شیطان تصویری اولان بیر انجیل+عكس
یازار : میرزه عبدالصمد ملکی | بؤلوم : عمومی
+0 به یه ن
شیطان تصویری اولان بیر انجیل+عكس
Gigas-ین ال یازیلاری توراتین متنلری و دانیشقلارینی محاوره شكلینده احتوا ائله‌ین، 800 ایل بوندان اوّلدن (اورتا عصرلردن) ایندی‌یه قالمیش عظمتلی و دئو آسا كتابدیر.
اورتا عصرلردن قالمیش بو اَن بؤیوك كتاب، اینك و اوزون قولاق دریسی اوستونده یازیلیب. آما بو كتابین «شیطان انجیلی» آدینا معروف اولماسینا سبب، اونون 299-جو صفحه‌سینده اولان شیطانین مرموز و یئرسیز بیر تصویری‌نین چكیلمه‌سیدیر.
افسانه‌لره گؤره، بو تصویر شیطان طرفیندن مسخ اولونموش اؤزونو شیطانا ساتمیش راهبین الی ایله بو كتابا چكیلیب. بو تصویرده شیطان انسانلارا آغزینی اَییب یاندی – قیندی وئریر. بو كتابین هر صفحه‌سی‌نین بویو 92 سانتیمتر و اَنی 50 سانتی متردیر. بو 310 صفحه‌لیك كتابین جلدی تخته، مئتال و گؤندندیر و 74 كیلو آغیرلیغی وار.
بو كتاب 13-جو عصرده چك اؤلكه‌سینده یازیلیب. 1648-جی ایلینده سوئد ایله 30 ایللیك جنگ زمانی سوئد ارتشی طرفیندن یاغمالانیب و ایندیلیكده سوئدین استكهلم شهری‌نین موزه‌سینده‌دیر.
همان شایعه بو دفعه آیری شكلده: یئر قارانلیغا جومور
یازار : میرزه عبدالصمد ملکی | بؤلوم : عمومی
+0 به یه ن
همان شایعه بو دفعه آیری شكلده: یئر قارانلیغا جومور
دسامبرین 21-دن 23-نه قدر (آذرین 30-دان دی آیی‌نین 2-سینه قدر) یئر اوزو قاپ- قارانلیق اولاجاق. گؤره‌سن بو بو اوچ گونده دنیا دوناجاق؟ گؤره‌سن بو حادثه انسانین یاشاییشینا پیس تأثیر قویاجاق؟
یوخاریداكی جمله‌لر بو گونلرده یاییلان شایعه‌لردیر. بو شایعه‌لرین بیر اوجو ناسایا چاتیر. كئچن اون دؤرد ایلده بو شایعه‌لره مختلف شكللرده راست گلمك اولار. قاباق ایللرده‌كی شایعه‌لر دنیانین باشا چاتماسیندان خبر وئریردیلر آما بو ایلكی شایعه، مسأله‌نین فقط طبیعی بیر حادثه اولدوغونا تأكید ائله‌مكله اونو داها چوخ انسانا ایناندیرماق ایسته‌ییر.
بو دفعه دئییرلر بو اوچ گونده گونشین جوّینده بیر سئری پارتلامالار نتیجه‌سینده چوخلو انرژی آزاد اوماقلا گونشین یئلی داها سرعتلی و شدّتلی اسه‌جك و یوكلو ذرّه‌لری یئره طرف گتیره‌جك و اونلار مغناطیس میدانی ایله بیر- بیرلرینه تأثیر قویماقلا گونش طوفانلاری حاصل اولاجاق و نتیجه‌ده گونون ایشیغی‌نین یئره چاتماسی امكانسیز اولاجاق و یئر، اوچ گون بویو مطلق قارانلیغا جوماجاق.
گونش طوفانلاری ارتباطی سیستملری‌نین قطع اولماسی، اوچوشلارین مختل اولماسی و چوخلو عارضه‌لره سبب اولا بیلر.
قدیمدن دئییبلر حؤكم‌آوار اوزاق كردیسی یاخین! بو شایعه‌نین‌ده نه اولدوغونو یاخین گله‌جكده اؤیرنه‌جه‌ییك.
حیرت و قورخو رومانی چاپ اولدو
یازار : میرزه عبدالصمد ملکی | بؤلوم : عمومی
+0 به یه ن
حیرت و قورخو رومانی تبریزده نباتی نشریاتی طرفیندن یاییلدی.
آتاسی‌نین دیپلومات وظیفه‌سی داشیدیغینا گؤره اوشاقلیغینی ژاپندا سووموش بلژیكلی قیز آمئلی، عالی تحصیلاتینیآلاندان سونرا 1990-جی ایلین اوّل‌لرنده بؤیوك بیر شركتده ایشله‌مك اوچون ژاپنا گئدیر. او چوخلو تستلردن سونرا شركت طرفیندن ایشه قبول اولونور. آما فرهنگلر آراسینداكی فرق اونون باشینا چوخلو بلالار آچیر. او گون دوغار اؤلكه‌سی‌نین عجیب غریب قایدا قانونلاری قارشیسیندا حیرت ایچینده، ایشه قبول اولوندوغو شركتده چوخ آز بیر زماندا توالئت تمیزله‌مك وظیفه‌سی سویّه‌سینه قدر تنزّل ائدیر.بو بلالارین هامیسی‌نین آرخاسیندا دا آمئلی‌نین چوخ سئویدیگی خانیم فوبوكی دایانیب.
حقیقته سؤیكنن ماجرانین یئر به یئرینده شرقله غرب آراسینداكی تضاد و ضدیّت دقت مركزینده‌دیر و فرهنگلر آراسینداكی آنلاشیلمازلیق چوخ دقیق اولاراق طنز قالبیندا تنقیده چكیلیر.
بو رومان 1999-جو ایلینده فرانسه ادبی آكادمیسی‌نین اَن یاخشی رومان جایزه‌سینی قازانیب.
كتابی یئندیر
«بیاض قالا» رومانی تبریزده «نباتی» نشریاتی طرفیندن یاییلدی
یازار : میرزه عبدالصمد ملکی | بؤلوم : عمومی
+0 به یه ن
اورهان پاموكون «بیاض قالا» رومانی آذربایجان توركجه سینده تبریزده «نباتی» نشریاتی طرفیندن یاییلدی. كتابی خانم رباب حیدرزاد آذربایجان توركجه سینه چئویریب.
«بیاض قالا» رومانیندا بیزیم اؤیرشدیگیمیز سنّتی شرق-غرب مسأله‌سی بعضی مقاملاردا اویونا چئوریلیر. و یازار اونو ادعا ائتمگه چالیشیر كی، بؤیوك انسان اوچون بو توققوشما‌لار یوخدور. شرق-غرب دَیری یوخدور، ساده‌جه دَیر وار و بؤیوك انسان یالنیز اؤز دنیاسینی دوشونوب آددیم آتیر. شرق-غرب مسأله‌سی ایكی انسان آراسیندا اؤز حلّینی تاپیر. (بلكه ده، تاپمیر). یعنی، جهانی‌لشمه رژیمینی بئله فردلر اداره ائدیر. بوتون عمومی مسأله‌لر ده فردلرین مناسبتیندن دوغور و آرادان گئدیر. اونا گؤره اورهان پاموك عمومیّتده، مدنیتلرین قارشیلاشماسیندان بیر قدر سوووشا‌راق، ایكی انسان آراسیندا چیخیش یولو آختاریر.
رومان ایكی اوخشار انساندان بحث ائدیر. ایكی آیری-آیری «مدنی قطب» ون آداملاری بیر-بیری‌نین سنّتلرینه، عادتلرینه بیر قدر خور باخیرلار. غربلی شرقده قالسا بئله، یئنه ده، شرقلی اولا بیلمیر. شرق و غرب مدنیتی بیر-بیری‌نین ایچینده اریمه‌دیگیندن بو بئله اولور. اثرده كؤله و آغا مناسبتی وار. بو ایكی آیری-آیری مدنیتین مناسبتی كیمی تظاهر اولونور. آما مناسبت فرقلی و یاد مناسبتدیر. كؤله آغا‌سیز ضعیفدیر. آغا دا كؤله‌سیز.
كتاب رقعی قطعده 156 صفحه ده و 7000 تومن قیمتله حاضرلانیب.
یاییم مركزلری:
1. تبریز. شهریار تجارت مركزی. نباتی نشریاتی (تهراندان اولان 10-20 گونلرینده، كتاب سرگیسینده ده اولاجاق)
2. تبریز. گولوستان باغی فرهنگی علمی دائمی كتاب سرگیسی. غرفه 22
قره‌داغین طبیعی محیطی
یازار : میرزه عبدالصمد ملکی | بؤلوم : عمومی
+0 به یه ن
قره‌داغین طبیعی محیطی
قره‌داغین قوروقلانمیش منطقه‌سی‌نین 80 مین 427 هكتار مساحتی وار كی آراز چایی‌نین جنوبوندا و جلفا ایله مغان چؤلو، ساوالان، بوزقوش و سهند داغلاری آراسیندا یئر آلیر. بو منطقه بیوسفر مخزنی كیمی ثبته یئتیشیب و نباتی و حیوانی جهتدن چوخ یوخاری دَیَره صاحبدیر.
قره‌داغدا مینلر جور بیتكی و مارال، كؤپگر، قافلان، قونور آیی، كئچی، وحشی پیشیك و شكاری قوشلار: قارا خوروز، قرقاوول، توراج كیمی جور به جور نادر حیوانلار یاشاییر.
بو منطقه اؤزونه مخصوص خصوصیّتلرینه گؤره 1354-جو ایلینده یونسكو طرفیندن یئر كره‌سی‌نین حیاتی ذخیره‌سی كیمی تانیندی و دنیا سطحینده جانلی فسیله معروفدور.
قره‌داغ جنگل‌لرینده 450 دن 600 گرمه قدر یاغینتی اولار. بو مقدار گیزلی یاغیش آدلانان مئهلی هوایا گؤره 750 میلی متره چاتار. شكسیز ائله بو مسأله، بو منطقه‌نی بو قدر نباتی و حیوانی جهتدن غنی ائله‌ییب.
بو منطقه‌ده مین جوردن آرتیق بیتكی وار كی اونلارین یوزده 26-سی داوا كیمی، یوزده 20-سی بزك كیمی، یوزده 17-سی یئمك كیمی، یوزده 28-ی یئم كیمی، یوزده بئشی حفاظت اولونموش و یوزده بئشی صنعتی گیاه كیمی استفاده اولونور. اونلاردان پالید، آردیج، وَلَس، آغاج‌قایین، وحشی گیلاس، قارا چؤهره، گیرده‌كان، آرمود، نار، قاراگیله، زریش، و سماقاز آغاجلارینی آد آپارماق اولار.
قره‌داغین حیوان تنوّعی ده 320-دن آرتیقدیر. اونلارین 39 نوعی ممه‌لی‌لر، 220 نوعی قوشلار، 38 نوعی سوروننلر و دوزیستلر، و 22 نوعدا بالیقدیلار. قارا خوروز اؤلكه‌میزده فقط بو منطقه‌ده اولار و آیری حیوانلاردان قره‌داغ قرقاوولو، قافلان، كؤپگر، چؤل گئچیسی،چؤل پیشیگی، جنگل پیشیگی و جور به جور كؤچری قوشلاری آد آپارماق اولار.
قره‌داغ جنگل‌لرینده جور به جور طبیعی منظره‌لر او جمله‌دن سیلدیرم داشلار، جنگل‌لر، اوتلاقلار، چایلار و اكین یئرلری و جور به جور طبیعی محیطلر او جمله‌دن "آنزا"، "كلن"، "پیر دره‌سی"، " قارونلار"، "قلعه دره‌سی وینق"، "شاه اتران" و "وایقان" كیمی یئرلر یئرلشدیریب.