لیلةالرغائب و رجب آیینین فضیلتلری
یازار : میرزه عبدالصمد ملکی | بؤلوم : دین
+0 به یه ن
قمری ایللرین یئددینجی آیینین آدی رجبدیر. بو آیین فضیلتلری یاددان چیخمامالیدیر چونکی بو آی تکلیکده چوخ یوخاری حرمت و ارزشه صاحبدیر. قرآن کریمده دؤرد آی «حرم» تعبیری ایله قید اولوب کی اونلاردا قتال و ساواش حرام ساییلیر و اونلارین بیریده رجب آییدیر.
اللهین رسولو (ص) بویوروب: «رجب، اللهین بؤیوک آییدیر و حرمت و فضیلتده هئچ آی اونا چاتماز و بو آیدا کافرلرله ساواش حرامدیر. بیلین کی رجب، اللهین آیی و شعبان منیم آییم و رمضان امّتیمین آییدیر. هر کس رجبده حتی بیر گون اوروج توتسا اللهی اؤزوندن راضی ائدیب و اللهین غضبی اوندان اوزاقلاشار».
امام صادقدن (ع) نقل اولوب کی رسول الله (ص) بئله بویوروب: رجب منیم امّتیمین استغفار آییدیر. پس بو آیدا استغفار ائلهیین کی الله ارحم الراحمیندیر. رجبی «أصب» آدلاندیریرلار چونکی بو آیدا اللهین رحمتی منیم امتیمه چوخلو نازل اولار. پس داها چوخ «استغفر الله و اسئله التوبة» دئیین.
امام صادقدن (ع) بیر روایتده بئله گلیب: «رجبین 27-جی گونونون اوروجونو الدن بوراخما کی او گون محمده (ص) نبوت مقامی وئریلیب. بو اوروجون ثوابی 60 آیینان برابردیر».
رجبین اهمیتینه گؤره اونا آیری آدلار دا وئریلیب: بو آیین باغیشلانماق آیی اولدوغونا گؤره «شهرالاستغفار». آیری حرام آیلاردان آیریلیب تک اولدوغونا گؤره «رَجَبُ الفَرد». اللهین رحمتینین داها چوخ نازل اولماسینا گؤره «رَجَبُ الاَصَبّ». و «شهرُ امیرِالمؤمنین» آدی.
رجب آییندا اسلام گونشی ظاهر اولدو و اسلام پیغمبری نبوته مبعوث اولدو. اوچ امامیمیز: امام علی (ع)، امام باقر (ع) و امام جواد (ع) ولادتی بو آیدا باش وئریب.
عین حالدا امام موسی کاظم (ع)، امام هادی (ع) و خانیم زینبین (س) وفاتیدا بو آیدا واقع اولوب.
لیلة الرغائب
رجب آیینین لاپ گؤزل گونلریندن بیری بو آیین اول جمعه گئجهسیدیر. بو گئجهنین آدی لیلةالرغائبدیر.
رغائب، رغیبهنین جمعیدیر. رغیبه «امرٌ مرغوب فیه عکاء کثیر» یعنی اوندان چوخلو موهبتلر و بخششلر اولان گئجه.
رسول اللهدان نقل اولان بیر حدیثده بئله گلیب: «بو گئجهنین آدینی ملکلر قویوب و بو گئجه اوچون بیر نماز وار کی هر کس اونو قیلسا اونون ثوابی لاپ گؤزل شکلده و گولر اوزله و فصیح دیل ایله قبرین اول گئجهسی نماز قیلانین گؤزونه ظاهر اولوب دئیر: ائی دوست ! من سنه هر چتینلیکدن نجات تاپدیغینی بشارت وئریرم». نماز قیلان اونا دئیر: «سن کیمسن؟ ایندییه قدر بئله گؤزل اوز و بئله شیرین سؤز و بئله گؤزل عطر بیلمهمیشم». جواب گلر: «من سنین لیلةالرغائبده قیلدیغین نمازین ثوابییام. گلمیشم کناریندا اولام و قورخونو سندن اوزاقلاشدیرام. صور چالینان زمان قیامت عرصهسینده سنین باشینا کؤلگه سالاجاغام. سئوین کی بو خیر سندن زایل اولمایاجاق».
لیلةالرغائب نمازینین کیفیتی:
رجب آیینین اول جمعه آخشامینی اوروزج توتوب شام و خفتن نمازلاری
آراسیندا هر ایکی رکعتی بیر سلاملا بیتن 12 رکعت نماز قیلاجاقسان. هر رکعتده بیر
حمد 3 قدر و 12 توحید سورهسی اوخویاجاقسان. 12 رکعت بیتندن سونرا 70 دفعه « اللهم
صل علی محمد النبی الاُمّی و علی آله» دئیهجکسن سونرا سجدهیه گئدیب 70 دفعه
« سُبُّوحٌ قُدُّوسٌ رَبُّ الْمَلَائِکَةِ وَالرُّوحِ »
دئییب سجدهدن قالخارسان 70 دفعه رَبِّ اغْفِرْ وَ ارْحَمْ وَ تَجَاوَزْ عَمَّا
تَعْلَمُ إِنَّکَ أَنْتَ الْعَلِیُّ الْأَعْظَمُ دئیرسن سونرا تازادان سجدهیه
گئدیب 70 دفعه « سُبُّوحٌ قُدُّوسٌ رَبُّ
الْمَلَائِکَةِ وَالرُّوحِ » دئییب اللهدان ایستهدیکلرینی
دیله گتیرهجکسن. انشاءالله دعالارین مستجاب اولار.
رجبین 13-و اعتکاف عمللری
ایام البیض آدلانان رجبین 13، 14 و 15-جی گونلری اعتکاف گونلردیر. بو اوچ گونده اعتکاف ائلهمگین چوخ ثوابی وار.
ام داوود عمللری
رجب آیینین مشهور عمللریندن ام داوود اعمالیدیر.
عراقلی معرفت اهلی اولان بیر جوان منصور دوانیقی الیله اوزون مدتلی زندانا دوشور. آناسی تاب توانین الدن وئریب امام صادقین (ع) محضریته یئتیشیر و او حضرتدن چاره ایستیر. حضرت بویورور: بیلیرسن بو آی رجب آییدیر و اوندا دعالار مستجاب اولار؟ دئدیکلریمی دقیقاً یئرینه گتیر کی اوغلون زنداندان قورتولسون».
«رجبین 13 ، 14 و 15-جی گونونو اوروج توت. 15-جی گونون گوناورتاسیندا غسل ائله و 8 رکعت نماز قیل. (نمازین نئجهلیگی مفاتیحده وار)». ام داوود نمازی قورتاران کیمی اوغلو آزاد اولدو. تئز حضرتین محضرینه چاتیب خبری اونا وئردی. امام بویوردو: «گئجهلرین بیرینده منصور دوانیقی جدّیم امیرالمؤمنین علینی (ع) یوخودا گؤدو کی اونا بئله دئدی: «هر نه تئزراق اوغلوم داوودو آزاد ائلهمهسن سنی اودا آتارام». منصور گؤزو قاباغیندا اودو گؤرنده داوودو آزاد ائلهمک مجبوریتینده قالدی.
گوموشدن انعطافلی اکران صفحهلری دوزَله بیلر
یازار : میرزه عبدالصمد ملکی | بؤلوم : تكنولوژی
+0 به یه ن
میشیگان دانشگاهینین محققینین ایناندیغینا گؤره، نازیک گوموش واراغیندان انعطافلی اکران صفحهسی دوزلتمک اولار.
پاپ ساینزین وئردیگی خبره گؤره،ایندیلیکده اکران صفحهلرین دوزلتمهسینده ایندیومون قلع اوکسیدیندن استفاده اولونور. بو سرامیکی ماده الکتریک کئچیریجیسی و شفافدیر.
ایندیوم آیری فلزلرین پالایشیندن اله گلیر و اونلاریندا ذخایری آزدیر. 10 ایلدن آرتیقدیر کی عالملری بو مادهنی دَییشن آیری ماده آختارماقدادیرلار. میشگان عالمی گائونونjournal Advanced Materials مجلهسینده یایدیغی تحقیقه گؤره، گوموشون 7 نانومتر نازیکلیگینده واراغی ایله همان ایشی داها آرتیق کیفیتله گؤرمک اولار.
"حلقه" عرفانی اومانیزم اساسیندا قورولوب
یازار : میرزه عبدالصمد ملکی | بؤلوم : دین
+0 به یه ن
«حلقه» عرفانی جامعهده اؤزونو شفا وئرمه، انرژی درمانی و بو کیمی آدلارینان تبلیغ ائلهمگه چالیشیر آما بو جریاندا روحی صدمهلره چوخ راستلانیلیر. هابئله بو جریانین عضولرینده معنوی و دینی اعتقادلار گئت گئده آزالیر و بو اعتقادلار مرموزانه شکلده تحریف اولونور.
حلقه عرفانی، اسلامی و شیعی کؤینگی ایله میدانا داخل اولوب و ایکی : عرفانی و درمانی مبحثلرله فعالیت ائلیر.
- حلقه عرفانینین نظری عرفان بحثلری:
نظری عرفاندا، حلقه عرفانی کیهانی شعورا متصل اولماقدان بحث ائلیر و ادعا ائلیر کی عضولر اونلارین کلاسلاریندا شرکت ائلهمکله کمال و عرفان یولونو طی ائلهییب بو واسطه ایله جسمی و روحی ناخوشلوقلارینی درمان ائلهیه بیلرلر.
اونلارین، سککیز ترمده عرفانی اؤیرنیب شفا وئرمک قابلیّته مالک اولماق ادعالاری، عاغلا سیغماز بیر ادعادیر.
حلقه عرفانینین ظاهری لفظلری و اصطلاحلاری بیزیم دینی مفهوملاردیلار آما مفهوم و ماهیت لحاظیندان تماماً فرقلیدیرلر.
مثلاً عرفان حلقهسیندهکی الله بیزیم ایناندیغیمیز اللهدان فرقلیدیر.
- حلقه عرفانینین درمانی عرفان بحثلری:
بو جریانا گؤره، درمان عرفانینا داخل اولماغا دین و اعقاد مطرح دئییل و هامی بو مبحثه داخل اولوب کیهانی شعورا متصل اولا بیلرلر.
بو جریانا گؤره، ناخوشلوغون درمانی سیر وسلوک اوچون مقدمه ساییلیر کی اللهین تانیماسینا و کمالا چاتماغا سبب اولور. حلقهنین درمان یوللاری نه علمی لحاظدان تحقیق اولوب و نهده دینی لحاظدان تأیید اولونان بیر یولدور.
صعب العلاج مریضلر ناخوشلوقلاریندان قورتولماق اوچون بو کلاسلارا داخل اولورلار آما عکس نتیجه آلیب داها آرتیق جسمی و روحی صدمهلرله قارشیلاشیرلار.
مثلاً نئچه ایل بوندان اوّل مهسا آدلی بیر قیزین باشیندا، آتاسینین گؤزلری قاباغیندا اؤلمهسی تأثیرینده، مزمن بیر آغری تاپیلیر. مهسا اونون درمانی اوچون حلقه عرفانینا اوز گتیریر آما بو کلاسلاردا او تشنّج ائلهییر و ایندی ایکی ایلدیر کی بویوندان فلج و لال اولوب.
سه شنبه 15 فروردین 1396 ، 15:28:53یازار :مینجیق | ||
ساغ اولاسیز! من جه ده بو ؛عرفان حلقه سی؛ انحرافی بیر حرکت دی. چوخ لاری گیریشیب ضربه گؤروپلر
|
حمل اولا بیلن آغ جیگر دوزلدی
یازار : میرزه عبدالصمد ملکی | بؤلوم : ساغلاملیق
+0 به یه ن
پیتسبورگ دانشگاهینین مهندسلری مصنوعی آغ جیگر دوزلتمکله، آغ جیگر ناخشلوغو اولانلارین ایشینی راحتلتدیلر.
دیجیتال ترندزین وئردیگی خبره گؤره، بو مصنوعی آغ جیگر مختلف آزمایشلردن باش اوجا چیخیب و تنفسی مشکللری اولان ناخوشلارین کؤمگینه گلیر.
بو مصنوعی آغ جیگرلر آیلار بلکه ایللر بویو آغ جیگر پیوندی نوبهسینده قالان ناخوشلارا چوخ کؤمک ائلهیه بیلر. اونلار بو مصنوعی جیگرلری، نفس آلماق اوچون چوخ راحت اؤزلری ایله دولاندیرا بیلرلر. چونکی تازا دوزلن بو آغ جیگرلر قاباقکیلارا گؤره چوخ یونگولدولر و حمل اولا بیلیرلر.
بو مصنوعی جیگر آزمایشگاهدا 6 ساعتلیک نفس آلما ایشینی موفقیتله یئرینه گتیریب آما لازم اولان مجوزلری آلماق اوچون نئچه آی تحقیق و زمانا احتیاجی وار. البته بو محصولدان استفاده ائلهین انسانلار اؤزلری ایله خارجی اکسیژن مخزنی داشیمالی اولاجاقلار.
محققلر مخزنه احتیاجی اولمایان مصنوعی آغ جیگرین دوزلتمهسینه ده چالیشیرلار.
اوشاقلارا گوندهلیک میوه سویو وئرین
یازار : میرزه عبدالصمد ملکی | بؤلوم : ساغلاملیق
+0 به یه ن
بوندان اوّل میوه سویونون اوشاقلارا آرتیق چکییه سبب اولدوغو دوشونولوردو. آما تازا تحقیقلر اونون متعادل مصرفینین ضررسیز اولدوغونو بللندیریب.
واشینگتونون سیاتل دانشگاهینین محققلری، میوه سویو مصرفی و اونون چکییه تأثیری بارهده، 34 میندن آرتیق اوشاغین اوستونده اجرا اولونموش 8 مطالعهنین نتیجهلرینی منتشر ائلهدیلر.
تحقیق تیمینین رئیسی دکتر براندون آئورباخ، بو بارهده دئییر: بیزیم ایندیکی اله گتیردیگیمیز نتیجهلره گؤره، گونده بیر وعده یوزده یوز طبیعی میوه سویونون مصرفی اوشاقلاردا چکی آرتیمینا سبب اولاجاغی اورتایا چیخمادی.
تحقیقلره گؤره 6 یاشدان آشاغی اوشاقلار گونده بیر وعده میوه سویو ایچمکله بیر آز آرتیق چکی تاپیرلار کی بالینی جهتدن گؤزه گلیم دئییل.
محققلرین دئدیگینه گؤره 7 دن 18-ـه قدر اوشاقلارین گونده بیر وعده میوه سویو ایچمکلری، اونلارین چکیسینده تأثیرسیز اولدوغو بیلینیب.
هابئله محققلرین دئدیگینه گؤره پرتغال سویونون گلوکوزی آزدیر و آرتیق چکییه تأثیری آز اولور.
محققلر تأکید ائلهدیلر کی بو تحقیقلر یوزده یوز طبیعی میوهلر بارهسیندهدیر و میوه اسانسلی ایچمهلیلر بارهده دئییل.
محققلری گونده120 دن 180 میلییه قدر گوندهلیک میوه سویو ایچمگی 6 یاش و داها کیچیک اوشاقلارا مناسب گؤرورلر. 7 دن 18 قدر ده گونده 240 دان 350 میلیلیتره قدر مناسبدیر.