din xadimi دین خادمی

ام‌البنین هر گون عباسین (ع) اولادی‌نین الیندن یاپیشیب بقیع قبرستانینا گئدیب اؤز قوشدوغو شعرلری اوخویوب دردلی-دردلی آغلاردی. جماعت اونو دؤره‌له‌ییب آغلاشاردیلار.

حضرت ام البنینین (س) وفات تاریخی باره‌ده موثق خبرلر الده اولماسا دا او حضرتین مقامی و منزلتینه خاطر بیر گونو، رسمی تقویمده ضعیف روایتلره اساسلاناراق او حضرتین وفات گونو کیمی قید اولونوب.

امّ الْبَنین‌، فاطمه‌ بنت‌ حزّام‌، حضرت علی‌نین (ع) ایکینجی خانیمیسی، آتاسی ابوالمجْل‌ حزّام‌ بن‌ خالد، بنی‌ کلاب قبیله‌سیندن. (طبری‌، ۵/۱۵۳) آناسی لیلی‌ یا ثمامه،‌ سهیل‌ بن‌ عامر بن‌ مالک‌ین قیزی ایدی. (ابن‌ عنبه‌، ۳۵۶؛ غفاری‌،/۱۷۴)

خانیم زهرانین(س)  وفاتیندان سونرا حضرت علی (ع) ام‌البنینله ائولنیب بو ائولیلیکدن 4 اوشاق صاحبی اولدولار: عباس‌، عبدالله‌، جعفر و عثمان. کی اونلارین دؤردو ده کربلا صحنه‌سینده شهادته چاتدیلار.‌ (ابوالفرج‌، ۸۲ -۸۴؛ ابن‌ عنبه‌، ۳۵۶؛ حسّون‌،/۴۹۶)

آما ام‌البنینین (س) اسلام امّتینه وئردیگی درسلر:

1. ام‌البنین کربلا صحنه‌سینده یوخیدی آما، اسیرلری مدینه شهرینه داخل ائله‌ینده بیر نفر  اونون اوغلانلاری‌نین شهادتینی اونا خبر وئرمک ایسته‌دی، آما او ایل سؤزو بو اولدو: « منه حسیندن (ع) خبر وئرین». سونرا اوغلانلاری‌نین امام حسینله (ع) بیرلیکده شهید اولدوغونو ائشیدنده دئدی: «ائی کاش اوغلانلاریم و دونیادا نه وار حسینه (ع) فدا اولایدی آما او دیری قالایدی». (همو، ۴۹۶-۴۹۷؛ محلاتی‌، ۳/۲۹۳)

2. امام باقر(ع) بویوروب: او حضرت بقیعه گئدیب ائله یانیقلی مرثیه اوخویاردی کی قلبی‌نین قساوتینه رغماً مروان‌دا آغلاردی. (مقاتل الطالبین ص۵۶ و بحارالانوار ج ۴۵ ص ۴۰)

3. ام‌البنین هر گون عباسین (ع) اولادی‌نین الیندن یاپیشیب بقیع قبرستانینا گئدیب اؤز قوشدوغو شعرلری اوخویوب دردلی-دردلی آغلاردی. جماعت اونو دؤره‌له‌ییب آغلاشاردیلار. (ابوالفرج‌، ۸۵/چاپ قاهره/مصر)

تانیدیغز مشهور ساریمساقدان، آنتی بیوتیکدن نئچه برابر تأثیرلی شربت دوزلتمک اولار. البته آنتی بیوتیک تمامً حیات و بیوتیک ضدی‌دیر آما ساریمساق شربتی فقط چیرکی قورودار.

تانیدیغز مشهور ساریمساقدان، آنتی بیوتیکدن نئچه برابر تأثیرلی شربت دوزلتمک اولار. البته آنتی بیوتیک تمامً حیات و بیوتیک ضدی‌دیر آما ساریمساق شربتی فقط چیرکی قورودار. بو شربت چین ملّتی طرفیندن ایللر بویو بدنین امنیّت سیستمینی گوجلندیرمک اوچون استفاده اولونوب. بو شربتین دوزلتمه‌سی چوخ ساده‌دیر و ائوده اولان ملزمه ایله دوزلتمک اولار.

ساریمساق شربتی بدنین امنیت سیستمینی گوجلندیرر و قان فشاری و قانین پیس کلسترولونو تنظیمه سالار.

بو شربت سویوق دَیمه و آنفولوآنزانین‌دا قاباغینی آلار.

ساریمساق شربتی‌نین دوزلتمه طرزی:

لازم اولان موادّ:

8 دیلیم سویولوب ازیلمیش ساریمساق

200 میلی لیتر آلما سیرکه‌سی

200 میلی لیتر طبیعی بال

حاضرلانما طرزی:

سویولوب ازیلمیش ساریمساغین ایچینه بال و سیرکه‌نی آرتیرین و 10-15 دقیقه میکسِرله چالین.

سونرا اونو آغزی باغلی شوشه قابدا 5 گون بویو یخچالدا ساخلایین.

ماده لرین یاخشی ترکیبی اوچون اونو گونده بیر دفعه چالخالایین.

5 گوندن سونرا بو شربت ایچمگه حاضردیر.

نئجه مصرف ائدک؟

سحرلر نشتاب ایکی چای قاشیغی قدر شربتدن بیر لیوان سودا حل ائله‌ییب میل بویورون. شربتین توند دادی اولدوغونا گؤره اونو بیر قورتومدا ایچمه‌یین.

بو شربتی منظم ایچسز چوخلو عفونتلرین قاباغینی آلمیش اولارسیز.

انسان بدنینده هضم سیستمینه عاید اولان “مزنتر” آدلی یئنی ارگان کشف ائدیلیب. 

 خبر آژانسلاری‌نین وئردیگی خبره گؤره، 2012-جی ایلدن ایرلندلی پروفسور کئلوین کوففی‌نین آپاردیغی تحقیقاتلار نتیجه‌سینده معلوم اولوب کی، " مزنتر " آیری-آیری حصه‌‌لردن دئییل، بوتؤو ارگاندان عبارتدیر. بو کشف نتیجه‌سینده انسان بدنینده ارگانلارین سایی 79-ا یوکسلیب.

 ارگان اولاراق اعلان ائدیلن حصه‌‌جیگین ساختاری‌نین تام اولاراق نه‌دن عبارت اولماسی هله ده معیّن‌لشدیریلمه‌ییب. لاکین عالملر بو کشفدن سونرا، علمین انسان ارگانیزمی حقّینده 100 ایللردیر، سهو فکرده اولدوغونو اعتراف ائدیبلر. بو تحقیقن نتیجه‌سی The Lancet Gastroenterology & Hepatology نشریه‌سینده چاپ اولوب.

الف: یئری و ارزشی

اجتماعی رابطه‌لرین گوجلنمه‌سی‌نین اساسلی یول‌لاریندان بیری، پیسلیکلرین مقابلینده یاخشیلیق ائتمکدیر. پیسلیک یاخشیلیغینان جواب وئریلدیگی زمان، شخصین یاتمیش وجدانی آییلار و نفرتلر محبته چئوریلر. انسانلاری ایچ و وجدان محکمه‌سینده محاکمه ائتمک اوچون، فقط باغیشلاماق و یاخشیلیق یولوندان استفاده ائتمک اولار. بئله‌لیکله او، اؤز ایچینده اوتانار و پیس ایشینه گؤره شرمنده اولار.

مؤمن و اجتماعی انسان انتقام اهلی اولماییب، اؤزگه‌نین پیس عملی مقابلینده اونونلا قطع رابطه ائله‌مه‌ییب معاشرتینه ادامه وئرمه‌لیدیر. چونکی اوزاقلیق و رابطه‌سیزلیک داها اوزاقلیغیا و حتی دوشمنلیگه سبب اولا بیلر آما رابطه چوخالدیقجا دوستلوق احتمالی، چوخ مقداردا آرتار. بئله‌لیکله دوستلارین سایی گوندن گونه آرتار.

قرآن کریم بیزلره پیسلیک مقابلینده یاخشیلیق ائله‌مگه دعوت ائلیر. مثلاً فصلت سوره‌سی‌نین 34-جو آیه‌سینده بئله بویورور: وَلاَ تَسْتَوِی الْحَسَنَةُ وَلاَ الْسَّیِّئَةُ ادْفَعْ بِالَّتِی هِیَ أَحْسَنُ فَإِذَا الَّذِی بَیْنَکَ وَبَیْنَهُ عَدَاوَةٌ کَأَنَّهُ وَلِیٌّ حَمِیمٌ؛

البته دونیادا پیسلیک و یاخشیلیق برابر دئییل. پیسلیگی لاپ یاخشی شکلده دفع ائله کی سنینله اونون آراسیندا دوشمنلیک اولان شخص، سنینله دوست و قوهوم کیمی اولسون.

و یا قرآنین رعد سوره‌سی‌نین 22-جی آیه‌سینده مؤمنلرین باره‌سینده بئله بویورور:

وَیَدْرَءُونَ بِالْحَسَنَةِ السَّیِّئَةَ أُولئِکَ لَهُمْ عُقْبَى الدَّارِ؛

پیسلیگی یاخشیلیقلا زایل ائلرلر. باقی دونیانین خوش عاقبتی اونلار اوچوندور.

قرآنین کریم آیری سوره‌ده پیغمبری دوشمنلرینن مدارایا و کئچینمگه چاغیریر. . قرآن مؤمنون سوره‌سی‌نین 96جی آیه‌سینده بئله بویورور:

ادْفَعْ بِالَّتِی هِیَ أَحْسَنُ السَّیِّئَةَ نَحْنُ أَعْلَمُ بِمَا یَصِفُونَ؛

سن اونلارین آزار و اذیتلرینی داها یاخشی رفتارلا دفع ائله، بیز اونلارین دانیشیغی (نین جزاسینی) داها یاخشی بیلیریک.

امام رضا (ع) بو زمینه‌ده لاپ یاخشی اولگولردن ساییلیر. او حضرت بئله بویورور:

بیز اهل بیتین یولو، بیزه پیسلیک ائله‌یَنین مقابلینده یاخشیلیق ائتمکدیر. آند اولسون الله‌ا بو یولدا عاقبت بخیرلیک وار.( حمیری، قرب الاسناد، ص 386؛ کلینی، الکافی، ج 2، ص 488؛ مجلسی، بحارالانوار، ج 90، ص 367؛ بحرانی، تفسیر برهان، ج 1، ص 395.)

ب: نمونه‌لر

پیغمبر (ص) و اماملارین (ع) رفتاریندا بو باره‌ده چوخلو نمونه‌لر وار کی اونلارین نئچه‌سینی مثال اوچون بوردا گتیریریک.

بیرینجی:

قریش، حضرت محمدین (ص) اذیتی اوچون الیندن گلنی اسیرگه‌مه‌دی. او حضرته و اصحابینا یئمک یولونو باغلادی و اونلاری اوشاقلی بؤیوکلو اوچ ایل آج قویدو. اونلاری شکنجه وئرمکدان علاوه اونلاری اؤلدورمگه دا ال ووردو کی نهایتده او حضرت مکده‌دن مدینه‌یه کؤچمگه مجبور قالدی.

دفعه‌لرله مدینه‌یه حمله ائله‌دیلر و او حضرتین عزیزلرینی شهید ائله‌دیلر. عمیسی‌نین جسدینی مُثله ائله‌دیلر. هجرتین سککیزینجی ایلینده مکه شهری، مسلمانلار طرفیندن فتح اولدو و او حضرتین جارچیسی بئله ندا وئردی:

بو گون محبت و عطوفت گونودور، انتقام گونو دئییل !

سونرا هامینی آزاد قویدو و هئچ کسی محاکمه‌یه چکمه‌دی. بوتون قاتل‌لر باغیشلاندی مشرکلرین باشچیسی ابوسفیانین ائوی دارالأمان اولدو و اونا و اوغول‌لارینا او اؤلکه‌نین لاپ ارزشلیسی اولان 300 دوه وئریلدی. (مجلسی، بحارالانوار، ج 21، ص 91.)

ایکینجی:

ابن ملجمین زهرلی قیلینجی‌نین اثرینده حضرت علی (ع) هجرتین 40-جی ایلی‌نین رمضان آیی‌نین 19-جو گونو هوشدان گئتدی. نئچه لحظه سونرا حضرت هوشا گلنده امام حسن (ع) او حضرته بیر قاب سوت گتیردی. حضرت او سوتون بیر آزین ایچیب قالانینی ابن ملجمه وئرمگینی امر بویوردو. سونرا اوغلو امام حسنه (ع) بویوردو: اونون باره‌سینده سیزین بوینوزدا حقّیم وار. اونون یئییب ایچمه‌سین یاخشیلادین. اولدوغو آنا قدر اونونلا مهربان اولون و منیم یئییب ایچدیگیمدن اونا دا وئرین !

امامین سوتون ابن ملجمه آپاراندا او حضرتین سؤزلرینی اونا دئدیلر. ابن ملجم شرمنده‌لیکله سوتو ایچدی. (مجلسی، بحارالانوار، ج 42، ص 289؛ نوری، مستدرک الوسائل، ج 11، ص 79.)

بوتون کاییناتین ال - اله وئریب گونوموزو داغیتماغا مصمم اولدوغو گونلر هر بیریمیزین باشینا گله بیلر. آما حقیقتده بئله بیر شئیین حقیقتی یوخدور. اصلاً دونیانین بئله حمله‌نین تنظیمینه گوجو یوخدور. دونیانین قایدالاری اؤز یوللاریندا دوام ائلیرلر و بو، بیزیک کی بعضاً اونلارین یولو اوستونده دایانیریق. و یا عکسینه بیز ایسته‌مه‌دن بیرینی ناراحت ائدیریک. شاید بیرینه دَیمیشیق و یا بیری‌نین کاغاذلاری‌نین اوستونه سو تؤکموشوک. او دا اؤز الینده اولمایاراق حیرصلنیب.

بئله‌نچی شرایطده انسان اؤزونو کنترل ائتمه‌لی و جوّی اوندان آرتیق آلوولاندیرمامالیدیر. او آنلار اوچون بئش ساده یول وار کی ائلیه بیلک اؤزوموزو کنترل ائدک و جوّه حاکم اولاق.

1. حسّ ائتک، تأیید ائله‌مگه و جواب وئرمگه واخت قویون

مثلاً بیری سیزه توهین ائدن زمان ایلک ایشیز درین نفس چکمک اولسون. هاوانی آغ جیگرلریزه چکین و ائشیگه اؤتورن زمان، توهین ائدن شخصله اؤز آراسینداکی فاصله‌نی حسابلایین. بو فاصله‌نی آرادان آپارین. اؤز حسّلریزی دیله گتیرن زمان اونوندا حسّلرینه دقّتیز اولسون.

2. زهرلی انسانلاردان فاصله‌لی اولون

انسانلارین هامیسی سیزه ضربه وورماق فکرینده دئییل‌لر آما بعضیلری سیزه صدمه وورماقدان لذّت آپارارلار. بیز بو انسانلارین نییه بئله اولماقلاری باره‌ده تحلیل وئرمگه و یا اونلارین مرضینی تشخیص وئرمگه احتیاجیمیز یوخدور. واختیمیزی داها ارزشلی زادلارا صرف ائتمه‌لی‌ییک.

بیری اؤز عمدی و یا غیر عمدی اشتباهلاریندان عذر ایسته‌مه‌سه، بو بیر قیرمیزی پرچم علامتیدیر. و یا بیری سیزین عذروزو قبول ائله‌مه‌سه بو دا قیرمیزی پرچم ساییلیر. بئله فرض ائله‌یین اوشاق اوینونودور و او دردسر یاراتماق ایسته‌ییر. بوتون گوجوزو بئله‌نچی آداملاردان اوزاقلاشماغا صرف ائدین. آما بو شخص مشتری و یا رئیسیز و یا قاچا بیلمه‌دیگیز هر هانسی بیر شخص اولسا اونون یاراتدیغی دردسرلردن لذّت آپارین.

3. مقابل طرفی درک ائدین

اؤزوزو اونون یئرینه قویون. اونون مشکلونو حل ائله‌مگه یول آختارین. باخین گؤرون اونون اورگینی سیندیرمادان سؤزله اونو آراملادا بیلرسیز. بعضاً بالاجا گولومسه‌مه اونو بحراندان قورتارا بیلر.

4. اؤز گوونیزه اعتبار وئرمک اوچون اؤزگه‌نی معیار بیلمه‌یین

اؤز گوونیزی یاخشی درجه‌ده ساخلاماق اوچون دوستلارا و اطرافداکیلارا دایانساز، اونلارین گلیب سیزه ضعیفلتمگه قاپینی آچیق قویوبسوز. سیز قاپی‌نین آچارینی اؤز شادلیق موتوروزا تاپیشیرمالیسیز. اؤز ایچیزده اؤزوزه اعتماد و عشقی یارادا بیلمه‌سز، اطرافداکیلارین هیجان دالغالارینی آلاجاقسیز. اطرافداکیلارین چوخو دا سیزی تماماً تانیمیرلار و احتیاجلاریزین نه اولدغونو کامل بیلمیرلر.

گولون، اؤزوزو سئومک و عاشق اولماق حسّینی اؤزوزده تقویت ائدین کی اطرافین یوللادیغی دالغالار چوخ کیچیک و اهمیتسیز گؤرونسون.

5. اؤزوزدن موغایات اولماغا واخت قویون

پیس بیر حادثه و یا گوندن سونرا روحیه‌زی قایتارماغا اؤزوزه شاد برنامه‌لر نظرده آلین و ایندیکی زمانی درک ائله‌مگه اؤزوزه کؤمک ائدین.