یوخونو نئجه نظمه سالاق؟
یازار : میرزه عبدالصمد ملکی | بؤلوم : ساغلاملیق
+0 به یه ن
تحقیقلر ملاتونین هورمونونون انسانین یوخو مسأله‌سینه مستقیم تأثیرلی اولدوغونو گؤستریر. یوخوسوز اولساز، اولا بیلر ملاتونین کمبودی ایله اوزلشمیش اولاسیز.
ملاتونین، بدنین بیولوژیک ریتملرینی تنظیمه سالار و اؤزو، پاراکرین و آندوکرین کیمی آیری هورمونلارین آخدیرماسینی عهده‌سینه آلیب. بو هورمون هابئله، بدنده آنتی اکسیدان‌دیر و بدنین زهرینی آلیر.
بعضی یئمه‌لیلرده بو ماده یوخاری مقداردا وار:
آناناس، موز، ایکی باشلی آرپا، قولانچار (مارچوبه)، قاپیز و کدو توخومو کیمی بعضی میوه‌لرین و گؤیلرین قوروموش توخوملاری، گیرده‌کان و پوسته کیمی خوشکه‌بار، سوغان و زنجفیل، یوخونون نظمه دوشمه‌سینه سبب اولار.
بونلاردان علاوه راحت یاتماق اوچون، یاتیلان یئرین قارانلیق اولماسی مهم نقش اویناییر. یاتماغا بیر ایکی ساعت قالمیش‌دا ائوین ایشغینی آزالتماق یاخشی اولار.
یادیزدا اولسون سحر و ناهاردان سونرا گونش معرضینده اولماساز، بدنیزده ملاتونین تولیدی مختل اولار و گون بویو بدنیز سوست و یورقون اولار.
گون بویو فعال و گون قاباغیندا اولماغا چالیشین کی سحرلر داها قیوراق و دینج یوخودان دورا بیله‌سیز.
جنّتین لاپ یاخشیلاری کیملردی؟
یازار : میرزه عبدالصمد ملکی | بؤلوم : دین
+0 به یه ن
جنّته یول تاپا بیلنلرین بعضیسی‌نین مخصوص یئری وار.
بیر کیشی خانیمیسینا بئله تاپیشیریر: گئت خانیم فاطمه زهرانین (س) محضرینه سوروش کی من او حضرتین شیعه‌لریندنم یوخسا یوخ؟
او خانیم، خانیم فاطمه زهرانین (س) محضرینه چاتیب مطلبی سوروشور. خانیم زهرا (س) بویورور: امری ائله‌دیگیمزی یئرینه گتیرسن و نهی ائتدیگیمیزدن اوزاق گزسن، بیزیم شیعه‌میزسن یوخسا دئییلسن.
او خانیم ائوه قاییدیب خانیم فاطمه زهرانین (س) بویوردوغونو ارینه دئییر. کیشی، جوابی ائشیدندن سونرا ناراحت اولوب قیشقیردی: وای اولسون منه نئجه اولار انسان گناه و خطایا بولانماسین؟ بئله‌لیکله من همیشه جهنّمده یاناجاغام.
او خانیم بیر داها خانیم فاطمه زهرانین (س) محضرینه چاتیب اری‌نین ناراحاتلیغینی و سؤزلرینه او حضرتین محضرینه یئتیردی. حضرت بویوردو: حیات یولداشینا دئ کی؛ دوشوندوغون کیمی دئییل چونکی بیزیم شیعه‌لریمیز جنّت اهلی‌نین لاپ یاخشیلاریدیلار. آما بیزی و دوستلاریمیزی سئونلر و دوشمنلریمیزله دوشمن اولانلار، عملده گناهکار اولوب امر - نهی‌لریمیزله مخالفت ائدنلر آما دیلی و اورگی بیزیمله اولانلار دا بیزیم واقعی شیعه‌میز اولماسا بئله، جنّت اهلیدیر. منتهی گناهلاری‌نین پاکلاندیغیندان سونرا.
بلی، بئله‌لیکله دونیا چتینلیکلری و یا قیامت عذابلاری و یا جهنمین اوّل طبقه‌سینده‌کی کیفرلریله گناهدان پاکلاناندان سونرا، بیزه خاطر جهنمدن قورتولوب بیزیم رحمت کناریمیزدا منزل تاپاجاقلار.
منبع:بحار الانوار، ج ۶۸، ص ۱۵۵
تازا واکسن بئش نفرین ایدزینی توختاتدی
یازار : میرزه عبدالصمد ملکی | بؤلوم : ساغلاملیق
+0 به یه ن
اسپانیالی عالملر ایدز اوچون دوزلتدیکلری واکسن ایله 5 ناخوشو توختادیبلار و ایندی 7 آیدیر کی اونلارین بدنینده ایدزدن اثر یوخدور.
دیلی میلین وئردیگی خبره گؤره، بو واکسن اسپانیالی محققلرین واسطه‌سی ایله دوزلیب. ناخوشلار بو واکسنی ایشلتمکله داها ضد ویروسی (ARV) داوالارا احتیاجلاری اولمایاجاق.
البته بو واکسن داها بؤیوک کلینیکی آزمایشلرده سینانمالیدیر. آما عالملرین اینادیغینا گؤره، بو داوا تأثیرلی اولاجاق.
بو موفقیتلی آزمایش، 30 ایل نتیجه‌سیز چالیشمالاردان سونرا عمله گلیب.
بارسلونا شهری‌نین IrsiCaixa AIDS تحقیق مؤسسه‌سی‌نین عالملریندن اولان دکتر بئاتریز موث، بو باره‌ده دئییر: بو مسأله، واکسن درمانی طریقی ایله بدنین T سلول‌لارینا ویروسو کنترل ائله‌مکی اؤیرتمک اولار. بو نتیجه، بو ایده‌نین انسانلاردا بیرینجی موفقیتی ساییلیر.
پیشگیری واکسنلر تولیدی نتیجه‌سیز قالاندان سونرا عالملر درمانی واکسنلرین تولیدینه اوز گتیردیلر. اونلارین هدفی ناخوشلارین بدنینده ARV داوالاریندان استفاده ائله‌مه‌دن ویروسون نئچه آیلیق و نئچه ایللیک کنترلی‌دیر.
ایندی‌یه قدر درمانی واکسن آزمایش اولسا دا بو، بیرینجی موفقیتلی آزمایش اولوب کی بدنین امنیت سیستمینی گوجلندیره بیلیب.
ناسانین اعلامینا گؤره؛ یئره اوخشایان 7 سیاره تاپیلدی
یازار : میرزه عبدالصمد ملکی | بؤلوم : تكنولوژی
+0 به یه ن
ناسا عالم‌لری‌نین اعلامینا گؤره، اونلار، تحقیقلرینده یئر سیاره‌سینه اوخشار آزیندان 7 سیاره تاپیبلار.
ناسانین وئردیگی خبره گؤره، بو سیاره‌لر بیر اولدوزون دؤره‌سینه دولانیرلار. بو اولدوزون یئردن 40 مین ایشیق ایلی قدر فاصله‌سی وار.
گونش منظومه‌سیندن ائشیکده بئله کشف، چوخ نادر کشفدیر. هابئله تاپیلان سیاره‌لرین اندازه‌سی و سطحلری‌نین حرارتی باخیمیندان یئره اوخشاماسی اونلاردا سویون اولماسینا علامت اولا بیلر. یعنی اولا بیلر او سیاره‌لرده حیات و یا اوندان یوخاری تمدن آثاری اولسون.
آیری اِل نینو یولدادیر
یازار : میرزه عبدالصمد ملکی | بؤلوم : تكنولوژی
+0 به یه ن
دریا سولاری‌نین یوخاری قالخماسیندا عمله گلن اِل نینو پدیده‌سی، 2017-جی ایلینده ده یئر اوزونده اؤزونو گؤستره‌جک.
ایرانین دریایی جامعه‌سی «مانا»نین سایتی‌نین وئردیگی خبره گؤره، عالملری ال نینون پدیده‌سی‌نین 2017-ده باش وئره‌جگیندن خبر وئریرلر. بو پدیده‌نین اساس سببی سولارین قیزیشماسی و نتیجه‌ده دریا سولاری‌نین چوخالیب یوخاری قالخماسی اولور.
بو خبره اساساً «ال نینو» پدیده‌سی 2 دن 7 ایلدن بیر دفعه باش وئرر کی بو پدیده سون دفعه 2015-جی ایلینده باشلاییب 2016-جی ایلین سونلارینا قدر دوام ائتدی.
بو پدیده هاوا وضعیتینده چوخ تأثیر قویار و قیشلارین چوخ سویوق و یایلارین چوخ ایستی اولماسینا مخصوصاً آمریکا قاره‌سی‌نین شمال و جنوبوندا سبب اولار.