تبریزین مركزی كیتابخاناسیندا 5 مین داش چاپ كیتابی وار
یازار : میرزه عبدالصمد ملکی | بؤلوم : اجتماعی
+0 به یه ن
شرقی آذربایجانین عمومی كیتابخانالار مودیری تبریزین مركزی كیتابخاناسیندا 3 مین نوسخه ال یازی و 5 مین نوسخه داش چاپ كیتابین اولماسیندان خبروئردی. فارسین تبریزدن وئردیگی معلوماتا گؤره, حسن رضایی دئدی: كیتابخانالار جامیعهلرین فرهنگ و مدنیتلرینین نومادلاری ساییلیر و تبریز كیتابخاناسیدا قدیمی اولدوغو اوچون و مینلر نوسخه دَیرلی و ارزیشلی كیتابی اؤزونده ساخلادیغی اوچون اوستانین و اؤلكهنین فرهنگی ویترینی ساییلیر. او بو كیتابخانانین اؤلكهدهكی یئرینه ایشاره ائدیب دئدی: تبریزین مركزی كیتابخاناسی كیتابخانالارین ایچینده ان غنی و ان بؤیوك كیتابخانادیر. او آرتیردی: بو كیتابخانا 3 میندن آرتیق خطی نوسخه و 5 میندن آرتیق داش چاپ كیتاب و 250 مین نوسخه كیتابلا, منبع و آیری فاكتورلار اساسیندا اؤلكهنین ان مومتاز عمومی كیتابخاناسی ساییلیر. |
ایسلامی عیرفاندا اوروج
یازار : میرزه عبدالصمد ملکی | بؤلوم : دین
+0 به یه ن
اوروجون فلسفهسی ظاهیری اؤتمك و ایلاهی ویصالا چاتماقدیر. عاریفلر قورآنین آیهلریندن ایستیفاده ائدیب بو نتیجهیه یئتیشیرلر كی اوروج بونا گؤره واجیب اولوب كی اینسانی ایلاهی ویصالا چاتدیرسین. ایسلامی عیرفاندا شرعی حؤكمدن باشقا آیری بیر شئی یوخدور آما عاریفلرین اوروجو عادی جماعتدن فرقلی اولور . ایكی دلیله گؤره: بیر بو كی عاریفلرین توتدوقلاری موستحبی اوروجلار, عادی جماعتین توتدوقلاریندان چوخ اولور. ایكینجی دلیلده بودور كی اونلارین اوروجلاری كیفیت جهتیندن فرقلی اولور. مثلاً قورآندا گلیب كی آللاه اوروجو عیبادت كیمی موقرر ائدیب تا جماعت تقوایا ال تاپسین, آما عاریفلر بو حدّه قانع دئییللر. عاریفلر قورآنین آیهلریندن ایستیفاده ائدیب بو نتیجهیه یئتیشیرلر كی اوروج بونا گؤره واجیب اولوب كی اینسانی ایلاهی ویصالا چاتدیرا. بونا گؤره عاریفلر اؤز كیتابلاریندا دئییرلر كی اوروج شریعتده یئییب ایچمكدن چكینمك معناسیندادیر, آما حقیقتده اوروج دونیادان اوز چئویرمك و اونا دیقّت ائتمهمكدیر. یعنی نه اینكی بیز یئییب ایچمكدن واز كئچیریك, بلكه بوتون كائیناتا دا گؤز یوموروق و فقط آللاهی گؤروروك. بونا گؤره دئییردیلر بدنین اوروجو, بدنی یئمكدن ساخلاماقدیر, آما اورگین اوروجو, اورگی شیطان وسوسهلریندن و گوناه باعیث اولان فیكیرلردن اوزاق ساخلاماق معناسینادیر. عاریفلرین اینامینا گؤره اوروج گرك ایستیغراق مرحلهسینه یئتیشدیره. یعنی ایلاهی موشاهیده دریاسینا گیرهله كی اوردا اوروجون اورتاسیندا آللاهی گؤرهلر. بونا گؤره لقاءاللها اینانیردیلار. معنوی اوروج اودور كی اوندا فقط معنویت و تماماً آللاها دیقّت ائلهمك وار. مولانا بویورور عادی اینسان آغزینی باغلیر كی آرتیق غذا یئمهسین, آما عاریفلر آغیزلارین باغلیرلار كی آللاهدان سونرا هئچ نهیی گؤرمهسینلر. عاریفلر وصل دالیسیجاندیلار و بونا گؤره اوروجلوق آیین نه فقط بركت آیی بلكه ایلاهی وصل آیی بیلیرلر. جماعت اوروجلوقدا اوروج توتور كی بیر شئی اله گتیرسین و بیر ثواب آپارسین, آما عاریفلر اوروج توتورلار كی آللاهی اله گتیرسینلر. بوردادیر كی عاریفلرینن آیریلارین فرقی بیلینیر. مولانا گؤزل میثال وورور و
دئییر سیز بیر نفرین قوناقلیغینا گئتسیز, سیزه گتیریلن آشی یئمهسیز و یا آز
یئسیز, ائو صاحیبی معرفت اهلی اولسا سیزه داها یاخشی آش گتیرهجك. مولانا بویورور
اوروجلوقدا, عاریف معمولی غذالاری یئمهیَنده, ایستیر آللاها
دئسین كی منه وئردیگین بو غذالار منیم جانیما موناسیب دئییل و منه داها یاخشی غذا
وئر. بونا گؤره ایسلامی عاریفلر نظرینده, اوروج, ظاهیری سووب ایلاهی عیرفانا
چاتماق معناسیندادیر.
|
دونیانین ان بؤیوك ایفطار سوفرهسی
یازار : میرزه عبدالصمد ملکی | بؤلوم : دین
+0 به یه ن
تركیهنین استانبول شهری دونیانین ان بؤیوك ایفطار سوفرهسینین آچیلماسینا شاهید اولدو كی 42 مین نفری اؤز باشینا ییغدی و دونیا ركوردلاری كیتابی (گینئس)ده ثبت اولدو. استانبول موسلمانلاری خیاباندا ایفطار میزی دوزماقلا دونیادا ان بؤیوك ایفطار میزی ركوردونو اؤز آدلارینا ثبت ائدهلر. آلمان خبر گوزاریسی معلوماتینا گؤره: تركیهنین استانبول شهری دونیانین ان بؤیوك ایفطار سوفرهسینین آچیلماسینا شاهید اولدو كی 42 مین نفری اؤز باشینا ییغدی و دونیا ركوردلاری كیتابی (گینئس)ده ثبت اولدو. تركیهنین "تی آر تی" شبكهسی اعلام ائلهدی, ایستانبولون اسنلر منطقهسینده دوزولن بو سوفره اوچون یئددی مین میزدن ایستیفاده اولوب كی 10 كیلومتر اوزونلوغوندا سوفره دوزولسون. بو سوفرهنین اوستونده, 10 تون دویو و 8 تون ات خورگی و 1500 سینی گؤی قویولموشدی. قاباقكی ركورد آمریكانین ایدی كی 16 مین نفری اؤز باشینا ییغمیشدی |
حضرت علی (ع) فضیلتلرینین بیر گوشهسی
یازار : میرزه عبدالصمد ملکی | بؤلوم : دین
+0 به یه ن
اومّتین ان چوخ بیلهنی مناقب خوارزمی كیتابیندا گلیب كی پیغمبر اكرم (ص) بویوروب: حكمت و معرفت و عیرفانی اون یئره بؤلدولر و دوققوز قیسمتین علییه وئردیلر و بیر قیسمتین خلقین هامیسینا وئردیلر. و بیر ده بویوردو: منیم اومتیمین داها چوخ بیلهنی مندن سونرا علی بن ابی طالب(ع) دیر. علینین (ع) زوهدی عبداللّه رافعدن نقل اولوب كی: علینین باشماقلاری خورما لیفیندنایدی و پالتارینی گاهدان خورما لیفی و بعضاً دریایله یاماییردی و ایكی پالتاری اون دؤرد دیرهمه آلاردی, بیرینی قنبره وئرردی و بیرینی اؤزو گئیردی. او حضرتین چؤرك قاتیغی سیركهایدی و یا دا دوز. ایستهسئیدی بونلارا بیر شئی آرتیرسین گؤی آرتیراردی. تئز-تئز ات یئمهزدی و یئسهایدیده آز یئیهردی و بویوراردی: قارنیزی حیوانلارین قبری ائلهمهیین. قیلینجینین قینی خورما لیفیندن ایدی و پالتاری قیسا و برك اولاردی. علی (ع) عیبادتی حضرت علی (ع) عابیدلرین عابیدی ایدی و هئچ كسین عیبادتی اونا چاتمازدی. صائِم النهار و قائِم اللیل ایدی و گوندوزلری اوروج توتور و گئجهلری آییق قالیر عیبادت ائدردی و گئجه گوندوز مین ركعت ناماز قیلاردی. او حضرتین آنلی سجدهنین چوخلوغوندان دَوه دیزی كیمی قابار چالمیشدی. او حضرتین عیبادتلریندن بیری بو ایدی كی اؤز ال زحمتینین پولیایله مین بنده آلیب آزاد ائلهدی. علینین (ع) جود و كرمی علی علیه السلامین مدینهده هامی آرزیسیندا اولان باغی واریدی. اونو مین دینارا ساتدی و هامیسینی مسجیدده یوخسولار و كاسیبلار آراسیندا پایلادی و ائوه قاییتدی, بیر حالدا كی اوندان بیر وعده غذا پولو دا قالمامیشدی. فاطمه علیهاالسلام بویوردو: سن بیلیرسن كی حسنین ایكی گوندور بیر شئی یئمهییبلر, سن ایله منده همان حالداییق. بو باغدان بیر رَطل آرپا اونو منیم نصیبیم اولمازدی؟ مولا بویوردو: ایستهمك ذلالتینی اوزلرینده گؤرمگه طاقتیم اولمایان جماعت, اوندان ائوه بیر شئی گتیرمگه مانع اولدو. یارالدان: مقدس اردبیلی ، صفحه 66 |
||
+
نوشته |
آمازوندا تازا نوع حیوان تاپیلدی
یازار : میرزه عبدالصمد ملکی | بؤلوم : عمومی
+0 به یه ن
آمازون چاییندا تحقیقده اولان عالیملر تازا بیر نوع حیوان تاپیبلار كی عجیب غریب شكلی وار. گؤزلری اولمایان بو فرقلی حیوان تازا نوع حیوان حسابا گلیر. عالیملری بو حیواندان 6 عدد گؤتوروب تحقیقه باشلادیلار. گؤرونوشلری ایلانا اوخشاسادا اصلاً ایلان نوعوندان دئییللر. اونلارین بعضی خصوصیتلری سمندرلرهده بنزهییر. بو حیوانلارین اوچو طبیعته قایتاریلدی, بیر اؤلدو و ایكیسیده تحقیقاتین ایدامهسی اوچون لابراتورا آپاریلدی. بو حیوانلار آمازوندا اولان بیر برق دوزلدن سدّی بوشالداندا تاپیلدیلار. اونلارین اورقانلاری ایلاندان چوخ سمندر و قورباغا بنزیر و نظره گلیر بالیق و قورتدان تغذیه ائلیر. |