دونیان ان ظریف هونری

+0 به یه ن


ظریفترین هنرمندی دنیا!


فرانك گروم, اسلوانیالی 72 یاشلی بیر هونرمنددیر كی ایللر بویودور اینجه ایشلره مشغولدور آما اونون بو دفعه كی هونری اؤز زامانی‌نین شاهكاری حئساب اولور. او ایندی اسلوانیانین پایتختی لیوبلیانانین یاخینلیغیندا بیر كندده یاشاییر.

او بیر ایگنه‌ایله ایسته‌دیگی طرحی یومورتانین اوستونه چكیر و سونرا بالاجا و نارین فرئز دستگاهی‌ایله طرحی یومورتانین اوستوندن چیخاردیر. او ایندیه قدر چوخلو پورتره و گؤزل منظره‌لر یومورتا قابیغی اوستونده یارالدیب.

اونون ایشلری‌نین بیر خصوصیتی‌ده خطاسیز اولماسیدیر كی بو خصوصیت اونو تایسیز ائدیب.

اونون قصدی وار بیر مودّت سونرا تایسیز اثرلرینی بیر سرگیده نوماییشه قویا.

اونون ایشلریندن نئچه‌سین آشاغیدا گؤرورسوز:








پیغمبرین سوت باجیسی «شیما»

+0 به یه ن


پیغمبرین باجیسی «شیما»

پیغمبر اكرم (ص) دونیایا گلندن سونرا, بو اوشاغا دایه آختاراندا بنی‌سعد بن بكر قبیله‌سیندن اولان حلیمه‌نی تاپدیلار. حلیمه‌نی محمده (ص) سوت وئرمك اوچون اجیر ائدندن او, پیغبرین سوت اَمَر واختی‌نین اَن اصلی شخصیِتینه چئوریلدی و ایكی ایله‌قدر بو موهوم ایشه مشغول اولدو. حلیمه‌نین اَری حارث بن عبدالعزی بن رفاعه‌ایدی و نَسَبی بكر بن هوازنه‌ چاتیردی. او حضرتین سوت قارداشی عبدالله و سوت باجیلاری انسیه و شیما ایدیلر كی بونلارین اوچو ده حلیمه‌نین اوشاقلاری‌ایدی. حضرت محمد ( ص) بنی‌سعد قبیله‌سینده بركتلی حضوری زامانی, شیما آناسی‌نین كؤمگی ایله بو تایسیز یارانیش قاشیندان موغایات اولوردو . . .

شیمانین اسیر اولما جریانی

نقل اولوب اوندا كی پیغمبر (ص) ائشیدیر كی هوازن قبیله‌سی «مالك بن عوف نصر»-ین باشچیلیغی‌ایله «حُنَین» منطقه‌سینده آرواد اوشاقلاری‌ایله بیرلیكده موستقر اولوبلار, دستور وئریرلر بؤیوك (اون ایكی مین نفرلیك) بیر لشكر  حاضیرلانیب اونلارا طرف گئتسین. موسلمانلارین منطقه‌یه چاتماسی ایله و دره‌ده كمین قورموش هوازن قبیله‌سی‌نین اونلارا حمله‌سی‌ایله, فضا چوخ چتین اولدو؛ ائله كی موسلمانلارین چوخو پیغمبرین (صل) اطرافیندان داغیلدیلار و تكجه دوققوز یا اون نفر بنی‌هاشمدن قالدیلار كی بونلاردان عیبارتیدی: علی بن ‌ابی‌طالب ( ع)، عباس بن عبدالمطلب، ابوسفیان بن حارث، نوفل بن حارث، ربیعة بن‏ حارث، عتبه و معتب ابولهبین اوغوللاری، فضل بن عباس، عبدالله بن زبیر بن عبدالمطلب و بیر قوولا گؤره ایمن بن ام‏ ایمن. آما نهایتده آللاه اؤز پیغمبرینی غالیب ائله‌دی و مَلَكلر واسیطه‌سی‌ایله اونو گوجلو ائله‌دی. علی بن ابی‌طالب (ع) هوازنین علمدارینی اؤلدوردو و بو مسأله دوشمنین اورگینه قورخو سالدی. بو دؤیوشون هوازن قبیله‌سینه نتیجه‌سی بو اولدو كی اونلارین چوخو اؤلدولر و بیر چوخو دا اسیر اولدو كی اونلارین سایی مین نفره چاتیردی. هابئله چوخلو غنیمتلر اله گلدی كی اوغورلانانلاردان سونرا اون ایكی مین دَوه‌یه چاتیردی.

دوشمن قوشونو ایچینده «بجاد» آدلی بیر كیشی واریدی. بنی سعد قبیله‌سیندن اولان بو كیشی, او قبیله‌یه گئدن بیر موسلمانی اؤلدوروب دوغراییب و سونرا یاندیرمیشدی. بجاد اؤز آغیر جورمونه واقیف اولاندا قاچدی. آللاه رسولی ( ص ) اؤز قوشونونا امر ائله‌دی كی هر نه یول‌لا اولسا بجادی یاخالاسیندلار. اونلار دا اونو تعقیب ائدیب قبیله‌سی‌نین بیر گوروهو ایله یاخالادیلار.

اسیرلر آراسیندا پیغمبرین ( ص) سوت باجیسی «شیما»دا گؤرونوردو. او گؤرنده كی موسلمانلار اونلاری یئیین و خشونتله اوردو یئرینه آپاریرلار قیشقیردی: «ائی جماعت ! بیر آز یاواش ! آللاها آند اولسون من سیزین بؤیوگوزون سوت باجیسی‌یم.»

آما موسلمانلار كی اونو تانیمیردیلار اونلاری همان وضعیّتله آللاه رسولی‌نین( ص) حضورونا آپاردیلار. او حضرتین حضورونا چاتاندا شیما دئدی: «ائی رسول‌الله ! ( ص), من سیزین سوت باجیزام.»

حضرت بویوردو:«بونا بیر علامتین وار؟» دئدی: «بلی, بیر گون من سیزی دیزیم اوسته اوتورتموشدوم و سیز منیم بئلیمی دیشله‌دیز.»

پیغمبر ( ص) سؤزونو تصدیقله‌دی و قالخیب رداسینی یئره آچدی و شیمانی اوندا اوتورتدو و اونا خوش گلدین دئدی. بو آندا شیمانین گؤزلری یاشلاندی. سونرا پیغمبر ( ص) شیمانین آتا و آناسی باره‌ده سوروشدو و او خبر وئردی كی مودّتلر قاباق اؤلوبلر.

ایسلام پیغمبری ( ص)  بو جوابی ائشیدندن سونرا بویوردو: بیزیم یانیمزیدا قالسان محبوب و مؤحترم اولاجاقسان و قاییتماغی‌دا سئوسن قاییدیب اؤز اقوامی‌نین یانینا گئده بیلرسن.

شیما او حضرتین ایكینجی تكلیفین قبول ائله‌دی. بنی‌سعدین نقیلینه گؤره پیغمبر ده بیر كنیز و غولام اونا وئردی و شیما اونلاری بیر-بیرلری ایله ائولندیردی و اونلارین نسلی هله‌ده بو قبیله‌ده قالیر.

بیر ریوایتده گلیب كی شیما, اسیرلر باره‌ده پیغمبره دئدی: «بونلار سنین باجیلارین و خالالاریندیلار.»

آللاهین رسولی‌ده ( ص)  بویوردو: «ما كان لی و لِبَنِی‌هاشمٍ فقد وَهَبْتُهُ لك» منیم و بنی هاشمین اولانی سنه خاطیر باغیشلادیم.»

بئله‌لیكله موسلمانلار دا پیغمبره ( صلّی الله علیه وآله وسلّم ) تای بوتون اسیرلری شیمایا باغشلادیلار.

تاكسی ماجراسی

+0 به یه ن


http://img4up.com/up2/59776598745997612956.jpeg


چارراهدا دایانمیشدیم و تاكسی گؤزلوردوم كی ائوه گئدم. ماشینلارین نئچه‌سی مسیر سوروشور آما ساخلامیرلار. نئچه‌سی‌ده قاباغیمدان آرام گئدیر آما شوفئر باشین چئویرمیر گؤروسون من هانسی مسیری دئییرم. آما من اومودومو الدن وئرمه‌ییب سسلیرم و دایانمیشام.

نهایتده آغ رنگده قدیم مودئل بیر پیكان ساخلاییر. شوفئرین كناریندا اگله‌شیرم. مندن سونرا بیر آیری موسافیر ده آرخا صندلده اگله‌شیر.

ماشین یولا دوشور. یولدا آیری موسافیرلر یئنیب مینیرلر. مسیر اوستونده چارراهلارین بیرینه قالمیش بیر صحنه‌یه شاهید اولوروق كی پاركدان چیخان بیر ماتیز ماشینی, فرمانی اورتا یاشلی بیر چرخلی‌نین قاباغینا آلیر. چرخلی قارداش‌دا, ایكی دمیر پارچاسی آراسیندا ازیلمكدن قورتولماق اوچون مجبوراً تورموز ووروب دایانیر. آما ماتیزین بو ایشی اونو حیرصلندیریب؛ اوجادان قیشقیریر: «سنه تصدیق وئره‌نی گؤروم فیلان فیلان اولسون!»

بیزیم شوفئر كی قیافه‌سی تانیش گلیر و یادیما گلن قاباق گونلرین بیرنده بونون ماشینینا مینمیشدیم بو صحنه‌یه دؤزنمه‌ییب, بیزه خیطاباً  دئییر: «آخی بو شوفئر ایشتیباه ائله‌ییب, اونا تصدیق وئرن نئیله‌سین؟»

شوفئره دستك اولوب جواب وئردیم: «دوز بویوروسوز, دوزدور كی تقصیر ماتیز شوفئرینده‌ایدی و اونا اؤیره‌دن‌ده دوزگون اؤیتمه‌ییب, آما او سؤزلری‌ده دئمك یاخشی دئییلدی.»

صؤحبت قیزیشدی و نهایتده من دئدیم: «جامیعه‌ده كی افرادین او قدر ده تقصیری یوخدور. تقصیر بیزلرده‌دیر كی وظیفه‌میزه دوزگون عمل ائله‌ییب جماعته اخلاق اؤیره‌ده بیلمه‌میشیك. بیر میثال ووروم؛ بیر شیركتین ماشینلاری خراب اولسا , او شیركتین میكانیكی مسئولدور. كی آغا سن بو ماشینلارا نئجه یئتیشیبسن كی ایندی بو حالدادیلار. ایندی ده جامیعه‌ده اخلاقی و ایجتیماعی موشكول اولورسا تقصیری بیزلرده‌دیر.»

بو آندا آرخا صندلده اوتوران موسافیر كی بو لحظه‌یه‌دك ساكیتیدی دیله گلیب دئدی: «یوخ حاج‌آغا ! تقصیر سیزده دئییل. تقصیر اونون اؤزونده‌دیر. بللی‌ایدی كی اونون آیری یئردن ناراحاتلیغی واریدی و اؤزونو تخلیه ائتمك اوچون اوجور دانیشیردی. مسئول اینسانین اؤزو و خانیواده‌سیدیر كی گرك تربیتی دوز اولسون.»

جواب وئردیم: «دوزدور كی اینسانلارین اؤزلری‌نین‌ده تقصیری وار, آما بیزلرین‌ده وظیفه‌میز ایجاب ائدیر كی جامیعه‌ده, اخلاقی دوزگون شكیلده پیاده ائدك و جماعته اؤیره‌دك. من همیشه میثال وورارام؛ پیغمبریمیز حضرت محمد (ص) جاهیل عربلرین ایچینده مبعوث اولدو و تك جانینا اونلارا اخلاقی اؤیرتدی و ایسلامی اونلارا تانیتدیردی, او قدر كی بوگون دونیانین باشا باشی ایسلاملا تانیش اولوب. جامیعه‌ده اخلاقی موشكولون اولماسی بونو نیشان وئریر كی بیز وظیفه‌میزه دوزگون عمل ائلیه‌ بیلمه‌میشیك.»  

سؤز بورا یئتیشنده آرخاداكی موسافیر دیله گلیب دئدی: « حاج‌آغا ! من اؤزوم روانشیناس دؤكتورم و جماعتین موشكوللرین حل ائده‌رم, آما بیری كؤمك ایسته‌مه‌سه و اؤیرنمك ایسته‌مه‌سه, اونا اؤیرتمك اولماز. من‌ده بئله بیر اینسانا كؤمك ائتمه‌رم چونكی اؤزو ایسته‌میر.»


qurtar.jpeg



من‌ده فورصتی موناسیب بیلیب دئدیم: «ایندی كی روانشیناس‌سیز لاب یاخشی! تقصیرلرین بیر قیسمتی‌ده سیزیندیر. سن ایله من باشارمامیشیق جماعتمیزه اخلاق اؤیره‌دك. اؤیره‌دنمه‌میشیك خیاباندا آیریلاری ایله نئجه دانیشماق و نئجه رفتار ائتمك لازیمدیر. حتی اونلار ایسته‌مه‌سه‌لر ده و بیزیم اوستوموزه حمله‌ ائت‌سه‌لر ده, بیزیم وظیفه‌میز وار اؤیره‌دك چون وظیفه‌میزدیر. میثال اوچون بیر پیشیك آغاج باشیندا گیره‌ دوشوب قالاندا, بیز چالیشاریق اونو قورتاراق. آما پیشیك كی بونو بیلمیر الیمیزی آتاندا, كی اونو گؤتوروب یئره قویاق, بیزیم الیمیزی جیرماقلار. آما بیز یئنه ناراحات اولماریق, چون بیلیریك اونون بو جیرماقلاماسی نه اینكی دوشمنچی‌لیكدن بلكه جهالتدندیر.»

جیناب دؤكتور دئییر: «ایختیلاف نظر چوخدور و اوتوروب دانیشماق لازیمدیر.» بو آندا من مقصده چاتیرام و ایستیرم یئنه‌م. دؤكتور دئییركی من بیر آز تئز دوشمه‌لی‌ایدیم آما سیزی موشاییعت ائله‌ماق اوچون یئنمه‌دیم.» هر ایكیمیز ماشیندان دوشوروك. من كی بو لحظه‌یه‌دك دؤكتورون اوزون گؤرمه‌میشدیم, قاییدیب اونا باخیرام و خوش هئكل بیر كیشینی قارشیمدا گؤرورم. بیر-بیرمیزله ال وئریریك و تانیشلیغیمیزا سئوینمه‌ییمیزی بیلدیریریك. دؤكتورون ایصراری وار منی قاپیمیزا دك موشاییعت ائله‌سین آما من دئییرم یاخشی اولار اوتوراق نیمكتلرین بیرینده و دانیشاق.

هر ایكیمیزین دردی بیردیر. جامیعه‌نین گئدیشی بیزی ناراحات ائلیر. قورخوروق بئله گئتسه ایشلر داهادا پیسله‌شه. دانیشا-دانیشا بیر موتورلی قاباغیمیزدان ردّ اولور. دؤكتور دئییر: «بو اوغلان منطقه‌نین آل وئرچیسی‌دیر. چوخ كؤنلوم ایستیر بو جوانلارا ایش اولسون و منطقه‌میز پاكلانسین»

من‌ده سؤزونو تصدیقله‌ییرم: «حرفه‌ای موجروملرین سایی چوخ آزدیر, دئنه میلیوندا بیر, بیز گرك جورم یارالدان عامیل‌لری آرادان آپاراق و سونرا قالسین او حرفه‌ای موجروملر كی اونلاری كونترول ائله‌مك راحاتدیر.»

دؤكتور تعریفله‌ییر : «تاكسی‌یا میننده سیزدن قاباق من بیر تاكسی‌دایدیم. سیز كی مسیر دئدیز, شوفئر ساخلامادی. سوروشدوم كی بیز همان مسیره گئدیریك دا ! نیه ساخلامادین؟ جواب وئردی: «ماللا میندیرسم ماشینیم خراب اولار.» من اونون بو سؤزونه دؤزنمه‌ییب دئدیم: «دانیشدیغین بیلیرسن هئچ؟ ساخلا من‌ده یئنیرم.» و بئله اولدو كی گلیب سیزینله بیرلیكده میندیم ماشینا.»

یاریم ساعت دردله‌شندن سونرا تیلیفون نومره‌لری و اینترنت آدرسلری تبادول ائله‌دیك و بیر داها گؤروشمك اومودو ایله آیریلدیق.

دؤكتور تعریفله‌دی كی بئش ایل اولار وطنه قاییدیب. قاباق ایللر توركیه و اوكرایندا اولوب. اؤلكه‌میزین ورزیش زمینه‌سینده بؤیوك ایفتیخارلاریمیزداندیر و روانشیناسی و مئتافیزیك ساحه‌سینده بؤیوك اوستاددیر.

آللاهین ایمئیلین اوخویوبسوز مو؟

+0 به یه ن


 

 ائی آللاهین بنده‌لری

ائی جوان موسلمانلار !

هر گون صبیرسیزجه گؤزلورسوز!

گؤره‌سن ایمئیل صاندیغیما مئساژ گلیب می؟

گونده نئچه دفعه آنلاین اولورسوز

گؤرنده كی مئساژیز وار سئوینیرسیز

اوخوماسینا صبیرسیزله‌نیرسیز

مئساژلارین بعضیسی دوغرودان گؤزلدیلر

صمیمی دوستلاریزین طرفیندن

آما بعضیلری ائله‌ بئله گلیبلر

و تكجه واختیزی توتور

بونلاری تئز سیلیرسیز

خبریز وارمی كی 1400 ایل قاباق

آللاه سیزه بیر اوزون مئساژ گؤندریب؟

البته جبرئیل واسیطه‌سی ایله

بنده‌سی حضرت محمده

او مئساژی آچیبسیز می؟

عنوان: قورآن

بو فایلی دانلود ائدیبسیز می؟

اورگیزین bookmark-یندا اونا علامت ووروبسوز مو؟

یاشاییشیزین favorites-یندا اونو  Add ائدیبسیز می؟

اونو اؤز home page-یز ائدیبسیز می؟

بو مئساژی آچمیش اولساز

حتماً اوخویوبسوز . . .

پیغمبرلرین ناغیللارین . . .

داغیلان قووملارین عیبرتلرین . . .

اینسانلیغا اولان مئساژلارین . . .

گونده‌لیك یاشاییشین قیلاووزی(راهنوماسی) . . .

گله‌جكدن وئرن موژده و خبرلری.

حتماً اوخویوبسوز كی

آللاه سیزدن ایسته‌ییب كی

یاخشی عمل‌لریزی بیر مئساژ فورماسیندا reply ائده‌سیز.

ایندی هر سحر یوخودان دوراندا

هر زاددان قاباق بو مئساژی آچین

دئییلن دستورلار كیمی

یاخشی عمل‌لری Reply ائدین.

عزیز موسلمان جوان !

ایسلامین گله‌جگینه Enter  وور.