din xadimi دین خادمی

گئجه‌لر خیرداجا قیزیمی ناغیل ایله یوخویا وئره‌رم. دونن آذربایجان فولکلوروندان آیاغینا تیکان باتمیش بالاجا سئرچه‌نین ناغیلینی اونا دانیشدیم. بو ناغیلی سیزینله ده پایلاشماغی فایدالی گؤردوم. لطفاً نظرلریزی بو باره‌ده یازین

بالاجا سئرچه‌نین ناغیلی MP3 یوکله

اوشاقلارین قوناقلیق زمانی ادبسیزلیکلری‌نین عمده سببی اونلارا دقّت ائله‌مه‌مکدیر. اونلار آیری زمانلار آتا-آنانین دقّت مرکزی و محبتی آلتیندا اولورلار آما قوناقلیق زمانی دقّتلر اونلارین اوستونده گؤتورولوب قوناغا چؤنور و بو زمان اوشاق همان آلیشدیغی دقّتی تازادان جلب ائله‌مک اوچون بیر سئری هنجارسیز ایشلری گؤرمگه ال وورور.

بیر اوشاق جمع ایچینده یاراشمایان سؤزلر دیله گتیرنده و یا یاراماز ایشلر گؤرنده والدین محبتله اونا یاخینلاشیب اونو تحقیر ائتمه‌دن احتراملا اونون بو ایشی‌نین اشتباه اولدوغونو تذکر وئرمه‌لیدیلر. بئله‌نچی زمانلاردا سویوق قانلی اولماق چوخ مهم مسأله‌دیر. اوشاغین قاباغیندا دایانماق عوضینه اونون دقّتینی ماراقلی اولدوغو مسأله‌لره چکمک لازمدیر. مثلاً اونا بیر کتاب وئرمک، دیوارداکی قفسده اولان قوشون دیلی ایله اونونلا دانیشماق و . .. کیمی ایشلر.

خطرلی وسیله‌لر اوشاغین الی چاتمادیغی یئره قویولمالیدیر کی سونرا اونو اونون الیندن آلماق مجبوریتینده اولمایاسیز. اونا نه قدر «یوخ» ، «دَیمه» ، «ائله‌مه» کیمی سؤزلر آز ایشلتسز بیر او قدر یاخشی اولار. بیر شئیدن دقّتینی داغیتماق ایسته‌سز، دقّتینی اوندان داها جالب بیر شئیه طرف چکین.

اوشاقلاری هئچ واخت آما هئچ واخت جمع ایچینده تحقیر ائتمه‌یین و اشتباهلارینی هامی‌نین ایچینده دانیشمایین. بیر عملی‌نین اشتباه اولدوغونو بیلدیرمک ایسته‌سز، اونو خلوتجه اؤزو ایله دانیشمالیسیز.

بیر ده هر قوناقلیقدان قاباق، قوناقلیقدا نئجه داورانماغین یاخشی و مطلوب اولدوغونو اوشاقلا دانیشین و اوندان قایدالاری رعایت ائله‌مگه سؤز آلین.

بوتون کاییناتین ال - اله وئریب گونوموزو داغیتماغا مصمم اولدوغو گونلر هر بیریمیزین باشینا گله بیلر. آما حقیقتده بئله بیر شئیین حقیقتی یوخدور. اصلاً دونیانین بئله حمله‌نین تنظیمینه گوجو یوخدور. دونیانین قایدالاری اؤز یوللاریندا دوام ائلیرلر و بو، بیزیک کی بعضاً اونلارین یولو اوستونده دایانیریق. و یا عکسینه بیز ایسته‌مه‌دن بیرینی ناراحت ائدیریک. شاید بیرینه دَیمیشیق و یا بیری‌نین کاغاذلاری‌نین اوستونه سو تؤکموشوک. او دا اؤز الینده اولمایاراق حیرصلنیب.

بئله‌نچی شرایطده انسان اؤزونو کنترل ائتمه‌لی و جوّی اوندان آرتیق آلوولاندیرمامالیدیر. او آنلار اوچون بئش ساده یول وار کی ائلیه بیلک اؤزوموزو کنترل ائدک و جوّه حاکم اولاق.

1. حسّ ائتک، تأیید ائله‌مگه و جواب وئرمگه واخت قویون

مثلاً بیری سیزه توهین ائدن زمان ایلک ایشیز درین نفس چکمک اولسون. هاوانی آغ جیگرلریزه چکین و ائشیگه اؤتورن زمان، توهین ائدن شخصله اؤز آراسینداکی فاصله‌نی حسابلایین. بو فاصله‌نی آرادان آپارین. اؤز حسّلریزی دیله گتیرن زمان اونوندا حسّلرینه دقّتیز اولسون.

2. زهرلی انسانلاردان فاصله‌لی اولون

انسانلارین هامیسی سیزه ضربه وورماق فکرینده دئییل‌لر آما بعضیلری سیزه صدمه وورماقدان لذّت آپارارلار. بیز بو انسانلارین نییه بئله اولماقلاری باره‌ده تحلیل وئرمگه و یا اونلارین مرضینی تشخیص وئرمگه احتیاجیمیز یوخدور. واختیمیزی داها ارزشلی زادلارا صرف ائتمه‌لی‌ییک.

بیری اؤز عمدی و یا غیر عمدی اشتباهلاریندان عذر ایسته‌مه‌سه، بو بیر قیرمیزی پرچم علامتیدیر. و یا بیری سیزین عذروزو قبول ائله‌مه‌سه بو دا قیرمیزی پرچم ساییلیر. بئله فرض ائله‌یین اوشاق اوینونودور و او دردسر یاراتماق ایسته‌ییر. بوتون گوجوزو بئله‌نچی آداملاردان اوزاقلاشماغا صرف ائدین. آما بو شخص مشتری و یا رئیسیز و یا قاچا بیلمه‌دیگیز هر هانسی بیر شخص اولسا اونون یاراتدیغی دردسرلردن لذّت آپارین.

3. مقابل طرفی درک ائدین

اؤزوزو اونون یئرینه قویون. اونون مشکلونو حل ائله‌مگه یول آختارین. باخین گؤرون اونون اورگینی سیندیرمادان سؤزله اونو آراملادا بیلرسیز. بعضاً بالاجا گولومسه‌مه اونو بحراندان قورتارا بیلر.

4. اؤز گوونیزه اعتبار وئرمک اوچون اؤزگه‌نی معیار بیلمه‌یین

اؤز گوونیزی یاخشی درجه‌ده ساخلاماق اوچون دوستلارا و اطرافداکیلارا دایانساز، اونلارین گلیب سیزه ضعیفلتمگه قاپینی آچیق قویوبسوز. سیز قاپی‌نین آچارینی اؤز شادلیق موتوروزا تاپیشیرمالیسیز. اؤز ایچیزده اؤزوزه اعتماد و عشقی یارادا بیلمه‌سز، اطرافداکیلارین هیجان دالغالارینی آلاجاقسیز. اطرافداکیلارین چوخو دا سیزی تماماً تانیمیرلار و احتیاجلاریزین نه اولدغونو کامل بیلمیرلر.

گولون، اؤزوزو سئومک و عاشق اولماق حسّینی اؤزوزده تقویت ائدین کی اطرافین یوللادیغی دالغالار چوخ کیچیک و اهمیتسیز گؤرونسون.

5. اؤزوزدن موغایات اولماغا واخت قویون

پیس بیر حادثه و یا گوندن سونرا روحیه‌زی قایتارماغا اؤزوزه شاد برنامه‌لر نظرده آلین و ایندیکی زمانی درک ائله‌مگه اؤزوزه کؤمک ائدین.

عاغیللی قولچاقلاری آرادان آپارین !

آلمانین نظارت مؤسسه‌لری مقاملاری، والدینلره اخطار وئردیلر که وای فای شبکه‌سینه وصل اولا بیلن عاغیللی قولچاقلاری آرادان آپارسینلار. چونکی اونلار جاسوسلوق وسایلی‌دیرلر.

مهرین «ورج»دن نقلاً وئردیگی خبره گؤره، بیر مدت اولار اینترنته وصل اولا بیلن اویناتمالیلار بازارا گلیب. بو قولچاقلارین مصنوعی عاغلی وار و اوشاقلارلا دانیشماق و اونلارین سؤال‌لرینا چواب وئره‌ بیلمک قابلیتلری وار.

آلمان مقاملاری دئییللر بلندگو و میکروفونو اولان بو قولچاقلار، اوشاقلار و والدینین خصوصی اطلاعاتینی سرقت ائتمک وسیله‌سیدیلر و آلمان قانونلارینا گؤره اونلاردان استفاده ائتمک قاداغاندیر.

مستقیم اولاراق آلمان مقاملاری‌نین طریفیندن اشاره اولونان قولچاقلارین بیری My Friend Cayla قولچاغیدیر کی اونون علیهینه اروپا و آمریکادا شکایتلر ثبته یئتیشیب. بو قولچاقلار والدیندن اجازه آلمادان اوشاقلارین دانیشیقلارین ضبط و ذخیره ائله‌ییر و اونلارین خصوصی حریمینی نقض ائیلر.

Cayla قولچاغی، میکروفون طریقی ایله اوشاغین سؤزلرینی ائشیدیب وای فای طریقی ایله دوزلدن شرکته (Nuance) یوللاییر. بو شرکت، سؤال‌لاری متنه چئویریب اینترنتده آختارماقلا جوابلارینی تاپیب جوابلاری اوشاغا پخش ائیلر.

تعطیل سفرینه گئتمک، ایش یورقونلوغونو چیخارتماغا و ذهنی دورولتماق اوچون لاپ یاخشی ایشلردن ساییلیر. تعطیلیز یاخشی و خوشلوقلا کئچسه، گونده‌لیک یاشاییشیزا داها آرتیق انرژی ایله باشلایا بیلرسیز.

مسافرت، دسته جمعی اولاندا لذت و بهره‌سی داها دا آرتیق اولار و سیز عایله و یا دوستلاریزین کناریندا یاخشی و لذتلی زمان کئچیرده‌سیز. ائله بونا گؤره‌ ده همسفرلریزین کی اولدوغو چوخ مهمّدیر.

سفرده سیزین یولداشیز «خوش سفر» بیری اولسا سیزین بو سفریز لذتلی و خوش خاطره‌لرله همراه اولاجاق. آما همسفریز مناسب اولماسا سفر نه اینکی خوش اولماز بلکه انسانین بورنوندان گلر.

 مسافرته چیخاندا دقّت ائله‌یین هم‌سفریز آشاغیداکی نفرلردن اولماسین:

1. همیشه یوبانان انسانلار

بئله انسانلار سؤز وئردیکلری زمان گلمزلر و همیشه‌ ده بو ایش اوچون مختلف بهانه‌لری اولار. اونلارلا سفره چیخساز واختیندا حاضر اولمازلار و برنامه‌نی بیر بیرینه وورارلار.

بئله انسانلارلا مسافرت مجبوریتینده اولساز گؤرمک ایسته‌دیگیز ایشلره، اونلارین داها تئز حاضر اولماسینی ایسته‌یین.

2. چوخ دانیشان انسانلار

سکوت قیزیلدیر. آما بو سؤز چوخلاری اوچون آنلامسیزدیر. دوزدور مسافرتده دانیشماق لحظه‌لری لذتلی و خاطره‌لی ائلر، آما بعضاً انسان ساکت دایانیب گؤزل منظره‌لری سیر ائتمک ایستر.

آما چوخ دانیشان انسانلار بونو آنلامازلار و حتی سیزین مطالعه و یا استراحت زمانی ویرر - ویرر دانیشارلار.

3. اؤزونو بَیَنمیش انسانلار

اؤزونو بَیَنن انسانلار فقط اؤز ایستکلرینه دقت ائلرلر و سیزی، اونلارا قازانان ایشلرین گؤرمه‌سینه مجبور ائلرلر.

مثلاً نه یئیه‌سیز، هارا گئده‌سیز و نه اویونلار اوینایاسیز و حتی هاردا استراحت ائله‌مگیزی‌ده اونلار قرار وئرمک ایسترلر.

4. تنبل و حوصله‌سیز انسانلار

دوزدور تعطیلات استراحت و آرامش اوچوندور آما تنبل انسانلار هفته‌نین 7 گونونون 24 ساعتینی هئچ ایش گؤرمزلر.

اونلار مسافرتده‌ ده گون اورتایاجان یاتارلار، ناهاردان سونرا یاتارلار البته چوخ شانسلی اولساز آخشام سیزینله بیر ایکی کلمه دانیشماغا غیرت گؤستره بیلرلر.

بئله‌لیکله سفریز خاطره‌سیز و تجربه‌سیز باشا چاتار.

5. حددن آرتیق حرکتلی انسانلار

بو انسانلار تنبل‌لیگین ترسه‌سیدیلر. یعنی تنبل‌لر تفریط ائله‌سه‌لر بونلار دا افراط ائلرلر. اونلار سفریزین خوش آنلارینی کورلایا بیلرلر. مثلاً سحر ساعت 4-ده قالخیب داغا گئتمک ایسته‌یه‌جکلر.

دریانین لاپ پیس یئرینده اوزمک ایسته‌یه‌جکلر و حتی سفر بویو خطرلی ایشلر گؤرمک ایسته‌یه‌جکلر.

گؤزل و خاطره‌لی مسافرت آختارساز بئله انسانلا سفره چیخمایین.

6. اؤزلری‌ ایله بوللو چمدان آپاران انسانلار

گؤرورسن بیر هفته‌لیک سفر اوچون اوچ عدد بؤیوک چمدان گؤتورورب. بوجور همسفر ال - آیاغا دولاشار و حتی بعضاً اضافه هزینه‌لره سبب اولار.

بو گونکی گونده، هارا گئده‌جگیز و اورانین هاواسی‌نین نئجه اولاجاغی چوخ راحت بللی اولار و نیاز دئییل مبادا گون اوچون هر زاد گؤتوره‌سیز.

7. عکس سالما دلیسی اولان انسانلار

مسافرته گئتمگی قالارگی خاطره‌لرین بیری‌ده عکس سالماقدیر. آما ائله زمانلار اولار کی انسان، دوربینی کنارا آتیب طبیعتدن لذت آپارماق ایستر. بئله‌نچی آنلاردا عکس سالما دلیسی همسفریز اولسا، بو آنلاری سیزه زهر ائلر.

8. حددن آرتیق مقیّد و منظم انسانلار

هر ایشی برنامه‌لی گؤرمک یاخشی اولار آما بعضاً تازا موضوعلار قاباغا گلر کی برنامه‌نی دَییشمگه ارزشی اولار. اوّلکی برنامه‌یه مقیّد هم‌سفریز اولسا، تازا و سورپریز لذتلری الیزدن آلار.

9. چوخ افاده‌لی انسانلار

هئچ هوتئلی بَیَنمزلر. هر هانسی رستورانا گئتسز اورانی کیفیر و مزخرف سایارلار و اؤزلرینی داها یوخاری یئره لایق گؤررلر.

بئله انسانلار اضافه هزینه‌لری تحمیل ائله‌‌یندن سونرا هله نهایتده‌ ده ناراضی قالارلار.

10. دئیینگن و ناراضی انسانلار

بعضیلری هر زادی بهانه ائلرلر. مثلاً طیاره یاریم ساعت یوبانسا او قدر میزیلدانارلارکی آدامین سفرینی هئچ ائلرلر. بئله انسانلار همیشه بیر شئیدن شکایتچیدیلر و هئچ واخت راضی اولمازلار.

بئله انسانلاری همسفر کیمی سئچمه‌سز داها راحت سفریز اولار.