موفق اوشاغین تربیت یول‌لاری
یازار : میرزه عبدالصمد ملکی | بؤلوم : اجتماعی
+0 به یه ن
ایش بیلن‌لر اوشاقلارا گونده‌لیک ایشلری گؤردورمگی اونلارین یاشاییش مهارتلری ایله تانیش اولماسی اوچون یاخشی یول بیلیرلر.
یاخشی آتا-آنا همیشه اوشاقلاری‌نین مشکل‌سوز و موفق اولماقلارینی ایستیرلر. آما بونون اوچون نئت و آیدین بیر یول یوخدور. آنجاق محققلرین بیر تعدادی بعضی ایشلری اوشاقلارین داها گوجلو و داها باشاریلی بؤیومه‌لری اوچون گؤرمگی مصلحت گؤرورلر:
اوشقالارا گونده‌لیک ایشلری گؤردورمک
اوشاقلارا گونده‌لیک ایشلری گؤردورمک اونلاری داها مهارتلی و اؤزگوون‌لی بارا گتیرر. بیر اوشاق ائوده قاب یوماسا بو، آیریسی‌نین اونون اوچون یومالی اولدوغو معناسیندادیر. بئله‌لیکله او نه اینکی بو ایشی بلکه ائوده ایش بؤلومونون گرکلی اولدوغونو اؤیرنه بیلمیر.
گونده‌لیک ایشلرده مشارکت ائدن اوشاقلار بؤیوینده آیریلاری ایله داها یاخشی ایش بیرلیگی آپارا بیلرلر.
اوشاقلاری گونده‌لیک ایشلره تشویق ائتمکله اونلار، یاشاییشدا پایلاری اولماق اوچون بیر سئری ایشلر گؤرمه‌لی اولدوقلارینی بیلیرلر.
یاشاییش مهارتینی اوشاقلارا اؤیرتمک
اوشاقلارا یاشاییش مهارتلری‌نین اؤیردیلمه‌سی
اوشاقلارین موفقیتی اوچون یول‌لارین بیری‌ده اونلارا یاشاییش مهارتلری‌نین اؤیردیلمه‌سیدیر.
پنسیلوانیا و دوک دانشگاه‌لاری‌نین محققلری آمریکانین باشا باشیندا 700 اوشاق باخچاسی و 25 یاش آراسی اوشاقلار اوستونده آپاردیقلاری تحقیق گؤستریر کی اوشاقلیقدا اجتماعی مهارتلری اؤیرنیلمه‌سی اونلارین 20 سونراکی یاشاییشلاریندا مستقیم تأثیری اولور.
بو 20 ایللیک مطالعه، اجتماعی مهارته صاحب اولان اوشاقلارین یعنی تشویقسیز اؤز یاشیتلارینا کؤمک ائتمک، اونلارین احساسلارینی بیلمک و اؤز مشکل‌لرینی حل ائده بیلمگی باشاران اوشاقلار، اجتماعی مهارتلری داها آز اولان اوشاقلارا گؤره داها موفق گله‌جگه صاحب اولماغا امکانلاری اولور.
اوشاقلاردان یوخاری انتظارین اولماسی
کالیفورنیا دانشگاهی‌نین محققلری 2001-جی ایلینده 600 اوشاق اوستونده اولان تحقیقلری گؤستردی کی والیدنلری‌نین اونلاردان انتظارلاری یوخاری اولان اوشاقلار داها آرتیق موفق اولورلار.
اوشاقلارنی گله‌جکده یوخاری یئرلرده گؤرمک انتظاریندا اولان آتا آنا حقیقتده اونلاری بو سمته هدایت ائلیرلر.
آشاغی یاشلاردا اوشاقلارا ریاضیات اؤیرتمک
نورث وسترن دانشگاهی‌نین محققلریندن اولان «گرگ دانکن» 35 مین اوشاغین اوستونده‌کی تحقیقده بیلدی کی اوشاقلارا آشاغی یاشلاردا ریاضیات اؤیرتمک اونلارا یوخاری امتیاز وئریر.
بو محققین نظرینه گؤره یاشاییشین اول ایللرینده ریاضیات و عددلر نظمی ایله تانیش اولماق اونلاری داها موفق ائتمکدن علاوه اونلارین اوخوما قابلیتینی‌ده گوجلندیریر.
شاغل آنالارا صاحب اولماق
هاروارد دانشگاهی محققلری‌نین نظرینه گؤره آنالارین ائودن ائشیکده اولماقلاری اوشاقلارین حالینا فایدالی اولور.
بو تحقیقه گؤره آنالاری ائشیکده شاغل اولان قیزلارین یوزده 23-و او بیری اوشاقلارا گؤره یوخاری تحصیل آلماق احتمال‌لاری داها چوخ اولور. هابئله بو مطالعه‌یه اساساً آنالاری ائشیکده ایشله‌ین اوغلانلار بؤیوکلوکده ائو ایشلری گؤرمگه داها میل‌لی اولورلار و هفته‌ده 7.5 ساعت داها آرتیق اوشاق ساخلاییر و 25 دقیقه داها آرتیق ائو ایشی گؤرورلر.
اوشاقلارا مناسب آد قویماق
اوشاقلارا تلفظی راحت آدلارین قویولماسی اونلارین موفقیتینده مستقیم تأثیری اولدوغونو گؤستریر.
سیزین‌ده بو مشکل‌لریز اولسا حتماً هوشلو آدامسیز
یازار : میرزه عبدالصمد ملکی | بؤلوم : اجتماعی
+0 به یه ن
بعضیلری هوشلو انسانلارین مشکل‌سوز انسانلار اولدوقلارینی تصور ائله‌ییرلر نییه‌کی اونلار هر هانسی مشکلو چوخ راحات حل ائله‌یه بیلرلر. آما حقیقت بئله دئییل.
هوشلو انسانلار نه قدر ده هوشلو اولسالار نهایتده انساندیلار. حتی اولا بیلر اونلارین مشکل‌لری آیریلارینا گؤره داها چوخ و بوروشوق اولسون. سیزین اوچون هوشلولره مخصوص نئچه مشکلو بوردا گتیرمیشیک. بو مشکل‌لر سیزده ده اولسا بیلین کی هوشوز او بیریلره گؤره یوخاریدیر.
1. معمولی دانیشیقلار حوصله‌زی آپاریر
کئف احوال ائله‌مک و گونده‌لیک سؤزلری دانیشماق سیزه داریخدیرا بیلر. آخی سیزین ذهنیز داها بؤیوک ایده‌لرله دولودور. سیز واختیزین تلف اولدوغونو دوشونورسوز و اؤزوزو فایداسیز دانیشیقلارین ایچینده بوغولان بیر شخص کیمی گؤرورسوز. سیز اؤزوزه بیر هم‌فکر و یولداش آختاریرسیز آما اونو چوخ آز زمانلار اله گتیره بیلیرسیز.
2. دانیشماقدان چوخ، دوشونورسوز
سیزین بئینیز ائله قورولوب کی بیر مسأله‌نین مختلف یول‌لارین یوخلاییر. بونا گؤره بیر مسأله‌ده نظریزی دئمگه معمولی انسانلاردان داها چوخ زمانا احتیاجیز اولور.
چوخ احتمالا جوابیزین بیر او قدر ده دقیق اولمادیغینی دوشوندوغوز زمان اصلاً اونو مطرح ائتمه‌یه‌سیز. و ظاهرده سس‌سیز و دانیشمایان بیر شخص کیمی جلوه‌لنه‌سیز.
3. گونده‌لیک ایشلریز سیزه تکراری و یوروجو گلیر
سیزین بئینیز تازا و بوروشوق مسأله‌لرله مشغول اولماق ایستیر آما گونده‌لیک گؤردوگوز ایش سیزه ساده گلیر و داریخدیریر.
4. بعضاً ایش گؤرمگه و عمل ائتمگه انگیزه‌ز اولمور
چوخ ایشله‌ین و فعال انسانلارلا دولو بیر دونیادا کی ایشله‌مک، ایده وئرمکدن داها مطلوب اولور، اولا بیلر ذهنیز او قدر بؤیوک ایده‌لرله مشغول اولا کی عمل ائله‌مک یادیزدان چیخا. متأسفانه بو مسأله‌نی چوخلاری تنبل‌لیک کیمی بیلیر و بو مسأله سیزی ناراحت ائلیر.
5. اجتماعی رابطه‌لرده ناشی ساییلیرسیز
انسانلارلا بحث ائله‌ین زمان مطمئن اولمادیغیز مطلبی دئمه‌زسیز، و بعضاً حق اولدوغوز موضعلری مطمئن اولمادیغیز اوچون شک ایله مطرح ائلرسیز و بو دا باعث اولار جماعت سیزی اجتماعی رابطه‌لرده ضعیف بیر شخص گؤرسونلر.
6. چوخ چتین عاشق اولارسیز
سیزین عشق سفریز معمولی جماعتدن بیر آز چتین اولور. سیز داها آرتیق محافظه‌کار و داها آرتیق تحلیل ائدنسیز. بونا گؤره جماعت سیزی سویوق و خودبین حسابلار. بونلاردان علاوه سیزده اضطرار حسّین آز اولماسی، تصمیملریزین سرعتینی آزالدیر و نتیجه‌ده عشق آلوولانمامیش ساکتلشیر.
بونلارلا بئله جماعتین سیزی داها یاخشی باشا دوشه بیلمه‌سی اوچون اونلارا آرتیق توضیح وئرمه‌لیسیز. بئله‌لیکله ایده‌لریزی مطرح ائله‌ییب عمله یاخینلاتماق اوچون داها آرتیق امکانیز اولار.
پروین اعتصامی
یازار : میرزه عبدالصمد ملکی | بؤلوم : اجتماعی
+0 به یه ن
پروین اعتصامی‌یه مشهور اولان رخشنده اعتصامی آذربایجانین بؤیوک شاعرلریندن ساییلیر. او 1285-جی ایلین اسفند آیی‌نین 25-ده تبریز شهرینده دونیایا گؤز آچدی. آتاسی میرزا ابراهیم آشتیانی‌نین اوغلو یوسف اعتصامی، اعتصام الملک آشتیانی آدینا مشهور ایدی. آناسی مقدم العداله‌نین قیزی بانو اختر فتوحی ایدی.
او «تربیت نسوان» آدیندا کتابی یازان عالم آتاسی‌نین تربیتی ایله بویا باشا چاتیر. عرب و فارس دیل‌لرینی‌ده آتاسیندان اؤیرنیر و آتاسی ایله بیرلیکده تهرانا گئدیر. 8 یاشیندان شعر دئمگه باشلاییر.
پروین 28 یاشیندا یعنی 1313-ده کرمانشاهدا شهربانی رئیسی اولان عمیسی اوغلو ایله ائولنیر. آما اونون لطیف روحی نظامی خصلتله توتمور. و نهایتده ایکی آی یاریمدان سونرا بوشانیب آتاسی ائوینه قاییدیر.
بیر ایل سونرا یعنی 1314-ده پروین اعتصامی‌نین بیرینجی شعر کتابی چاپ اولور.
پروین بیر مدت تهرانین عالی دانشسراسیندا کتابچی کیمی چالیشیر و عینی حالدا شعر قوشماغا ادامه وئریر. نهایتده اجل، پروینی 35 یاشیندا یعنی 1320-جی ایلین فروردینین 15-ده ادب و شعر دونیاسیندان آلیر و پروین قم شهرینده عایله مقبره‌سینده آتاسی جیواریندا تورپاغا تاپیشیریلیر.
پروینین دیوانیندا 248 قطعه شعر وار کی اونلارین 65 قطعه‌سی مناظره کیمی یازیلیب.
بایرام تعطیلاتیندان سونراکی روح دوشگونلوگو ایله نه ائدک؟
یازار : میرزه عبدالصمد ملکی | بؤلوم : اجتماعی
+0 به یه ن
چوخلاری قاباقکی عادی و استرسلی یاشاییشا قاییتماقدان ناراحت و شکایتچیدیلر. بو ناراحتچیلیق اونلارین چهره‌سیندن اوخونور و دیللرینه گتیرمکلری لازم دئییل.
استرسدن اوزاق اولماق اوچون استراحت ائله‌مک و ایشه فاصله وئرمک توصیه اولان و استفاده اولان یوللارداندیر. بایرام تعطیلاتی بو ایش اوچون مهم و یاخشی فرصت ساییلیر. بو فرصتده هامی خانواده‌سی‌نین یانیندا اولور و چوخلو جسمی و روحی مشکل‌لر آزالیر.
سفرلرین برنامه‌سیز و آز فاصله‌سی و مسافرتین اوزون اولماسی تعطیلاتین سونوندا‌کی روح دوشگونلوگونه سبب اولور. مسافرتده‌کی افراط و تفریطلر استرسین تماماً بوشالماماسی و مسافرت احتیاجی‌نین هله ده حسّ اولونماسی انسانلاری ایشه قاییتماق مجبوریتینده اولدوقلاری اوچون روح دوشگونلوگونه سالیر.
بیزیم فرهنگیمیزده سفر اوچون بیر سئری آداب و روسم وار کی اونلاری رعایت ائله‌مک بو کیمی مشکل‌لرین قاباغینی آلار.
هر حالدا تعطیلاتدان سونرا کی روح دوشگونلوگونو ساده یول‌لارلا درمانا ائتمک اولار. مثلاً ایش یئرینه و یا گونده طی ائله‌دیگیز قیسا مسیری پیادا و قاچا قاچا گئتمکله روح دوشگونلوگونون ساواشینا گئده بیلرسیز. بئله‌لیکله گونده‌لیک ایشلریزی ورزشه چئویرمیش اولورسوز.
تبریز دانشگاهی‌نین رئیسی دانشگاهلارین تولیدده‌کی مهم نقشلرینه تأکید ائله‌دی
یازار : میرزه عبدالصمد ملکی | بؤلوم : اجتماعی
+0 به یه ن
تبریز دانشگاهی‌نین رئیسی تولیدی اؤلکه‌نین توسعه موتورو بیلمکله آرتیردی: بو مسیرده دانشگاهلار فنی علم تولید ائله‌مکله مهم نقش ایفا ائله‌یه بیلرلر.
دکتر محمد رضا پورمحمدی سه شنبه گونو دانشگاهین اوستادلار و ایشله‌ینلری ایله گؤروشده، بو ایلین معظم رهبرلیق مقامی طرفیندن تولید ایلی آدلاندیرماغا اشاره ائله‌ییب دئدی: تولیددن منظور هر طرفلی تولید یعنی کالا، خدمت و فنی علم تولیدی‌دیر.
او آرتیردی: دانشگاهلار و علمی مرکزلرین مقاومتی اقتصادین تحققوندا دانیلماز نقشلری وار.
اوستاد پورمحمدی آرتیردی:دانشگاهلار اوستادلار و نخبه دانشجولارین تازا ایده‌لریندن حمایت ائله‌مکله و اونلاری تجاری ائتمکله، اؤز واقعی رسالتلرینه عمل ائله‌یه بیلرلر.
او، مقاومتی اقتصادین تحقق تاپماسی یوللاریندان بیرینی، محصول تولید ائدیب دونیا بازارلارینا صادر ائله‌مک بیلدی. تبریز دانشگاهی رئیسی آرتیردی: برجامین آچیلیشلاری، تحریملرین گؤتورولمه‌سی، بین المللی بانکی و معامله‌لرین تازادان قورولماسینی نظرده آلماقلا بو یولدا تولیدچیلره و صنعتگرلره تازا فرصتلر آچیلیب.