سربازلیق دؤرو
یازار : میرزه عبدالصمد ملکی | بؤلوم : اجتماعی
+0 به یه ن
سربازلیق دؤرو
ناجا باشقانی بونو دئمكله كی اجازه وئرمه‌مه‌لی‌ییك بیر عدّه قانونی و غیر قانونی یول‌لارلا سربازلیقدان قاچسینلار و یا اؤزلری اؤز خدمت یئرلرینی معیّن ائله‌سینلر، تأكید ائله‌دی: «عدالت فقط بو دئییل كی بیزیم فیكیمیز تبعیضدن اوزاق اولسون. بو مسأله عملده ده بئله اولمالیدیر. مسأله‌یه دقّتله باخاندا، مركزدن سرحد منطقه‌لرینه اوزاقلاشدیقجا، سربازلار یوخسول خانواده‌لردن اولدوغونو گؤروروك. البته بیز بو باره‌ده هئچ امر وئرمه‌میشیك آما حتماً قایدالاریمیزدا مشكل‌لر وار كی بئله اولور. باخیب گؤرمه‌لی‌ییك كی نه اولوب كندلی و یوخسول خانواده‌لرین جوانلاری مرزلرده خدمت ائلیر و تهران اوشاقلاری یا معاف اولورلارو و یا راحت یئرده خدمت ائلیرلر.
اؤلكه رئیس پلیسی سراوانداكی شهید مرزبانلارا اشاره ائتمكله دئدی: بو عزیز شهیدلرین چوخو دیندار و یوخسول عایله‌لردن ایدی كی البته خدمت كؤنول‌لو اولسایدی دا اونلار ائله بو منطقه‌لره گئدردیلر.
كیشیلر آروادلارین توزونا دا چاتمیرلار
یازار : میرزه عبدالصمد ملکی | بؤلوم : اجتماعی
+0 به یه ن
كیشیلر آروادلارین توزونا دا چاتمیرلار
بو تحقیقده 120 كیشی و 120 خانیم بیر كامپیوتر تستینده رقابت ائله‌دیلر. بو تست بیر سیرا عدد و شكلی بیرلشدیرمك ایدی. اونلاردان ایسته‌ینده كی خاص بیر موضوعنون اوستونده دقیق اولسونلار هر ایكی گروهون ذهنی گوجو بیر اولوردو، آما اونلاردان نظرلرینی سرعتله آیری موضوعا چئویرمكلرینی ایسته‌ینده كیشیلر دالی قالیب قاریشدیریردیلار.
بو پروژه‌نین مدیری‌نین دئدیگینه گؤره، بو معطل قالماق و یوبانماق نظره كیچیك‌ده گلسه اوزون مدّتده بؤیوك تأثیری اولار.
خانیملار مسأله‌لرین حلّینده عاغیللی یوللاردان استفاده ائلیرلر و بو یوللارین بعضیسی نئچه ایشی بیر یئرده مدیریّت ائله‌مگه ال وئریشلی اولا بیلر.
بو تستده آروادلارین و كیشیلرین ذهنی فرقلری‌نین، اونلارین نقاشی‌لری‌نین اوزوندن‌ده بللی اولماغی آشكار اولدو.
بو تحقیقین نتیجه‌سینده بللی اولدو: آروادلار و كیشیلرین بیر آیری فرقی‌ده بودور كی آروادلار ایشی باشلامادان اوّل اونون باره‌سینده دوشونورلر آما كیشیلر فاصله‌سیز ایشه باشلیرلار. هابئله ایشین گئدیشینده مشكلله اوزلشنده آروادلار ایشی دایاندیریب اونون باره‌سینده دوشونورلر و مناسب یول تاپاندان سونرا اونو ادامه وئریرلر.
بو تحقیقین كامل نتیجه‌لری، BMC Psychology مجله‌سی نین آخر شماره‌سینده چاپ اولوب.
2013-ون خوشبخت اؤلكه‌لری
یازار : میرزه عبدالصمد ملکی | بؤلوم : اجتماعی
+0 به یه ن
2013-ون خوشبخت اؤلكه‌لری
بیرلشمیش ملّتلر سازمانی طرفیندن 2013-جو ایلین خوشبخت اؤلكه‌لرین لیستی یاییلدی.بو سیاهیدا بیر اؤلكه‌نین ایمن و شاد یاشاییش اوچون امكانلاری، فرقلی شاخصلر واسطه‌سی ایله نئچه بؤیوك تحقیقاتی مؤسسه طرفیندن بیرلشمیش ملّتلرین نظارتی ایله اؤلچولوب. بو تحقیده اشتراك ائدن مؤسسه‌لردن كلمبیا بریتیش دانشگاهی، كانادا دانشگاهلاری‌نین تحقیقاتی مؤسسه‌سی، لندنین اقتصادی مدرسه‌سی و گالوپ مؤسسه‌سینی آد آپارماق اولار. ایللیك گلیر، یاشاییشا اومید، جامعه‌نین رفاهی، ساغلاملیق و اجتماعی آزادلیقلار بو تحقیقین معیارلاریندان ایدی.
156 اؤلكه‌نی اؤزونده احتوا ائدن بو سیاهیدا اسكاندیناوی اؤلكه‌لری بیرینجی رتبه‌لرده یئر آلدیلار. بو سیاهیدا روسیه 68، تركیه 77، ایران 115 ، آذربایجان 116 و ارمنستان 128-جی یئرده قرار تاپیب.
قدیمین باغ-شهرینی دوز طوفانی تهدید ائلیر
یازار : میرزه عبدالصمد ملکی | بؤلوم : اجتماعی
+0 به یه ن
قدیمین باغ-شهرینی دوز طوفانی تهدید ائلیر
تبریز شهری بیر زمانلار باغ-شهریدی، ایندی نه اینكی او گونلردن بیر شئی قالمیر بلكه هوا چیركلیگی بورولغانیندا قالماقدان علاوه دوزلو یئللرله ده تهدید اولور.
تبریز كلانشهری بیر طرفدن سایسیز كرخانالار و ماشینلاری ایله و بیر طرفدن‌ده اورمیه گؤلو معضلی ایله جدّی شكلده هوا چیركلیگی ایله اوزلشیب. ائله كی اؤلكه‌نین اَن چیركلی شهرلریندن بیرینه چئوریلیب.
تبریز باغلاری‌نین داغیلماسی بو شهرین هواسی‌نین چیركلنمه‌سینده بؤیوك رولو وار.
صنعتی چیركلندیرنلردن علاوه، بیر مدّت اولار كی عرب اؤلكه‌لریندن گلن توز-تورپاق تبریز هواسینی شدّتلی شكلده چیركندیریر. بو توز-تورپاق تبریزلی‌لری صاف هوادان محروم ائله‌مكدان علاوه، اونلارین ساغلاملیغینی‌دا تهدید ائلیر.
گؤزدن یاش گلمه، قاشینما، بوغاز، بورون و گؤزده آجیشما بو توز-تورپاغین قیسا عوارضیدیر كی آغ جیگرلره تأثیر قویوب اؤسكورمگه و تنگی نفسه‌ده سبب اولور.
تبریزه دوز حمله‌سی، بو گونلرین دانیلماز حقیقتی
صنعتی چیركلندیریجی‌لردن علاوه، تبریزی بؤیوك بیر دوز حمله‌سی تهدید ائلیر. پاییز فصلی‌نین باشلاماسی و فصلی یئللرین گلمه‌سی ایله بو تهدیدلر آجی واقعیته تبدیل اولوب و بو خطردن قورتولماق اوچون داها نظریه وئرمك وقتی كئچیب و عمل وقتیدیر.
غربی و شرقی آذربایجان، اورمیه گؤلو قوروماسی‌نین صدمه گؤرنلرین مقدّم صفینده‌دیلر و بو خطر او بیری استانلاری‌دا تهدید ائلیر.
اورمیه گؤلونو قورتارماغا، اوزون مدّت یوللاردان علاوه، قیسا مدّت یوللار دا وار كی اونا سو چاتدیرماق اوزون مدّت یولدور و او ایش باشا چاتمامیش قیسا مدّت ایشلر ده گؤرولمه‌لیدیر. یوخسا منطقه‌میز بؤیوك بیر قورولوق و شورازارلیقلا اوز به اوزدور.
خبری تنظیم ائله‌دی: یاسمین مولانا
دنیانین اَن سوادلی اؤلكه‌لری هانسی‌لاردی؟
یازار : میرزه عبدالصمد ملکی | بؤلوم : اجتماعی
+0 به یه ن
دنیانین اَن سوادلی اؤلكه‌لری هانسی‌لاردی؟
توسعه و همكارلیق سازمانی‌نین (OECD) وئردیگی سیاهی‌یا گؤره روسیه توسعه تاپمیش اؤلكه‌لرین ایچینده اَن سوادلی جمعیّته مالكدیر. 2011-جی ایله قدر روسلارین 53.5 درصدی‌نین كالج مدركی وار. بو سازمانین سیاهی‌سینا گؤره دنیانین اَن سوادلی اون اؤلكه‌سی بونلاردیر:
روسیه: 2011-جی ایلینده 64-25 یاش آراسی جمعیتین یاریسیندان چوخو كالج سطحینده و یوزده 95 –ی متوسطه مدركلری واریدی.
كانادا: 2011-جی ایلینده هر دؤرد كانادالیدان بیری فنی حرفه مهارتی دؤره‌سی گؤرموشدو.
ژاپن: ژاپنلی‌لارین یوزده 46.4-ی‌نین كالج تحصیلاتی وار. و یوزده 23-و عالی تحصیلات آلیبلار.
آمریكا: بو اؤلكه جمعیتی‌نین یوزده 42.5-ی‌نین كالج تحصیلاتی وار.
جنوبی كره: كره‌لی‌لر درسی قورتاراداندان سونرا آیری اؤلكه‌لره نسبت داها راحت ایش تاپا بیلیرلر. بو اؤلكه‌ده لیسانس آلانلارین فقط 2.6 درصدی ایشسیز قالیبلار. بو اؤلكه جماعتی‌نین یوزده 40.4-نین كالج تحصیلاتلاری وار.
بریتانیا: بو اؤلكه جماعتی‌نین یوزده 39.4-نون كالج حدّینده تحصیلاتلاری وار.
نیوزلند: نیوزلندلی‌لرین چوخو متوسطه دؤره‌سیندن سونرا تكنیكی و فنّی مهارتلری كسب ائلیرلر. بو اؤلكه جماعتی‌نین یوزده 39.3-نون بئله تحصیلاتی وار. نیوزلند بودجه‌سی‌نین یوزده 21.2-سی تحصیلاتا صرف اولور.
فنلاند: بو اؤلكه جماعتی‌نین یوزده 39.3-نون كالج حدّینده تحصیلاتی وار.
استرالیا: بو اؤلكه جماعتی‌نین یوزده 38.3-نون كالج حدّینده تحصیلاتلاری وار.