نهج البلاغه مكتوبلار 10
یازار : میرزه عبدالصمد ملکی | بؤلوم : دین
+0 به یه ن
نهج البلاغه مكتوبلار 10
10-جو مكتوب
بو دا، امام علی علیه السلامین معاویه‌یه مكتوبلارینداندیر (كی، امام علیه السلام اوندا معاویه‌نین چیركین عمللرینی مذمّت ائدیر، اونا اؤیود- نصیحت وئریر و اونو ایشلری‌نین پیس نتیجه‌سی ایله قورخودور):
اؤزونو (دنیا پرستلر اوچون) بزه‌یه‌رك گؤزل گؤسترن و لذتلری ایله آلدادان یاشادیغین دنیانین پرده‌لری سندن (گؤزون اؤنوندن) گؤتورولن زمان نه ائده‌جكسن؟ (دنیا) سنی (اؤز دوستلوغونا) دعوت ائدیب، (سن ده) قبول ائتمیسن؛ قاباغینا دوشوب دالینجا گئتمیسن؛ سنه امر ائدیب اطاعت ائتمیسن. (اؤلوم، عذاب و گناهلارین جزاسی ایله نه ائده‌جكسن؟) قارشینی آلاجاق بیریسی‌نین سنی ساخلاماسی (اونون گله‌جگی زمان) یاخیندیر. (اؤلوم گلیب چاتیب سنی) او شئیدن (عذاب و جزادان) خبردار ائده‌جك كی، هئچ بیر نجات وئرن سنی خلاص ائده بیلمه‌یه‌جك. بونا گؤره ده (بو چتین كئچیدلری نظره آلاراق نفسی ایستكلره تابع اولماییب) بو ایشدن (لایق اولمادیغین خلافت ادعاسیندان) ال چك و اؤزونو حساب و سورغو گونونه حاضرلا. سنه چاتاجاق شئی (اؤلوم و اوندان سونراكی چتینلیكلر) اوچون قولونو چیرما (چئویك اول، چالیش). قولاغینا (عمرو ابن عاص و مروان كیمی) آزغینلاری دینله‌مك امكانی وئرمه (اونلارین سؤزلرینه قولاق آسما و گؤستریشلرینه تابع اولما). اگر بئله ائتمه‌سن (بو اؤیود- نصیحتی قبول ائتمه‌سن)، سنی اؤزون باره‌نده غافل اولدوغون شئیدن خبردار ائدیرم: سن ناز- نعمت ایچریسینده غرق اولموسان، (نعمت سنی عصیانكار ائدیب و بونا گؤره ده) شیطان سنده (سنین قلبینده) یئر توتوب و اؤز آرزوسونا چاتیب، سنین (وجودوندا) جان و قان كیمی حركت ائدیب. (سنه ائله حاكم اولوب كی، ائتدیگین هر بیر ایش، دئدیگین هر بیر سؤز اونون گؤستریشی ایله‌دیر. امام علیه السلام بوندان سونرا اونو مذمّت ائده‌رك بویورور: )
ای معاویه، سیز (امیّه اؤلادلاری) هئچ بیر خیر و یاخشیلیق افتخارینا، محترملیك و شرفه مالك اولمادان نه واختدان رعیته حاكملیك و مسلمانلارا باشچیلیق لیاقتینه صاحب اولموسوز؟! (بوندان قاباق هئچ بیر ایشده فضیلت و اوستونلوگون اولماییب كی، سنین خلافت و امیرلیك ادعاسی ائتمگینه سبب اولسون.) (انسانی شیطانین و نفسی ایستكلرین دوامچیسی ائدن) بدبختلیك تاریخچه‌لری‌نین برقرار اولماسیندان الله‌ـا پناه آپاریرام! سنی همیشه آرزولارا آلدانماقدان و ظاهرینله باطنینین ایكی جور اولماسیندان چكیندیریرم. (دنیاپرستلیك، منافقلیك و ایكی اوزلولوكدن قورخ. سونرا اونو جنگ ایله هده له‌یه‌رك بویورور:)
منی دؤیوشه چاغیرمیسان. ائله ایسه جماعتی بیر طرفه قویاراق اؤزون منیم یانیما گل. هر ایكی قوشونو دؤیوشدن ساخلا كی، گناهین، بیزلردن هانسی‌نین قلبینه غلبه چالماسی، پرده‌نین (غفلت پرده‌سی‌نین) كیمین گؤزو اؤنوندن آسیلماسی معلوم اولسون. (جماعتی اؤز حاللارینا قوی كی، كیمین الله یولوندا قیلینج چالماسی، حق یولدا دایانماسی و قاچماماسی بیلینسین.) من ابو الحسنم، سنین بابانی (جیگر یئیَن آنان هندین آتاسی عتبة ابن ربیعه‌نی)، دایینی (ولید ابن عتبة‌نی) و قارداشینی (حنظله ابن ابو سفیانی) اؤلدورن! من اونلاری بدر ساواشیندا محو ائتدیم. همین قیلینج (ایندی ده) منده‌دیر. همین اوركله دوشمنیمله اوز- اوزه گلیرم. باشقا دین سئچمه‌میش، یئنی پیغمبر گؤتورمه‌میشم. (اسلامین حكملری‌نین هئچ بیری‌نین عكسینه حركت ائتمیرم.) من بیر یولدایام كی، سیز اؤز اختیاریزلا اونو ترك ائتدیز و اونا مجبوریت اوزوندن داخل اولموشدوز.
بئله گمان ائدیرسن كی، (مندن) عثمانین انتقامینی آلماغا گلمیسن؟! حال‌بوكی عثمانین هارادا اؤلدورولمه‌سینی (و اونو كیملرین قتله یئتیرمه‌لرینی مندن یاخشی) بیلیرسن. اگر (دوغرودان دا) انتقام آلماق ایسته‌ییرسنسه، اورادان (اونو اؤلدورموش طلحه‌دن، زبیردن و دیگرلریندن) انتقام آل. سنی سانكی (اونون انتقامینی بهانه ائدن، اصلینده ایسه) جنگدن، دوه‌لرین یوكون آغیرلیغیندان قوپاردیقلاری فریادلاری كیمی فریاد ائدیب شیون قوپاران گؤرورم، قورخورسان كی، (او،) دیشلرینی سنه باتیرسین (سنه اوز توتسون). سانكی سنین قوشونونو گؤرورم كی، آلدیقلاری آردیجیل ضربه‌‌لر، باش وئره‌جك چتین حادثه‌‌لر و بیر- بیری‌نین آردینجا تورپاغا دوشمه‌لری نتیجه‌سینده چاره‌سیزلیكدن منی الله‌ین كتابینا دعوت ائدیرلر (كی، جنگدن ال گؤتوروم).
همین قوشون حقّه كافر و اونو انكار ائدنلردیر (كی، منه بیعت ائتمه‌ییبلر)، و یا بیعت ائدیب (سونرا اوندان) ال گؤتوروبلر. (عراق منافقلری او حضرته بیعت ائدندن سونرا عهدلرینی پوزاراق شاما، معاویه‌نین یانینا گئتمیشدیلر.)
و من كتاب له علیه السلام إلیه أیضا
وَ كَیْفَ أَنْتَ صَانِعٌ إِذَا تَكَشَّفَتْ عَنْكَ جَلَابِیبُ مَا أَنْتَ فِیهِ مِنْ دُنْیَا قَدْ تَبَهَّجَتْ بِزِینَتِهَا وَ خَدَعَتْ بِلَذَّتِهَا دَعَتْكَ فَأَجَبْتَهَا وَ قَادَتْكَ فَأَتْبَعْتَهَا وَ أَمَرَتْكَ فَأَطَعْتَهَا وَ إِنَّهُ یُوشِكُ أَنْ یَقِفَكَ وَاقِفٌ عَلَى مَا لَا یُنْجِیكَ مِنْهُ مُنْجٍ فَاقْعَسْ عَنْ هَذَا الْأَمْرِ وَ خُذْ أُهْبَةَ الْحِسَابِ وَ شَمِّرْ لِمَا قَدْ نَزَلَ بِكَ وَ لَا تُمَكِّنِ الْغُوَاةَ مِنْ سَمْعِكَ وَ إِلَّا تَفْعَلْ أُعْلِمْكَ مَا أَغْفَلْتَ مِنْ نَفْسِكَ فَإِنَّكَ مُتْرَفٌ قَدْ أَخَذَ الشَّیْطَانُ مِنْكَ مَأْخَذَهُ وَ بَلَغَ فِیكَ أَمَلَهُ وَ جَرَى مِنْكَ مَجْرَى الرُّوحِ وَ الدَّمِ (وَ مَتَى كُنْتُمْ یَا مُعَاوِیَةُ سَاسَةَ الرَّعِیَّةِ وَ وُلَاةَ أَمْرِ الْأُمَّةِ بِغَیْرِ قَدَمٍ سَابِقٍ وَ لَا شَرَفٍ بَاسِقٍ وَ نَعُوذُ بِاللَّهِ مِنْ لُزُومِ سَوَابِقِ الشَّقَاءِ وَ أُحَذِّرُكَ أَنْ تَكُونَ) مُتَمَادِیاً فِی غِرَّةِ الْأُمْنِیِّةِ مُخْتَلِفَ الْعَلَانِیَةِ وَ السَّرِیرَةِ وَ قَدْ دَعَوْتَ إِلَى الْحَرْبِ فَدَعِ النَّاسَ جَانِباً وَ اخْرُجْ إِلَیَّ وَ أَعْفِ الْفَرِیقَیْنِ مِنَ الْقِتَالِ لِیُعْلَمَ أَیُّنَا الْمَرِینُ عَلَى قَلْبِهِ وَ الْمُغَطَّى عَلَى بَصَرِهِ فَأَنَا أَبُو حَسَنٍ قَاتِلُ جَدِّكَ وَ خَالِكَ وَ أَخِیكَ شَدْخاً یَوْمَ بَدْرٍ وَ ذَلِكَ السَّیْفُ مَعِی وَ بِذَلِكَ الْقَلْبِ أَلْقَى عَدُوِّی مَا اسْتَبْدَلْتُ دِیناً وَ لَا اسْتَحْدَثْتُ نَبِیّاً وَ إِنِّی لَعَلَى الْمِنْهَاجِ الَّذِی تَرَكْتُمُوهُ طَائِعِینَ وَ دَخَلْتُمْ فِیهِ مُكْرَهِینَ وَ زَعَمْتَ أَنَّكَ جِئْتَ ثَائِراً بِعُثْمَانَ وَ لَقَدْ عَلِمْتَ حَیْثُ وَقَعَ دَمُ عُثْمَانَ فَاطْلُبْهُ مِنْ هُنَاكَ إِنْ كُنْتَ طَالِباً فَكَأَنِّی قَدْ رَأَیْتُكَ تَضِجُّ مِنَ الْحَرْبِ إِذَا عَضَّتْكَ ضَجِیجَ الْجِمَالِ بِالْأَثْقَالِ وَ كَأَنِّی بِجَمَاعَتِكَ تَدْعُونِی- جَزَعاً مِنَ الضَّرْبِ الْمُتَتَابِعِ وَ الْقَضَاءِ الْوَاقِعِ وَ مَصَارِعَ بَعْدَ مَصَارِعَ- إِلَى كِتَابِ اللَّهِ وَ هِیَ كَافِرَةٌ جَاحِدَةٌ أَوْ مُبَایِعَةٌ حَائِدَةٌ
نهج البلاغه مكتوبلار 9
یازار : میرزه عبدالصمد ملکی | بؤلوم : دین
+0 به یه ن
نهج البلاغه مكتوبلار 9
9-جو مكتوب
امام علی علیه السلامین معاویه‌یه مكتوبلارینداندیر. (معاویه او حضرته مكتوب گؤندره‌رك اوندان عثمانین قاتللرینی اونا تحویل وئرمگیی ایسته‌میشدی. امام علیه السلام بو مكتوبو اونا جواب اولاراق یازیب و اورادا اؤز فضیلت و كرامتلرینی، هابئله اسلام و ایماندا اؤنجول اولماسینی خاطرلاداراق بویورور:)
بئله‌لیكله، قبیله‌میز (قریش) پیغمبریمیزی اؤلدورمك و بیزیم كؤكوموزو كسمك (محو ائتمك) ایسته‌دی. بیزیم اوچون غم- غصّه یاراتدیلار، باره‌میزده نالایق ایشلره ال آتدیلار و بیزی (حیاتین) آسایش و شیرینلیگیندن محروم ائتدیلر. قورخو و واهمه‌نی آنجاق بیزه عاید ائتدیلر و بیزی مجبوری اولاراق سرت داغا (اوتسوز، سوسوز شعب ابو طالبه) گئتمگه وادار ائتدیلر (و اورادا بیزی محاصره‌‌یه آلدیلار؛ بوتون بونلار حضرت پیغمبرین ایلاهی رسول كیمی گؤندریلمه‌سی‌نین یئددینجی ایلینین اوّلینده باش وئردی) و بیزه قارشی جنگ آلووو قیزیشدیردیلار. بیز الله‌ین ایستگی ایله دوشمنین شرّینی اونون پیغمبریندن اوزاقلاشدیردیق. (او حضرته بیر خسارت دیَمه‌یه قویمادیق.) بیزیم (پیغمبره ایمان گتیرمیش ابو طالب و حمزه كیمی) مؤمنلریمیز پیغمبری حمایه ائتمگین اجرینی (الله‌ین راضیلیغینی) دیله‌ییر، (عباس و مطعم ابن عدی كیمی اسلامی قبول ائتمه‌میش) كافرلریمیز (ایسه او حضرتله) قوهوملوقلارینا گؤره (اونو) حمایه ائدیر و یاردیم گؤستریردیلر. (بیز بنی هاشمدن باشقا) قریشدن مسلمان اولان دیگر كیمسه‌لرین بیزیم قدر (كافر و مشركلردن) قورخو و واهمه‌لری یوخ ایدی. سبب اونلارین (مشركلرله) آند و پیمانلاری‌نین اولماسی، یا دا (اونلارلا) قوهوم اولمالاری ایدی. (بو سببلر) اونو قورخو و واهمه‌دن ساخلاییردی و او، اؤلدورولمكدن (اؤلوم خطریندن) آماندا اولوردو.
(الله مشركلرله جنگ و اونلارین شرلری‌نین اوزاقلاشدیریلماسینی امر ائدنده و) ساواش، جماعتین (قورخو و واهمه‌دن) گئری چكیلمه‌لری حدّینه قدر چتینلشنده، حضرت پیغمبر (صل الله علیه و آله) اؤز اهل بیتینی قاباغا وئریر و اونلارین واسطه‌‌سی ایله صحابه‌لری و قوشونونو نیزه و شمشیرلرین (یاراداجاغی یارالارین) ایستی‌لیگیندن قورویوردو. (او حضرتین عمیسی اوغلو) عبیدة ابن حارث (ابن عبدالمطلب) بدر غزوه‌‌سینده (بدر مكّه یولوندا، مدینه یاخینلیغیندا قازیلمیش قویونون آدیدیر)، (او حضرتین عمیسی) حمزه اُحُد غزوه‌‌سینده (احد مدینه یاخینلیغینداكی بیر داغین آدیدیر) و (قارداشیم) جعفر مؤته ساواشیندا (مؤته شام اطرافیندا یئر آدیدیر) اؤلدورولدو. ایسته‌مه‌دیگیم اوچون آدینی چكمه‌دیگیم كیمسه ده (امام علیه السلام)، اونلار كیمی اؤلدورولمگی و (الله یولوندا) شهید ائدیلمگی ایسته‌ییردی. (منیم ده شهید اولماق و اؤلدورولمك آرزوم وار ایدی.) لاكن اونلارین عمرلری داها تئز سونا چاتدی و آدینی چكمه‌دیگیم شخصین اؤلومو تأخیره دوشدو. (پیغمبر منه خبر وئردی كی، سن ده اؤلدوروله‌جكسن. امام یوز اللی بئشینجی كلامدا بو مطلبه اشاره ائدیب.) ایندی (حضرت پیغمبری قوروماق و اسلام دینینی یایماق اوچون چكدیگیم بو قدر اذیت و چتینلیكلردن سونرا) روزگارا تعجب ائدیرم كی، ائله بیر زمانا گلیب چیخمیشام كی، دینین یاردیمی اوچون منیم كیمی چالیشمامیش و اسلامدا منیم (الله‌ـا و پیغمبره ایمان گتیرمكده) مالك اولدوغوم بیرینجیلیك و اؤنجوللوك افتخاریما مالك اولمایان بیریسی منیمله برابر حساب ائدیلیر. هئچ كس بئله بیر افتخار الده ائده بیلمز. آنجاق ادعا ائدن (معاویه) ادعا ائده‌رك (اؤزو باره‌سینده) منیم بیلمه‌دیگیم و الله‌ین دا تانیماسینی گمان ائتمه‌دیگیم بئله بیر شئی دئییر. (چونكی الله‌ـا و پیغمبره ایلك ایمان افتخاری مندن باشقاسینا نصیب اولماییب كی، الله دا اونو تانیسین.) هر حالدا حمد ثنا الله‌ـا مخصوصدور (كی، مصلحت بیلیب سنین كیمیسینی منیم قارشیمدا قویوب، سن ده حق و حقیقته ضد نالایق شئیلر ادعا ائدیرسن).
آمّا عثمانین قاتللرینی سنه گؤندرمكله باغلی ایستگین باره‌سینده: من بو باره‌ده فكرلشدیم و گؤردوم كی، اونلاری سنه و سندن باشقاسینا گؤندرمك منیم عهده‌مدن خارجدیر.
(امام سونرا معاویه‌نی هده له‌یه‌رك بویورور:) جانیما آند اولسون، اگر آزغینلیق و دوشمنچیلیكدن ال چكمه‌سن، تئزلیكله سنی آختارانلاری تانییاجاقسان كی، اونلار بو آختاریشلاریندا سنی صحرادا، دنیزده، داغدا و دوزنلیكده زحمته سالمایاجاقلار (بیرباشا سنین سراغینا گله‌جكلر). آمّا بو آختاریش سنی اینجیده‌رك غملندیره‌جك و بو زیارتچیلرله گؤروشمك و اونلاری گؤرمك سنی سئویندیرمه‌یه‌جك (سنین سراغینا ائله گله‌جكلر كی، دئیه‌جكسن: ای كاش، من اونلاری طلب ائتمه‌یه‌یدیم). سلاما لایق كیمسه‌یه سلام اولسون!
و من كتاب له علیه السلام إلى معاویة
فَأَرَادَ قَوْمُنَا قَتْلَ نَبِیِّنَا وَ اجْتِیَاحَ أَصْلِنَا وَ هَمُّوا بِنَا الْهُمُومَ وَ فَعَلُوا بِنَا الْأَفَاعِیلَ وَ مَنَعُونَا الْعَذْبَ وَ أَحْلَسُونَا الْخَوْفَ وَ اضْطَرُّونَا إِلَى جَبَلٍ وَعْرٍ وَ أَوْقَدُوا لَنَا نَارَ الْحَرْبِ فَعَزَمَ اللَّهُ لَنَا عَلَى الذَّبِّ عَنْ حَوْزَتِهِ وَ الرَّمْیِ مِنْ وَرَاءِ حُرْمَتِهِ مُؤْمِنُنَا یَبْغِی بِذَلِكَ الْأَجْرَ وَ كَافِرُنَا یُحَامِی عَنِ الْأَصْلِ وَ مَنْ أَسْلَمَ مِنْ قُرَیْشٍ خِلْوٌ مِمَّا نَحْنُ فِیهِ بِحَلْفٍ یَمْنَعُهُ أَوْ عَشِیرَةٍ تَقُومُ دُونَهُ فَهُوَ مِنَ الْقَتْلِ بِمَكَانِ أَمْنٍ وَ كَانَ رَسُولُ اللَّهِ صلى الله علیه واله إِذَا احْمَرَّ الْبَأْسُ وَ أَحْجَمَ النَّاسُ قَدَّمَ أَهْلَ بَیْتِهِ فَوَقَى بِهِمْ أَصْحَابَهُ حَرَّ السُّیُوفِ وَ الْأَسِنَّةِ فَقُتِلَ عُبَیْدَةُ بْنُ الْحَارِثِ یَوْمَ بَدْرٍ وَ قُتِلَ حَمْزَةُ یَوْمَ أُحُدٍ وَ قُتِلَ جَعْفَرٌ یَوْمَ مُؤْتَةَ وَ أَرَادَ مَنْ لَوْ شِئْتُ ذَكَرْتُ اسْمَهُ مِثْلَ الَّذِی أَرَادُوا مِنَ الشَّهَادَةِ وَ لَكِنْ آَجَالُهُمْ عُجِّلَتْ وَ مَنِیَّتُهُ أُخِّرَتْ فَیَا عَجَباً لِلدَّهْرِ إِذْ صِرْتُ یُقْرَنُ بِی مَنْ لَمْ یَسْعَ بِقَدَمِی وَ لَمْ تَكُنْ لَهُ كَسَابِقَتِی الَّتِی لَا یُدْلِی أَحَدٌ بِمِثْلِهَا إِلَّا أَنْ یَدَّعِیَ مُدَّعٍ مَا لَا أَعْرِفُهُ وَ لَا أَظُنُّ اللَّهَ یَعْرِفُهُ وَ الْحَمْدُ لِلَّهِ عَلَى كُلِّ حَالٍ وَ أَمَّا مَا سَأَلْتَ مِنْ دَفْعِ قَتَلَةِ عُثْمَانَ إِلَیْكَ فَإِنِّی نَظَرْتُ فِی هَذَا الْأَمْرِ فَلَمْ أَرَهُ یَسَعُنِی دَفْعُهُمْ إِلَیْكَ وَ لَا إِلَى غَیْرِكَ وَ لَعَمْرِی لَئِنْ لَمْ تَنْزِعْ عَنْ غَیِّكَ وَ شِقَاقِكَ لَتَعْرِفَنَّهُمْ عَنْ قَلِیلٍ یَطْلُبُونَكَ لَا یُكَلِّفُونَكَ طَلَبَهُمْ فِی بَرٍّ وَ لَا بَحْرٍ وَ لَا جَبَلٍ وَ لَا سَهْلٍ إِلَّا أَنَّهُ طَلَبٌ یَسُوءُكَ وِجْدَانُهُ وَ زَوْرٌ لَا یَسُرُّكَ لُقْیَانُهُ وَ السَّلَامُ لِأَهْلِهِ
نهج البلاغه مكتوبلار 8
یازار : میرزه عبدالصمد ملکی | بؤلوم : دین
+0 به یه ن
نهج البلاغه مكتوبلار 8
8-جی مكتوب
امام علی علیه السلامین جریر ابن عبدالله بجلّی‌یه، اونو (بیعت آلماق اوچون) معاویه‌نین یانینا (شاما) گؤندرركن یازدیغی مكتوبلارداندیر:
الله‌ـا حمد و حضرت پیغمبره (صل الله علیه و آله) سلامدان سونرا: منیم مكتوبوم سنه چاتان كیمی معاویه‌نی ایشینی سونا چاتدیراراق بیر طرف باره‌سینده قطعی قرارا گلیب حاضرلاشماغا وادار ائت. (سرگردانلیغی اؤزوندن اوزاقلاشدیرسین و سنی یوباتماسین، بیعت ائتمكده بهانه آختاراراق بو گون–صاباح ائتمه‌سین.) سونرا اونا جماعتی مجبوریت و نگرانلیقلا اؤز وطن و آسایش یوردوندان دیدرگین سالان داغیدیجی جنگ ایله خوار ائدیجی صلح و باریشیق آراسیندا آزاد سئچیم ائتمك امكانی وئر. (چونكی باریشیق عاجزلیگین نشانه‌سیدیر. امام علیه السلام بورادا هر ایكی حالدا، ایستر جنگ ائتسه، ایسترسه ده باریشیق ائتسه غلبه‌نین اونونلا اولاجاغینی باشا سالماق ایسته‌ییر و بو سؤزلرله اونو هده له‌ییر.) بئله‌لیكله، اگر جنگی سئچسه، آمان‌نامه‌نی اونا طرف آت و قاییت. آمّا صلح و باریشیغی قبول ائتسه، اوندان بیعت آل. (وظیفه‌‌نی تئزلیكله یئرینه یئتیره‌رك گئری دؤن و بیزی گؤزو یولدا قویما). سلاما لایق كیمسه‌یه سلام اولسون!
و من كتاب له علیه السلام إلى جریر بن عبد الله البجلی لما أرسله إلى معاویة
أَمَّا بَعْدُ فَإِذَا أَتَاكَ كِتَابِی فَاحْمِلْ مُعَاوِیَةَ عَلَى الْفَصْلِ وَ خُذْه بِالْأَمْرِ الْجَزْمِ ثُمَّ خَیِّرْهُ بَیْنَ حَرْبٍ مُجْلِیَةٍ أَوْ سِلْمٍ مُخْزِیَةٍ فَإِنِ اخْتَارَ الْحَرْبَ فَانْبِذْ إِلَیْهِ وَ إِنِ اخْتَارَ السِّلْمَ فَخُذْ بَیْعَتَهُ وَ السَّلَامُ
نهج البلاغه مكتوبلار 7
یازار : میرزه عبدالصمد ملکی | بؤلوم : دین
+0 به یه ن
نهج البلاغه مكتوبلار 7
7-جی مكتوب
بو دا امام علی علیه السلامین معاویه‌یه اولان مكتوبلاریندادیر (كی، اوندا اونو، او حضرته یازدیغی مكتوبا گؤره مذمّت ائدیب و اونون نادانلیق و آزغینلیغینی خاطرلادیب):
الله‌ـا حمد و ثنا و حضرت پیغمبره سلامدان سونرا: سندن منه مختلف سؤزلری بیر- بیرینه یاپیشدیریب مكتوب بزه‌دیگین اؤیود- نصیحت گلیب چاتدی. (بعضی مطلبلر اله گتیره‌رك بو مكتوبدا اونلاری بیر- بیرینه یاپیشدیرمیسان، حال‌بوكی اونلارین بیر- بیری ایله هئچ بیر علاقه‌‌سی یوخدور. اونلارین هر بیری‌نین هارادا و نئجه ایشله‌دیلمه‌سی‌نین گركلیگینی بیلمه‌دیگین اوچون) اؤز آزغینلیغین سببیندن بو مكتوبو حاضرلامیسان و فكر و دوشونجه‌نین پیسلیگیندن اونو (منه) گؤندرمیسن! مكتوب دوز یولا هدایتلندیره‌جك گؤزو (بصیرت و گؤزو آچیقلیغی) و نجات یولونا سوق ائده‌جك باشچیسی و جیلووداری اولمایان كیمسه‌دندیر. نفسی ایستك اونو (بئله بیر ایشه) وادار ائدیب، او دا قبول ائدیب، آزغینلیق اونون رهبری اولوب، او دا اونون دالینجا گئدیب. (بونا گؤره ده) او، ساییقلایاراق بوش-بوغازلیق ائدیب و بیهوده فریاد قوپاریب (معناسی باشا دوشولمه‌ین غلط سؤزلر دئییب)؛ یولونو آزاراق سهو ائدیب (بئله نالایق سؤزلر یازیب).
بو دا همین مكتوبون بیر حصه‌‌سیدیر:
(او حضرته بیعت ائدنلرله بیعت ائتمه‌ینلرین بویونلارینا دوشن وظیفه‌‌لرین برابرلیگی باره‌سینده:)
(ائی معاویه، منیمله بیعت ائتمك و پیمان باغلاماق مسأله‌‌سینده بصره اهالیسی، طلحه، زبیر، سن و شام اهلی‌نین وظیفه‌‌سی یكسان و برابردیر.) چونكی او بیر بیعتدیر كی، (محمّد - صل الله علیه و آله – امّتی‌نین دایاق نقطه‌‌سی سایدیغیز مهاجرلر و انصار توپلاشاراق همین مسأله‌‌ده بیرلشیبلر و اونلارین، باره‌سینده قرارا گلدیكلری هئچ بیر بیعتده) نظر و فكر ایكی اولمور و اوندا (باشقا بیر نظر) سئچمك باشدان باشلانمیر، (نئجه كی، ابو بكر، عمر و عثمان و اونلارلا بیعت باره‌سینده بئله عقیده‌‌ده‌سیز. اودور كی، همین بیعت مجلسینده اولان كس پیمانی پوزاراق باشقاسینی سئچه بیلمز و اورادا اولمایانین اونو قبول ائتمه‌مك حقی یوخدور. بونا گؤره ده) هر كیم پیمانی پوزاراق اوندان ال گؤتورسه، (مسلمانلارین دین و آیینلرینه) طعنه ووراندیر. (ائله ایسه اونونلا چیخدیغی یولا قاییدانا كیمی ووروشماق لازمدیر.) اونون (قبول ائدیلیب-ائدیلمه‌مه‌سی) باره‌سینده فكره دالان دا منافق و ایكی اوزلودور. (چونكی سیزین عقیده و عمل تجربه‌نیزه گؤره همین شخصین رد و یا قبول ائتمك باره‌سینده فكرلشمه‌سی، مؤمنلرین گئتدیكلری یول و اونا تابع اولماغین واجبلیگینده شكّ- شبهه‌ده اولماسی و اونون میلی‌نین صمیمیت و صافلیقلا اولماماسی دئمكدیر. اونا گؤره كی، اگر اونون دوغرودان دا میلی اولموش اولسایدی، فكرلشیب دوروخمادان مؤمنلرین توپلاشاراق باره‌سینده بیرلشدیكلری شئیی قبول ائدردی.)
و من كتاب له علیه السلام إلیه أیضا
أَمَّا بَعْدُ فَقَدْ أَتَتْنِی مِنْكَ مَوْعِظَةٌ مُوَصَّلَةٌ وَ رِسَالَةٌ مُحَبَّرَةٌ نَمَّقْتَهَا بِضَلَالِكَ وَ أَمْضَیْتَهَا بِسُوءِ رَأْیِكَ وَ كِتَابُ امْرِئٍ لَیْسَ لَهُ بَصَرٌ یَهْدِیهِ وَ لَا قَائِدٌ یُرْشِدُهُ قَدْ دَعَاهُ الْهَوَى فَأَجَابَهُ وَ قَادَهُ الضَّلَالُ فَاتَّبَعَهُ فَهَجَرَ لَاغِطاً وَ ضَلَّ خَابِطاً وَ مِنْ هَذَا الْكِتَابِ لِأَنَّهَا بَیْعَةٌ وَاحِدَةٌ لَا یُثَنَّى فِیهَا النَّظَرُ وَ لَا یُسْتَأْنَفُ فِیهَا الْخِیَارُ الْخَارِجُ مِنْهَا طَاعِنٌ وَ الْمُرَوِّی فِیهَا مُدَاهِنٌ
نهج البلاغه مكتوبلار 6
یازار : میرزه عبدالصمد ملکی | بؤلوم : دین
+0 به یه ن
نهج البلاغه مكتوبلار 6
6-جی مكتوب
امام علی علیه السلامین معاویه‌یه اولان مكتوبلارینداندیر (كی، اونو شاما جریر ابن عبدالله بجلّی واسطه‌‌سی ایله گؤندریب و اوندا اؤز خلافتی‌نین حق و دوزگون اولماسینی ثبوت ائده‌رك عثمانی اؤلدورمكدن اوزاق اولدوغونو آچیقلاییب):
ابو بكر، عمر و عثمانلا بیعت ائدنلر (اونلاری خلافته تعیین ائدنلر) همین یوللا منیمله بیعت ائده‌رك عهد- پیمان باغلادیلار (ایشلرین اداره‌سینی منه تاپشیردیلار). اودور كی، (خلافتین الله و پیغمبر طرفیندن تعیین ائدیلمه ایله دئییل، امّتین عمومی نظری ایله برقرار اولماسینا و جماعتین عمومی توافقه گله‌رك ابو بكر، عمر و عثمانی خلیفه تعیین ائتمه‌لرینه عقیده بسله‌ین سیزلر بیلمه‌لیسیز كی، منی ده خلافته همین شخصلر، یعنی، جماعت كوتله‌سی تعیین ائدیب. بونا گؤره ده) اورادا (بیتده) اولانلارین (طلحه و زبیر كیمیلرین) اوندان باشقاسینی سئچمك حقلری یوخدور. اوردا اولمایانین دا (سنین كیمیلرین ده) اونو قبول ائتمه‌مك حقی یوخدور. (سیزین عقیده‌‌نیزه گؤره خلافت مسأله‌‌سینده) مشورت ائله‌مك مهاجرلرین (مكّه‌دن مدینه‌یه گله‌رك حضرت پیغمبره-صل الله علیه و آله- قوشولانلارین) و انصارین (مدینه‌ده حضرت پیغمبره ایمان گتیره‌رك یاردیم ائدنلرین) حقیدیر. اونلار توپلاشاراق بیر نفری خلیفه و امام آدلاندیرسالار، الله‌ین راضیلیغی دا همین ایشده اولار. اگر كیمسه (خلیفه‌ده) عیب و نقصان تاپماسی سببیندن (بهانه‌سی ایله، مثلا، معاویه‌نین عثمانین اؤلدورولمه‌سینی اونا نسبت وئرمه‌سی كیمی) و یا (دینده روا اولمایان شئیی اونا داخل ائتمك طلحه، زبیر و اونلارین طرفدارلاری‌نین عهد- پیمانلارینی پوزمالاری كیمی) بدعت نتیجه‌سینده اونلارین امرلریندن (اونلارین گؤردوكلری ایشلردن) بویون قاچیرسا، اونو اطاعت ائتمگه وادار ائدرلر. اگر (اؤیود- نصیحت فایدا وئرمسه و) اونلارین گؤستریشلرینی قبول ائتمسه، (سیزین عقیده‌‌نیزه گؤره) اونونلا مؤمنلرین یولوندان باشقا بیر یول ایله گئتدیگی اوچون ووروشارلار. الله (دا) اونو اوز توتدوغو شئیین عهده‌سینه بوراخار.
ائی معاویه، جانیما آند اولسون، اگر عاغلینا مراجعت ائتسن (فكره دالیب دوشونسن) و نفسی ایستكلرینه گؤز یومسان، (یئرسیز دانیشماز، عثمانین اؤلدورولمه‌سینی منیمله پیمان باغلاماماغینا بهانه گتیرمزسن) گؤررسن كی، من عثمانین قانیندا (اؤلدورولمه‌سینده) ان تمیز آدام اولموشام؛ بیلرسن كی، من اوندان اوزاقلاشاراق بیر گوشه‌یه چكیلمیشدیم. آمّا سن (نفسی ایستكلره اویاراق) بهتان آتیب اونون اؤلدورولمه‌سینی منه نسبت وئریرسن و سنه معلوم اولان شئیی گیزله‌دیرسن. سلاما لایق كیمسه‌یه سلام اولسون!
و من كتاب له علیه السلام إلى معاویة
إِنَّهُ بَایَعَنِی الْقَوْمُ الَّذِینَ بَایَعُوا أَبَا بَكْرٍ وَ عُمَرَ وَ عُثْمَانَ عَلَى مَا بَایَعُوهُمْ عَلَیْهِ فَلَمْ یَكُنْ لِلشَّاهِدِ أَنْ یَخْتَارَ وَ لَا لِلْغَائِبِ أَنْ یَرُدَّ وَ إِنَّمَا الشُّورَى لِلْمُهَاجِرِینَ وَ الْأَنْصَارِ فَإِنِ اجْتَمَعُوا عَلَى رَجُلٍ وَ سَمَّوْهُ إِمَاماً كَانَ ذَلِكَ لِلَّهِ رِضًا فَإِنْ خَرَجَ عَنْ أَمْرِهِمْ خَارِجٌ بِطَعْنٍ أَوْ بِدْعَةٍ رَدُّوهُ إِلَى مَا خَرَجَ مِنْهُ فَإِنْ أَبَى قَاتَلُوهُ عَلَى اتِّبَاعِهِ غَیْرَ سَبِیلِ الْمُؤْمِنِینَ وَ وَلَّاهُ اللَّهُ مَا تَوَلَّى وَ لَعَمْرِی- یَا مُعَاوِیَةُ- لَئِنْ نَظَرْتَ بِعَقْلِكَ دُونَ هَوَاكَ لَتَجِدَنِّی أَبْرَأَ النَّاسِ مِنْ دَمِ عُثْمَانَ وَ لَتَعْلَمَنَّ أَنِّی كُنْتُ فِی عُزْلَةٍ عَنْهُ إِلَّا أَنْ تَتَجَنَّى فَتَجَنَّ مَا بَدَا لَكَ وَ السَّلَامُ