یئمكدن بیلا فاصیله سونرا دیشلریزی میسواكلامایین*Yeməkdən bilafasilə sonra dişəlrizi fırçalamayın
یازار : میرزه عبدالصمد ملکی | بؤلوم : ساغلاملیق
+0 به یه ن
 |
||
|
یئمكدن سونرا یاریم ساعته قدر دیشلری میسواكلاماق اونلارا جیدّی ضرر یئتیره بیلر. اسیدلی ماده‌لر یئیه‌ندن سونرا, بو اسید دیشلرین میناسینی و اونون ایچ لایه‌سینی خرابلایا بیلر. تلگراف روزنامه‌سی‌نین وئردیگی معلوماتا گؤره, دیشلرین میسواكلاما واختی موناسیب اولماسا یعنی یئییب ایچمكدن سونرا یاریم ساعتدن تئز اولسا, غذاداكی اسید دیشلرین داها درین لایه‌لرینه نفوذ ائلر و اونو تئز چورودر. بونا گؤره دیش دؤكتورلری توصیه ائلیرلر كی مخصوصاً اسیدلی و ادویه‌لی غذالار یئیه‌نده, حتماً یاریم یا بیر ساعت دؤزون و سونرا دیشلریزی میسواكلایین تا اسیدلی مادّه‌نین اثری گئتسین. | ||
نفس چكمه‌دن دیری قالماق مومكون اولدو*Nəfəs çəkmədən diri qalmaq mümkün oldu
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
آمریكالی عالیملر بیر یول تاپیبلار كی اوكسیژن بیر باشا قانا تزریق اولور و اینسانی, بؤحرانلی واختلار و نفس چكه بیلمه‌ین زمانلار دیری ساخلیر. ساینس دیلی‌نین وئردیگی معلوماتا گؤره, بو یول ائلیه‌بیلر موتخصیصلره كؤمك ائله‌سین كی جراحلیق زمانی و یا آیری بؤحرانلی واختلار تنفوس دستگاهی اولمادان, مصدومی 30 دقیقه بویوندا دیری ساخلاسینلار. دؤكتور جان خیر (John Kheir) و همكارلاری, بوستون اوشاقلار مریض‌خاناسیندا, بو ایشی گؤرمك اوچون, صوتی امواجدان ایستیفاده ائدیب اوكسیژنی چوخ نازیك یاغ سلول‌لارین(پیتید) ایچینه قویورلار و بو ماده‌نی بیر باشا قانا تزریق ائلیرلر. انگیزه‌یه تبدیل اولان اؤلوم دؤكتور خیر 2006-جی ایلده شیدّتلی ذات‌الریه اثرینده آغ جیگرلری صدمه گؤرن بیر اوشاغا یئتیشیردی كی قانی‌نین اوكسیژنی چوخ یئنمیشدی و دؤكتورلرین چالیشمالارینا رغماً, تنفّوس دستگاهینا یئتیشینه قدر اؤلدو. بو اوشاغین اؤلومو بیر انگیزه اولدو كی دؤكتور خیر, قانا اوكسیژن یئتیرمك اوچون داها یئیین یول تاپسین. البته 100 ایل قاباق بو ایش آزماییش اولموشدو آما خالیص اوكسیژنین قانا تزریق اولماسی دامارلاردا خطرلی گازلار تولید ائله‌مه‌سینه گؤره بو تجروبه شیكست یئمیشدی. بونا گؤره دؤكتو خیر چالیشدی كی بیر مادّه‌دن ایستیفاده ائلیه كی اوكسیژنی اؤزونده ذخیره ائلیه و سونرا دامارلاردا آزاد ائله‌سین. بئله‌لیكله دؤكتو خیر و همكارلاری 2 ایلا 4 میكرومتر اندازه‌سینده اولان پیتیدلردن ایستیفاده ائدیب اوكسیژنی بو میكرو مولكول‌لارین ایچینه یئرلشدیریب بیر محلول اله گتیردیلر. دؤكتور خیر دئییر: بیز بیر-بیرمیزین قانینی چكیب اوكسیژنین آلاندان سونرا آزماییش لوله‌سینه تؤكوردك. اوكسیژن تركیبین قانا آرتیراندا, فورآ اوكسیژنسیز آبی قانین رنگی, قیرمیزیا دؤنوردو و بو بیزیم ایشیمیزین موفق اولدوغونو گؤرسه‌دیردی. سونراكی ایللرده, اونلار موختلیف آزماییشلرله بو نتیجه‌نی داها دا یاخشیلاشدیردیلار. بو محلول حیوانلار اوستونده موفّقیّتله آزماییش اولدو و تزریقدن سونرا حیوانلاری 15 دقیقه دیری ساخلایا بیلدی. و نهایتده بو یول اینسان اوستونده‌ده آزماییش اولدو و اوكسیژنین اثری تقریباً 30 دقیقه اینسانین قانیندا قالدی. گر چی اوندان آرتیق ایستیفاده اولاندا قانا صدمه وورور. | ||
پلاستیكلرده‌كی مادّه, اوشاقلارین كؤكلوغونا سبب اولور
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
هلث‌دی نیوزون وئردیگی معلوماتا گؤره, جنوبی كره موحقیقلری كی بو تحقیقی آپاریبلار دئییرلر بو شیمیایی مادّه بدنده‌كی یاناجاق و یاغ تنظیمله‌مه‌سینه اثر قویا بیلر. بو موحقیقلرین دئدیگینه گؤره DHEP ائلیه بیلر ایكی یوللا بدنده یاغ تولیدی‌نین چوخالماسینا باعیث اولسون. اولا بیلر بو ماده آندروژنلری (كیشیلرین جینسی هورمونلارین) آزالتسین, آندروژنلر بدن توده‌‌نین شاخیصینی آشاغی یئندیررلر. (بدن توده شاخیصی‌نین یوخاری اولماغی كؤكلوق علامتیدیر.) اونلار دئییرلر بو ماده تیروئیدین ایشنیه خیلل وارید ائلیه بیلر و تیروئیدین آز ایشله‌مه‌سی بدنی آغیرلادار. بو موحقیقلرین دئدیگینه گؤره فتالاتلاری هر یئرده_یئمك, سو, پلاستیك كیسه‌‌لر, بزك وساییلی, لوسیونلار, شامپولار و پلاستیكدن دوزلمیش اویناتمالی‌لاردا_ گؤرمك اولار. اونلار دئییرلر حامیله خانیملار و كؤرپه اوشاقلار بو ماده‌یه حساسدیلار و سو و ایستی یئمكلری پلاستیكی قابلارا قویولماسی خطرلی اولا بیلر. | ||
وبانین نئجه قاباغین آلاماق اولار؟
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
 وبا ایسهال‌لی ناخوشلوقلارین بیریدیر. ناخوشلوغون علامتلری باغیرساقدا میكروب واسیطه‌سی‌ایله یاییلان سمّدیر . یویولما‌میش میوه و گؤی, باتیق سویونان دوزلمیش بوز و باتیق سودا چیممك اینسانی موبتلا ائلیه بیلر. نئجه وبانین قاباغین آلماق اولار: وبانین یاییلماسی‌نین قاباغین آلماق اوچون ان یاخشی یول بودور كی اونون یاییلما یوللاری باغلانسین و عامیلی آرادان آپاریلسین. • ناخوشلوغو كونترول ائتمكدن اؤترو قاب-قاشیغی دوزگون صورتده یوماق و غذالاری قیزیشیدیریب داغلاندیرماق لازیمدیر. • اینسان فضولاتینی بهداشتی صورتده دفع ائله‌مك: بهداشتی تووالتلردن ایستیفاده ائله‌مك و تووالتی و باتان یئرلری ضید عفونی ائله‌مك لازیمدیر. • تصفیه اولمایان سویو بیر دقیقه قایناتماق و یا كولور تركیباتین سویا آرتیریلماسی توصیه اولور. موسافیرتده مومكون اولان قدر ایستاندارد و آغزی باغلی شوشه‌لردن ایستیفاده ائله‌یین. • میوه و گؤیو تورپاقلاری تمیزلنماغا خاطیر یویون سونرا بیر قابا بئش لتیر سو و 15 قطره قاب یویان مایع توكوب حل ائدین. میوه و گؤیلری بئش دقیقه بویوندا بو محلولون ایچینده ساخلایین و سونرا تمیز سویونان یویون. • وبانین داریشان زامانی آبقورا و آبلیمو كیمی اسیدلی مادّه‌لردن ایستیفاده ائدین. | ||
سیزی عصبلشدیرن 9 یئمك عادتی
یازار : میرزه عبدالصمد ملکی | بؤلوم : ساغلاملیق
+0 به یه ن
یاشاییشدا آرامیش احساسی چوخ زادلارا باغلیدیر كی اونلارین بیری یاخشی تغذیه ائتمك و دوزگون یئمك عادتلرینه صاحیب اولماقدیر.
موناسیب تغذیه, ورزیش و موتعادیل بیر عاطیفی یاشاییش, سیزین فیكری آرامیشیزده چوخ تأثیری وار. بعضی واختلار عصبی اولماق بعضی یئمه‌لیرلرین چوخ یئمه‌سی و یا آز یئمه‌سی اثرینده اولور.
دوزگون اولمایان عادتلرین بعضی‌سین بیلمك اوچون بیزه قوشولون.
قهوه
بونونلا بئله كی قهوه اندازه‌سی‌دك ایچیلسه بدنه فایدادیر آما بیلمك لازیمدیر كی اوندا اولان كافئین مركزی عصب سیستئمینه اثر قویار و آدرنالین ترشّوح ائله‌تدیرر. بو هورمون چتین و استرسلی شراییطده ترشّوح تاپار كی شخص قاچماق و یا ساواشماغا آماده اولسون. هابئله قهوه ایدرار گتیرندیر. بؤیركلر تحریك اولوب آرتیق ایشله‌سه‌لر آرامیشه لازیم اولان مادّه‌لر ایدرارلا بیرلیكده دفع اولار.
بدنه كافئین چوخ یئتیشسه باغیرساقلار دا حسّاس اولارلار و معدنی مادّه‌لرین جذبینده خیلل یارانار. ایستیرئسیز اولسا, موضطریب و نیگران اولساز حتماً 400 میلی گیرمدن آز كافئین مصرف ائله‌یین. توصیه‌میز بودور كی فقط سحرلر بیر لیوان ایچه‌سیز.
انرژی گتیرن ایچمه‌لیلر
انرژی گتیرن ایچمه‌لیلرین طرفدارلاری یئنی یئتمه‌لر ایچینده چوخدور آما بیلمه‌‌لیسیز كی بو ایچمه‌لیلر سیزین انرژیزی چوخالتماق اوچون چوخلو میقداردا تورین, گوارنا آدیندا بیر برزیللی گیاه-كی قهوه‌نین ایكی برابری‌دك كافئینی وار-, كافئین و قندلری وار . بو محصول‌لار سورنال وزلرین تحریك ائدرلر و بئله‌لیكله انرژی ذخیره‌لرین بوشالدارلار. بونا گؤره مصرف احتیاجی دال به دال چوخالار و بئله‌لیكله اعتیاد گتیرر. ایسته‌سز انرژیلی اولاسیز بو مادّه‌لرین یئرینه موناسیب تغذیه‌ز اولسون و ورزیش ائله‌یین.
دوز
حاضیری و كونسئرو اولموش غذالاری یئمگی عادتیز اولسا و یا فست‌فود موشتریسی اولساز بیلین كی دوز مصرفیز یوخاریدیر. طیبّی نظردن دوزون چوخ مصرفی قان فیشارینا باعیث اولار.
شور غذالار بدنین بوتونلویونه و بئیین و اعصابا چوخ فیشار گتیرر. بعضیلرین اعتیقادینا گؤره ساغلام غذا اودور كی شور و شیرین مادّه‌لری اولسون. دوزون مصرفین آزالدین تا آرامیشیز چوخالسین.
یاشیل چای
یاشیل چایدا تئین وار. بو آمینه اسید كافئین كیمی قاندا دوپامین و سروتونین میقدارین موتعادیل ائلر. بو مادّه‌نی چاییزدان حذف ائتمك اوچون كیفایتدی كی چایین اوستونه توكولن سویو ائشیگه تؤكه‌سیز و تازادان سو تؤكوب و قویاسیز اون دقیقه دملنسین. بو حالتده یاشیل چای آرامبخش پولیفنول‌لارین آزاد ائلر. بو چایدا فوق‌العاده آنتی‌اوكسیدانلار وار. توصیه‌میز بودور كی غذا ایله و یا بیلافاصیله غذادان سونرا چای ایچمه‌یین, چونكی دمیر جذبینه مانع اولار. گون بویو داغ-داغ یاشیل چایی ایچسه‌ز فیكریز آرامیشه چاتار.
پروتئین مصرفی‌نین حددن چوخ اولماسی
پروتئین مصرفی‌نین سهمی, غذایی برنامه‌نین یوزده ایگیرمی‌سیندن چوخ اولمامالیدیر. بوشقابلاریزدان كربون هیدراتلاری یعنی چؤركلری حذف ائله‌سز پروتئین مصرفیز چوخالار. البته اگر ات تاپا بیلسز. پروتئینلرده اولان تریپتوفان كربون هیدراتلارلا بیرلیكده شادلیق گتیرن «سروتونین» هورمونون آزاد ائلر. حقیقتده بو كربون هیدراتلاردا اولان آمینه اسیدلر, تریپتوفانین بئیینه نوفوذ ائله‌مگی‌نین آچاری ساییلیرلار. بونا گؤره پروتئینلرینن كربون هیدراتلارین بیرلیكده مصرفی, آرامیش و خوش‌اخلاقلیغا باعیث اولار.
میوه و گؤیون یئمه‌مگی
میوه و گؤی معدنی مادّه‌لر و ویتامینلرین منبعی‌دیلر كی ساغلاملیق و آرامیشه سبب اولارلار. بوندان علاوه اونلار دولودولار فیبرلرله كی راحات دفعه كؤمك ائلرلر. اونلاردا اولان گلوسیدلر انرژی گتیرندیر و سویوندان‌دا ایستیفاده ائتمك اولار.
بو مادّه‌لر خام یا بوغدا پیشیلمیش صورتده مصرف اولسالار چوخ راحات بدنه لازیم اولان ویتامین و معدنی مادّه‌لری تأمین ائلرلر. میوه‌نی غذادان قاباق یا وعده آراسی عونوانیندا یوغورت, پنیر و بادامینانلا یئیین. رنگلی گؤیلر یئیین. نارینجیلر ویتامین و یاشیل‌لار كلسیوم تأمینی اوچون فوق‌العاده‌دیلر.
غذانی یئیین یئمه‌یین
گونون ماشینی یاشاماسی اؤزونو یئمك نحوه‌سینه‌ده تحمیل ائدیب. غذا یئمك آرام موحیطده اولمالیدیر. غذانی آرامیشده یئمك اونو دادماق و اوندان لذّت آپارماق لازیمدیر. قاچا قاچا ساندیویچ دیشله‌ینده و اؤزوزو در دیوارا چیرپاندا اینتیظاریز اولماسین كی شاد و آرام اولاسیز. چالیشین غذانی آرامیشلی و لذّتله یئیه‌سیز.
موناسیب اولمایان رژیملر
لازیم اولمایان كالوریلری آلماماغا چالیشماغیز چوخ یاخشیدیر. آما لازیم اولمایان و چتین رژیملره بویون وئرنده و لازیم اولان میقداردان آز كالوری آلاندا استرس و عصبلشمگه دوچار اولارسیز. موناسیب اولمایان رژیملری اولانلار كی همیشه آغیرلانما نیگرانیدیلار, ایضطیرابلاری چوخ اولار و عؤمرولری‌ده آز اولار.
یاغلاری كامیلاً حذف ائتمك
دوزدور كی یاغلار, كربون هیدراتلار و پروتئینلره گؤره چوخ كالوریلری وار آما بدنینی ساغلاملیغینا لازیمدیرلر. جماعت, حیوانی یاغلار و قیزارتمالار كیمی ایشباع اولموش یاغلارین مصرفین آزالتماقدا یاخشی ایش گؤرورلر.
آما اونون ترسه‌سی‌ده صادیقدیر. چوخ فایدالی اولار كی سیز زیتون یاغی كیمی «مونو»ایشباع اولمامیش یاغلار و سویوق سو بالیغی كیمی «پَلی» ایشباع اولمامیش یاغلار مصرف ائده‌سیز. بو یاغلارین آدی اومئگا 3دور و ایلتهابین منفی اثرلرین آزالدارلار و سیزی آرام و خوش‌اخلاق ائدرلر.
نهایتده توصیه‌میز بودور كی ساغلام و فایدالی غذالارین مصرفین موكمّیل‌لرین مصرفینه ترجیح وئره‌سیز.