شرقی آذربایجانین اوستانداری: تبریز-باكی رابیطه‌لرین تقویتی‌نین اولویّتی وار
یازار : میرزه عبدالصمد ملکی | بؤلوم : خبرلر
+0 به یه ن
 |
||
|
شرقی آذربایجانین اوستانداری اومیدوارلیق ایبراز ائله‌دی كی بو اوستانین ظرفیتلرین اؤلكه خاریجینده تانیتدیرماقلا, ایرانین خاریجی رابیطه‌لری و مخصوصاً ایقتیصادی حوزه‌ده قونشو اؤلكه‌لرله چوخالا. فارسین وئردیگی خبره گؤره, احمد علیرضابیگی شرقی آذربایجان و آذربایجان جومهوریسی آراسیندا رابیطه‌لرین چوخاتماق ایجلاسیندا -كی جومهوری ایسلامی‌نین بو اؤلكه‌ده‌كی تازا سفیری‌نین حضوری‌ایله بو اؤلكه‌ده برگوزار اولونوردو- تبریز و باكی‌نین قدیم رابیطه‌لرینه ایشاره ائله‌مكله دئدی: موختلیف زمینه‌لرده بو رابیطه‌لری و همكارلیقلاری گوجلندیرمك, اوستان مودیریتی‌نین اولویّتینده‌دیر و بو زمینه‌ده آذربایجانلی طرفله یاخشی موذاكیره‌لر و ییغینجاقلار اولوب. او بونا ایشاره ائله‌مكله كی جومهوری ایسلامی و آذربایجانین همكارلیقلاری‌نین چوخالماسی هر ایكی طرفین منفعتینه‌دیر, دئدی: شرقی آذربایجان اؤلكه‌نین شیمال غرب صنعتی و علمی قوطبی كیمی ائلیه بیلر بو زمینه‌ده تعیین ائدن همكارلیقلار ائله‌سین. علیرضابیگی ایرانین قاباقكی سفیری محمدباقر بهرامی‌نین زحمتلریندن قدردانلیق ائله‌مكله, موختلیف زمینه‌لرده آذربایجان جومهوریسی‌ایله رابیطه‌لرین گئنیشلندیرمكده شرقی آذربایجانین كامیل حاضیرلیگینی اعلام ائله‌دی و آرتیردی: شرقی آذربایجانین ایجرایی دستگاهلاری و خصوصی بخشی حاضیردی كی ایرانین باكیداكی سیفارتی‌ایله ایكی اؤلكه‌نین ایكی طرفلی رابیطه‌لرین گوجلنمه‌سی اوچون همكارلیق ائله‌سین. بو ایجلاسدا كی اوستاندارین برنامه‌ریزلیق موعاوینی و خاریجی ایشلری ویزارتی‌نین اوستانداكی نوماینده‌سی‌نین حضوری واریدی, ایقتیصادی و دارایی ایشلری, یول و شهر سالما, منطقه سویو, صنعت, معدن و تیجارت, حمل و نقل و ترمیناللار, گومروك ناظیرلری, تبریز و علوم پزشكی دانیشگاهلاری‌نین رئیسلری و مودیرلری, و هابئله جلفا, خداآفرین فرماندارلاری و آراز آزاد تیجاری صنعتی منطقه‌نین موعاوینی آذربایجان جومهوریسی‌ایله رابیطه‌لرین چوخالماسی باره‌ده نظرلرین دئدیلر. |
||
روسیه امنیت شوراسی‌نین سوریه علیهینه اولان شدیداللحن بیانیّه‌سی‌نین قاباغین آلدی
یازار : میرزه عبدالصمد ملکی | بؤلوم : خبرلر
+0 به یه ن
|
||
|
رویترزین وئردیگی خبره گؤره, روسیه, امنیّت شوراسیندا سوریه‌نین توركیه شهرلری‌نین بیرینه حمله ائله‌مه‌سینه گؤره یازیلان شدیداللحن بیانیه‌نین تصویب اولماسینا مانع اولدو و پیشنهاد ائله‌دی بو بیانیه یوموشانسین. بیر غربی دیپلومات دئدی كی آذربایجان طرفیندن پیشنهاد اولان بو بیانیه آمریكا طرفیندن داها شدید‌الحن‌لشیردی كی روسیه مانع اولدو. بو بیانیه‌ده كی امنیت شوراسی‌نین 15 اؤلكه‌سینه تصویب اوچون وئریلمیشدی, سوریه‌نین چرشنبه گونو توركیه شهرینی خومپاره هدفینه توتماسی «اَن شیدّتلی لحنله» محكوم اولموشدو. |
||
توركیه سوریه‌نین آتشینه جواب وئردی
یازار : میرزه عبدالصمد ملکی | بؤلوم : خبرلر
+0 به یه ن
|
||
|
سی ان ان اعلام ائله‌دی كی تركیه ارتشی توپخانا گوللـه‌سی‌ایله سوریه‌نین نئچه یئرین ووردو. بو ایتیفاق اوندان سونرا باش وئردی كی سوریه‌دن گلن توپ گوللـه‌سی 14 نفر توركیه‌لی‌نین اؤلوب یارالنماسینا سبب اولدو. بو خبری رجب طیبب اردوغانین دفتری تأكید ائدیب و اعلام ائدیب كی توركیه‌نین ارتشی رادارلا موشخص اولان نوقطه‌لری ووروب. ناتو دا بو باره‌ده ایضطیراری جلسه تشكیل وئریب سوریه‌یه هوشدار وئردی كی بو ایشی ایله ناتونون مرزلرینه تجاووز ائدیب و بو ایش تیكرار اولمامالیدیر. توركیه ناتونون اعضاسینداندیر و بو پیمان اساسیندا عضولرین هر بیرینه تجاووز اولونسا ناتو اوندان دیفاع ائله‌مه‌لیدیر. |
||
ساندویچ یئمگین جرمه‌سی وار
یازار : میرزه عبدالصمد ملکی | بؤلوم : خبرلر
+0 به یه ن
|
||
|
ایتالیا پایتختی رم شهری‌نین تاریخی مركزینده ساندویچ یئمك قادغان اولدو و بو خیلافا مورتكیب اولانلار جرمه وئرمه‌لی اولاجاقلار. فرانسه خبرگوزاریسی‌نین وئردیگی خبره گؤره, رم شهرداریسی تازالیقدا بو قانونی ایجرا ائدیر و اونون اساسیندا بو شهرین تاریخی مركزینده ساندویچ یئمگین 25 دن 500 یورویا دك جرمه‌سی وار. رم شهرداریسی اؤز ایطیلاعیه‌سینده تأكید ائدیب بونا گؤره كی تاریخی بینالارین یانیندا ساندویچ یئییب نوشابه ایچمك مانع اولور كی جماعت و توریستلر بو بینالارین منظره‌سیندن لذّت آپارسینلار, بونا گؤره بو محدوده‌ده هر جور ساندویچ و نوشابه یئییب-ایچمك قدغاندیر و بو خیلافا مورتكیب اولانلار 25 دن 500 یورویا دك جرمه وئرمه‌لی اولاجاقلار. بو قانون هله‌لیكده آزماییشی صورتده دسامبرین 31-دك ایجرا اولاجاق. عین زماندا ایتالیانین ونیز, فلورانس و بولونیا كیمی آیری شهرلری‌ده شهرین تاریخی مركزینده ساندویچ یئمك قادغانلیغینی ایجرا ائدیبلر. |
||
هاوانین شاختاسی زلزله‌زده‌لرین اورك داغینی چوخالدیر
یازار : میرزه عبدالصمد ملکی | بؤلوم : خبرلر
+0 به یه ن
|
||
|
جام جم آنلاین: قیش یئتیشیر, شاختا یاواش-یاواش اؤزونو گؤرسدیر و صیفردن آشاغی درجه‌ده هر ساختیماندا یاشاماق چتیندیر, هله قالسین كی او شاختادا موناسیب اولمایان چادیر ایچینده كیچیك اوشاقلار و خسته قوجالاریلا قالاسان. كندلیلر دئیرلر ایستی‌لتمه وساییلدن‌ده خبر یوخدور, چادیرلار سو كئچمز دئییرلر و بیر طرفدن‌ده یاغیش سویو اونلارین آلتیندان كئچیر. «بوردا گئجه‌لر چوخ سویوق اولور, بیزیم ائو-ائشیگیمیز یوخدور و گئجه‌نی سحره‌جن تیر-تیر تیتره‌ییروق.» بو زلزله‌زده‌لرین سسی‌دیر كی ایستیرلر سسلری مسئوللارین قولاغینا چاتسین. دئییرلر ایندی كی خاروارلار تورپاغین آلتیندان سالیم چیخمیشیق اومیدواریق كی قیشی اَن آز ایمكانلارلا باشا وئرك. منطقه‌ده پاییز یاغیشلاری باعیث اولوب زلزله‌زده‌لرین چادیرلارینا سو دولسون. دره‌لرده قورولموش چادیرلاری سو آپاریر و اوجالیقلاردا قورولموش چادیرلاری پاییز كولگی آپاریر. ایندی شاختا فصلی‌نین یاخینلاشماسیله كندلیلرین چاره‌سی قالماییب كی, هر جانلی وارلیغا یاشاییشی چتینله‌دن سویوقدا, قیشی باشا وئرسینلر. زلزله‌زده كندلرین هامیسی‌نین وضعیتی بئله‌دیر؛ بیر حالدا كی مسئوللار زلزله‌زده‌لرین ائولرینی تحویل وئرمكدن دانیشیرلار. آما یئتیشن گوزاریشلره گؤره جماعتین چوخو چادیردا و بؤحران شراییطده یاشیرلار. بو منطقه‌نین هاوا شراییطی گؤرسدیر كی چوخ تئز یاغان قار نه ورزقان, اهر و هریس ائولری‌نین دامی بلكه زلزله‌زده‌لرین چادیرلاری اوستونده اوتوروب. زلزله‌زده منطقه‌لرین تازادان دوزلتمه‌سینده كم‌كارلیق, ایندی اوستانین نوماینده‌لری‌نین‌ده سسینی چیخاردیب. ائله كی اهر, ورزقان و هریس شهرلری‌نین ایكی نوماینده‌سی عباس فلاحی و الله وردی دهقانی, جام جم آنلاینا دئدیدیلر كی ایشلر بئله گئتسه زلزله‌دن دیری قورتولانلار شاختا و ناخوشلوق اثرینده آرادان گئده‌جكلر. |
||