Gmail ده بعضی دگیشیكلیكلر اولاجاق
یازار : میرزه عبدالصمد ملکی | بؤلوم : تكنولوژی
+0 به یه ن
Gmail ده بعضی دگیشیكلیكلر اولاجاق
گوگل الكترون پوستی راحاتلاتماق اوچون تازا دگیشیكلیكلر ائتمگی بیلدیریب. ایندیلیكده Gmailسرویسینده ایمیل یوللاماق اوچون Composeدویمه‌سینی باسماقلا مكتوب یازماغا كیچیك بیر صفحه آچیلیر. بوندان اوّل ایمیل گؤندرمگه تازا بیر صفحه‌یه گئتمك لازیم اولوردو و ایندیكی حالت قاباقكیندان داها آز واخت آپاریر.
آما گوگلین اعلامینا گؤره تازا دگیشیكلیكلرله ایندیكی حالتی دگیشیب الكترون پوستدان ایستیفاده ائله‌مگی داها دا راحاتلاداجاق.
اوشاقلارین سالدیرقانلیغینی آغیز سویونون آنالیزی ایله تشخیص وئرمك
یازار : میرزه عبدالصمد ملکی | بؤلوم : تكنولوژی
+0 به یه ن
اوشاقلارین سالدیرقانلیغینی آغیز سویونون آنالیزی ایله تشخیص وئرمك
آغیز سویونون آنالیزی اوغلان اوشاقلاری‌نین سالدیرقان اولوب اولمادیقلارینی تشخیص وئرمگه كؤمك ائلیه بیلر. «سینسیناتی» مریض‌خاناسی‌نین طیبّی آراشدیرمالار موركزی‌نین موطالیعه‌لرینه گؤره آغیز سویونداكی هورمونلارین غیلظتی ایله اوشاقلارین سالدیرقانلیغی‌نین آراسیندا رابیطه وار.
موحقیقلر 7 - 9 یاشلاریندا اولان اون یئددی اوشاغین آغیز سویوندان نمونه گؤتوروبلر. بو اوشاقلارین روحی موراقیبتلره احتیاجلاری اولدوقلاری مریض‌خانا طرفیندن تأیید اولموشدو.
بو نمونه‌لری اوچ؛ تستوسترون، دهیرواپیاندروسترون و كورتیزول هورمونلاری سطحینده آنالیز اولوندو.
موحقیقلر گؤردولر اوشاقلارین سالدیرقانلیغی‌نین حدّی بو هورمونلارین اندازه‌سی ایله رابیطه‌لیدیر. اونلار سالیم و ناخوش اولمایان اوشاقلارین آغیز سولارین‌دا آنالیز ائله‌دیلر. اله گلن نتیجه بو مسأله‌نی تأیید ائله‌دی.
بو موحقیقلر اینانیرلار آغیز سویونون واختیندا و دقیق آنالیزی‌نین آیری فایدالاری‌دا اولا بیلر. اونلارین نظرینه، آغیز سویونون هورمونلارینی آنالیز ائله‌مك ناخوشلارین درمانی اوچون طبیبلره كؤمك ائلیه بیلر.
مریخه سفر ائتمگه بیر ار-آرواد لازیمدیر
یازار : میرزه عبدالصمد ملکی | بؤلوم : تكنولوژی
+0 به یه ن
خصوصی
بیر تشكیلات بیرینجی فضایی توریستین باشچی‌لیغی ایله 2018-جی ایله‌دك ایدّعالی بیر
طرحله مریخه سرنشینلی سفینه گؤندرمك فیكرینده‌دیر. اونلار بو سفینه‌ایله یوللاماق
اوچون بیر ار-آرواد آختاریرلار.
لایوساینسین وئردیگی خبره گؤره، بو طرح 2001-جی ایلده اؤز خرجی ایله گؤیه گئدن آمریكالی میلیاردر، دنیس تیتو طرفیندن ایجرا اولاجاق. اونلارین اینسانلاری مریخ سیاره‌سینه یئندیرمك قصدلری یوخدور بلكه سیاره‌لرین چوخ نادیر حاللاردا باش وئرن بیر سیرادا دوزولمكلریندن ایستیفاده ائدیب، مریخین كناریندان رد اولماق قصدلری وار.
تیتو اؤز طرحینی آمریكانین میلّی مطبوعات كلوبوندا مطرح ائدیب خبری كونفرانسدا دئدی: «مریخین ایلهام بونیادی» آدیندا بیر تشكیلات بو مأموریّتین حامیسی اولاجاق.
تیتو امیدوارلیغین بیلدیردی كی لازیم اولان راكئت و سفینه‌نین بازاردان آلیب ایكی نفری 501 گونلوك دولاندیرا بیلن شكلده دَییشیب مریخه طرف گؤندره.
تیتو دئییر ار-آروادی بو سفینه‌نین سرنشینلری كیمی یوللاماق، فضایا گئدنلرین تجریدلری اثرینده موبتلا اولدوقلاری روحی موشكوللرین قاباغین آلاجاق.
بو سفر قراردی 2018-جی ایلین ژانویه‌سینده باشلایا.
تیتو دئییر: 500 گون عرضینده مریخه سفینه یوللاییب قایتارماغین اله دوشمك فورصتی چوخ نادیردیر. بو فورصت الدن گئتسه همن ایشی ایكی اوچ ایلده گؤرمك اولار.
تیتو بو طرحی موشكوللو بیلسه‌ده اونو حیاتا مومكون بیلیر.
روسیهده گؤی داشی‌نین تیكه‌لری تاپیلدی
یازار : میرزه عبدالصمد ملکی | بؤلوم : تكنولوژی
+0 به یه ن
نئچه گون آختاریشدان سونرا روس عالیملری،جومعه گونو روسیهده اورالین گؤیونده پارتلایان گؤی داشی‌نین تیكه‌لرینی تاپماغا موفق اولدولار.
فرانسه خبرگوزاریسی‌نین وئردیگی خبره گؤره، روس عالیملری چلبیانسك شهری و اورالین اوستونده پارتلاییب بو منطقه‌نین موختلیف یئرلرینده یئره دَیَن گؤی داشی‌نین بعضی تیكه‌لری‌نین تاپماسینی دئییبلر.
روسیه‌نین فوق‌العاده حاللار ویزارتی یكشنبه گونو اعلام ائله‌میشدی: بو گؤی داشی‌نین قطعه‌لری‌نین دوشمه احتیمالی اولان چرباركول گؤلونون غواصلار طرفیندن آختاریلماسی نتیجه وئرمه‌دی.
آما منطقه‌یه یوللانان اورال دانیشگاهی‌نین عالیملری بو گؤی داشی‌نین 50 تیكه‌سینی چرباركول گؤلونون یاخینلیغیندان تاپدیلار. تاپیلان تیكه‌لر یكاترینبورگ شهرینه یوللانیبلار.
علوم آكادمیسی عضوی و بو هیأتین رییسی ویكتور گروخفسكی‌نین دئدیگینه گؤره، تاپیلان تیكه‌لر بو گؤی داشی‌نین 'كندرایت'لر نوعی و یا همان داش جینسیندن اولماسینی بللی ائدیب. اونون یوزده اونونو دمیر تشكیل وئریردی.
ویكتور گروخفسكی دئدی: بو گؤی داشی 'چرباكول گؤی داشی' آدلانیب. اونون كیچیك تیكه‌لرینی گؤلون قیراغیندا تاپدیغیمزا گؤره اصلی قطعه‌لری‌نین چرباكول سولاری‌نین درینلیگینده اولما احتیمالی وار.
مرّیخده حیات ایزلری تاپماغا بیر آددیم
یازار : میرزه عبدالصمد ملکی | بؤلوم : تكنولوژی
+0 به یه ن
كئچن ایلین آذرینده "كیپ كاناورال" فضایی مركزدن گؤیه بیر اطلس راكتین توللانماسیله ایكی میلیارد یاریملیق پروژه‌نین سون مرحله‌سی باشلاندی. «گؤره‌سن مرّیخده حیات ایزلری وار؟» قدیمی سوآلینا جواب وئرمك اوچون.
دوققوز آی اون بیر گوندن سونرا "كیوریاسیتی" مریخ گزنی موفقیّتله 2.4 كیلومتر خطایلا مریخین موشخص اولان نوقطه‌سینه یئندی.
"كیوریاسیتی" بوتون سوآللارا جواب وئره بیلمه‌سه‌ده یئردن كنارداكی حیاتین علامتلرینی تانییا بیلر.
كئچن هفته، حاضیرلاماسی آلتی آی چكن بیر پروژه‌نین ایجراسیله بو علامتلرین تاپیلماسینا اومید چوخالدی.
"كیوریاسیتی" مریخ گزنی بیرینجی دفعه اولاراق مریخین اوستواسینداكی قایالارین بیرینه نفوذ ائدیب آزماییشگاهی تحقیقلر اوچون نمونه گؤتوره بیلدی. بو نمونه‌ده تحقیق ائله‌مگین، مریخ كؤره‌سی‌نین كئچمیشده حیاتین اولوب اولماماسی باخیمدان اهمیتی وار.
"كیوریاسیتی"، مریخین "گیل" جولاسیندا –مریخ اوستواسیندا درین بیر جولا- اؤز قازینتی‌سینی آپاردی. 6.4 سانتی متر درینلیگی و 1.6 سانتی متر ائنلیگینده بیر دلیك آچیب بوز رنگده یوموشاق پودر چیخارتدی.
بو، اینسانین آیری كؤره درینلیگینه بیرینجی نفوذ ائتمه‌سیدیر.
بو دلیگین تصویرلری صاباحیسی گون یئره موخابیره اولدو.
پروژه‌نین ارشد عالیمی پروفسور جان گروتیزینگر، بو نمونه گؤتورمگی، كیوریاسیتی‌نین مریخه یئنمه‌سیندن سونرا بو تیمین اَن بؤیوك موفقیّتی آدلاندیردی.
"كیوریاسیتی" مته‌سینی حاضیرلاماق آلتی آی چكدی. بو مته 2.2 مترلیك مریخ گزن روباتین قولونون آخیرینه قوشولوب. بو مته مریخ گزنین اون اساس علمی ابزارلاری‌نین آخیرینجی‌سیدیر.