دكتر محسن هشترودی
یازار : میرزه عبدالصمد ملکی | بؤلوم : اجتماعی
+0 به یه ن
دكتر محسن هشترودی
محسن هشترودی 1286-جی ایلین دی آیینین 22-سینده هشتری شهرینده دنیایه گلدی. آتاسی شیخ محمد خیابانینین مشاورلریندناولان، مجتهد شیخ اسماعیل ایدی.محسن هشترودی ابتدایی تحصیلینی تبریز شهرینین سیروس و اقدسیّه مدرسهلرینده اوخویاندان سونرا تهرانین دارالفنونوندا طبابت اوخودو. او 1304-جو ایلده دولتی بورسیهسی ایله ریاضیات اوخوماغا فرانسهیه یوللاندی.
او، 1314-ده فرانسهنین سوربون دانشگاهیندان لیسانس درجهسی ایله فارغ التحصیل اولدو. سونرا پروفسور «الی كارتان» نین باشچیلیغی ایله دیفرانسیل هندسهسی زمینهسینده تحقیقه باشلادی و 1316-جی ایلینده ریاضیات رشتهسینده اؤز دكتراسینی آلدی.
پروفسور هشترودی وطنه قاییداندان سونرا عالی دانشسرانین علملر دانشكدهسینده اوستادیار كیمی ایشه باشلادی. 1320-ده عالی دانشسرانین اوستادلیغینی آلدی. 1320-ده تبریز دانشگاهینین رئیسی اولدو و 1336-دا تهران دانشگاهینین علملر دانشكدهسینین رئیسی اولدو.
پروفسور هشترودی عمرو بویو، رابطهسینی بینالمللی علمی مجمعلرله ساخلادی. او 1329-دا تهران دانشگاهینین نمایندهسی كیمی هارواردین بینالمللی ریاضیچیلار كنگرهسینه قاتیلدی. مؤسسهنین رئیسی پرفسور اوپنهایمرین ایستگی ایله پرینسون دانشگاهینین پیشرفته مطالعهلر مؤسسهسینه عضو اولدو و هاروارد دانشگاهیندا دا بیر ترم درس وئردی.
پروفسور هشترودی دیفرانسیل هندسهسینده متخصص ایدی. اونون اَن مهم علمی اثری، دیفرانسیل هندسهسی زمینهسینده یازدیغی دكترا تزیدیر. بو تزده، اوستادی الی كارتالینین مدللرینین بیرینی تعمیم وئریب كی بو گون Hachtroudi Connection (هشترودی التصاقی) آدینا تانینیر.
ساری كؤك، درمان خاصیّتی اولان ادویه
یازار : میرزه عبدالصمد ملکی | بؤلوم : ساغلاملیق
+0 به یه ن
ساری كؤك، درمان خاصیّتی اولان ادویه
تازا تحقیقلر ساری كؤكون سوموك پوكالماسی و آرتریت روماتوئید كیمی بعضی ناخوشلوقلارین قارشیسین آلدیغینی گؤستریر.ساری كؤك قدیم ایللردن، مخصوصاً آسیادا مفصل التهابی اوچون درمان كیمی استفاده اولور. ساری كؤكون تأثیرلی مادّهسی كاركامین آدیندا مادّهدیر.
بو تحقیقدن اؤترو آریزونا بیتكی طبّ مركزینده ساری كؤكون مختلف عصارهلری حاضرلاندی. نتیجهلرده بو مادّهنین، التهاب آزالتماسیندا تأثیرلی اولدوغو بللی اولدو.
بو محققلرین نظرینه گؤره، گوندهلیك 1.5 گرم كاركامین، مفصل التهابینین آزالتماسینا لازمدیر.
متخصصلرین دئدیگینه اساساً ساری كؤكده اولان آیری آنتی اكسیدان مادّهلرینده آنتی التهاب خاصیّتلری اولا بیلر.انسانین تعالاسیندا نافله و گئجه نمازلارین تأثیری
یازار : میرزه عبدالصمد ملکی | بؤلوم : دین
+0 به یه ن
انسانین تعالاسیندا نافله و گئجه نمازلارین تأثیری
آیهلر و روایتلره گؤره، انسان گوجلو ارادهیه صاحب اولماق و قرار وئرمكده چتینلیكلرله اوزلشمهمك اوچون، گئجهلر و ایكی آراسیندا آییق اولوب الله-ین عبادتینه مشغول اولمالیدیر.پیغمبردن (ص) روایت اولوب كی بویوروبلار: «جبرئیل گئجه نمازینی او قدر منه تاپیشیردی كی بئله بیلدیم امّتیمین یاخشیلاری گئجهلر یاتمایاجاقلار». بونا اساساً نافلهلرین چوخلو فضیلتلری وار، حتّی بعضی روایتلر اونو تركیتمگی معصیت ساییبلار.
گئجه نمازی انسان ارادهسینین گوجلندیرمهسینده چوخ مهم تأثیری وار. قرآن كریم فجرین دوغماسینا، گئجه آییقلیغینا و دان اولدوزونا، اونلارا آند ایچماق قدر یوخاری اهمیّت وئریر. ائله كی فجر سورهسینده بویورور: «آند اولسون فجرین دوغماسینا، آند اولسون اونلو گئجهلره، آند اولسون گئجهنین درینلیغیندا قیلینان گئجه نمازینا، آند اولسون ایكی ركعت شفع نمازینا و بیر ركعت وتر نمازینا و آند اولسون گئجهنین گئدیشینه». و آیری یئرده بویورور: «آند اولسون گئجهیه و ایكی طلوع آراسینا».
قرآنین آیری سورهلرینده بو جور جملهلره راست گلمك اولار. قرآنداكی بو آند ایچمهلر سؤزون اهمیّتینی بللی ائلیر و گئجه آییقلیغینین انسانین روحوندا فوقالعاده تأثیرینه اشاره ائلیر. گونلوك مسألهلر انسانین دقّتینی اؤزونه جلب ائلیر و اونون فكرینی مختلف وادیلره چكیب نماز اوستونده حضور قلبدن اوزاقلادیر. آما گئجهنین درینلیغیندا و فجرین دوغدوغو زمان، نئچه ساعت یاتاندان سونرا، مادّی حیاتین غوغاسینین یاتدیغی آنلاردا، آرام بیر محیطده، هر جور ریاكارلیقدان اوزاق، انسان خاص دقّت و حضور قلب تاپیر كی بو آنلارین عبادتی و راز و نیازی فوقالعاده روح پرور و كمال یارادان اولور.
علامه مجلسی امام صادقدن (ع) بئله بیر حدیث نقل ائلیر: «مؤمنین شرفی گئجه نمازی قیلماقدا و عزّتی اؤز ناموسونو جماعتدن ساخلاماقدادیر».
گئجهنین یاریسی، یوخودان قالخیب كبریایی عرشین قاباغیندا دایانماق نماز قیلان انساندا ائله بیر حال یارادار كی اونو كمالا طرف چكیر. كمالا طرف آددیم آتیب منیّتدن اوزاقلاشان انسانین اورگینین حالی « وجهت وجهی للذی فطر السموات و الارض» (اوزومو یئری و گؤیلری یاردانا چئویردیم) اولسا، اونون نجاتینا اومید باغلاماق اولار.
امام صادقدن بئله روایت اولوب كی بویوروبلار: «گئجه قیامیندان ال چكمه، یازیق او آدام كی گئجهنین قیامی و عبادتیندن محرومدیر».
امیرالمؤمین (ع) كتابخاناسیندا علامه مجلسینین مزاریندان تصویرلر
یازار : میرزه عبدالصمد ملکی | بؤلوم : دین
+0 به یه ن
امیرالمؤمین (ع) كتابخاناسیندا علامه مجلسینین مزاریندان تصویرلر
«علامه امین» آدینا تانینان آیتالله حاج شیخ عبدالحسین تبریزی نجفی 1320-جی هجری قمری ایلده علم و تقوا مركزی اولان تبریز شهرینده دنیایا گؤز آچدی.
عبدالحسین، تبریز شهرینده سید محمد مولانا، سید مرتضی خسروشاهی و آتاسی (میرزا احمد نجفی) كیمی بؤیوك عالملرین محضرینده تحصیل آلاندان سونرا نجفه گئدیب میرزا نائینی، شیخ محمدحسین آل كاشف الغطا، و شیخ محمدحسین كمپانی كیمی بؤیوك عالملرین محضرینده اولوب اوزون چكمهدی كی یوخاری فقاهت مقامینا ال تاپدی.
«علامه امینی»نی «الغدیر» كتابی ایله تانییریق. بو عظمتلی كتابی یازماق اوچون مختلف سفرلره قاتلانان عالم كی شیعه و سنّی روایتلرینه و سندلرینه استناد ائلهمكله غدیر خم واقعهسینی یازماغا، 10 مین حدیث كتابینی اوخودو.
امیرالمؤمنین (ع) حرمینین قبله قاپیسیندان چیخاندا «شارع الرسول» خیابانینا چاتیرسیز. بو خیابان اؤزونده شیعهنین معاصر تاریخی اندازهسینده عظمتلی خزانهلر یئرلشدیریب. امام خمینینین (ره) ائوی و آیت الله حكیمین (ره) مزاریندان توتوب علامه امینینین (ره) كتابخاناسی و مزارینا قدر.
علامه امینینی داها چوخ سلیس عرب دیلینده 20 جلدده یازیلان عظمتلی كتابی، الغدیرله تانیریق. او بو كتابی یازماق اوچون 24 ساعتین 17 ساعتینی گئجه گوندوز مطالعهیه صرف ائدیب. او الینده اولمایان كتابلاری اوخوماق اوچون مختلف سفرلرین رنجینی جانینا آلیب.
علامه امینی بو كتابین یازماسیندا اوزلشن چتینلیقلارا اشاره ائدیب دئییر: «من الغدیر كتابینی یازماغا 10 مین كتابی بسم الله-ین «باء» سیندان تمّت-ین «تاء»سینا قدر اوخودوم و 100 مین كتابا تكراراً باش ووردوم».
شبههسیز بو بؤیوك كیشینین یوخاری همّتیندن علاوه بو عظمتلی اثرین یارانماسیندا آیری عامللر ده واریدی. علامه امینی و اطرافینداكیلاردان تكراراً نقل اولوب كی هر واخت بو كتابین یازماسیندا چتینلیغا راست گلیردی، حضرت علی(نین) حرمینه پناه آپاریدی و عالمی ایشیقلاندیران گونشدن كؤمك ایستیردی.
بو ربّانی عالم، هجری قمری ایلین ربیعالثانی آیینین 28-ده جمعه گونو (1349 شمسی 12 تیر) فانی دنیادان كؤچدو و مطهر جسدی مولاسی حضرت علی (ع) كناریندا تورپاغا تاپیشیریلدی.
جهانی هویّتله ملّی هویّتی نئجه بیر یئره ییغماق اولار
یازار : میرزه عبدالصمد ملکی | بؤلوم : اجتماعی
+0 به یه ن
جهانی هویّتله ملّی هویّتی نئجه بیر یئره ییغماق اولار
بو یازی پرینسون دانشگاهینین اوستادی، معاصر فیلسوف «آنتونی آپیا» نین جهانی هویّتله ملّی هویّتین نئجه بیر یئره ییغماغی بارهده اولان نظریّهسینی آراشدیریر.معاصر نظریّهچی آنتونی آیپانین، اخلاق، سیاسی فلسفه، اجتماعی فلسفه و چوخ كولتورلوك كیمی انسانی علملر ساحهسینده مختلف نظرلرینین یوخاری اهمیّتی وار.
آیپا « هویّت اخلاقی» آدلی كتابیندا كئچن دؤرلرده، هویّتی تشكیل وئرن عنصرلری مطرح ائلیر و فردلیك و جمعلیك هویّتی آراسینداكی نسبتی آراشدیریر.
اونون نظرینه گؤره عیرق، قومیّت، ملیّت و جنسیّتین، سون اون ایللرده هویّت و جمعی هویّته مربوط اولان بحثلرده مهم روللاری واریدی.
آیپایا گؤره بو دَیَرلره دقّت یئتیرمك آیری دَیَلری كؤلگهده قویور. جمعی هویّت و فردلیگین آراسینداكی نسبت، هویّت بحثینده دقّتی جلب ائدن بحثلردن ساییلیر.
گؤرهسن جمعی هویّت، فردی آزادلیقلاری محدودلاشدیران آزادلیقدی؟ بئله اولان تقدیرده جمعی هویّت نه قدر فردلیگی و فردی آزادلیغی محدود ائلیر؟
آیپا بو اثرینده آیری عالملرین نظرلرینی مطرح ائلهمكله بو اساسلی سؤاللارا جواب وئریر. آیپا بو كتابدا بئله دئییر: هویّت اخلاقی بیر طرفدن فردلیگه مربوط اولان ادّعالار (كی حیاتیمیزی دوزلدن وظیفهلره شامل اولور) و آیری طرفدن هویّته مربوط اولان ادّعالاردی. (كی اؤزوموزه جمعی هویّت تعریفلهمگه امكان وئرن هویّتی تشكیل وئرن اجتماعی عنصرلردیلر.)
آیپا، فردی و جهانی هویّتین آراسینداكی رابطهیه تأكید ائلهمكله، فردی فرهنگ و هویّتین فقط تانینمیش بشری و جهانی دَیَرلره ضرر یئتیرمهدیگی زماناجن قبول اولونا بیلمهسینه تأكید ائلیر.
بو، همان اجتماعی هویّتیمیزین فردی هویّتیمیزی محدودلاشدیران سرحدّدیر كی فردی حیاتیمیزی اؤز تأثیری آلتینا آلیر.
او «جهان وطنی» باخیشینا اینانماقلا انسانلارین بیر-بیرلرینه جواب وئرمهلی اولمالی اولدوقلاری اوچون، جهانی هویّته صاحب اولماغا تأكید ائلیر. او ملّی هویّتی نفی ائلهمیر آما اونو، جهانی هویّتین كؤلگهسینده قبول ائلیر. آیپا جهان وطنی فلسفهسیندن تأثیر آلیر و بو فلسفهنین یارانماسیدا «هگل»دن «بویس»ـا قدر آلمانلی فیلسوفلاردان تأثیرلنیب.