بو ایشلری گونده گؤرون کی ساغلیغیز و اؤز گوونیز یئرینده اولسون
یازار : میرزه عبدالصمد ملکی | بؤلوم : ساغلاملیق
+0 به یه ن
خوشا گلمز سوآل‌لارین بیری‌ده بودور کی بیری سیزدن سوروشا: «ائله بیل بیر آز کؤکلیبسن؟ هن؟» مسلماً هئچ کسین بئله سوآلا جواب وئرمک مجبوریتینده قالماقدان خوشو گلمز و اؤز گوونی آزالار.
بو سوآل ایله اوز به اوز اولماماق اوچون سیزه بیر سئری ایشلر گؤرمگی پیشنهاد ائلیرم:
یئمک هوسلریزی کنترل ائله‌یین
بو ایش نه قدر ده چتین اولسا سیزین ساغلیغیز اوچون لازم بیر ایشدیر. یاخشی اولار هر نه تئزراق بو ایشی گؤره‌سیز.
هامی بیلیر کی سالم غذا برنامه‌سی استرسی آزالدار و روحیه‌نی گوجلندیرر.
کفایت قدر یاتین
تحقیقلر، آز یاتانلارین داها آرتیق روحی مشکل‌لره دوچار اولدوغونو گؤستریر. یوخو انسانین بئینینه ریکاوئری امکانی وئریر و صاباحین ایشلرینه داها گوجلو اولماغا امکان یارادیر. یوخوسوزلوق سیزین ساغلیغیزا ضرر وورار.
تحرکوز اولسون
هئچ اولماسا سحرلر پیاده‌رولیک ائله‌یین. یئریمگیز ائله یئیین اولمالدیری کی نفس - نفس ووراسیز. یوخسا یاواش یئریمگه تحرک دئمک اولماز. ورزش ایله قان جریانی نظمه دوشر و بدنین بوتون هورمونلاری دوز ایشلر.
ساغلیغیزی کنترل ائله‌یین
نئچه مدتدن بیر حتماً آزمایشه گئدین کی ساغلیغیزین یئرینده اولدوغوندان مطمئن اولاسیز. ناخوشلوغون قاباغینی آلماق درماندان چوخ داها راحتدیر.
اجتماعی اولون
اوتانجاق‌دا اولساز جامعه‌دن اوزاق گزمه‌مه‌لیسیز. بحثلرده شرکت ائله‌یین، گولومسه‌یین، غریبه‌لرله دانیشین. دسته جمعی قرارلاشین و گزمگه گئدین. بو ایشلر سیزین اؤز گوونیزی و عزّتیزی آرتیرار.
مشغولیتیز اولسون
اولا یبلر انسان سئودیگی ایشلری گؤرمکله چؤرک قازانا بیلمه‌سین، آما اونلارا دا واخت آییرمالیدیر. بو ایش سیزی روحیه‌لندیرر و وارلیغیزین فایدالی اولدوغونو تأکید ائلر.
گونده‌لیک برنامه‌ز اولسون
گونون اوّل 10 دقیقه‌سینی اؤزوزه برنامه وئرمگه اختصاص وئرین. هر گونوز اوچون برنامه‌ز اولسون.
هر گونوزه بیر هدف تعریفله‌یین. همان گون هدفه چاتماساز دا اشکالی یوخدور.
چینده روبات راهنمایی پولیسی دوزلیر !
یازار : میرزه عبدالصمد ملکی | بؤلوم : تكنولوژی
+0 به یه ن
چنین شیانگ یانگ شهرینده پیاده عابرلره اخطار وئرمک اوچون روبات پولیس دوزلیب.
بو روبات پولیس «هوبی» ایالتین مرکزی اولان شیانگ یانگ شهری‌نین مرکزینده نصب اولوب و قیرمیزی چیراقدان کئچن عابرلری دایاندیریر.
شهر مقاملاری‌نین اومیدی وار بو روباتین سایه‌سینده جماعت قیرمیزی چیراقدان رد اولما عادتلرینی باشدان چیخارتسینلار.
روبات پولیس، الی ایله علامتلر گؤستریر و باشینداکی دوربین ایله خطاکارلارین تصویرینی گؤتورور.
دونیادا بیرینجی چاپ اولموش کؤرپو دوزلدی
یازار : میرزه عبدالصمد ملکی | بؤلوم : تكنولوژی
+0 به یه ن
12 متر اوزونلوغوندا و تقریبا 2 متر ائنی اولان بو کؤرپو پلی پروپلین ترموپلاستیک تزریقی ایله سیمان جنسیندن دوزلیب.
دئو آسا زادلارین دوزلمه‌سی سون ایللرده چوخ یاییلیب و ایندی اونلارین دوزلتمه‌سینده مختلف ماده‌لردن استفاده اولونور.
مثال اوچون 2016-جی ایلینده اروپادا بیر اداری ساختمان تماماً پرینترله دوبی‌ده سیمان ترکیبی ایله دوزلدی.
آیری طرفدن ایتالیالی بیر شرکت دئو آسا بیر پرینترین دوزلتمه‌سینده‌دیر کی پالچیق و طبیعی فیبرلرله مختلف قورقولار دوزلده بیله‌جک.
هابئله MX۳D هلندلی شرکت، آمستردام کانالی اوستونده اوچ بُعدلی پرینترله پولاددان کؤرپو دوزلتمک عرفه‌سینده‌دیر.
سوماغین آریخلاتما خاصیتی وار
یازار : میرزه عبدالصمد ملکی | بؤلوم : ساغلاملیق
+0 به یه ن
سوماق، آریخلاتما خاصیتینه مالک اولماقدان علاوه هضم سیستمینه ده کؤمک ائلر.
جهانی بهداشت سازمانینا گؤره، کؤک اولماق و آرتیق چکی‌یه صاحب اولماق، بدنده یاغلارین بیر یئره ییغیلیماسیندان عمله گلیر و بئله‌لیکله شخصین ساغلاملیغینی مختل ائلیر. سون ایللرده دونیادا آرتیق چکی‌لنمک گوندن گونه آرتماقدادیر و حتی اوشاقلاری‌دا مبتلا ائلیر. یاییلان آمارا گؤره، تهران جماعتی‌نین یاریسی‌نین آرتیق چکیسی وار و اونلارین یوزده 20-سی چاغ ساییلیر. بو مسأله‌نین اساس حلی تحرک اولسا دا اونون کناریندا بعضی ماده‌لری یئمکله درمانا کؤمک ائتمک اولار.
سوماق، او ماده‌لرین بیریدیر. سوماغین خاصیتلریندن بونلاری سایماق اولار: بدنین یاغینی اریتمک، سرطانلی سلول‌لاری آرادان آپارماق، اورک بولانمانین علاجی، آلزایمرین قاباغین آلان، اورک دامار ناخوشلوقلارا فایدالی، لثه‌لرین گوجلندیرمه‌سی، قان فشارینی کنترل ائتمک. هابئه سوماق آنتی اوکسیدان، ویتامین C و اومئگا 3 ایله دولودور.
سوماغی دمله‌ییب ایچمک بدنین یاغینی اریدر و اندام تناسبینه ده کؤمک ائلر.
اوست اوسته بیتکی دمله‌مه‌لرین چوخو بدنین پاکلانماسی، متابولیسمین تحریکی و ادرارین چوخالماسینا کؤمک ائلر.
آما سوماغی نئجه دمله‌یک؟ بیر ایکی قاشیق دارتیلمش سوماغی داغ سویون ایچینه تؤکوب چای کیمی دمله‌یین. سوماغین طبیعتی‌نین سویوق اولدوغونا گؤره یاخشی اولار اونا بیر آز دا آغ نابات آرتیراسیز سونرا موادی یاتیخاندان سونرا سوزگچ ایله سوزون و میل ائله‌یین. نوش اولسون !
دئمه‌لی‌یم تازا سوماق مسموم ائده بیلر. اونا گؤره حتما و حتما قورو سوماقدان استفاده ائله‌یین.
هابئله سویوق مزاج انسانلار، سوماغی آیری ایستی مزاجلی بیتکی‌لرله بیرلیکده استفاده ائله‌سینلر.
تبریز شهرداری خبر وئردی: خارجده اولان تبریزلی‌لر تبریزده 3 تریلیون سرمایه یاتیریبلار
یازار : میرزه عبدالصمد ملکی | بؤلوم : عمومی
+0 به یه ن
تبریز شهرداری دئدی: کئچن اوچ ایلده تبریز شهرینده مسکن، هوتل و توریزم زمینه‌سینده 7 تریلیون تومن سرمایه یاتیریلیب کی بونون 3 تریلیون تومنی خارجده اولان تبریزلیلرین قویدوقلاری سرمایه‌دیر.
شهرداری‌نین عمومی رابطه‌لری‌نین وئردیگی خبره گؤره، صادق نجفی ایران اوتاغی نماینده‌لری‌نین سککیزینجی دوره‌سی‌نین 21-جی اوتوروموندا دئدی: تبریزین 2018-جی ایلینده اسلامی اؤلکه‌لرین توریستی پایتختی کیمی سئچیلمه‌‌سی مشخص بیر پروسه‌دیر. اسلامی اؤلکه‌لر سازمانی کونیا، مدینه، تبریز و باکی‌نی ۲۰۱۶، ۲۰۱۷، ۲۰۱۸ و ۲۰۱۹ ایللر اوچون اسلامی اؤلکه‌لر توریزم پایتختی کیمی سئچیب.
او آرتیردی: تبریزین قدیم تاریخ و مدنیتی همیشه اقتصادی حوزه‌لرله باغلی ایدی. ایپک یولوندا واقع اولماق، تبریزین بؤیوک اوست اورتولو بازاری و اؤلکه‌نین بیرینجی بازرگانی اوتاغی‌نین تبریزده تأسیس اولماسی، همیشه تبریزین، آذربایجانین و ایرانین اقتصادی، اجتماعی و فرهنگی هدفلرینه خدمت ائتمک مسیرینده اولوب.
او دئدی: «تبریز ۲۰۱۸»ین گئنیش ساحه‌لری تبریزه مخصوص دئییل و اؤلکه‌میز اوچون‌ده اقتصادی و فرهنگی ساحه‌لرده بؤیوک فایدالار یئتیره‌جک.
نجفی دئدی: کئچن اوچ ایلده تبریز شهرینده مسکن، هوتل و توریزم زمینه‌سینده 7 تریلیون تومن سرمایه یاتیریلیب کی بونون 3 تریلیون تومنی خارجده اولان تبریزلیلرین قویدوقلاری سرمایه‌دیر.
او آرتیردی: اؤلکه‌نین بیرینجی زیبیل یاندیرما کرخاناسی‌نین تبریزده یولا سالینماسی فرانسه‌لی شرکتین مشارکتی ایله 290 میلیون دولار دَیَری ایله BOT شکلینده منعقد اولوب و اجرا مراحلی‌نین آخرینده‌دیر.
او، هابئله تبریزه یولا دوشن «تبریز باشماغیندان حمایت» کمپینینه اشاره ائله‌ییب آرتیردی: سون گونلرده تبریزلی‌لر و اصنافین طرفیندن یولا دوشن بو کمپین، داخلی تولیددن حمایت اوچوندور و تبریز جماعتی‌نین اقتصادی تعصبیندن و مقاومتی اقتصادین مصداقلاریندان حکایت ائلیر.