سرنگ و ایینه ایله وداعلاشین / نانو یاپیشقان یولدادیر
یازار : میرزه عبدالصمد ملکی | بؤلوم : ساغلاملیق
+0 به یه ن
 | ||
استرالیالی محققلر واکسیناسیوندا ایینه‌نین یئرینی توتا بیلن نانو یاپیشقان دوزلدیبلر. بو یاپیشقان آغریسیز اولاراق داوا ترکیبینی و یا واکسنی بدنه تزریق ائلیر. کویینزلند دانشگاهیندا جناب مارک کندال بو طرحین اوستونده ایشله‌ییر کی بو یولونان 160 ایللیک عمرو اولان ایینه و سرنگین ایشینی باشا وئرمک اولار. بو نانو یاپیشقان فعال اچ یون آدلی یول ایله دوزلیب کی یونلار الکتریکی میداندا اوتوروب اونو تغییر وئریرلر. الکتریکی میدانی‌نین اولماسینا گؤره یونلاری چوخ یوخاری دقّت ایله کنترل ائله‌مک اولار. بو یولون راحاتلیقلاریندان بونو سایماق اولار کی بو یول بوندان اوّل گونش باطری‌لاریندا ایشلنمیشدی و ساده‌لیکله انبوه تولیده چاتدیرماق اولار. غیر مسلح گؤزله نانو یاپیشقانین اوستونده‌کی میکرو ایینه‌لری گؤرمک اولماز. اونونلا بئله اونلارین اوزونلوغو دری‌یه باتاجاق قدر اولار. بو میکرو ایینه‌لر حفاظتی نقشلری اولان دری سلول‌لارین اؤلو بؤلومونه نفوذ ائلیرلر. اؤلو لایه‌دن کئچندن سونرا دری‌نین دیری بؤلومنه چاتیرلار کی واکسنین ایشینده مهم رولو اولان بدنین ایمنی سلول‌لاری یئرلشیر. بو تیم گؤرستدیلر کی بو یول ایله میکرو ایینه‌لرین سطحینی واکسن موادی ایله اؤرتمک اولار کی بئله‌لیکله واکسن چوخ آشاغی دوزلا بدنه وارد اولار. دونیا جمعیتی‌نین یوزده اونو آمپولدان قورخورلار و دونیا سلامت سازمانین وئردیگی آمارا گؤره ایلده 3.1 میلیون نفر آمپول آلوده‌لیگی تأثیرینده جانلارینی الدن وئریرلر. بو تکنولوژی‌نین آیری بیر مزیتی‌ده وار: بو یول یئرینده اوتورورسا واکسنلری ساخلاماغا داها یخچال لازم اولمایاجاق و اونلاری قورو شکلینده ساخلاماق کفایت ائله‌یه‌جک. | ||
تبریزلی محققلر ضد سرطان ماکارونی دوزلتدیلر
یازار : میرزه عبدالصمد ملکی | بؤلوم : ساغلاملیق
+0 به یه ن
| ||
تبریزین علوم پزشکی دانشکده‌سی‌نین محققلری پری بیوتیک ماکارونی دوزلتمکله بؤیوک باغیرساق سرطانی‌نین قاباغین آلماغا تأثیرلی اقداما ال ووردولار. امیر امینی غذایی علملر ارشد ایش بیلنی مهر آژانسینا دئدی: بیز داوا خاصیّتی اولان یئمه‌لی ماکارونی دوزلتمیشیک کی یوکسک فایدالی غذالاردان ساییلیر. او اؤلکه‌میزده غیرمناسب تغذیه‌یه گؤره بؤیوک سرطان مبتلالارین یاشی‌نین آشاغی یئنمه‌سینه اشاره ائله‌مکله آرتیردی: بو ماکارونی‌نی یئمک شخصین ساغلاملیغینی آرتیرار و کلون سرطانی‌نین قاباغینی آلار. حقیقتده بو محصولون کؤمگی ایله کلون یا بؤیوک باغیرساق سرطانی‌نین ابتلا احتمالی آزالاجاق. او پرو بیوتیک و پری بیوتیکلرین فرقلرینه اشاره ائله‌ییب دئدی: پروبیوتیکلر، بؤیوک باغیرساغین دیوارلاریندا روشد ائله‌ین دیری میکرو اورگانیزملردیلر. آما پری بیوتیکلر، پرو بیوتیکلرین غذاسی ساییلیرلار. یعنی پروبیوتیکلر پری بیوتیکلریدن تغذیه ائله‌ییب اؤز ساغلاملیق تأثیرلرینی بدنه قویورلار. امینی، پروبیوتیک‌لی یا پری بیوتیک‌لی غذالارین فایدالی اولدوقلارین دئمکله آرتیردی: پری بیوتیک داها آرتیق فایدالی‌دیلار. چونکی بدنین اؤزونده آز سایدا پروبیوتیک وار و اونلاری پری‌بیوتیک ایله تغذیه ائله‌مکله سایلاری آرتار. بو محقق بونا اشاره ائله‌مکله کی بو اختراع ایندی تجاری اولماق عرفه‌سینده‌دیر آرتیردی: بو محصولون خارجی و داخلی نمونه‌سی و تایی یوخدور. او تأکید ائله‌دی: بو ماکارونی اولیه نمونه کیمی تولید اولوب و انبوه تولید اوچون حمایته احتیاجی وار. | ||
شیرین نوشابه‌لرین ایچمه‌سی قارین یاغلارینی چوخالدیر
یازار : میرزه عبدالصمد ملکی | بؤلوم : ساغلاملیق
+0 به یه ن
شیرین نوشابه‌لرین ایچمه‌سی قارین یاغلارینی چوخالدیر
تازا بیر تحقیقده، شیرین نوشابه‌لرین ایچمه‌سی‌نین بدنین مخصوصاً قارین دؤره‌سی‌نین یاغی‌نین چوخالماسینا سبب اولماسی بللی اولوب.
قارین دؤره‌سینده‌کی یاغلارین چوخالماسی دیابت و اورک دامار ناخوشلوقلاری‌نین اساس سببلریندن ساییلیر. آمریکانین قلب انجمنی تازا بیر تحقیقده اورتا یاشلی انسانلاردا، شیرین نوشابه ایچمگین قارین ناحیه‌سینده یاغلانماغا مستقیم تأثیرلی اولدوغونو اورتایا چیخاردیب.
قارین ناحیه‌سی‌نین یاغلاری قارا جیگر، لوزالمعده و باغیرساقلار کیمی داخلی ارگانلارین اطرافینی توتور. بو یاغ شخصین هورمونلاری‌نین ایشله‌مه‌سینه تأثیر قویور و بونا گؤره ده ایکینجی نوع دیابت و اورک دامار ناخوشلوقلارینی تقویتچیسی ساییلان انسولین مقاومتینده مهم رولو اولور.
بو محققلرین دئدیگینه اساساً انسانلار قندلی و شیرین نوشابه‌لرین ایچمه‌سینده احتیاطلی اولمالیدیلار.
آنفولانزانین قاباغینی آلماق اوچون شخصی بهداشتی رعایت ائله‌مک لازمدی
یازار : میرزه عبدالصمد ملکی | بؤلوم : ساغلاملیق
+0 به یه ن
آنفولانزانین قاباغینی آلماق اوچون شخصی بهداشتی رعایت ائله‌مک لازمدی
شرقی آذربایجانین بهداشت مرکزی‌نین رییسی آنفولانزانین اوستانیمیزدا یاییلما احتمالی‌نین اولدوغونا اشاره ائله‌مکله دئدی: بهداشت اصولونو رعایت ائله‌مکله بو ناخوشلوق مهار اولا بیلر.
دکتر تبریزی آرتیردی: جماعتین دقّتی اولسون کی واکسنی آلاندان سونرا کی یخچالدان چیخاردیلدی یاریم ساعت ایچینده حتماً تزریق اولمالیدی.
او، کرمان و سیستان بلوچستاندا اولون تلفاتا اشاره ائله‌ییب دئدی: احتمالی وار بو ناخوشلوق ایکی اوچ هفته‌دن سونرا شرقی آذربایجانا چاتا و جماعت مواظب اولمالیدی. او، ناخوشلوغون یاییلماسی‌نین قاباغینی آلماق اوچون بو ایشلری گؤرمگی لازم بیلدی:
1. ناخوش انساندان بیر متر فاصله‌لی اولماق واجبدیر.
2 . اللری تئز تئز صابونلا یوماق واجبدیر.
3 . گؤروشلرده ال وئرمک و اؤپوشمکدن چکینمک واجبدیر.
4 . ناخوش شخصین، شخصی وساییلی و لیوان بوشقابی آیری ساخلانمالیدیر.
دکتر تبریزی آنفولانزا علامتلری‌نین سویوق دَیمه کیمی اولدوغونو بیلدیردی: بدنین هر یئری‌نین آغریماسی، اورک بولانما ایله بیرلیکده اولان باش آغریسی، استفراغ، اسهال مخصوصاً اوشاقلاردا و 38 درجه‌دن یوخاری اولان تب.
ناخوشلایان شخص دکتره گئدندن ایکی هفته سونرا توختاماسا حتماً درمان مرکزلرینه یولوخمالیدیر.
اوشاقلاردا قولاق آغریسی
یازار : میرزه عبدالصمد ملکی | بؤلوم : ساغلاملیق
+0 به یه ن
اوشاقلاردا قولاق آغریسی
آغلاییر، قرارسیزدیر، راحت یاتا بیلمیر، اشتهاسیزلاییب و بیر هئی بهانه ائلیر . . . دردینی دیله گتیره بیلمه‌ین اوشاقلاردا بو علامتلری گؤرمک هر آتا- آنانی نگران ائلر. مخصوصاً ایکی یاشدان آشاغی اوشاقلاردا کی والدین، آغلاماقلارینی آغری علامتی کیمی و ناخوشلوق علامتی کیمی باخمازلار.
اوشاقلارین قرارسیزلیغی، مخصوصاً سویوق دَیمیش اوشاقلاردا اکثراً قولاق آغریسی اولور، اورتا قولاغین التهابیندان عمله گلن قولاق آغریسی.
آما اوشاقلاردا قولاق آغریسی‌نین عامل‌لری نه‌لردیر؟
کؤرپه‌لرده و سوت اَمَر اوشاقلاردا قرارسیزلیق و آغلاماق، اگر تب و بورون توتولما ایله بیر اولسا چوخ احتمالا قولاق آغریسی سببی اولا بیلر.
اوشاقلارین قولاغی آغری‌یاندا معمولاً قولاقلارینا ال وورارلار. آما دقت ائله‌مک لازمدیر کی ساییلان علامتلرین اولمادیغی تقدیرده اوشاغین قولاغینا ال وورماسی، قولاق آغریسی علامتی ساییلا بیلمز. اوشاقلاری قولاق آغریسی اولاندا معمولاً گئجه‌لر آغریدان آییلارلار چونکی قولاق شیشی اوزانمیش حالدا چوخالار.
بو نوع عفونتده ویروسلار و باکتری‌لر؛ بورون، بوغاز و استاش لوله‌سی (اورتا قولاق استاش لوله‌سی طریقی ایله بوغازا و بورونا یول تاپیر) واسطه‌سی ایله اورتاق قولاغی آلوده ائلیرلر.
ائشیک قولاغین التهابی، دیش، بوغاز، لوزه‌لر، دیل و سینوسلارین چیرکی‌ده قولاق آغریسینا سبب اولا بیلر.
قولاق چیرکی معمولاً بیردن بیره اورتا قولاقدان باشلار و مدتی‌ده آز اولار. بعضی اوشاقلاردا قولاق آغریسیندان علاوه، قولاق توتولماسی و آز ائشیتمه عارضه‌سی‌ده اولار. بعضاً ده اورتا قولاغین شدّتلی چیرکی ایله عین زماندا قولاق پرده‌سی ییرتیلار و ایچینده‌کی مایعلر قولاق کانالینا تؤکولر. بو زمان، قولاق آغریسی آزالار آما قولاق توتولماسی عارضه‌سی شدّتلَنَر. والدین‌ده معمولاً اونا دقّت یئتیرمزلر.
متخصصلرین دئدیگینه اساساً، قولاق پرده‌سی‌نین ییرتیلماسی، مننژیت، بئیین آبسه‌لری، اوز عصبی‌نین فلج اولماسی، قان عفونتی، داخلی قولاغین عفونتی و کارلیق، اورتا قولاغین عفونتیندن عمله گله بیلن عارضه‌لردندیلر.
واختیندان تئز دوغان اوشاقلار و اینک سوتو ایله تغذیه اولان اوشاقلار، داها چوخ اورتا قولاق عفونتینه مبتلا اولارلار.
آیری طرفدن، بهداشت و تغذیه فقری، اوشاغین چوخلوغو، یاشاییشا کفایت قدر فضانین اولماماسی، یاخینلارین سیگار چکمه‌سی، بدنین ایمنیسی‌نین ضعیفلیگی، مدرسه و اوشاق باخچاسی کیمی باغلی یئرلرده قالماق، سویوق هوا و سویوق دَیمیش انسانلارلا تماسدا اولماق و عمومیتده بدنین دفاع سیستمینی ضعیفله‌دن هر عامل اورتا قولاق عفونتینه سبب اولا بیلر. هابئله لوزه‌لرین بؤیوکلویو و تئز- تئز عفونت ائله‌مگی و تنفّسی عفونتلر ده، احتمالی چوخالدار.