌لر پایلانیر و آللاه تعالا بو گئجه بنده‌لرین باغیشلاییر و ملكلری یئرین گؤیونه و اوردان‌دا یئره نازیل ائلر و ایلك یئر, مكه‌یه نازیل اولار. ایمام جعفر صادقدن(ع)  ریوایت اولوب كی امام محمدباقردن(ع) شعبان یاریسی‌ گئجه‌سی‌نین فضیلتیندن سوروشدولار؛ ایمام  بویوردو: قدر گئجه‌سیندن سونرا او گئجه لاپ افضل گئجه‌دیر. او گئجه‌ده آللاه, فضلینی بنده‌لرینه عطا ائلر و اونلاری اؤز كرمی‌ایله باغیشلار. پس چالیشین او گئجه آللاها یاخینلاشین كی او بیر گئجه‌دیر كی آللاه اؤز موقدّس وجودونا آند ائدیب كی قاپیسیندان هئچ ساییلی قوغمایا مگر بو كی گوناه بیر ایستگی اولا. ایمام صادق‌ده (ع) بو باره‌ده بویوروب: نئجه‌كی آللاه پیغمبره (ص) قدر گئجه‌سی باغیشلادی, بیزه‌ده شعبان یاریسین باغیشلاییب. شعبان یاریسی گئجه‌سی‌نین اعمالی بو گئجه اوچون, نئچه عمل ذیكر اولوب: 1.      غوسل, كی گوناهلاری یونگول‌لشدیرر. 2.      بو گئجه‌نی آییق قالیب سحره‌ قدر دوعا, ایستیغفار و نامازلا كئچیرمك. ریوایتده گلیب كی بو گئجه‌نی آییق قالانین اورگی, اوركلر اؤلن گون, اؤلمز. 3.      ایمام حسینین (ع) زیارتی كی بو گئجه‌نین عمل‌لری‌نین افضلی ساییلیر كی گوناهلارین باغیشلانماسینا سبب اولار. و هر كس اونونلا موصافیحه ائده اونون‌دا گوناهلاری باغیشلانار. 124 مین پیغمبرین روحی او حضرتی زیارت ائدرلر. او حضرتین زیارتی اوچون لاپ آزی بودور كی داما چیخاسان و ساغا سولا باخاسان و سونرا گویه باخیب او حضرتین زیارتینی بو كلمه‌لرله ائده‌سن « اَلسَّلامُ عَلَیْكَ یا اَبا عَبْدِاللّهِ، اَلسَّلامُ عَلَیْكَ وَ رَحْمَةُاللّهِ وَ بَرَكاتُهُ.» و هر كس هر هاردا اولا و هر واخت او حضرتی بوجور زیارت ائلیه, اومید وار كی حج و عمره ثوابی اونون اوچون یازیلسین. 4.      زوال واختی هر گونلوك صلوات اوخونسون. 5.      گلیب كی بو گئجه كمیل دوعاسی اوخونسون. 6.      بو ذیكرلر یوز دفعه اوخونسون : "سُبْحانَ اللّهِ" ، "الْحَمْدُلِلّهِ" ، "اللّهُ اَكْبَرُ" وَ "لا اِلهَ اِلا اللّهُ" بلكه آللاه تعالا اونون كئچمیش گوناهلارین باغیشلاسین و اونون دونیا و آخیرت ایستكلرین یئرینه یئتیرسین. 7.      جناب جعفرین نامازی قیلینسین. 8.      شیخ, مصباح كیتابیندا بیر خبر ضیمنینده, شعبان یاریسی گئجه‌سی‌نین فضیلتی باره‌ده نقل ائتدیغی خبرده ریوایت ائدیب كی, اؤز مولام حضرت صادقدن (ع) سوروشدوم كی بو گئجه لاپ یاخشی دوعا نه‌‌دیر؟ بویوردو: عشا نامازیندان سونرا, 2 ركعت ناماز قیل كی اوّل ركعتینده حمد و قُلْ یا اَیُّهَا الْكافِروُنَ سوره‌سین اوخو و ایكینجی ركعتده حمد و توحید سوره‌سین اوخو. سلاملاردان سونرا خانیم زهرانین (س) تسبیحاتین اوخو. سونرا بو دوعانی اوخو: یا مَنْ اِلَیْهِ مَلْجَاءُ الْعِبادِ فِى الْمُهِمّاتِ وَ اِلَیْهِ یَفْزَعُ الْخَلْقُ فىِ الْمُلِمّاتِ یا عالِمَ الْجَهْرِ وَالْخَفِیّاتِ وَ یا مَنْ لا تَخْفى عَلَیْهِ خَواطِرُ الاْوْهامِ وَ تَصَرُّفُ الْخَطَراتِ یا رَبَّ الْخَلایِقِ وَالْبَرِیّاتِ یا مَنْ بِیَدِهِ مَلَكُوتُ الاْرَضینَ وَالسَّمواتِ اَنْتَ اللّهُ لا اِلهَ اِلاّ اَنْتَ اَمُتُّ اِلَیْكَ بِلا اِلهَ اِلاّ اَنْتَ فَیا لا اِلهَ اِلاّ اَنْتَ اجْعَلْنى فى هِذِهِ اللَّیْلَةِ مِمَّنْ نَظَرْتَ اِلَیْهِ فَرَحِمْتَهُ وَ سَمِعْتَ دُعاَّئَهُ فَاَجَبْتَهُ وَ عَلِمْتَ اسْتِقالَتَهُ فَاَقَلْتَهُ وَ تَجاوَزْتَ عَنْ سالِفِ خَطیئَتِهِ وَ عَظیمِ جَریرَتِهِ فَقَدِ اسْتَجَرْتُ بِكَ مِنْ ذُنُوبى وَ لَجَاْتُ اِلَیْكَ فى سَتْرِ عُیُوبى اَللّهُمَّ فَجُدْ عَلَىَّ بِكَرَمِكَ وَ فَضْلِكَ وَاحْطُطْ خَطایاىَ بِحِلْمِكَ وَ عَفْوِكَ وَ تَغَمَّدْنى فى هذِه اللَّیْلَةِ بِسابِغِ كَرامَتِكَ وَاجْعَلْنى فیها مِنْ اَوْلِیاَّئِكَ الَّذینَ اجْتَبَیْتَهُمْ لِطاعَتِكَ وَاخْتَرْتَهُمْ لِعِبادَتِكَ وَ جَعَلْتَهُمْ خالِصَتَكَ وَ صِفْوَتَكَ اَللّهُمَّ اجْعَلْنى مِمَّنْ سَعَدَ جَدُّهُ وَ تَوَفَّرَ مِنَ الْخَیْراتِ حَظُّهُ وَاجْعَلْنى مِمَّنْ سَلِمَ فَنَعِمَ وَ فازَ فَغَنِمَ وَاكْفِنى شَرَّ ما اَسْلَفْتُ وَاعْصِمْنى مِنَ الاِْزدِیادِ فى مَعْصِیَتكَ وَ حَبِّبْ اِلَىَّ طاعَتَكَ وَ ما یُقَرِّبُنى مِنْكَ وَ یُزْلِفُنى عِنْدَكَ سَیِّدى اِلَیْكَ یَلْجَاءُ الْهارِبُ وَ مِنْكَ یَلْتَمِسُ الطّالِبُ وَ عَلى كَرَمِكَ یُعَوِّلُ الْمُسْتَقیلُ التّائِبُ اَدَّبْتَ عِبادَكَ بالتَّكَرُّمِ وَ اَنْتَ اَكْرَمُ الاْكْرَمینَ وَ اَمَرْتَ بِالْعَفْوِ عِبادَكَ وَ اَنْتَ الْغَفُورُ الرَّحیمُ اَللّهُمَّ فَلا تَحْرِمْنى ما رَجَوْتُ مِنْ كَرَمِكَ وَلا تُؤْیِسْنى مِنْ سابِغِ نِعَمِكَ وَلا تُخَیِّبْنى مِنْ جَزیلِ قِسَمِكَ فى هذِهِ اللَّیْلَةِ لاِهْلِ طاعَتِكَ وَاجْعَلْنى فى جُنَّةٍ مِنْ شِرارِ بَرِیَّتِكَ رَبِّ اِنْ لَمْ اَكُنْ مِنْ اَهْلِ ذلِكَ فَاَنْتَ اَهْلُ الْكَرَمِ وَالْعَفْوِ وَالْمَغْفِرَةِ وَ جُدْ عَلَىَّ بِما اَنْتَ اَهْلُهُ لا بِما اَسْتَحِقُّهُ فَقَدْ حَسُنَ ظَنّى بِكَ وَ تَحَقَّقَ رَجاَّئى لَكَ وَ عَلِقَتْ نَفْسى بِكَرَمِكَ فَاَنْتَ اَرْحَمُ الرّاحِمینَ وَ اَكْرَمُ الاْكْرَمینَ اَللّهُمَّ وَاخْصُصْنى مِنْ كَرَمِكَ بِجَزیلِ قِسَمِكَ وَاَعُوذُ بِعَفْوِكَ مِنْ عُقُوبَتِكَ وَاغْفِر لِىَ الَّذنْبَ الَّذى یَحْبِسُ عَلَىَّ الْخُلُقَ وَ یُضَیِّقُ عَلىَّ الرِّزْقَ حَتّى اَقُومَ بِصالِحِ رِضاكَ وَ اَنْعَمَ بِجَزیلِ عَطاَّئِكَ وَاَسْعَدَ بِسابِغِ نَعْماَّئِكَ فَقَدْ لُذْتُ بِحَرَمِكَ وَ تَعَرَّضْتُ لِكَرَمِكَ وَاسْتَعَذْتُ بِعَفْوِكَ مِنْ عُقُوبَتِكَ وَ بِحِلْمِكَ مِنْ غَضَبِكَ فَجُدْ بِما سَئَلْتُكَ وَاَنِلْ مَا الْتَمَسْتُ مِنْكَ اَسْئَلُكَ بِكَ لابِشَىءٍهُوَ اَعْظَمُ مِنْكَ. سونرا سجده‌یه گئد و 20 دفعه یا رَبِّ ، 7 دفعه یا اَللّهُ، 7 دفعه لاحَوْلَ وَلا قُوَّةَ اِلاّ بِاللّهِ، 10 دفعه ما شآءَ اللّهُ، 10 دفعه لاقُوّةَ اِلاّ بِاللّهِ، و 10 دفعه صلوات دئنه و اؤز حاجتینی آللاهدان ایسته. آند اولسون آللاها كی بو عمل‌لره گؤره یاغیش دانالاری ساییسی‌جن ده حاجتین اولسا, آللاه سنه یئتیرر. شعبان یاریسی گونونون اعمالی بو گون اون ایكینجی ایمامیمیزین مَوْلانا وَ اِمامُنا الْمَهْدِىُّ حضرت حجّة بن الحسن صاحبُ الزَّمان صَلَواتُ اللّهِ عَلَیْهِ وَ عَلى آبائِهِ ویلادت گونودور و او حضرتین زیارتین هر یئرده و هر واختدا اوخوماق و او حضرتین ظهوری اوچون دوعا ائله‌مك توصیه اولوب. مخصوصاً توصیه اولوب سامرانین سردابیندا او حضرتین زیارتی اوخونسون. او حضرتین ظهوری و حؤكمرانلیغی موسلّمدیر و اودور كی یئر اوزون عدالتله دولدوراجاق نئجه‌كی ظولم ایله دولوبدور.

تبریزین شهرداری موزه‌سینده «آذربایجانین طنز آتاسی» تالاری آچیلدی Təbrizin bəldiyyə müzeyində «Azərb

آذربایجان مطبوعات و طنز آتاسی‌نین وفاتی‌نین ایل دؤنومو عرفه‌سینده, اوستاد حمید آرش آزاد تالاری تبریزین شهر و شهردارلیق موزه‌سینده آچیلدی. مهرین گوزاریشینه گؤره, روزنامه‌چی, موترجیم, طنز یازان, ناغیل یازان و هونرمند رحمتلیك اوستاد آرش آزادین یادیگارلاری عاییله‌سی طرفیندن تبریزین شهر و شهردارلیق موزه‌سینه اهدا اولوب كی همشهریلر و تبریز و آذربایجان هونر و تاریخینی سئونلرین گؤروش معرضینده اولسون. بو تالاردا اوستادین مجموعه اثرلری (چاپ اولان و ترجومه اولان كیتابلار), تقدیرنامه‌لری, ال یازیلاری و او رحمتلیگین قدیمی عكسلری نوماییشه قویولوب. رحمتلیك اوستاد حمید آرش آزاد 1327-جی ایلین دی آیی‌نین 4-ده تبریز كوچه‌باغ دربندینین كوره‌باشی محله‌سینده دونیایه گلمیشدی. او جیدّی اولاراق روزنامه‌چیلیگی 1369-جو ایلیندن فروغ آذربایجان روزنامه‌سیندن –كی سونرالار آدی مهدآزادی‌یه چئوریلدی- باشلادی و هابئله آیری روزنامه‌لرله همكارلیقدان سونرا 1379-جو ایلیندن رحمته گئده‌نه‌ قدر (1389) امین روزنامه‌سی‌ایله همكارلیق ائله‌دی. اوستاد حمید آرش آزاد هابئله 1374-جو ایلیندن «گل آقا» مؤسیسه‌سی‌ایله همكارلیغا باشلادی و اؤز طنز اثرلرینی شعر و نثر صورتده «گل آقا» هفته‌لیگی و «اوشاقلار . . . گل آقا» آیلیغیندا چاپ ائتدیردی. او گل آقادا «داییمی همكارلار»ین بیریدی كی داییمی و جیدّی همكارلیغی واریدی. و اثرلری بو آدلارلا چاپ اولوردو: «گول اوْغلان»، «قیزیلباش»، «طوطی بالاسی»، «بیگلر بیگی»، « تبریزلی وروجك »، «كوله لئیلك»، «خان‌دایی»، «كوره‌باشی اوشاغی»، «آراز» و... او بیرینجی یازیچی‌ایدی كی «گل آقا»-دا توركی دیلینده طنز شعر یازدی. اوستاد حمید آرش آزاد اعتماد ملی روزنامه‌سیله‌ده همكارلیغی واریدی. اوستاد آرش آزاددان ایندیه‌قدر بو ترجومه كیتابلار چاپ اولوب: «تورپاق دلیسی» طالب آب آیدینین اثری, «یاغی» یاشار كمالین اثری, «قانلی دره قوردلاری» دورسون چاملیجانین اثری, و «آلفا سیّاره‌سی‌نین موسافیرلری» امیل پتایانین اثری و اونلاردان علاوه میرزه علی اكبر صابیرین «هوپ هوپ نامه»سینی كرئیل الیفباسیندان كؤچوروب چاپا یئتیریب. اوستادین توركی و فارسی شعرلریندن «جیزیغیندان چیخما بالا» و «جولو- جولویه قالمادی» كیتابلارینا ایشاره ائتمك اولار. ایندی‌ده اونلارجا طنز ناغیل و ایكی میندن چوخ قطعه سیاسی-ایجتیماعی طنز شعر چاپ اینتیظاریندادیر. اوستادین سون كیتابی "اوخو آت یایین گیزلت!" آدی‌ایله 1390-دا چاپ اولدو. او اؤز عصری‌نین آدلیم و مطرح یازیچیلار و شاعیرلری ایله ایرتیباطی واردی كی او جمله‌دن بونلاری آد آپارماق اولار: رحمتلیك اوستاد یحیی شیدا ، رحمتلیك كیومرث صابری ، رحمتلیك عمران صلاحی ، ابراهیم افشار و آیریلاری. 1377-جی ایلینده شرقی آذربایجان فستیوالیندا  و بیر دفعه‌ده 1384-جو ایلده زنجان فستیوالیندا زنجان, اردبیل, شرقی و غربی آذربایجان اوستانلاری‌نین طنزچیلر ایچینده بیرینجی مقامی اله گتیرمیشدی. و نئچه سراسری طنز, شعر, مقاله و جدول ساحه‌لریننده یوخاری مقاملار گتیرمیشدی. هابئله 1389-جو ایلین تیرینده اؤلكه‌نین شیمال غرب مطبوعات و خبرگوزاریلر فستیوالیندا, اوستاد حمید آرش آزاد بو فستیوالین باش مقاله ساحه‌سی‌نین بیرینجی روتبه‌سین اله گتیرماق ضیمنینده, ایللر بویو روزنامه‌چیلیك یولوندا چكدیگی زحمتلره گؤره بیر آغ‌ساققال و تجروبه‌لی كیمی تجلیل اولدو. او رحمتلیك نهایتده 35 ایل هونر و فرهنگ زمینه‌سینده چالشماقدان سونرا 1389-جو ایلین موردادین ایرمی اوچونده ناخوشلوق اثرینده دونیایا گؤز یومدو.

اؤزونو ایبراز ائله, آما سیرتیق اولما Özünü ibraz elə, amma sırtıq olma

فرض ائدین یاخین دوستوز كی سیزه سؤز وئریب دقیقاً فیلان ساعتده سیزله گؤروشه, دلیلسیز و خبرسیز, قرار یئرینه گلمه‌یه و یا چوخ یوبانا و بو ایشی همیشه گؤره, سیزن عكس‌العملیز نه اولار؟ ایندیه‌ قدر بونا فیكیرلشمیسیز كی حیات یولداشیز همیشه سیزه زور دئیه‌نده و یا اؤزگه‌لرین یانیندا سیزی دلیلسیز یئره تحقیر ائدنده, سیز اعتیراض یئرینه بیر آز دا اونو تعریفله‌ییرسیز. بو عملیزین عیلّتینه دوشونموسوز؟ شاید دینمه‌مزلیگیزی اؤز جئنتئلمن اولماغیزا حمل ائدیبسیز. و یا شاید بو ساكیتلیغیزدان خوشوز گلمیر آما بیلمیرسیز نه ائده‌سیز؟ «اؤزونو ایبراز ائله‌مك» ایرتیباط قورماغین یاخشی یوللارینداندیر. اؤزونو ایبراز ائله‌مك سیرتیق اولماق معناسیندا دئییل. اؤزگه‌نین حقّین آیاقلاماق‌دا دئییل. زور دئماق و ساواشماق‌دا دئییل. اؤزونو ایبراز ائله‌مك یعنی بو كی اؤز گوجلر و باشاریقلارینی گؤرسه‌ده‌سن. سیز مؤحكم و قاطع جواب وئرنده, حقیقتده اؤزوزو ایبراز ائدیبسیز. بو مورید ده غلط فیكیرلره باخمایاراق, اؤزونو ایبراز ائله‌مك, ایسته‌دیكلرینی هر نه‌یین باهاسینا اله گتیرمك معناسیندا دئییل. فیكیرلری آیدین, موستقیم و صلاحیّتلی صورتده دئمك, اؤز فیكیر و حیسّلرینه ارزیش قاییل اولماق, اؤزونه عیزّت و حؤرمت قاییل اولماق و اؤز گوج و ضعف نوقطه‌لری تانیماغا, اؤزونو ایبراز ائله‌مك دئییلیر. عاییله‌نین نوعی و فرهنگی افرادین اؤزلرینی ایبراز ائله‌مكلررینه چوخ تأثیری وار. عاییله بیرینجی و ان اساس منبعدیر كی اوشاق اوردا داورانیشلارین چوخونو آتا آناسیندان اؤرگه‌شیر, اؤزونو ایبراز ائله‌مك, عاییله‌دن و ائودن باشلایا بیلر. معمولاً عضولری‌نین رابیطه‌لری سالیم و موستقیم اولان عاییله‌لر -كی مثلاً اوشاق راحات سوروشا بیلر كی «آتا بویون نه اولوب؟ چوخ حیرصلی‌سین»,- ائله عاییله‌لر‌دیلر كی اونلاردا اوشاقلار اؤزلرینی ایبراز ائله‌مگه فورصتلری اولار. عكسینه او عاییله‌لرده كی اوشاقلار آتا آنادان قورخورلار, داها اؤزونو ایبراز ائله‌مگه مئیدان یوخدور. عاییله‌دن سونرا, جامیعه‌لرین, اؤزونو ایبراز ائله‌مگه موختلیف تأثیری اولار. ایمكانی وار بیر جامیعه‌ده فیكیرلشمه‌میش سؤزه قولاق آسماق و ال آیاغی باغلی اولماق ارزیش ساییلا. بئله بیر موقعیتده حیسلری بیان ائله‌مك و اؤزونو ایبراز ائله‌مگین معناسی اولماز. عكسینه بیر جامیعه‌ده كی اؤز حقّینی تانیماق و اوندان دیفاع ائتمك و اونا ال تاپماغا چالیشماق ارزیش ساییلا, بئله بیر جامیعه‌ده اؤز حقّیندن دیفاع ائدن اینسان و حیسّلرین صادیقانه ایبراز ائدن شخص, اؤزگه‌لرین‌ده حقّینی آیاقلاماز. اؤزوزو ایبراز ائله‌مك باعیث اولار كی اؤزوزله راحت اولاسیز و آیریلارینا دا ایمكان وئره‌سیز كی سیزله راحاتراق رفتار ائده‌لر. ان غنی و سالیم صمیمی رابطه, ایكی جورأتلی شخصین آراسیندا اولار. اؤزوزو ایبراز ائله‌مك اوچون گرك بیر اینسان كیمی بعضی حقلریزی تانیاسیز: -          سیزین حقّیز وار سیزینله احتیراملی رفتار اولا. سیز ده گرك آیریلارینا احتیرام قویاسیز. -          سیزین حقّیز وار یاشاییشیزدا موستقیل تصمیم توتاسیز, آما كاریخمایین؛ سیزین مشورته احتیاجیز وار آما نهایتده بو سیزسیز كی تصمیم توتمالیسیز. -          سیزین حقّیز وار آیریلاریندان اینتیظاریز اولسون, آما اینتیظارلاریز گرك منطیقلی و اونلارین الیندن گلن میقداردا اولا. -          سیزین حقّیز وار آیریلارین منطیقسیز ایستكلرینی ردّ ائلیه‌سیز. قرار اولسا كی هر غیر معقول ایستگی یئرینه یئتیره‌سیز, داش داش اوستونده دایانماز. -          سیزین حقّیز وار آیریلار طرفیندن گلن ایستكلری گؤتور قوی ائلیه‌سیز. پس اونلارین حقّی یوخدور كی سیزی تلسدیرسین. -          سیزین حقّیز وار حیسّلریزی بیان ائلیه‌سیز. سیزین حیسّلریز منفی اولا یا موثبت, گرك ایبراز اولا. -          سیزین حقّیز وار ایشتیباه ائلیه‌سیز, البته ایشتیباه ائله‌مه‌سیز داها یاخشی اولار. عین حالدا موغایات اولمالیسیز كی ایشتیباهلاریز اؤزگه‌یه صدمه وورماسین. «یوخ» دئمك, اؤزونو ایبراز ائله‌مگین موهوم ابزاری هامیمیز اوچون ائله واختلار اولوب كی «یوخ» دئمك بیزه چتین اولوب. «یوخ» دئمگه گوجوموز چاتماسا و  اؤزگه‌لرین منطیقسیز ایستكلرینی ردّ ائلیه بیلمه‌سك, موختلیف موقعیتلرده بیزی چتین شراییطه سالار. «یوخ» دئمگه گوج چاتماماغین موختلیف عیلتلری وار. شاید «یوخ» دئیه‌نده سیزه گوناه احساسی ال وئریر, شاید قورخورسوز دوستلاریزی الدن وئره‌سیز و شاید ده «یوخ» دئمگی بیر جور تكبّور حئسابلیرسیز. بونونلا بئله بیلمه‌لیسیز كی «یوخ» دئمك و آیریلارین منطیقسیز ایستكلرین ردّ ائله‌مك سیزین حقّیزدیر, مخصوصاً او زامان كی بو ایستكلر سیزین اوچون منفی اثرلری اولا. پس موناسیب صورتده «یوخ» دئمك اوچون بو یوللارا عمل ائدین: 1.      جوابیزی ائشیده‌ بیلینن بیر «یوخ»لا باشلایین. 2.      اؤزوزو «یوخ» دئمك اوچون توجیه ائله‌مه‌یین. 3.      اؤزوزه دئیین كی «یوخ» دئمگه حقّیز وار. 4.      «یوخ» دئیه‌ندن سونرا مونتظیر اولمایین كی سیزین فیكریزی دگیشسینلر. 5.      یادیزدا اولسون كی سیز او شخصین ایستگینه یوخ دئمیسیز, نه اینكی اونون اؤزونه. 6.      «یوخ» دئمك مسئولیتینی بوینوزا آلین و اونلاری سیزدن منطیقسیز ایستكلرینه گؤره موقصیر بیلین. 7.      «هن» یا دا «یوخ» دئمگه آرتیق ایطیلاعاتا احتیاجیز اولسا, طرفدن ایسته‌یین كی سیزه آرتیق ایطیلاعات وئرسین.