ابراز تأسف استاندار اردبیل از پخش اخبار به زبان فارسی از صدا و سیما اردبیل
یازار : میرزه عبدالصمد ملکی | بؤلوم : اجتماعی
+0 به یه ن
ابراز تأسف استاندار اردبیل از پخش اخبار به زبان فارسی از صدا و سیما اردبیل
به نقل از:
http://www.farsnews.com/newstext.php?nn=13921130001529
حضرت معصومه‌نین (س) قم شهرینه سفری و ارتحالی
یازار : میرزه عبدالصمد ملکی | بؤلوم : دین
+0 به یه ن
حضرت معصومه‌نین (س) قم شهرینه سفری و ارتحالی
امام صادق (ع) بویوردو: «بو شهرده (قم شهرینده) منیم اوشاقلاریمدان بیر خانیم دنیادان گئده‌جك، اونون آدی فاطمه، موسی‌نین (ع) قیزیدیر كی اونون شفاعتی ایله منیم شیعه‌لریم جنّته گئده‌جكلر.
نه یاخشی كی او كرامتلی خانیمی اهل بیتین دیلی ایله تانیاق.
امام صادق (ع) بویوردو: «اللهین حرمی وار كی مكّه‌دن عبارتدیر. پیغمبرین (ص) حرمی وار كی مدینه‌دن عبارتدیر. امیرالمؤمنینین (ع) حرمی‌ده كوفه‌دیر . . . جنّتین سككیز قاپیسی وار كی اوچو قم شهریندندیر؛ بو شهرده بیزیم اوشاقلاردان بیر خانیم دنیادان گئدر، اونون آدی فاطمه، موسی‌نین (ع) قیزیدیر كی اونون شفاعتی ایله منیم شیعه‌لریم جنّته گئده‌جكلر. [1]
قم شهرینده امامزاده‌لرین چوخو دفن اولوب كی هر بیرینین یوخاری مقاملاری وار. آما اماملاریمیز (ع) فقط موسی بن جعفرین (ع) قیزی‌نین زیارتیندن دانیشیبلار. ائله بو مسأله بو كرامتلی خانیمین یوخاری معنوی مقامی‌نین علامتی ساییلیر.
او كرامتلی خانیمین شخصیّتی باره‌ده نئچه مسأله‌یه دقّت یئتیرمك لازمدیر:
1. قارداشی امام رضانین (ع) مروه مجبوری هجرتیندن سونرا، اونونلا گؤروشمك اوچون مروه طرف یوللانماسی. آما تاریخچیلرین یازدیغینا گؤره، بو سفر باشا چاتمادی و حضرت معصومه (س) ساوه شهرینده خسته‌لندی و قم شهرینه آپاریلماسینی امر بویوردو و ائله بو شهرده ده دنیادان گئتدی. [2]
او حضرتین بو اوزون مسیر و سفرین چتینلیكلرینه و مخصوصاً مأمون حكومتی طرفیندن اولان تهدیدلره رغماً مدینه‌دن مروه حركتی، بو كرامتلی خانیمین سیاسی و اجتماعی شخصیتیندن خبر وئریر.
2 . بو سفرده مریض اولاندان سونرا، و قارداشی امام رضایا (ع) چاتماقدان مأیوس اولاندان سونرا، قم شهری‌نین گله‌جكده‌كی فرهنگی موقعیّتینه گؤره بو شهره آپاریلماسینی امر بویورور كی صفالی حرمی اهل بیت (ع) عاشقلرین مأمنینه چئوریلسین.
بو تصمیم یعنی قم شهرینه گئتمك امری، او حضرتین فرهنگی باخیشا صاحب اولماقلاریندان خبر وئریر.
3. او حضرتین یاشاییشینی مطالعه ائله‌ینده، اونون مشهور لقبلریندن «محدثه»[3] اولدوغونو گؤروروك. او، طاهر اجدادیندان چوخلو روایت نقل ائدیب، هابئله حدیث عالملری‌نین بیر عدّه‌سی او حضرتدن حدیث نقل ائدیبلر. او جمله‌دن «مسلسل فواطم»ـه[4] مشهور اولان خبره اشاره ائدیریك كی او حضرت سندلر سلسله‌سینده وار:
بكر بن احمد قصری امام رضانین (ع) قیزی فاطمه‌دن، او دا امام كاظمین قیزلاری فاطمه (حضرت معصومه) و زینب و ام كلثومدن، و اونلاردا امام صادقین (ع) قیزی فاطمه‌دن روایت ائدیبلر و بو حدیثین سندی حضرت فاطمه زهرایا (س) چاتیر كی بویوردو: غدیر بایرامی گونو، رسول اللهین امرینی یاددان چیخاردیبسیز كی بویوردو: «من كنت مولاه فعلی مولاه».[5]
هابئله بو سلسله سندله آیری بیر روایت كی معراج حدیثینه مربوطدور. [6]
نتیجه‌ده:
1. اماملارین (ع) سؤزلریندن استفاده اولوندوغو كیمی، حضرت معصومه‌نین (س) یوخاری معنوی شخصیّتی وار.
2. او حضرتین یاشاییشیندان بللی اولدوغو كیمی، حضرت معصومه‌نین (س) سیاسی و فرهنگی شخصیّتی‌ده چوخ یوخاری ایدی.
منبعلر:
[1] . قمی، عباس، سفینة البحار، ج 2، ص 376.
[2] . قمی، عباس، همان، ص 376؛ حكیمی، محمد، حضرت معصومه و قم شهری ، معاصر، اسلامی تبلیغات دفتری‌نین انتشارات مركزی ، قم، ایكینجی چاپ، 1376، ص 41 ـ 40.
[3] . محمدحسون؛ ام علی مشكور، اعلام النساء المومنات، اسوه انتشاراتی ، بیرینجی چاپ، 1411 هـ . ق، ص 577.
[4] . قمی، عباس، همان، شیع و فطم سؤزلری.
[5] . شافعی، شمس الدین محمد، اسنی المطالب، مكتبه الامام امیرالمؤمنین، اصفهان، ص 50.
[6] . مجلسی، محمدباقر، بحارالانوار، داراحیاء التراث العربی، بیروت، ج 65، ص 76، ح 136.
جامعه‌میزین رفتارینی دَییشمك لازمدی
یازار : میرزه عبدالصمد ملکی | بؤلوم : اجتماعی
+0 به یه ن
جامعه‌میزین رفتارینی دَییشمك لازمدی
آمارا اساساً، دنیا سطحینده آمریكا اَن خشن اؤلكه ساییلیر و بو اؤلكه‌ده، قتل، تجاوز و سلاحدان استفاده ائله‌مك سایی، چوخ یوخاریدیر. روانشناسلارین نظرینه گؤره، آمریكادا هالیوود فیلملری طریقی ایله خشونت، تشویق و تبلیغ اولونور. دئیه‌سن خشونت آمریكا فیلملرینه تقدّس وئریر. آما بیزیم جامعه‌میزده بو تشویق او قدر ده گوجلو دئییل. بیزیم جامعه‌ده‌كی خشونتین اساس عاملینی جامعه شناسلار، مادّی مشكل‌لر و روح دوشگونلوگو بیلیرلر. خشونتین ریشه‌سینی، انسانین محیطده‌كی خطرلر و تهدیدلرین قاباغیندا مبارزه ائله‌مگینده آختارماق اولار كی اونون رفتارینا تأثیر قویور.
حددن آرتیق سیگنال چالیریق
خیاباندا گؤردوكلریمیز بیزی بیر حدّه چاتدیریر كی پرت اولماغی، اؤزوموزده طبیعی بیر خصلت اولدوغونو دوشونوروق و نظریمیزه ائله گلیر كی غضبلنمه‌دن بیر ساعت ائودن ائشیگه اولا بیلمیریك.
بعضی عالملرین نظرینه گؤره، خشن اولماق انسانین حیوانی خصلتلریندن بیریدیر. هر كس غضبلنه بیلر آما انسانلیق و اسلام فرهنگینده اونو كنترل ائله‌مگی اؤیرنیریك. غضبین كنترول اولا بیلینمه‌سی، شخصین دنیایا گلدیگی و تربیت تاپدیغی محیطه باغلیدیر. اهل عیالی ایله خشن رفتار ائدن شخص، خشونتی اؤز اوشاقلارینا منتقل ائلر.
بیر ساده رفتارلا جامعه‌نین خشونت اندازه‌سینی بیلمك اولار. بیزیم جامعه‌ده اروپالی‌لارا نسبت چوخ-چوخ سیگنالدان استفاده اولونور. بیر حالداكی سیگنال فقط خطر زمانلارینی خبر وئرمكدن اؤترودور. سیگنالدان حددن آرتیق استفاده ائله‌مگین سببی، غضبی نشان وئرمكدن اؤترودور. محكمه‌لرده‌كی ووروشما پرونده‌لری‌نین یوخاری ساییسی‌دا، جامعه‌میزده‌كی خشونتین چوخلوغوندان خبر وئریر.
جنگ تجربه‌سی اولان جامعه‌لرده خشونت چوخ یوخاری حدده رواج تاپار و سونراكی نسل‌لره ده انتقال تاپار. بو مسأله ترمیم اولماسا جامعه‌یه جبران اولونماز و اوزن مدتلی صدمه‌لر وورا بیلر.
بیزیم جامعه‌میز، تاریخ بویو هر طرفدن حمله‌یه معروض قالیب. ائله بو مسأله ده خشونتین گوجلنمه‌سینه سبب اولوب. اونون قاباغینی آلماق اوچون اوشاقلاریمیزا كیچیك یاشلاردان، خشونتی آزالتماغی و غضبی كنترل ائله‌مگی اؤیرتمه‌لی‌ییك. اونلارا اؤیرتمه‌لی‌ییك كی هم كلاسلاری ایله، هم وطنلری ایله، آیری انسانلارلا خشونتلی رفتار ائله‌مه‌سینلر، چونكی اونلارین دا اَن آزیندان بیزیم قدر یاشاماق حقلری وار.انگلیس و ایرانین مستقیم رابطه‌لری تازادان باشلادی
یازار : میرزه عبدالصمد ملکی | بؤلوم : خبرلر
+0 به یه ن
انگلیس و ایرانین مستقیم رابطه‌لری تازادان باشلادی
انگلیس و ایرانین رابطه‌لری اسفندین اوّلیندن مستقیم صورتده تازادان باشلاندی. خارجه وزارتین آمریكا و اروپا معاونی، مجید تخت روانچی، ایسنایا دئدی:
اسفندین اوّلیندن انگلیس و ایرانین رابطه‌سی غیر مقیم كاردار سطحینده و حافظ منافع اولمادان، باشدان باشلاندی.
او آرتیردی: حافظ منافع دفترلری‌نین باغلانماسی ایله ایكی اؤلكه‌نین رابطه‌سی‌نین مسئولیّتی غیر مقیم كاردارلارا تاپیشیریلدی.
روانچی دئدی: انگلیس و ایران پرچملری اسفندین اوّلیندن بو اؤلكه‌لرین سفارتخانالاریندا اسمگه باشلایاجاق.
1390-جی ایلین آذر آیی‌نین 8-ده بیر عدّه معترضین، انگلیسین تهرانداكی سفارتینه داخل اولدوغوندان سونرا، انگلیس بیر طرفلی اولاراق رابطه‌لری قطع ائله‌دی. اوندان سونرا بو اؤلكه‌نین دولتی، دیپلوماتلارینی ایراندان خارج ائله‌مگیندن خبر وئردی و ایرانلی دیپلوماتلاردان 48 ساعت ایچینده انگلستانی ترك ائله‌مكلرینی ایسته‌دی.
ایكی اؤلكه‌نین سفارتی باغلاناندان سونرا، سوئدین تهرانداكی سفارتی، انگلستانین حافظ منافعی، و مقابلده عمانین لندنده‌كی سفارتی ایرانین حافظ منافعی اولدو.
ایرانین تازا دولتی ایش اوستونه گلندن سونرا انگلستانین نخست وزیری روحانی‌یه تبریك نامه ضمنینده رابطه‌لرین یوكسلمه‌سینه علاقه‌سینی بیلدیردی. اوندان سونرا ایكی اؤلكه‌نین خارجی ایشلر وزیرلری، محمد جواد ظریف و ویلیام هیگ، سازمان مللین عمومی مجمعینده گؤروشوب اؤز معاونلرینی بو مسأله‌یه مأمور ائله‌دیلر.
امام رضانین (ع) دیلیندن پیغمبرین (ص) توصیفی
یازار : میرزه عبدالصمد ملکی | بؤلوم : دین
+0 به یه ن
امام رضانین (ع) دیلیندن پیغمبرین (ص) توصیفی
قرآن كریم دفعه‌لرله پیغمبردن آد آپاریب و اونو عظیم اخلاق صاحبی، رئوف و رحیم، حسنه اسوه و . . . آدلاندیریب. ائمه ده (ع) پیغمبریمیزین خصوصیّتلری باره‌ده دَیَرلی سؤزلر دئییبلر. او جمله‌دن امام علی بن موسی الرضا(ع) پیغمبرین شخصیتی و او حضرته احترام قویماغین واجبلیگی باره‌ده بویوربلار: «اذا سمیتم الولد محمداً فاكرموه و اسعوا له فی المجالس و لا تقبحوا له وجهاً؛ بیر اوشاغین آدینی محمد قویدوغوزدا، اونو عزیزله‌یین و مجلسلرده اونا یئر وئرین و اونونلا قباحتلی اوز به اوز اولمایین». (1)
او حضرت آیری یئرده بو باره‌ده بویوربلار: «ما مِن مائدةَ وُضِعَتْ فَقَعَدَ عَلَیها مَن اسمه محمّدٌ أو أحمدُ إلاّ قُدِّس ذلكَ المنزِلُ فی كُلِّ یَومٍ مَرَّتَین؛ احمد و یا محمد آدیندا اونون باشیندا اولمایان هئچ سفره آچیلماز، مگر او ائو گونده ایكی دفعه تقدیس اولار».(2)
امام رضا (ع) هابئله محمد آدی‌نین عظمتی و بركتی باره‌ده بویوروب: «لا یَدْخُلُ الفَقْرُ بَیْتاً فِیه اسمُ محمّدٍ أو أحمد أو علیٍّ أو الحسنِ أو الحسینِ أو جَعْفَرَ أو طالب أو عبداللهِ أو فاطمة مِنَ النساء؛ بو آدلار اولان ائوه یوخسوللوق داخل اولماز: محمد، احمد، علی، حسن، حسین، جعفر، طالب، عبدالله، و خانیملاردان فاطمه».(3)
امام رضا(ع) پیغمبرین (ص) و اونون اهل بیتی‌نین (ع) مقامی باره‌ده او حضرتین دیلی ایله بئله یویورور: «قال رسول الله صلی الله علیه و آله: یا علی، خلق الناس من شجر شتی، و خلقت أنا و أنت من شجرة واحدة، أنا أصلها، و أنت فرعها و الحسن و الحسین أغصانها... فمن تعلق بغصن من أغصانها أدخله الله الجنة..؛ رسول الله (ص) بویوردو: ای علی! جماعت مختلف آغاجلاردان یارانیبلار آما من ایله سن بیر آغاجدان یارانمیشیق. من او آغاجین ریشه‌سی، سن گؤوده‌سی، حسن و حسین اونون بوداقلاری و سئونلریمیز اونون یارپاقلاریدیلار. هر كس او آغاجین بوداقلاریندان بیرینه ال آتا، الله تعالا اونو جنتّه داخل ائلر». (4)
امام رضا (ع) آیری بیر روایتده پیغمبره نئجه صلوات گؤندرمك باره‌ده بویوربلار. ابن اَبى‌نَصْر دئییر: امام رضانین (ع) محضرینه عرض ائله‌دیم: نمازدان سونرا رسول الله-ا نئجه صلوات گؤرندرمك لازمدیر؟ جوابدا بویوردو كی دئیَرسن: «اَلسَّلامُ عَلَیْكَ یا رَسُولَ اللّهِ وَرَحْمةُ اللّهِ وَبَرَكاتُهُ اَلسَّلامُ عَلَیْكَ یا مُحَمَّدَبْنَ عَبْدِاللّه اَلسَّلامُ عَلَیْكَ یا خِیَرَةَاللّهِ اَلسَّلامُ عَلَیْكَ یاحَبیبَ اللّهِ اَلسَّلامُ عَلَیْكَ یا صِفْوَةَ اللّهِ اَلسَّلامُ عَلَیْكَ یا اَمینَ اللّهِ اَشْهَدُ اَنَّكَ رَسُولُ اللّهِ وَاَشْهَدُ اَنَّكَ مُحمَّدُ بْنُ عَبْدِ اللّهِ وَاَشْهَدُ اَنَّكَ قَدْ نَصَحْتَ لاِمَّتِكَ وَجاهَدْتَ فى سَبیلِ رَبِّكِ وَعَبَدْتَهُ حَتّى اَتاكَ الْیَقینُ فَجَزاكَاللّهُ یا رَسُولَ اللّهِ اَفْضَلَ ما جَزى نَبِیّاً عَنْ اُمَّتِهِ اَللّهُمَّ صَلِّ عَلى مَحَمِّدٍ و آلِ مُحَمِّدٍ اَفْضَلَ ما صَلَّیْتَ عَلى اِبْراهِیمَ وَ آلِ اِبْراهیمَ اِنَّكَ حَمیدٌ مَجیدٌ.
سنه سلام اولسون ای رسول الله و الله-ین رحمت و بركتلری. سنه سلام اولسون ای عبدالله اوغلو محمد. سنه سلام اولسون ای اللهین سئچیلمیشی. سنه سلام اولسون ای اللهین حبیبی. سنه سلام اولسون ای اللهین سئچیلمیشی. سنه سلام اولسون ای اللهین امینی. شاهد گئچیرم كی سن اللهین گؤندرمیشی‌سن و شاهد گئچیرم كی سن عبدالله اوغلو محمدسن و شاهد گئچیرم كی سن اؤز امّتین اوچون خیرخواه ایدین و الله یولوندا جهاد ائله‌ییب یقین (اؤلوم) سنه گلینجه اونو عبادت ائله‌دین. ای رسول الله، الله سنه اجر وئرسین، امتی طرفیندن پیغمبرلرینه وئریلن اَن یاخشی اجر. الله‌یم! محمد و اونون اهلینه، ابراهیم و اهلینه گؤندردیگین اَن یاخشی سلامدان گؤندر. البته كی سن حمید و مجیدسن».(5)
هایئله امام رضا (ع) بویوروب: «اِنّا اَهلُ بَیْتٍ نَرى وَعدَنا عَلَینا دَینا كَما صَنَعَ رَسولُ اللّهِ صلى الله علیه و آله؛ بیز اهل بیت وئردیگیمیز وعده‌لری اؤزوموز اوچون بورج و دین حسابلاریق، رسول اللهین ائله‌دیغی كیمی».(6)
هابئله امام رضا (ع) رسول اكرمین (ص) امامت و ولایت مقامی‌نین وصفینده بویوروب: «امامت، ابراهیم نسلینده قالیردی و بیر-بیر نسلدن نسله اونو ارث آپاریردیلار. اسلام پیغمبری (ص) اونو ارث آپاراندا الله تعالا بویوردو: «انّ اولی الناس بابراهیم للذین اتبعوه و هذا النبی والذین آمنوا والله ولی المؤمنین؛ البته ابراهیمه اَن یاخین اولان انسانلار، اونو تبعیّت ائدنلر و [هابئله] بو پیغمبر و ایمان گتیرنلر و الله، مؤمنلرین ولیسیدیلر». و بو امامت رسول الله-ا مخصوص ایدی كی اللهین امری ایله حضرت علی‌نین (ع) عهده‌سینه قویولدو سونرا او دسته، حضرت علی‌نین (ع) نسلیندن سئچیلدی و الله تعالا اونلارا علم و ایمان وئریب. . . بو امامت قیامت گونونه قدر علی‌نین (ع) اوشاقلاریندا قالاجاق.(7)
امام رضا (ع)، رسول الله باره‌سینده بویوربلار: «إن رسول الله(ص) یوم القیامة آخذ بحجزه تعالى ونحن آخذون بحجزه نبینا وشیعتنا آخذون بحجزتنا ثم قال: والحجزة النور وقال فی حدیث اخر: معنى الحجزة: الدین؛ قیامت گونو رسول الله (ص)، اللهین اتگیندن توتار، بیز ده پیغمبریمیزین اتگینه و بیزیم شیعه‌لریمیز ده بیزیم اتگیمیزه ال آتارلار». سونرا بویوردو: «اتكدن منظور ایشیقدیر». و آیری حدیثده بویوردولار: «اتكدن منظور دیندیر».(8)
امام رضا (ع) بیر آیری روایتده پیغمبریمیزین (ص) اخلاقی خصوصیتلری باره‌ده آتالاریندان و امام حسن مجتبی‌دن (ع) بئله نقل بویورور: «كانَ رَسولُ اللّه صلى الله علیه و آله فَخْما مُفَخَّما... یَتَـكَلَّمُ بِجَوامِعِ الكَلِمِ فَصْلاً لا فُضولَ فیهِ و لا تَقصیرَ. دمثا، لَیْسَ بِالجافى و لا بِالْمَهینِ تَعظُمُ عِنْدَهُ النِّعْمَةُ و اِنْ دَقَّت لا یَذُمُّ مِنها شَیئا غَیْرَ اَنَّهُ كانَ لا یَذُمُّ ذَواقا و لا یَمدَحُهُ و لا تُغضِبُهُ الدُّنْیا و ما كانَ لَها، فَاِذا تُعوطىَ الحَقّ لَم یَعْرِفهُ اَحَدٌ، و لَم یَقُمْ لِغَضَبِهِ شَى ءٌ حَتّى یَنتَصِرَ لَهُ...؛ رسول الله (ص) عظمتلی ایدی . . . آرتیق-اسكیكسیز جامع سؤزلر دانیشاردی. مهربان ایدی، هئچ كسه ظلم ائله‌ییب هئچ كسی تحقیر ائله‌مزدی. نعمتی آز دا اولسایدی عظمتلی سایاردی و اونو مذمّت ائله‌مزدی. یئمگین دادینی نه تعریفلردی و نه پیسلردی. دنیا و اونا مربوط اولانلار اونو غضبلندیرمزدی. حق ضایع اولان زمان، اونو حاكم ائلیه‌نه قدر هئچ زاد اونون غضبین سویوتمازدی و هئچ كسی تانیمازدی».(9)
__________________________________________________
1 ـ عیون اخبار الرضا،ج2، ص 16، ح 29
2 ـ صحیفة الرضا(ع)، ص88، ح20؛ عیون أخبار الرضا(ع)، ج2، ص29، ح31
3 ـ فروع كافی، ج6، ص19، ح18
4 ـ عیون أخبار الرضا(ع)، ج2، ص134، ح324
5 ـ مفاتیح الجنان، اسوه نشریّاتی ، قم، ص 56
6 ـ تحف العقول، ص 446
7 ـ عیون اخبار الرضا ج 1 ص 217 و 218
8 ـ عیون اخبار الرضا ج 1 ص 254 ح 20
9 ـ عیون اخبار الرضا، ج 2، ص 635،ح 1