دیشلرین چورومه‌سی داها اولمایاجاق
یازار : میرزه عبدالصمد ملکی | بؤلوم : ساغلاملیق
+0 به یه ن
 |
||
|
عالیملر تازا بیر ایقدامدا ائله ایش گؤردولر كی ائلیه بیلر دیش دؤكتورلرین بئكار ائله‌سین. اونلار بیر جور واكسن دوزَلدیبلر كی بیزی همیشه‌لیك دیش چورومه‌سی موقابیلینده موقاویم ائدیر. آمریكانین فوریست مؤسیسه‌سی‌نین موحقیقلری بیر واكسن دوزلدیبلر كی دیشلرین چورومگینه باعیث اولان mutans streptococci باكترینی آرادان آپاریر. بو باكتری غذانی تجزیه ائدنده لاكتیك اسیدی تولید ائدیر كی دیش میناسینی یونور و چورومگه سبب اولور. بو واكسن دیفاع سیستمینه اؤرگه‌دیر كی باكتریلرین دیشلره یاپیشماسینا سبب اولان آنزیملری اؤلدورمك اوچون, آنتی‌بادی دوزلتسین. بو باكتریلر دیشه یاپیشماسالار آغزین سویو اونلاری یویار و دیشلر ساغلام قالارلار. سیچانلار اوستونده اولان آزماییشلر گؤرسدیب كی بو واكسن دیشلرین چورومه‌سی‌نین قاباغینی آلیر. آداملار اوستونده اولان آزماییشلر ده اوخشار نتیجه‌یه چاتیب. بو واكسن دیشلری بؤیومكده اولان بیر یاشدان كیچیك اوشاقلارا وئریلیر. دیش پلاكی باكتریلری‌نین دوزلمه‌سیندن قاباق. دؤكتور دانیل اسمیت بو مؤسیسه‌نین موحقیقلریندن بیری دئییر: «اوشاقلارا كیچیك یاشدان بو واكسن وورولسا نظریمه بئله گلیر كی دیش پلاكلارین ییغیشماسی‌نین قاباغین آلماق اولار.» موحقیقلر دئییرلر بو واكسن بورون قطره‌سی صورتینده اولا بیلر كی اوشاقلارا و بؤیوكلره چتینلیگی اولماسین. بورون و آغیزین بیر-بیرلرینه ایرتیباطلاری وار و واكسن بوروندان داخیل اولسا, آنتی‌بادیلر آغیز سویونا یول تاپا بیلرلر. گلن نئچه ایلده بو واكسن بازارا گلسه دیش و آغیز ساغلاملیغینی تپ-چئویر ائده‌جك. | ||
سیگار چكنلرین یوخولاریندا ایختیلال چوخ اولور
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
آلماندا ایكی مین نفردن چوخ اینسانین اوستونده آپاریلمیش تحقیق گؤرسدیر كی دوخانیات مصرف ائدنلرین گئجه‌لر یوخلاماقدا موشكوللری وار و آیریلارلا موقاییسه‌ده یوخولاری آرام اولمور. موحقیقلر بیلیبلر كی بو تحقیقده شیركت ائدنلرین 1100 نفری‌نین یوزده 17-سی گئجه‌لر 6 ساعتدن آز یاتیرلار و یوزده 28-نین یوخو كیفیتی پریشاندیر. استفان كوهرس بو تحقیق باره‌ده یازدیغی علمی مقاله‌ده دئییر: بو تحقیق بیرینجی دفعه‌دیر كی سیگار چكنلر و چكمه‌ینلرین یوخولارینی تحقیق ائدیر. تحقیق اولان گروه ائله آداملار ایدیلر كی هئچ جوره روحی ایختیلال سابیقه‌لری یوخیدی و ایطمینان اوچون بالقوه ریسكلی عامیللر ده كونترول اولوب. بو تحقیقین نتیجه‌لری تكلیكده گؤرسده بیلمز كی سیگار چكمك موستقیم صورتده یوخونو موختل ائدر, نیه كی ایمكانی وار بو آداملارین بعضیسی‌نین آیری عادتلری ده اولسون كی اونلارین یوخولارینا تأثیر ائده. بو عادتلردن گئجه یاریسینادك تیلویزیون قاباغیندا قالماق و یا بیر آز فیزیكی فعالیت اولماقدیر كی راحت بیر یوخویا سبب اولار. آما آیری طرفدن دئمك اولار بو تحقیق گؤرسدیر كی نیكوتینین تحریك ائدن اثری بو ایختیلالا سببی اولور. یوخو كیفیتی چوخ آشاغی اولانلارین چاقلیق, دیابت و اورك ناخوشلوقلاری كیمی موشكوللری‌ده اولار بیلر. بو تحقیقده 1071 نفر سیگار چكن و 1243 نفر سیگار چكمه‌ین كی بئیینلرینده هئچ موشكول یوخیدی, شیركت ائله‌میشدیلر. بئیین موشكولونه بو قدر تأكید ائله‌مك بونا خاطیر ایدی كی اولا بیلر بئیین موشكولو یوخودا ایختیلال یاراتسین و یا سیگار چكمگه ریغبت یاراتسین. | ||
آلما فایدالیدیر, آروادلارا داها فایدالی
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
آروادلار گونده بیر آلما یئسه‌لر كولسترول قاباغیندا بیمه اولارلار. حتماً ائشیدیبسیز كی گونده بیر دانا آلما یئیه‌نه دؤكتور لازیم اولماز. آما تازا تحقیقلر گؤرسه‌دیر كی آلمانین هامی‌یا فایدالی اولماسیندان علاوه آروادلارا داها چوخ فایداسی وار. موحقیقلر دئییرلر آروادلار گونده بیر آلما یئمكله قانلارینداكی پیس كولسترولو آزالدیب و موثبت كولسترولو چوخالدیرلار. بو تحقیقده آلتی آی بویوندا گونده 75 گیرم قورو آلما یئیه‌ن خانیملارین پیس كولسترولو 23 درصد آزالیب و یاخشی كولسترولو 4 درصد چوخالیب. آرمانین وئردیگی معلوماتا گؤره, بو موطالیعه ایكی گروه 45 دن 65 یاشا قدر خانیملاردا انجام تاپدی و بو موطالیعه‌ده بیر گروه بیر ایل بویو قورو آلما یئدیلر و او بیری گروه آیری قورو میوه یئدیلر. اوندان سونرا اوچ آی, آلتی آی فاصیله‌ایله و آخیرده اونلاردان قان نمونه‌سی آلیندی و بیر ایللیك دؤره‌نین آخیرینده بو نتیجه آلیندی كی آلما یئیه‌ن خانیملارین پیس كولسترولو آزالمیشدی. عالیملر هابئله بیلدیلر كی آلمادان بدنه جذب اولان گونده 240 كالوری نه اینكی خانیملارین كؤكلویونه باعیث اولماییب بلكه بیر آز دا یونگوللشیبلر. عالیملرین دئدیگینه گؤره, بو آزماییش قورو آلما ایله اولسا دا بو نتیجه‌نی تازا آلمادان دا گؤزله‌مك اولار. بیر لیوان دوغرانمیش تازا آلما, لیوانین دؤردده بیر قورو آلما ایله برابرلیك ائلر. | ||
حیرصی سویوتماق اوچون 5 فوری یول
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
حیرصله‌نن زمان باشیزی بیر ایشه قاتین كی ذهنیز مشغول اولسون؛ حیرصدن و سونراكی پشمانلیقدان قورتولماغا چوخلو یوللار وار. آراملیقلا بیر لیوان سو ایچین نظره چوخ ساده گلیر, آما چوخ تأثیرلیدیر. پس بوندان سونرا هر واخت حیرصله‌نسز, اؤزوزه بیر لیوان سو تؤكون و آراملیقلا ایچین. هر قورتوم سویا دیقّت ائدین, تصوّور ائدین كی سو, نئجه آغزیزدان معده‌زه گئدیر, بئله‌لیكله اؤزوزو داها آرام حیس ائده‌جكسیز. غضبین فیشارینی بوشالدین بیر یوموشاق بالیش یا موتكّه سیزه كؤمك ائدر كی تازادان آراملاشاسیز. بوتون غضبیزی بالیشین اوستونه تؤكون, بالیشی مؤحكم یوموروقلایین و نئچه دقیقه‌نین ایچینده غضبیز بوشالار. گولمه‌لی قیافه‌یه فیكیرلشین گؤزلریزی یومون و سیزی غضبلندیرن شخصین قیافه‌سینی نظریزه گتیرین, ایندی اونو مومكون قدر لاپ گولمه‌لی حالتده تصوور ائدین مثلاً اونو بؤیوك گوللو شالوار و یا بؤیوك و یاشیل شیپوری بؤرك و یا عجیب بیر پالتار ایچینده تصوور ائدین كی تلخك كیمی ادا چیخاردیر. بئله ائله‌سز گؤره‌جكسیز كی غضبیز یاددان چیخیب و گولورسوز. درین نفس آلین اؤزوزو بیر كنارا چكین و گؤزلریزی یوموب درین نفس آلین, چالیشین نفسین گئدیب گلمه‌سینی ائشیده‌سیز. ذهنیزی باغلایین و نفس سسیندن سونرا آیری سسه فیكیر وئرمه‌یین. داها درین و یاواش نفس چكین, اورگیزین دؤیونمه‌سی یاواشلار و غضبیز سویویار. اؤزوزو ذهنی بیر فعالیته مشغول ائدین اوندا كی گؤردوز غضبله‌نیبسیز, ذهنیزی بیر ایشه مشغول ائدین, مثلا سودوكو جدولی حل ائتمگه باشلایین. بیر شئی تاپانماسیز گؤزلریزی یومون و عددلری بؤیوكدن كیچیگه سایماغا باشلایین. بوجور :100 , 99, 98, 97 و . . . و بیر لحظه گؤره‌جكسیز كی غضب یادیزدان چیخیب. | ||
یوسون آدیندا بیر غذا
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
اون ایل اولار كی عالیملر دریا یوسونلارین (جؤلبكلرین) اهمیّتینی بیلیبلر و بو یوسونلارین ایچینده «chlorella» یوسونونون اهمیّتی هامیسیندان چوخدور كی بیر اعلا غذایی ماده كیمی تانینیب. حقیقتده اونلاری بیر كامیل غذایی ماده كیمی تانیماق اولار چونكی اوندا كلوروفیل, B ویتامینی, Cویتامینی, E ویتامینی, بتاكاروتن, آمینه اسید, منیزیوم, دمیر, معدنی ماده‌لر, كربوهیدرات و چوخلی پروتئین (50 درصددن چوخ) اولور. هابئله بدنده اولان زهرلرله قاریشیب و اونلاری ائشیگه هیدایت ائلر. یوخاری پروتئینینه گؤره بیتكی‌یئینلر اوچون موناسیب سئچیمدیر. «chlorella» یوسونونون موهوم خاصیّتی بدنین زهرین آلماقدیر. بعضی آراشدیرمالار گؤرسدیر كی بو یوسون آغیر فیلیزلری بدندن دفع ائدر و باعیث اولار بدنین بافتلاری آز صدمه گؤرسون. بو قابیلیّتین اهمیتی اوردا بیلینیر كی آغیر فیلیزلر هله-هله بافتلاردان آیریلمازلار و بونا گؤره خاص صنایعده ایشله‌ینلر اوچون و یا تشعشوعات معرضینده اولانلار اوچون یوخاری اهمیتی وار. آیری طرفدن دریالارین چیركلنمه نتیجه‌سینده بعضی بالیقلارین بدنی جیوه‌یه آلوده اولور و آراشدیرمالار نیشان وئریرلر كی سرطانی سلوللارین چوخوندا جیوه اولور. آلزایمر ناخوشلوغو و عاغیل ایتیرمه داها چوخ آغیر فیلیزلردن مسموم اولان شخصلرده گؤروشور. «chlorella» یوسونو, قانی تمیزلر و قان جریانیندا اوكسیژنی سهمانا سالار. اونون مصرفی ایله بدن قلیایی اولار و اسیدوز حالتی (قان و بافتلاردا PH-ین آزالماسی) آرادان گئدر. بونلاردان علاوه قان فیشاری, آغری و ایلتهابی آزالدار و بدنین مودافیعه سیستمینی گوجلندیرر. | ||
