بامادور توخومون درمان خاصیتی
یازار : میرزه عبدالصمد ملکی | بؤلوم : ساغلاملیق
+0 به یه ن
بامادور توخومون درمان خاصیتی
کالفرنیادا بیر تحقیقین ایلکین نتیجه‌سی بامادور توخومونون آسپرین کیمی خاصیتلی اولدغونو گؤرسَدیر.
سیمرغون وئردیگی خبره گؤره، عالملر بامادور توخوموندا قانی دورولدان مادّه‌نین اولدوغونو بیلیبلر. بو دا همان آسپرینین ایشیدیر.
بو تحقیق تماملاشیرسا و نتیجه‌سی‌نین یاییلماسینا مانع اولماسالار، چوخلارینی آسپرین مصرفیندن قورتاراجاق چونکی آسپرین، چوخلو فایدالارینا رغماً معده قاناماسی کیمی ضررلی عارضه‌لره سبب اولا بیلیر.
آزمایشلر، بو مادّه‌نین اوچ ساعت بدنه وارد اولماسنیدان سونرا 18 ساعت بویوندا قان دولانیشی‌نین نظمه سالماسینی گؤرسَدیر.
سفره‌نی دویمامیش ترک ائدین
یازار : میرزه عبدالصمد ملکی | بؤلوم : ساغلاملیق
+0 به یه ن
سفره‌نی دویمامیش ترک ائدین
50 ایل بوندان اوّله قیاساً ایندی گونده‌لیک 140 کالری آز یاندیریریق. چونکی ایندیکی ایشلریمیز او زمانکی کیمی آرتیق فعالیته احتیاجی یوخدور و نقلیات وسایلی سایه‌سینده داها آز پیادا یئری‌ییریک. محققلرین نظرینه گؤره بو مسأله‌نین جبرانی اوچون انسانلار تحرکلرینی چوخالتمالی و یئمکلرینه آرتیق دقّت یئتیرمه‌لیدیلر.
معده‌نی تماماً دولدورماماق، عمرو چوخالدار
اوزون عمرلو و سالم اولماغا معروف اولان ژاپنون اوکیناوای جزیره‌سی جماعتی، محققلر طرفیندن مطالعه اولوبلار. بو جزیره‌نین انسانلاری جدی ناخوشلوق گؤرمه‌دن 100 ایله قدر یاشاییرلار. محققلر بو جزیره‌ده گؤزل بیر قانونون حاکم اولدوغونا راست گلدیلر: Hara Hachi Bu دویمامیش الینی یئمکدن چک! بو ایش بدنه آرتیق کالری‌نین وارد اولماسی‌نین قارشیسینی آلار و بدن مصرف ائله‌دیگیندن لاپ احسن شکلده استفاده ائلر.
هر زادی بیر یئرده و حددن آرتیق یئمک انسانی قوجالدار
داها آرتیق غذا یئدیکجه بدنیز قوجالیغا داها یئیین گئدر. بدن، هر وعده‌ده یئدیکلریمیزی انرژی‌یه چئویرمه‌لیدیر. بو آرادا اونلارین ایچینده آزاد رادیکال‌لار دا اولان چوخلو ترکیبات حاصل اولور. آزاد رادیکال‌لار سلول‌لاری قوجالیغا آپاریر. حقیقتده غذانین تبدیل پروسه‌سی چوخالدیقجا آزاد رادیکال‌لارین مقداری‌دا چوخالیر.
آغیر غذا باش آغریسی گتیرر
حددن آرتیق یئیَنده غذانین هضم سرعتی آزالار و نتیجه‌ده کؤپ گتیرر. بونلارین هامیسی‌دا «واگ» عصبینی فعال ائلر. واگ عصبی، بئیین ایله هضم سیستمی‌نین واسطه‌سیدیر و معده‌ده غذانین حرکتینی کنترل ائلر. دئمک اولار معده انسانین ایکینجی بئینی ساییلیر. معده‌نی حددن آتریق دولدوردوغوز زمان، باش آغریسی و اورک بولانماسینی گؤزله‌مه‌لیسیز.
بیر دفعه ده آرتیق یئمک ایشی کورلار
بدنیمیزین چوخ گوجلو حافظه‌سی وار و حتی بیر دفعه افراطدان سونرا دا چتینلیگه دوشر. سوئدلی لینکوپینگ دانشگاهی‌نین محققلری‌نین تحقیقی، هر یئمکدن سونرا آرتیق یاغلارین بدنده ییغیشماسینی گؤستریر. بو یاغلارین اریمه‌سینه ایکی ایل زمان لازمدیر.
معده‌نی یئمکله دولدورماق، نفس چکمگی چتینلَدر
آرتیق یئدیگیز زمان ماهنی اوخوماغا چالیشین. گؤره‌جکسیز نه اینکی اوخویا بیلمیرسیز، نفس چکمکده ده زورلوق چکیرسیز. چونکی معده‌نین حجمی یئمک نتیجه‌سینده آرتیر و بو مسأله آغ جیگرلر و دیافراگمین حرکتینی محدودلاشدیریر.
آرتیق یئمک یوخودا پیس تأثیر قویار
معمولاً آرتیق یئمکدن سونرا، بدن یورقونلوق حس ائلر و یوخو گلر. آما باشی یاتماغا قویاندا یوخو گلمز. بو یوخولولوغون سببی‌ده لپتین و هیپوکترین هورمون‌لاری‌نین قاریشماسی نتیجه‌سینده اولور.
آرتیق یئمک اورک سکته‌سینه سبب اولا بیلر
یاددیزدا اولسون یاغلی و آغیر یئمکلر بدنده تری گلیسیریدی آرتیرار. بو مسأله مستعد انسانلاردا اورک سکته‌سینه گتیریب چیخارا بیلر.
چوخ یئمک اعتماد بنفسی (اؤز گووَنی) آزالدار
انسانلار اؤزلرینه چوخ یئمه‌مک اوچون سؤز وئررلر آما هر دفعه آرتیق یئیَنده، اؤزلرینی دانلاماغا باشلاییب وجدان عذابی توتارلار. بو ناراحتلیق هئچ جوره آرادان گئمتز و اؤز گووَنین آزالماسینا سبب اولار.
دقت دقت
دقتیز اولسون انسان غذادان دویاندان سونرا بئینی دویماق حسّینی یارادار. آما بئیین بو سیگنالی 20 دقیقه‌دن تئز یوللاماز. یعنی یئمکلریمیزی یاواش یاواش یئمه‌لی‌ییک کی بئیین واختیندا دویماق حسّینی یارادا بیلسین.
امام حسن عسکری‌نین (ع) ولادت بایرامی مبارک اولسون
یازار : میرزه عبدالصمد ملکی | بؤلوم : دین
+0 به یه ن
امام حسن عسکری‌نین (ع) ولادت بایرامی مبارک اولسون
ربیع الثانی‌نین سککیزی اون بیرینجی امام، امام حسن عسکری‌نین (ع) ولادت گونودور. او حضرت 232 هجری قمری ایلینده مدینه شهرینده دنیایا گلدی.
او حضرت 22 یاشی اولاندا متوکل، منتصر، مستعین، معتز، مهتدی و معتمد عباسی کیمی ظالم خلیفه‌لر دؤرونده اماملیغا چاتدی. بو دؤرده عباسی خلیفه‌لری او حضرته اولان ظلملرینی حددیندن آشیرمیشدیلار. چونکی مختلف روایتلره گؤره امام حسن عسکری‌نین (ع) اوغلو امام زمانین (عج) وارلیغیندان قورخوردولار و اونا گؤره او حضرتی نظارتده ساخلامیشدیلار و اؤز خلافتلری‌نین بقاسی اوچون او حضرتی حبسه سالمیشدیلار.
آما امام (ع) مختلف یوللارلا جماعتله ارتباطدا اولوردو و بالاسی امام زمانین (ع) اماملیغینی اونلارا بشارت وئریردی. معتمد عباسی امام حسن عسکری‌نین (ع) معنوی نفوذوندان قورخدوغونا گؤره او حضرتی 260 هجری قمری ایلین ربیع الاولین سککیزینده مسموم ائله‌ییب شهادته چاتدیردی. او حضرتین مطهر مزاری سامراء شهرینده کرامتلی آتاسی‌نین مزاری‌نین کناریندادیر.
تبریزین شرقیندن غربینه تراموا سالینیر
یازار : میرزه عبدالصمد ملکی | بؤلوم : خبرلر
+0 به یه ن
تبریزین شرقیندن غربینه تراموا سالینیر
تبریز شهرداری ایکی چینلی و کرواسی هیأتله گؤروشده تبریزین دمیر یولو نقلیاتی باره‌سینده دئدی: تبریزین شهر مدیریتی، لازم اولان استانداردلار، گون تکنولوژیسی و گرکلی گؤزللیگی نظرده آلماقلا بو شهرده تراموا سالماغی دوشونور.
تبریز شهرداریسی‌نین عمومی رابطه‌لری‌نین وئردیگی خبره گؤره، صادق نجفی کرواسی‌نین نقلیات تکنولوژی «کونچار» شرکتی‌نین خدمت و ساتیش مدیری ایله گؤروشده دئدی: کرواسیده موفق ترکیبی نقلیات تجربه‌لری، مخصوصاً زاگربین ترامواسینداکی تجربه، ایکی طرفین مناسب رابطه‌سینه دقّت یئتیره‌رک، تبریزین شهر قطارینا یاخشی نمونه اولا بیلر.
او، تبریز شهردایسی‌نین، دمیر یولو نقلیاتی‌نین وضعیتینی مختلف اقتصادی استراتژیلرله نظرده آلدیغینی دئمکله، تأکید ائله‌دی: آرتیق توافقه چاتماقلا، تبریزین شهر مدیریتی طرفیندن مالی منابعین تأمینینه و خارجی طرفین گَرَکلی اطرافلی مطالعه‌لری اوچون بللی بیر زمانلاما تعیین ائدیله بیلر.
نجفی آرتیردی: تبریزین شهری مدیریتی، لازم اولان استانداردلار، گون تکنولوژیسی و گرکلی گؤزللیگی نظرده آلماقلا تراموا سالماغی دوشونور و بونا گؤره، خارجی تعامل‌لرین گئدیشینده، گون تکنولوژیسینی آراشدیریب مقایسه ائلیر.
تبریز شهرداری بو گؤروشده، کوانچار شرکتی‌نین فنی تکلیفلری و وئردیگی مسیر نقشه‌لرینی آراشدیرماقلا عینی زماندا، بو شرکتین تبریزین شهر نقلیاتی متخصص‌لری ایله گله‌جکده‌کی هماهنگلیکلری‌نین لازم اولماسینا تأکید ائله‌دی.
کونچار شرکتی‌نین مدیری، نینیچ‌ده بو گؤروشده، فنی و متخصص هیأتین بو گؤروشدن اوّل تبریزین یونگول شهر قطاری باره‌سینده‌کی پروژه‌نین اوّلیه فنّی معلوماتینا دقّت یئتیرمگینی دئمکله آرتیردی: بو مطالعه‌لره گؤره، «شمالدان جنوبا» مسیری تراموا مسیرلری‌نین اولویتی اولا بیلر کی سونرالار بو مسیر «شرقدن غربه» مسیرینه یاپیشماقلا تبرزیز شهرینی احاطه ائله‌یه بیلر.
او آرتیردی: تبریزده اولان پوتانسیل‌لر و آلت یاپیلارا دقّت یئتیرمکله، بو شهرده تراموا قوشماغا مانع گؤرونمور.
تبریز شهرداری، کروات هیأتیندن قاباق، تبریزین دمیر یولو نقلیاتی باره‌سینده چینلی بیر هیأتله ده گؤروشوب دانیشدی.
نجفی، چینین نقلیات مهندسلیک شرکتلریندن بیری‌نین رئیسی «لو چنگ» ایله گؤروشده دئدی: « تبریز متروسو واگونلارینا ایکی رام علاوه ائدیلدیگی شرطی ایله، آز زماندا مقرر مالی منابعینی ال سی و یا بانکلار آراسی شبکه‌لرله وئرمگه حاضریک.
او آرتیردی: بو جور پروژه‌لرده زمان اَن مهم فاکتور ساییلیر و بونا گؤره، مالی منابعه نظرده آلدیغمیز تدبیرلره دقت یئتیره‌رک، بو فاکتورو الدن وئرمگه اصلاً حاضر اولماریق.
لو چنگ‌ده بو گؤروشده دئدی: « مساعد ایش بیرلیگی سابقه‌یه دقّت یئتیرمکله، ایکی طرفین مشارکتی‌نین دوامینا مانع یوخدور.
امام حسن عسکری ایله (ع) اسحاق کِنْدی‌نین قرآن باره‌سینده مناظره‌سی
یازار : میرزه عبدالصمد ملکی | بؤلوم : دین
+0 به یه ن
امام حسن عسکری ایله (ع) اسحاق کِنْدی‌نین قرآن باره‌سینده مناظره‌سی
عراقدا یاشایان اسلام و عرب فیلسوفلاریندان بیری «اسحاق کِنْدى»، اوزون مدتّ اؤزونو ائوده حصر ائدیب زمانینی «قرآنداکی تناقض‌لر» آدلی کتابی یازماغا صرف ائله‌میشدی.[1] گونلرین بیرینده اونون شاگردلریندن بیری امام حسن عسکری‌نین (ع) محضرینده اولور. امام اونو گؤرنده بویوردو: «سیزین آرازدا اوستادیز «کندی»نین سؤزلرینه جواب وئرن رشید کیشی یوخدور؟»
شاگرد دئدی: «بیز اونون شاگردلری‌یییک و اونون اشتباهینا اعتراض ائله‌مگه گوجوموز چاتماز».
امام بویوردو: «سیزه بیر سؤز تلقین و تفهیم اولسا اونو اوستادیزا نقل ائلیه بیلرسیز؟»
شاگرد دئدی: «بلی»
امام بویوردو: « بوردان قاییداندا اوستادین یانینا گئت و اونونلا محبّتلی رفتار ائدیب انس و الفت قورماغا چالیش. تماماً انسیت قورماغا موفق اولاندان سونرا اونا دئ: «منه بیر مسأله عارض اولوب و سیزدن باشقاسی اونا جواب وئره بیلمز. او مسأله بئله‌دیر: «قرآنی دئیَنین، سیزین حدس ووردوغوزدان آیری معنا قصد ائله‌مه‌سی ممکندورمو ؟»
او جوابدا «بلی امکانی وار، اولا بیلر او جور نظرده توتسون» دئیه‌جک. او زمان سن دئ: «اولا بیلرمی قرآنی دئیَن سیزین حدس ووردوغوزدان آیری معنا قصد ائله‌میش اولسون و سیز اونون لفظلرینی اؤز معناسیندان باشقا آنلامدا ایشلَده‌سیز».
امام آرتیردی: «او عاغیللی آدامدیر. بو نکته‌نی دئمکله سهویی آنلایاجاق».
شاگرد، اؤز اوستادی‌نین حضورونا گئدیب امام بویوردوغو کیمی زمینه مساعد اولاندان سونرا امامین سؤالینی بئله سوروشدو: «اولا بیلر دانیشان اؤز سؤزوندن، ائشیدنین ذهنینه گلمه‌ین معنانی قصد ائله‌میش اولسون؟ یا آیری جور دئسک، دئیَنین نظرده توتدوغو، مخاطبین ذهنینده‌کی ایله فرقلی اولسون؟»
کندی دقتله شاگردی‌نین سؤالینا قولاق آسیب اوندان سؤالینی تکرار ائله‌مه‌سینی ایسته‌دی. شاگرد سؤالی تکرار ائله‌دی.
استاد بیر آز دوشونوب دئدی: «بلی، امکانسیز دئییل. اولا بیلر سؤز دانیشانین ذهنینده اولان، مخاطبین ذهنینه گلمه‌یه و ائشیدن سؤزون ظاهریندن، اراده اولان معنانین خلافینی آنلاسین».
اوستاد بئله بیر سؤالین شاگردی‌نین اؤز ذهنینه گلمه‌دیگینی بیلیردی. شاگرده اوز چئویریب دئدی: «سنی آند وئریرم حقیقتی منه دئ. بو سؤال هاردان سنین ذهنینه گلدی؟»
شاگرد دئدی: «نه ایرادی وار بئله سؤال منیم ذهنیمه گلسین؟»
اوستاد دئدی: «سنه بو مسأله‌نی بیلمک تئزدیر. دئ گؤروم بو مسأله‌نی هاردان اؤیرنیبسن؟»
شاگرد جواب وئردی: «دوغروسو بودور کی، ابو محمد (امام حسن عسکری علیه‌السلام) بو سؤالی منه اؤیردیب».
اوستاد دئدی: الأن جئت بالحق و ما کان لیخرج مثل هذا إِلّا من ذلک البیت. «ایندی دوزون دئدین، بونا تایلاری فقط او طایفادان اولا بیلر».
بئله‌لیکله کندی واقعیتی آنلاماقلا سهوینی باشا دوشوب، یازدیغی کتابین یاندیریلماسینا امر وئردی.[2]
[1] . مستنداتا اساساً بو کتابی یازان، اسحاقین اوغلو یعقوب ایدی. «محمد لطفى جمعه»نین یازدیغینا گؤره، اسحاق، اوچ عباسی خلیفه‌سی؛ مهدى، هادى و هارون زمانیندا کوفه حاکمی ایدی. (تاریخ فلاسفه الاسلام فى المشرق و المغرب، المکتبه العلمیه، ص 1) دئیه‌سن آتا و اوغولون آدلاری دَییشیک دوشوب و یا نسخه‌لری یازاندا اوغولون آدی قلمدن دوشوب.
[2] . بو جریانی ابن شهر آشوب اؤز «مناقب» کتابیندا (ج4، ص 424) ابوالقاسم کوفى‌نین کتابی «التبدیل»دن نقل ائدیب. ابوالقاسم کوفی‌ده او جریانی مرسل صورتده یعنی سندسیز یازیب.