هر ائوده اولان طبیعی آغری كسنلر
یازار : میرزه عبدالصمد ملکی | بؤلوم : ساغلاملیق
+0 به یه ن
هر ائوده اولان طبیعی آغری كسنلر
1. گیلاس: گیلاسدا «آنتوسیانین» آدینداكی تركیبلر، حقیقتده گوجلو آنتی اكسیداندیلار كی ایكی یول ایله آغرینی آزالدارلار. بو تركیبلر التهابین قاباغینی آلماقلا و هابئله آغری آنزیملرینی آرادان آپارماقلا، آسپرین و ناپروكسن كیمی عمل ائله‌ییب، آغری‌نین ساكتلشمه‌سینه كؤمك ائلرلر. بیر تحقیقین نتیجه‌لری سحر یئمگینده چوخلو مقداردا گیلاس یئینلرین آغریلاری‌نین یوزده ایرمی بئشی‌نین آزالماسینی گؤستریر.
2. زنجفیل: بو كؤك، سنّتی قارین سانجیسی داواسیدیر و اورك بولانماسینی‌دا درمان ائلر. آسپرین و ضد التهاب خاصیّتلی اولان زنجفیل، عضله، میگرن و آرتریت آغریلارینی ساكتلشدیره بیلر.
3. قیرمیزی بیبر: بیبرده «كاپسایسین» آدیندا تركیب وار كی عصب ترمینال‌لارینی تحریك ائله‌مك و آغری سیگنال‌لارینی انتقال وئرن شیمیایی مادّه‌نین آزالتماسی ایله، آغرینی آزالدار.
4. بالیق اَتی: آز مقداردا جیوه‌سی اولان و یوخاری مقداردا یاغ اسید اومگا-3 اولان بالیقلارین مصرفی، آغرینی آزالتماقدا تأثیری وار. اومگا-3، قان دولانیشینی یاخشیلاتماقدا و عصب و قان دامارلاری‌نین التهابینی آزالتماقدا تأثیرلیدیر.
5. ساری كؤك: اوزون ایللر بویو بو ادویه‌دن آغرینی آزالتماقدا و غذا هضمینی یاخشیلاتماقدان اؤترو استفاده ائلیرلر. آما متخصصلرین دئدیگینه گؤره ساری كؤكون آنتی التهاب خاصیّتی‌ده وار و انسان بدنینی، مفصل التهابیندان قورویار و عصبی سلّول‌لارین فعالیّتینی تقویت ائلر.
6. یوغورت: طبیبلرین دئدیگینه گؤره، یوغورتدا، التهابی و آغرینی آزالدان نئچه جوره باكتری وار.
7. قهوه: قهوه‌ده‌كی كافئین، باش آغریسی تأثیرینده ملتهب اولان آچیلمیش قان دامارلارینی ییغماقلا، آغری‌نین شدّتینی آلار.
8. نانه: بو بیتكی عضله توتولماسی‌نین قاباغینی آلار و بونا گؤره، نانه عراغی تحریك اولان باغیرساق سندرومو تأثیرینده عمله گلن قارین سانجیسیندا، استفاده اولونار.
9. یاشیل سویا: اوكلاهما دانشگاهیندا بیر تحقیقده، بیر عدّه‌یه 40 گرم سویا پروتئینی و آیری عدّه‌یه سوتلو پروتئین وئردیلر. تحقیقین سونوندا سویا پروتئینی‌نین، آغری كسمكده داها تأثیرلی اولدوغو بللی اولدو.
10. زوغال میوه‌سی‌نین سویو: زوغال سویو معده و كیچیك باغیرساقدا، هلیكوباكتر پیلوری میكروبی تأثیرینده عمله گلن یارالارین قاباغینی آلار.
هابئله بونلاری شكر علاوه ائله‌مه‌دن ایچمك لازمدیر. چونكی شیرین اولاندا التهاب گتیررلر.
یئمكلریزدن دوزو كسمه‌یین
یازار : میرزه عبدالصمد ملکی | بؤلوم : ساغلاملیق
+0 به یه ن
یئمكلریزدن دوزو كسمه‌یین
یئدیگیمز دوزون چوخونو، خبریمیز اولمادان حاضری یئمكلر و فست فودلاردان قبول ائدیریك.آمریكانین آیوا دانشگاهینداكی تحقیقلر، دوزون، روح دوشگونلوگونون قاباغین آلماقدا تأثیرلی بیر ماده اولدوغونو ثابت ائلیر. محققلرین اینادیغینا گؤره، دوز متعادل صورتده استفاده اولونسا روح دوشگونلوگونون علامتلرینی ساغالدار. البته یاددان چیخارتمامالی‌ییق كی دوزون حددن آرتیق مصرفی، قان فشارینی یوخاری آپارار و اورك-دامار خسته‌لیكلره مبتلا اولماغا زمینه یارادار.
بو تحقیقده، كفایت قدر دوز یئمه‌ین سیچانلاردا روح دوشگونلویو علامتلری گؤروشدو و اونلار، طبیعی حالدا لذّت آپاردیقلاری ایشلردن ال چكدیلر.
قبول ائله‌دیگیمیز دوزون چوخو حاضری یئمكلر و فست فودلاردان اولدوغو اوچون، دوزون مصرفینده داها آرتیق دقّت ائله‌مه‌لی‌ییك. انگلستانین یئمك استاندارد مركزی‌نین اعلامینا گؤره، بؤیوكلر گونده 6 گرمدن آرتیق دوز یئمه‌مه‌لیدیلر.
بو تحقیقین نتیجه‌لری رفتار و پسیكولوژی مجله‌سینده چاپ اولوب.
دنیادا اَن چوخ گازلی ایچكی بیزیم اؤلكه‌ده ایچیلیر
یازار : میرزه عبدالصمد ملکی | بؤلوم : ساغلاملیق
+0 به یه ن
دنیادا اَن چوخ گازلی ایچكی بیزیم اؤلكه‌ده ایچیلیر
نظام پزشكی سازمانی‌نین وئردیگی خبره گؤره، عمومی دكترلر انجمنی‌نین نایب رئیسی دئدی: گلیر مقداری، تحصیلات، ایش، تغذیه، اجتماعی طبقه كیمی عامل‌لر بیولوژیك عامل‌لردن داها آرتیق ساغلاملیقدا تأثیرلی اولورلار و انسان ساغلاملیغیندا یوخاری نقش‌لری وار.
او آرتیردی: الده اولان مطالعه‌لره گؤره ایرانلیلارین یوزده دوخسانیندا كلسیم آزلیغی وار و بو آمار سوتون سوبسیدینی حذف ائدندن سونرا یوزده اون دؤرد چوخالیب. حقیقتده سوتون باهالیغی جماعتی اونون مصرفیندن واز كئچدیریب. سوت، یئمك هرمی‌نین ارزشلی منبعلریندن ساییلیر و انسانین اونا، میوه‌دن و گؤیدن داها آرتیق احتیاجی وار. سوتون باهالاشماسیندان اوّل، اونون ایللیك مصرفی 80 الی 100 كیلو گرم ایدی كی ایندی باهالاشاندان سونرا یوزده ایرمی ایكی آزالیب و 60 الی 70 كیلوگرمه چاتدیغینی گؤرورورك.
او آرتیردی: دنیادا گازلی ایچكی مصرفی هر نفره ایلده 10 لیتردیر. بیزیم اؤلكه‌ده بو میزان 42 لیتردیر. بو غلط برنامه دیشلرین چورومه‌سی، بؤیرَكلرین ناخوشلاماسی و . . . كیمی مشكل‌لری یارادیر.
سوموك پوكالماسی‌نین دوشمنی، ایسپناه
یازار : میرزه عبدالصمد ملکی | بؤلوم : ساغلاملیق
+0 به یه ن
سوموك پوكالماسی‌نین دوشمنی، ایسپناه
ایسپناه یئمك، سوموكلرین پوكالماسی‌نین قارشی‌سینی آلماقدان علاوه، اورك خسته‌لیكلری و باغیرساق سرطانی كیمی خسته‌لیكلرین قاباغینی آلا بیلر.
ایسپناهدا اولان Kویتامینی، سوموكلرین املاحینی داها سیخلاندیرار و اونلارین پوكالماسی‌نین قاباغینی آلار. ایسپناه یئیَنلرین ایچینده سوموك سینماسی داها آز اولور.
كلسیم، فسفر، پتاسیم، روی و سلنیوم، چوخلو مقداردا ایسپناهدا وار و اونون سوموك دوزلتمه پروسه‌سینده رولو اولماقدان علاوه، قارا جیگرین ساغلاملیغیندا دا نقشی وار.
ذهنیمیزی نئجه آراملاداق؟
یازار : میرزه عبدالصمد ملکی | بؤلوم : ساغلاملیق
+0 به یه ن
ذهنیمیزی نئجه آراملاداق؟
ائویزه و ایش یئریزه مثبت باخیشیز اولسون
بو ایش اوچون ائویزی و ایش یئریزی جور به جور خاطره‌لر و خوش آنلارلا دولدورون. مثلاً اورانی مسافرتلریزدن اولان شاد عكسلریزله دولدورون. عكسلرین تكرارلی اولماماسی اوچون نئچه وقتدن بیر اونلاری دگیشین.
قدر بیلن اولون
اطرافیزداكیلارین قدرینی بیلمگی نشان وئره بیلسز، اونلارا مثبت و یاخشی تأثیر قویموش اولورسوز. بونا گؤره مخاطبیزین گؤزلرینه باخاراق «تشكر ائلیرم» دئیین. سونرا بوتون مثبت حادثه و ایشلریزی گونده‌لیك دفتریزه یازین.
آیریلارینی تعریفله‌یین
آیریلارین مثبت ایشلرینی كشف ائله‌مكله، بئینیزه آیریلارین یاخشیلیقلارینا فكرلشمگی اؤیرَدیرسیز و بو سیزین فردی یاشاییشیزدا چوخ مثبت تأثیر قویار و بو مثبت انرژی، سیزین اورگیزه و بئینیزه داخل اولار.
مدیتیشن ائله‌یین
انسانلار، ایچ دنیالاریندان خبردار اولماق اوچون مكاشفه و دوشونجه‌یه احتیاجلاری وار. تماماً آییق اولدوغوز زمان دوز اوتورون، نفس آلماغیزدا دقیق اولون و بدنیزین جوابلارینا دقّت ائدین. دقّتیز داغیلیرسا دا تازادان نفس اولماغیزا دقیق اولون.
بدن دیلینه چوخ دقّت یئتیرین
جامعه‌ده یاخشی گؤرونمك ایسته‌ییب انسانلارلا دوزگون ایلگی قورماق ایسته‌سز یاخشی اولار مختلف حال‌لاردا انسانلارین بدنلری‌نین عكس‌العمل‌لرینه دقّت یئتیره‌سیز. اؤز ایچیزده حدس ووراسیز كی او ایندی نه حسّ ائدیر. سونرا بو تمرینی دوستلاریزین اوستونده ائدین و گؤرون حدسیز نه قدر دوزدور.
گونده اون دقیقه دقیق اولون
دقّت گوجوزو آرتیرماق اوچون گونده اون دقیقه ساكت بیر اوتاقدا اوتوروب آچیق گؤزله اوز به اوزده‌كی سوژه‌یه مثلاً تابلو و یا آیری بیر شئیه دقیق اولون.
حسّلریزی تحریك ائله‌یَنلری تانی‌یین
همیشه متعادل اولماق ایسته‌سز و حسّلریزین اسیری اولماماق ایسته‌سز، حسّلریزی تحریك ائدن حادثه‌لری یازمالیسیز. سونرا نئچه درین نفس آلیب و ریلكس حالدا 15 دقیقه بویوندا او موضوعلار باره‌ده و وئردیگیز عكس‌العمل‌لر باره‌ده دوشونون.
مهربانلیغی و تسلّی وئرمگی تصوّر ائدین
مهربان و شفقتلی یاشاییشیز اولماغینی ایسته‌سز، هفته‌ده دؤرد بئش دفعه و هر دفعه بئش اون دقیقه بو تمرینی ائله‌مه‌لیسیز: تصوّر ائله‌یین دوستلاریزین بیری یاشاییشیندا مشكلی وار و سیز اونا تسلّی وئریب اونو آراملادیرسیز. هر نفس آلماغیزدا اونا تسلّی وئریب و هر نفس وئرمگیزده اونون تسكین تاپماسینی گؤرورسوز. بو انسانین دردلری‌نین بیر آز آزالماسینا سبب اولار.