حظّچیلیك مكتبی
یازار : میرزه عبدالصمد ملکی | بؤلوم : اجتماعی
+0 به یه ن
حظّچیلیك مكتبی
حظّچیلیك مكتبی «شخصی حظّی» اخلاق لازیملیغی و دَیَری‌نین منشأی بیلیر و قبول ائله‌دیگی اخلاقی حؤكملری اونون اساسیندا ثابیت ائدیر. اخلاقلی بیر ایش گؤرَنین، آپاردیغی حظّین، ذاتی دَیَری وار و آیری سؤزله، سعادت هر شخصین داها چوخ حظّ آپارماسیندان عیبارتدیر.
بو اخلاق مكتبی‌نین تابعلری، حظّین ذاتی دَیَره مالیك اولماسینی اینسانین طبیعی اولاراق حظّ آختارماسی و آغریدان قاچماسی ایله ثبوت ائتگه چالیشیبلار. هر فرد اوچون حظّ و سئوینج طلب اولوناندیر و هئچ كس اؤزو اوچون آغری و ناراحتلیق ایسته‌مز. بونا گؤره حظّین مطلوبیّت و ذاتی دَیَری‌نین منشأی، فرد اؤزودور.
نتیجه‌ده اخلاقلی فاعیله حظّلی اولان ایشین، دَیَری وار و اونا آغریسی اولانین، دَیَری یوخدور. هابئله بیر یئره ییغیشامایان و بیر-بیریله ضیدّیتلی اولان ایشلرین هر هانسی‌نین، اونون اوچون داها چوخ حظّی و یا داها آز آغریسی اولسا، او ایشین سئچیلمگه دَیَری وار.
چوخ ساده لؤح باخیشدا، شخصی حظّ، حاضیر حظّده خولاصه اولور. بو باخیشا گؤره، شخص بیر ایشین دَیَرینی بیلمك اوچون، او ایشین ایندی اونون اوچون حظّلی و یا آغریلی اولماغینا باخمالیدیر و بو ایشین گله‌جكده اولان حظّ و یا آغریسی‌نین، اونا دَیَر قویماقدا تأثیری یوخدور. آما اینسانین طبیعی اولاراق حظّ دالیسیجان اولماسینی قبول ائتسك‌ده حظّی فقط حاضیر حظّه مخصوص ائتمگیمیز دوغرو دئییل.
حظّ مطلوب اولورسا، اَن چوخ حظّ داها مطلوب اولار، ایستر حاضیر حظّ اولسون و یا گله‌جكده اله گلن حظّ اولسون. بلكه داها اوزون و داها شیدّتلی حظّ، بیر آز آغری‌یا دؤزماقلا اله گله بیلر و بلكه آز و حاضیر حظّلر اوزون آغریلارا سبب اولا بیلر.
اینسان عقل صاحیبی اولدوغو اوچون قارشیدا اولان حظّلر و آغریلارا دوشونه بیلر و داها چوخ حظّلی اولان ایشی سئچه بیلر. میثال اوچون ناخوشلوغو شیدّتلندیرن دادلی یئمكلرین سایی چوخدور. بعضاً ده موختلیف حظّلری الده ائتمك اوچون ضیدّیّت یارانار و اونلاری بیر یئرده الده ائتمك اولماز. میثال اوچون تنبللیكله علم اؤیرنمك حظّلری بیر یئره ییغیشمازلار.
بونا گؤره حظّچیلرین چوخو هر ایشین دَیَرینی موعیّنلشدیرمك اوچون، اوندان حاصیل اولان حظّ و آغرینی، و دَیَرلرین آراسینداكی موقاییسه‌ده، اوندان علاوه، حظّلرین موقاییسه‌سی و اوستون حظّی موعیّنلشدیرمگی لازیم بیلیبلر. هابلئه اونلار ایشلردن حاصیل اولان حظّ و آغرینی موحاسیبه ائتمك اوچون بیر پارا معیارلار وئریبلر و بو یوللارلا موختلیف ایشلرین دَیَرینی موعیّنلشدیرمه‌نین مومكون اولماسینی ایدّعا ائدیبلر.
بو معیارلارا اساساً هر فرد، عمللرین ایندی و گله‌جكده‌كی بوتون حظّ و آغریلارینی نظرده آلماقلا، اوست-اوسته داها چوخ حظّلی اولان ایشی و یا هئچ اولماسا داها آز آغریسی اولان ایشی سئچمه‌لیدیر و بو ایشین دَیَری داها چوخدور.
حظّچیلرین بعضیسی، حظّین ذاتی دَیَرینه تأكید ائله‌سه‌لر ده، حظّلرین هامیسینی برابر بیلمیرلر، بلكه نفس ساكینلیگی كیمی روحی حظّلری شهوت و جیسمی حظّدن یوخاری بیلیرلر.
حظّچیلر، حظّین طبیعی اولاراق اینسان اوچون دَیَرلی اولدوغونا تأكید ائله‌مكله، اونون دَیَرینی طبیعی اولماسینا گؤره ذاتی بیلیرلر.
اونلار، طبیعی دَیَر دئیَنده، اینسان طبیعیتی‌نین طلب ائتدیگی دَیَری نظرده توتورلار. آیری سؤزله، حظّچیلر اینسانین طبیعتینی حظّ آختاران و حظّین هئچ وضعیّتده اینسان اوچون نا مطلوب اولماسینا اینانیرلار. بونا گؤره حظّین طبیعی دَیَره مالیك اولماسینی دئییرلر.
البته عوام اینسانلار دونیا و مادّی مسأله‌لرله مشغول اولدوقلاری اوچون، حظّدن، جیسمی و مادّی حظّی تلقّی ائدرلر.
پیغمبر حضرت ابراهیمین (ع) ایتمیش شهری تاپیلدی
یازار : میرزه عبدالصمد ملکی | بؤلوم : تاریخ
+0 به یه ن
پیغمبر حضرت ابراهیمین (ع) ایتمیش شهری تاپیلدی
peyğəmbər həzrəti ibrahimin itmiş şəhəri tapıldı
ingiltərəli arxeoloqlar iraqda apardıqları qazıntılar nəticəsində nəhəng
bir kompleksin qalıqlarını aşkar ediblər. ans press-in məlumatına görə,
arxeoloqlar nasiriyə şəhəri yaxınlığında qazıntı aparıblar.
kompleksin 4500 illik şumer mədəniyyətinin paytaxtı olan antik ur şəhərinin
qalıqları olduğu iddia edilir. bu qalıqların azı 4000 illik olduğu və həzrəti
ibrahimin yaşadığı dövrə aid olduğu bildirilir.
mançestr universitetinin arxeoloqlarının üzə çıxardığı kompleks təqribən bir
futbol stadionu böyüklüyündədir. qrupun rəhbəri stüart kampbell eradan əvvələ
aid komplekslərin nadir hallarda tapıldığını və bu qazıntının o dövrə aid bir
çox məlumatı üzə çıxarmağa köməkçi olacağını deyib.
گؤزل اخلاق؛ ایسلامی حیاتین محوری
یازار : میرزه عبدالصمد ملکی | بؤلوم : دین
+0 به یه ن
گؤزل اخلاق؛ ایسلامی حیاتین محوری
ایسلام دینی حیاتین محورینی گؤزل و سئویملی اخلاق تانیتدیریب. ائله بونا گؤره‌ده قورآندا حضرت محمد (ص)بوتون اینسانلار اوچون اخلاق نمونه‌سی تانیتدیریلیب.
ایسلام، حیاتین بوتون آنلارینا و مرحله‌لرینه اخلاقی تعلیملری وار. اخلاق و اونون بوداقلاری باره‌ده چوخلی روایتلر و آیه‌لر وار. او جومله‌دن قورآن كریم قلم سوره‌سی‌نین دؤردونجو آیه‌سینده بویورور: «ائی محمد (ص) سنین گوجلو و بؤیوك اخلاقین وار». هابئله احزاب سوره‌سی‌نین ایرمی بیرینجی آیه‌سینده بویورور: «پیغمبر، سیزین اوچون یاخشی اولگو و نمونه ساییلیر».
هر موسلمانا نَبَوی اخلاقی تانییب او حضرتین سیره‌سینی اوخویوب اونلار بویوران زادلارا عمل ائله‌مه‌سی و خودبینلیك، تكبّور، یالان كیمی اخلاقسیزلیقلاردان اوزاق اولماسی واجیبدیر.
اخلاق هر جامیعه‌یه واجیب اولان ملزمه‌لردن ساییلیر. اونون واجیبلیگینه اوچ سبب سایماق اولار:
- فردین روحی ساكینلیگی
- ایجتیماعی ساكینلیك
- ایلاهی مطلوب كمالا چاتماق
اخلاق، روحوموزو ساغلاملادیر و حیاتین اَن گؤزل شكلینی بیزه اؤیرَدیر. اخلاق، رذیلتلری بیزه تانیتدیریب اونلاردان اوزاق گزمگی بیزه گؤستریر. اخلاقدا روحی صحّتیمیز رعایت اولوب ساكینلیك حیسّی بیزی بورویور.
اخلاقین ایجتیماعی فایدالاری‌دا آز دئییل. غیبت ائله‌مه‌ین اینسان، پخیللیك ائله‌مه‌ین اینسان اؤزو ساكینلیكده اولماقدان علاوه، جامیعه‌نین‌ده ساكینلیك و تمیزلیگینه كؤمك ائدیر.
آما اخلاقین اَن موهیم فایداسی، اینسانین آللاه وئرگی استعدادلاری‌نین چیچكلنمه‌سیدیر. اینسان یاخشی عمللری فقط آللاها گؤره ائله‌سه، داها كیریخماق احتیمالی قالماز و بوتون ایشلری دوز یؤنه یؤنه‌لر. بیر اینسانین اخلاقی بو سطحده اولورسا او، كمالا طرف اوجالار و اینسان خیلقتی‌نین هدفی تحقّوق تاپار.
ایكی اخلاقی حدیث
پیغمبر بویوروب: «یاخشی اخلاق، گونش بوزو اریدن كیمی، گوناهی اریدر. پیس اخلاقدا بالی دوز فاسید ائدن كیمی، عمللری آرادان آپارار. (دیلمی‌نین ارشاد القلوبی ، ص 133)
ایمام باقر (ع) بویوروب: « قیامت گونو منه اَن یاخین فرد، هامیدان چوخ دوز دانیشان، امانتی یاخشی ساخلاییب تحویل وئریب عهدینه وفالی اولان و اخلاق باخیمیندان هامیدان یاخشی اولان شخصدیر».
(مفیدین امالی‌سی، مفید، ص 41)
سویوق سو ایله چای دمله‌یین
یازار : میرزه عبدالصمد ملکی | بؤلوم : تكنولوژی
+0 به یه ن
سویوق سو ایله چای دمله‌یین
ایختیراعچیلار
تازالیقدا سویوق سویو داغ سویا چئویرن بیر دستگاه دوزلدیبلر.
سویو قیزدیرماغا چوخلو انرژی لازیم اولور و بو مسأله عاییله‌لره یوخاری خرجلر تحمیل ائلیر. آما بو خرجین آزالدیلماسینا آز دیقّت یئتیریلیب. تازالیقدا موحقیقلر سویوق سویو قیزدیرماق اوچون تازا بیر وسیله دوزلدیبلر.
بو وسیله سویوق سوداكی انرژینی آلیب همن انرژی ایله سویو قیزدیریر. بو محصولون دوزلدنلری‌نین دئدیگینه گؤره، 21 درجه سانتیگراد حرارتی اولان شهر سویو بو وسیله‌یه داخیل اولماقلا حرارتی آلینیب مخزنده‌كی سویون قیزدیرماسینا ایستیفاده اولور.
بو وسیله سویوق سو مخزنینه 76 لتیر سویون داخیل اولماسیله، 189 لتیرلیك مخزنین سویونو داغلاندیرا بیلر.
شرقی آذربایجان توركیه‌نین ارزروم شهرینه، موناسیب تیجاری شریك اولا بیلر
یازار : میرزه عبدالصمد ملکی | بؤلوم : خبرلر
+0 به یه ن
شرقی آذربایجان توركیه‌نین ارزروم شهرینه، موناسیب تیجاری شریك اولا بیلر
شرقی آذربایجانین اوستانداری دئدی: بیر-بیریمیزین ظرفیّتلریندن داها چوخ ایستیفاده ائله‌مه‌لی‌ییك و شرقی آذربایجان منطقه‌ده اثر قویان بیر نوقطه كیمی ارزروم اوستانینا یاخشی تیجاری شریك اولا بیلر.
فارسین تبریزدن وئردیگی خبره گؤره، تیجاری-ایقتیصادی بیر هیأتین باشیندا توركیه‌نین ارزروموندا سفرده اولان شرقی آذربایجانین اوستانداری احمد علیرضابیگی، سفری‌نین اوّل گونونده نئچه خدماتی-تولیدی مركزدن گؤروشده ارزرومون محلی مقاملاریله گؤروشدو.
شرقی آذربایجانین اوستانداری ارزرومون اوستانداریله گؤروشده ایران و توركیه‌نین موشتركاتینی ایكی طرفلی همكارلیقلارا موناسیب فورصت اولدوغونو دئمكله آرتیردی: شرقی آذربایجان و ارزروم اوستانلاری بو فورصتلردن آیری اوستانلارا نیسبت داها چوخ ایستیفاده ائده بیلرلر.
علیرضابیگی آرتیردی: : بیر-بیریمیزین ظرفیتلریندن داها چوخ ایستیفاده ائله‌مه‌لی‌ییك و شرقی آذربایجان منطقه‌ده اثر قویان بیر نوقطه كیمی ارزروم اوستانینا یاخشی تیجاری شریك اولا بیلر.
ارزرومون اوستانداری صلاح‌الدین اؤزتورك‌ده قاباقكی تَوافوقلرین گئرچكلشمه‌سینه ایكی طرفین هیأتلری‌نین گئت-گلی‌نین ایدامه تاپماسیندان آسیلی بیلدی و تأكید ائله‌دی ایكی طرفلی رابیطه‌لرین ایجرایی اولماسی اوچون قاباقكی تفاهوملره آرتیق دیقّت یئتیریلمه‌لیدیر.
شرقی آذربایجانین اوستانداری و همراه هیأتی سفرین ایدامه‌سینده، بو شهرین شهرداریسینه گئدیب شهردارلا گؤروشوب دانیشدی.
بو گؤروشده شرقی آذربایجانین اوستانداری و ارزروم شهرداری، ایكی طرفلی همكارلیقلارین خصوصاً شهرسالما و شهر خیدمتلری زمینه‌سینده تأكید ائله‌دیلر.
علیرضابیگی مربوطه مودیرلرله بیرلیكده ارزروم اوستانین بؤحران مودیریّتی سیتادیندان‌دا گؤروش ائله‌دی و اونلارین برنامه‌لری و ایمكانلاری‌نین جریانیندا اولدو.
شرقی آذربایجانین تیجاری ـ ایقتیصادی هیأتی ارزروما اولان ایكی گونلوك سفرلرینده ارزرومومون ایقتیصادی فعّاللاریله گؤروشوب تیجاری آلیش-وئریشین چوخالماسینا تأكید ائله‌دیلر.