آغ جیگرلره فایدالی یئمكلر
یازار : میرزه عبدالصمد ملکی | بؤلوم : ساغلاملیق
+0 به یه ن
آغ جیگرلره فایدالی یئمكلر
متخصصلرین دئدیگینه گؤره، گریپ فروت، موز، بالیق و پنیرین یئمگی آغ جیگر خسته‌لیكلرین ساغالماسیندا تأثیری اولار.
بو تحقیقده آمریكادا و اروپادا 2167 نفر آغ جیگر خسته‌لیگینه مبتلا اولان ناخوشلار مطالعه اولوندولار. اوستده ساییلان یئمكلردن یئیَن خسته‌لرین جیگرلری‌نین ایشینده و قانلارینداكی آغ گلوبول‌لارین سایی‌سیندا مثبت تأثیر گؤستریب.
بو مطالعه‌نین ارشد متخصصی «كورین هانسون» دئییر: یئمك رژیمی بالقوه خطرلی بیر عامل اولا بیلر و چوخلو خسته‌لیكلری گوجلندیره بیلر. علمی نتیجه‌لر گؤستریر كی یئمك رژیمی آغ جیگر خسته‌لیگینده یوخاری حدده تأثیری وار.
بو مطالعه‌ده آنالیزدن بیر گون اوّل، گریپ فروت، موز، بالیق و یا پنیر یئیَن ناخوشلارین وضعیّتی او بیریلره نسبت داها یاخشی اولور.
متخصصلرین عقیده‌سینه گؤره، بو یئمكلرله اله گلن نتیجه آراسیندا سبب - نتیجه رابطه اله گلمه‌ییب آما چوخ احتمالا بونلاردا اولان آنتی اوكسیدان مادّه‌سی بو نتیجه‌لری اله وئریر.
كؤك اولانلار اوخوسونلار
یازار : میرزه عبدالصمد ملکی | بؤلوم : ساغلاملیق
+0 به یه ن
كؤك اولانلار اوخوسونلار
كؤك اولان انسانلاردا آیری مشكل‌ده اولماسا اورك-دامار خسته‌لیگی‌نین احتمالی اونلاردا یوخاری اولار.
كؤكلوك، اورَگه آرتیق یوك و فشار گتیرن ساغلام اولمایان وضعیتدیر. بونا گؤره آریقلاماق لازم مسأله‌دیر.
سیز، ایده‌آل و نورمال چكی‌یه ال تاپساز سیزده اورك دامار خسته‌لیگی‌نین احتمالی آزالار. بو، یاغ مصرفی‌نین آزالتماسی، میوه، تره‌وز و حبوبات مصرفی‌نین آرتیرماسی و بدن تحرّكونون چوخالماسی معناسیندادیر.
یئمك رژیمینی باشلاماق راحت اولا بیلر آما اونو دوام ائتدیرمك چتیندیر. اوّلده هدفی بللی ائله‌مكله یول اوستو مانعلره دوشونوب چتینلیكلرله نئجه اوز به اوز اولماغا تصمیم توتمالی‌سیز.
مناسب بیر یئمك رژیمی باره‌ده تغذیه متخصصی ایله مشورت ائله‌مك سیزه یاخشی اولار. یونگول‌لشمك اوچون غذا یئمه‌مك گاهدان بیر دب اولان رژیملرله آریقلاماق اولماز. سیز بیر گونده كؤكلمه‌میسیز كی بیر گونده ده آریقلایاسیز.
یئمك عادتیزه نظر سالین. باخین گؤرون آجالاندا یئمك یئییرسیز یوخسا عادت اوزوندن هر گئجه تلویزیون قاباغیندا اوتوروب یئمك یئییرسیز. بئله اولسا یئمك رژیمیزده دَیشیك‌لیك وئرمه‌لیسیز.
ایچیزده اولان یئمك هو‌سینی كنترل ائله‌یین. سیزه كالوریسی یوخاری اولان یئمكلر وئریلنده، اونلاری مؤدبانه ردّ ائله‌یین.
آرام یئیین و تیكه‌لریزی كیچیك گؤتورون. آغزیزداكینی چئینه‌ییب قورتارمامیش او بیری تیكه‌نی گؤتورمه‌یین.
گونده بیر دفعه چوخ یئمك عوضینه، نئچه دفعه آز یئیین. جور به جور میوه‌لر، تره‌وز، تاخیل، سوت محصول‌لاری، قیرمیزی ات، بالیق و دریسیز تویوق كیمی سالم یئمكلردان استفاده ائله‌یین.
غذالاری یاغدا قیزارتمایین بلكه اونلاری توست، فئرده پیشیرمك، كباب و سودا پیشیرمك فورموندا حاضرلایین. هابئله گونده ایچدیگیز سویون مقدارینی آرتیرین.
بدن تحرّكوزو آرتیرین
بدن فعالیتی، غذا رژیمیندن آرتیق سیزین ساغلاملیغیزا فایدالی اولار. او سیزی آغ جیگر، سوموك و اورك دامار خسته‌لیكلریندن اماندا ساخلار.
یاز فصلینده آلرژی عامل‌لری
یازار : میرزه عبدالصمد ملکی | بؤلوم : ساغلاملیق
+0 به یه ن
یاز فصلینده آلرژی عامل‌لری
جنینلیك زمانیندان بدنین دفاع سیستملریندن بیری اؤز و اؤزگه‌‌لیگی تشخیص وئریب بیگانه عامل‌لرله مبارزه ائله‌مكدیر.
قاندا اولان مدافعه سلول‌لاریندان علاوه دری‌نین تمامینی و بورون، نای، گؤز، قولاق كیمی بدن منفذلری‌نین اورتوسونو بوروین سلول‌لار واردیلار. بو سلول‌لارین وظیفه‌سی خارجی جرملره یئیین عكس العمل گؤرستمكدیر. بو جرملر بدنه داخل اولماق همان، سلول‌لار آسقیرماق، اؤسكورمك، بورون سویو آخماسی و دری‌نین ملتهب اولماسی كیمی عكس العمل‌لره سبب اولارلار.
ساییلان عكس العمل‌لر كاملاً طبیعی و عادی‌دیلر. مثال اوچون هوانین چیركلی اولدوغو زمان هواداكی ایری ذرّه‌لر، آسقیریب اؤسكورمگه سبب اولورلار كی بونا آلرژی دئییلمز. مشكل، بدنین مدافعه سلول‌لاری‌نین حددن آرتیق تحریك اولدوقلاری زمان یارانیر.
بئله اولاندا شخص آلرژی ناخوشلوغونا مبتلا اولور. چیركلی هوادا اولان كیمی اؤسكورمگه و تنگی نفس اولماغا باشلایان اوشاق كیمی. بئله‌نچی وضعیته، آلرژیك آسم دئییلیر. و یا یاز فصلینده هوادا اولان بیتكی ذرّه‌لرینه گؤره گؤزلری قیزاران و آسقیران بیر جوان قیز.
محیطی عامل‌لرین معرضینده اولان بدندن محافظت وظیفه‌لری اولان انداملار، آلرژیك ناخوشلوقلارا مبتلا اولا بیلرلر. دری، بورون، تنفس دستگاهی و هضم سیستمی، آلرژی‌یه مبتلا اولان انداملارداندیلار كی سپمه، آسم، رینیت و اسهال كیمی آلرژیك ناخوشلوقلارا مبتلا اولارلار.
آلرژیك رینیت، بورونون ملتهب اولماسینا دئییلیر. دال به دال اؤسكورمك، بورون سویو گلمك، گؤز و بورونون قاشینماسی، بورون دلیكلری‌نین توتولماسی، گؤزلرین قیزارماسی و سولانماسی و بوغازین قاشینماسی اونون علامتلریندن ساییلیر.
بو علامتلرین سویوق دَیمه‌یه چوخ اوخشارلیغی وار. سویوق دَیمه اوچ گون چكن ویروسلی بیر ناخوشلوقدور كی بدنین آغریسی و حرارتی اولار و اوچ گوندن سونرا آرادان گئدر. بیر حالدا كی آلرژیك رینیتین علامتلری آسقیرماق، گؤز و بورون سویو آخماسی اولور و داها اوزون زمان اولور.
بعضاً بیر ائو حیوانی‌نین توكو و یا یئلَگینه گؤره آلرژی توتوروق. بعضاً ائوده سوسری‌نین اولماسی آلرژی گتیریر و گاهدان‌دا یورقان دؤشكده اولان یون و یئلك آلرژی‌یه سبب اولور.
آلرژی‌نین تكجه درمانی آلرژی گتیرن زادلاردان اوزاق اولماقدیر. بو ایشی‌ده یاشادیغیمیز یئره مناسب فیلترلرین قوشولماسی و چیركلی یئره گئدنده ده ماسكدان استفاده ائله‌مكدیر.
زهری بدندن نئجه آلماق اولار؟
یازار : میرزه عبدالصمد ملکی | بؤلوم : ساغلاملیق
+0 به یه ن
زهری بدندن نئجه آلماق اولار؟
مختلف سمّ‌لر و هوا چیركندیریجی مادّه‌لرین تولیدی بو گونكی صنعتی دنیاسی‌نین دغدغه‌لریندندیر. انسان و سایر موجوداتین یاشاییشینی خطره سالان زهرلی مادّه‌لر. صنعتی چیركندیرنلری تصفیه ائله‌مك، قورقوشوم، جیوه، مادیوم و آرسنیك كیمی مادّه‌لرین زهری‌نین تمیزلنمه‌سی اوچون اَن مناسب یولدور.
بو سمّ‌لر انسانین بدنینه نئجه داخل اولور؟ و اونلاری بدندن نئجه چیخارتماق اولار؟
اوست-اوسته بدنده اولان زهلری ایكی دسته‌یه بؤلمك اولار: بیتكی سمّ‌لری، حشره داوالاری، هوا چیركلیگیندن عمله گلن آغیر فلزّلر و مختلف دخانیات كیمی بو زهرلرین بؤیوك قسمی، ائشیكدن بدنه داخل اولورلار.
زهرلرین آیری قسمی‌ده، غذا و داوالارین بدنده تجزیه اولماسیندان تولید اولورلار.
سیگار چكماق بدنه زهر داخل ائله‌مگین بللی یوللاریندان بیریدیر، آما آیری یوللار دا وار كی مختلف زهلری انسانین بدنینه داخل ائلیر. تنفّس ائله‌دیگیمیز هوا، یئدیغیمیز غذا، ایچدیكلریمیز و آتدیغیمیز داوالار بدنیمیزه زهر داخل اولماغین آیری یوللاریدیر.
هابئله جسمی و روحی فشارلار بدنده بیر سئری زهرلرین تولیدینه سبب اولور.
ترله‌مه قاباغینی آلان اسپری‌لر، فلورسنت لامپلار، تصفیه اولموش قند و بزك و بهداشتی لوازماتی، بو زهلرین منبعی ساییلیر. بعضی ایچمه‌لیلرده یوخاری قندین اولماسی، دیشلری آرادان آپارماقدان علاوه بدنه چوخلو مقداردا سدیم كربنات داخل ائلیرلر.
كنسرو اولونموش غذالاردا اولان آرتیریلمیش مادّه‌لر گونده‌لیك بدنه داخل اولان زهرلردن ساییلیرلار. آیری طرفدن، حشره داوالارینداكی فلوراید و كلر چوخ راحت شكلده سودا حل اولوب انسانین بدنینه جذب اولور.
هابئله موبایل كیمی وسیله‌لردن عمله گلن مغناطیس دالغالاری‌نین معرضینده اولماق، بدنه ضرر وورا بیلن بیر سئری زهلرین تولیدینه سبب اولور.
زهرلر بدنه داخل اولان زمان، بیرینجی اولاراق قره جیگر و سونرا بؤیركلر اونو جذب ائدیب دفع ائله‌مگه چالیشیرلار. بو عمل غذانین داها یاخشی هضمی و بدنه لازم اولان انرژینی‌نین تأمینی اوچون فایدالی اولور.
تازا میوه و تره‌وزلرین گونده‌لیك مصرفی بدنین زهرینی آلماقدا، یوخاری نقشی اولا بیلر. مثلاً فیبر، كربوهیدرات و آنتی اكسیدنلا دولو اولان مادّه‌لرین مصرفی، بدنه، سمّلرین دفیعینده كؤمك ائلر.
فیبرلر باغیرساقلارین حركتینی آرتیرماقلا و آیری طرفدن باغیرساقلاردا اولان سمّ‌لره یاپیشماقلا بدنده‌كی سمّلرین دفع سرعتینی آرتیریرلار.
بدنین زهرینی آلماقدا تأثیرلی اولان مادّه‌لردن، بیتكیلرده اولان كلروفیلدیر كی بیتكیلرین فتوسنتز پروسه‌سینه كؤمك ائلر. بئله اینانیلیر كی، بو مادّه‌نین ملكول قورولوشونون هموگلوبینه اوخشاماسینا گؤره، او، انسان ساغلاملیغینا فایدالیدیر. كلروفیل قان آخیمی‌نین تمیزلنمه‌سینه، آغیز ایی‌نین محو اولماسینا، سرطانلی مادّه‌لرین تأثیرسیز اولماسینا و دیشلرین چورومه‌سی‌نین قاباغینی آلماغا سبب اولا بیلر.
كلروفیل، استالید زهرلرینی (یورقونلوق عاملی) و هیستامینلری (آلرژی عاملی) دفع ائله‌مكله انسانین یاشاییشینا مثبت تأثیر قویور.
دنیانین كلروفیلدن لاپ غنی مادّه‌سی یاشیل یوسوندو، ائله بونا گؤره ژاپنلی‌لار بو مادّه‌نی چوخ مصرف ائلرلر. بو یوسونلاردا اولان كلروفیل، فیبر و پلی ساكاریدلی تركیبات، بدنده اولان آغیر فلزّلر و حشره سمّلریندن قالان زهرلر و سایر چیركلندیرنلرله قاریشیب، اونلاری مدفوع یولو ایله بدندن دفع ائلر.
تحقیقلرین نتیجه‌سینه اساساً بیر آی بویوندا گونده‌لیك 3-2 گرم یوسون مصرفی، انسان بدنینی زهرلردن تمیزلیر.
آیری طرفدن بیتكی فیبرلری، غذانین داها یاخشی هضمینه فایدالی اولورلار و باغیرساقلارین طبیعی حركتینی آرتیرماقلا یبوست كیمی مشكل‌لری آرادان آپاریب هضم سیستمی‌نین داها ساغلام اولماسینا كؤمك اولورلار.
آشاغیداكی مناسب غذا رژیمی ایله هضم سیستمینی ساغلام ساخلاماق و اونا زهرلرین دفعینده كؤمك ائله‌مك اولار:
1. فیبرلی غذالارین یئمه‌سی.
2. گونده‌لیك یاشیل چای و تازا لومو سویو ایچمك.
3. C ویتامینلی اولان مادّه‌لرین یئمه‌سی. بو ویتامین گلوتاتیون تولید ائله‌مكله بدن زهرلرینی دفع ائله‌مگه كؤمك ائلر.
4. گونده‌لیك 8 لیوان سوی ایچمك. چونكی سو طبیعی اولاراق بدنین زهلرین و لازم اولمایان مادّه‌لرینی سودوك و تر یولو ایله دفع ائلر. ترله‌مگی آرتیرماق اوچون سونا لاپ گؤزل یولدور.
5. اضطرابسیز و مثبت انرژی ایله دولو یاشاییش.
6. درین نفس آلماق و اكسیژنین بدنه داخل اولماسی.
7. ورزش و فیزیكی فعالیت. گونده‌لیك بیر ساعت ورزش بدن زهرلری‌نین دفعینه لاپ گؤزل یولدور. ورزش زمانی نفس آلماق یئیینلشیر و قان آخینی آرتیر. نتیجه‌ده ترله‌مك و سودوك مقداری چوخالیر.
8. ساریمساق، كلم، جعفری، كنگر، قند چوغوندورو و ساری كؤكون مصرفی، بدنه زهرلری مخصوصاً قورقوشوم و جیوه‌نی دفع ائله‌مكده كؤمك اولار.
9. قیرمیزی رنگده اولان میوه‌لر بدن زهرینی آلماق اوچون اَن تأثیرلی مادّه ساییلیرلار. بو میوه‌لر پتاسیم‌دان دولو اولورلار و قارا جیگرین تمیزلنمه‌سینده تأثیرلیدیلر.
تبریزین نفسی بوغولور
یازار : میرزه عبدالصمد ملکی | بؤلوم : ساغلاملیق
+0 به یه ن
تبریزین نفسی بوغولور
بو مسأله كئچن هفته‌لره نسبت اورك و آغ جیگر خسته‌لری‌نین ساییسینی یوزده اوتوز آرتیریب و آیری طرفدن اوشاقلار و قوجالار بو خسته‌لیكلرین داها چوخ معرضینده اولورلار.
تبریز هواسی‌نین چیركلنمه‌سینه نئچه سبب وار كی اونلاری آرادان آپارماق و یا هئچ اولماسا تأثیرینی آزالتماق اوچون مسئول‌لار طرفیندن دوزگون برنامه لازمدیر.
تبریزین حرارتی نیروگاهی چوخداندیر كی طبیعی گاز یئرینه مازوت یاندیریر بو مسأله هوانین جوجوت دی اكسیدینی آرتیریر و هوانی چیركلندیرن آیری گازلار دا تولید ائلیر.
هوا چیركلیگی‌نین آیری عاملی‌ده خیابانلاردان گزن ماشینلاردیلار كی سایلاری حددن آشیب. جماعتی عمومی ماشینلاردان استفاده‌یه ترغیب ائتمك اوچون ایندیلیكده تبریزین 1200 تازا اوتوبوسا احتیاجی وار و هر ایل 200 تازا اوتوبوس آلینمالیدیر.
بو چیركلی هوادا جماعتیمیزه توصیه اولور هئچ عنواندا ماسكسیز ائودن ائشیگه چیخماسینلار.