اوشاقلارا نه وقتدن كتاب اوخویاق
یازار : میرزه عبدالصمد ملکی | بؤلوم : اجتماعی
+0 به یه ن
اوشاقلارا نه وقتدن كتاب اوخویاق
عاغیل، استعداد و ذكاوت والدینین اوشاقلاردا تقویت ائله‌مگینی آرزیلادیقلاری خاصیّتلردندیلر. بوتون والدینلر اوشاقلاری‌نین هوشلو و استعدادلی اولماقلارینی ایستیرلر و ائله بونا گؤره اونلارا اَن یاخشی مدرسه و اَن یاخشی معلم تاپماغا چالیشیرلار. آما یادیزدا اولسون كی سیز والدین كیمی بو زمینه‌ده اَن چوخ رول و قدرتیز وار كی اوشاغیزین اؤیرنمك قابلیّتینی كتاب اوخوماقلا تقویت ائلیه‌سیز و كتاب اوخوماغی اونلارین حیاتی‌نین آیریلماز بؤلومونه چئویره‌سیز.
اوشاقلارا كتاب اوخوماغین مزیّتی
هامی اوشاقلارا كتاب اوخوماغین اهمیّتلی اولدوغونو بیلیر. بوردا 2-6 یاشلار آراسی اوشاقلارا كتاب اوخوماغین مهم مزیّتلرینی سیزین اختیاریزدا قویوروق. حقیقتده انسان، عمر بویو اؤیرندیكلری‌نین یوزده یئتمیش بئشینی ایكی یاشینا قدر اؤیرنمیش اولور.
- والدین ایله داها گوجلو رابطه: اوشاغیز بویودوگو كیمی، حركتی، اویناماغی، قاچماغی و اطرافا ماراقلی اولماغی‌دا اؤیرنیر. كتاب اوخوماق سیزه، قوجاغیزا آلدیغیز اوشاغیزلا دینج و آرام بیر گوشه‌ده اوتوروب بیری-بیریزین كناریندا اولماقدان لذّت آپارماق فرصتی وئریر. اوشاغا كتاب اوخوماغی مجبوری و صرفاً وظیفه اولدوغونا گؤره ائله‌مه‌یین. اوشاقلارا 2 یاشدان كتاب اوخوماق، تربیتی بیر فعالیّتدیر كی اوشاقلا والدینین رابطه‌سینی گوجلندیرر.
داها یاخشی اؤیرنمك: اوشاقلارا كتاب اوخوماغین آیری مزیّتی‌ده اونلارین اؤیرنمك استعدادلارینی تقویت ائله‌مكدیر. دبستاندان اوّل اوخوماغی باشلایان اوشاقلار، تعلیم زمینه‌لرینده داها فعال و داها یاخشی اولورلار.
دانیشیق مهارتلری: اوشاقلار دبستان یاشلارینا قدر دیل و دانیشیق مهارتلرینی اؤیرنرلر. والدینین كتاب اوخوماغینا قولاق آسماقلا اوشاقلاردا، دیلی تشكیل وئرن اساس سسلر تقویت اولار. اوشاق كتاب صفحه‌لرینی های-كوی ایله چئویرنده سوادلانماقدان اؤنجه‌كی اَن مهم فعالیّتینی تجربه ائلیر. اوشاقلارین كلمه و لغت دایره‌سی بؤیویور.
كتابین نئجه اوخونماسی: اوشاقلار دنیایه گلنده كتابین نئجه اوخونماسی باره‌ده (ساغدان سولا و یا سولدان ساغا) علملری یوخدور و یا بیر صفحه‌ده‌كی یازیلارین تصویرلردن آیری اولدوقلارینی بیلمیرلر. بو واجب مهارتلری، والدین اونلارا كتاب اوخویاندا اؤیرنرلر.
داها یاخشی رابطه قورماق مهارتلری: وقتیزی اوشاغیزا كتاب اوخوماغا قویدوغوزدا، اونلار، اؤزلرینی داها یاخشی گؤستره بیلیب آیریلاری ایله رابطه قورا بیلرلر. كتابداكی شخصیّتلرین آراسینداكی رابطه و هابئله ناغیلی اوشاقلارا اوخودوغوزدا اوشاقلا رابطه قوردوغوز زمانلار، اوشاق رابطه قورماغین ارزشلی مهارتلرینی اؤیرنیر.
دیله مسلّط اولماق: اوشاقلارا دبستاندان اوّل كتاب اوخوماق، مدرسه‌ده اؤیرندیگی اصول ایله رابطه‌لیدیر.
- داها آرتیق منطقی دوشونجه مهارتلری: آشاغی یاشلاردا اوشاغا كتاب اوخوماغی آیری مزیّتلریندن بیری، اونلارین مفهوم دركلری‌نین یوخاری گئتمه‌سی سبب و نتیجه‌نی تشخیص وئرمك و دوزگون قضاوت ائتمكدیر. اوشاق، كتابین داخلینده‌كی حادثه‌لری بیر-بیرینه ربط وئرمكله عین زماندا اونا اوخودوغوز ناغیلدان هیجانلانیر.
- دقّت و انتظامین تقویتی: اوشاقلار ناغیلین تأثیرینده ناراحت اولا بیلرلر آما شبهه‌سیز اونلار ناغیلی آخیره‌دك قولاق آسماغی اؤیرنیرلر. ناغیل بویو اله گلن درك، اوشاقدا نظمین دال به داللیغی، آرتیق دقّت و یاخشی حافظه‌نی تقویت ائلر.
- اوخاماغا جذّابیّت یاراتماق: كیچیكلیكده اوشاقلارا كتاب اوخوماق اونلارین بؤیوكلوگونده اوخوماغا داها رغبتلی اولماقلارینا سبب اولار.
اوشاقلارا مناسب كتاب سئچمك
دقت ائتمك لازمدیر كی هر یاشا مناسب یاخشی كتابلار سئچمكلی‌ییك. اوشاق بؤیودوكجه اونون كتابلاری‌دا یاشینا مناسی دگیشمه‌لیدیر.
- ورقلری چئویرمگی باشارمایان لاپ كیچیك اوشاقلارا، قاردون و یا پارچا كتابلار داها مناسبدیر. 5-6 یاشلی اوشاقلارا بؤیوك تصویرلی و رنگارنگ اولان كتابلار یاخشیدیر. چوخ تصویرلی و رنگلی كتابلار بو یاشداكی اوشاقلارین رغبتینی آرتیرار. یاخشی كتابلار اوشاقلا بؤیویرلر. مثلاً اوشاغیزا بئش یاشیندا تصویرلی بیر كتاب آلساز او 6 یاشیندا اولاندا، اونو سیزه اوخویا بیلر و سككیز یاشیندا چكیلیب بیر گوشه‌ده كتابی اوخویار. كتابی تكلیكده اوخویا بیلن اوشاغا، ائله بیر كتاب آلین كی تیتری، اونو مأیوس ائله‌مه‌دن چتینلیگه سالسین.
آلتی یاشدان كیچیك اوشاقلارا مناسب اولان كتابلار، اونلارین دقّتینی اساس مفهوملار، الفبا، حسّلر و دوستلوق رابطه‌سینه آرتیرار. هابئله تكرار، سس علمی و آیری دیل اؤیرنمك ابزارلاردان استفاده ائتمك، اونون اوخوماق مهارتین آرتیرار. بونا گؤره 5 یاشا قدر اوشاقلارین كتابلاریندا الفبا و عدد اولمالیدیر. بو یاشداكی اوشاقلارین كتابلاریندا تصویر چوخ و یازی آز اولمالیدیر. داها بؤیوك اوشاقلارا ائله كتابلار یاخشیدیر كی اونلارین درك مطلب گوجلرینی آرتیرسین و كلمه دایره‌لرینه وسعت وئرسین.
- 5 یاشدان آشاغی اوشاقلارین كتابلارینداكی تصویرلر اونلارا تانیش اولوب اونلارن دقّتینی اؤزونه چكمه‌لیدیر. اونلارین كتابی اونلارین احساس، ال سورتمك، دقّت و تصویر باره‌ده دانیشماغا رغبتلرینی تحریك ائتمه‌لیدیر. كتابلاردا اوخشار و یا فرقلی سایز و رنگلرده تصویرلر اولمالیدیر.
- تكلیكده كتاب اوخویا بیلن اوشاقلار اوچون، اونلارا اوخوماق و یازماق مهارتینی اؤیردن جذبه‌لی كتابلار سئچین. بو یاشداكی اوشاقلارا كتاب آلاندا، ائله ناغیل‌لاری سئچین كی اؤیرنمك و باش قاتما آراسیندا مناسب دنگه اولسون. حقیقتده كتاب یوروجو اولمامالیدیر. یاخشی اولار بو كتابلاردا شعر ده اولسون.
- كتاب سئچنده اوشاغین اؤزو حاضر اولسا داها یاخشی اولار. اونون اؤز علاقه‌سینی‌ده كتاب باره‌ده سوروشون و اجازه وئرین سیزه كتاب سئچمكده كؤمك ائله‌سین.
قانات چالان طیّاره
یازار : میرزه عبدالصمد ملکی | بؤلوم : تكنولوژی
+0 به یه ن
قانات چالان طیّاره
هلندلی عالملر خلبانسیز چوخ كیچیك طیاره دوزلدیبلر كی 9 دقیقه انسان كنترلو اولمادان قوشلار كیمی قانات چالیب اوچور.
«دلفلای اكسپلورر» آدلانان بو طیّاره، اؤز-اؤزونه اوچا بیلن بیرینجی طیّاره‌دیر.
بو طیّاره قوشلار كیمی اوچماق و حركت اوچون قانات چالیر و مانعلره دَیمه‌مك اوچون بیر استریو گؤرمه سیستمیندن استفاده ائلیر.
هابئله یوكسكیگی اؤلچمك اوچون بیر بارومتره مجهز اولوب. اوندان علاوه اونون كنترلی و ثابتلیگی اوچون اونون ایچینده بیر سیستم قوشولوب.
18 گرم آغیرلیغیندا اولان دلفلای اكسپلورر، یئردن قالخیب بللی بیر یوكسكلیگه چاتاندان سونرا 9 دقیقه بویوندا اوچور. بو طیّاره هلندین دلفت دانشگاهی‌نین لابراتوروندا موفقیّتله تست اولوب.
بو طیّاره‌نین اساس قسمتی اونون استریو گؤرمه سیستمیدیر كی گؤز كیمی طیاره‌نی مانعه دَیمكدن ساخلیر.
بو طیّاره‌نین دوزلدنلری‌نین دئدیگینه گؤره، اونون آز زماندا اوچماسی‌نین سببی باطریدان استفاده ائله‌مگه گؤره‌دیر.
مختلف دینلرده جهنّم
یازار : میرزه عبدالصمد ملکی | بؤلوم : دین
+0 به یه ن
مختلف دینلرده جهنّم
دنیانین آیری یئرلرینده‌ده ابتدایی انسانلارین اعتقادلاریندا، یئر آلتی دنیاسیندا تفاوت یوخدور. بوندان علاوه فولكلورلارین چوخوندا شجاعتلی قهرمانین یئر آلتی دنیاسینا اولان سفریندن، مختلف افسانه‌لر وار. بو افسانه‌لرین چوخوندا _هر بیرینده‌كی جزئیات فرقلی اولسا دا،_ یئر و یا سو آلتی هیولانین – كی اكثراً یئر آناسی، اؤلوم آناسی و یا گئجه ملكه‌سی آدلانیر_ قارنینا و بطنینه گیرمكله، مختلف مانعلری و چتینلیكلری دالیدا قویوب، جان آلان امتحانلاردان و یولونا چیخان قورخونج موجودلارلا ساواشیب، نهایتده طبیعی بیر یول و یا اؤزو آچدیغی یول ایله، اونون بدنینده ائشیگه چیخیر.
بعضی محققلرین دئدیگینه گؤره، بو جور یئر آلتی دنیاسینا جومماق افسانه‌لری، تشرّف امتحانلاری‌نین سمبولیك بیانیدیر كی اونلاردان تبعیت ائله‌مكله، ناغیل قهرمانی اؤلومدن قورخو و یا اؤلومون اؤزونه غالب گلیب بعضاً ابدی‌لیگه چاتیر. هابئله بو مسافرت، باطنی و ایچ دنیاسی‌نین معرفت آختاریشیدیر كی هامی‌نین اونا الی چاتماز و فقط بئله سفرلره گئده بیلنلرین اونا اللری چاتار. (الیاده، «آیینلر ...3»، 61-64 ؛ بروس‌لانگ، 127؛ مكالك، «نزول ...4»، 648-649، «یئر»، 818).
بوندان علاوه، قبیله انسانلارین چوخو، روحون، اؤلومدن سونرا یئرین آلتینا اولان سفرینی چوخ خطرلی و چتین بیر سفر اولدوغونا اینانیردیلار. مثلاً سیبریلی قبیله‌لر اؤلومدن سونرا هر شخصین روحونون یئر آلتی دنیاسینا گئتمه‌سی اوچون، شمنین كؤمگینه محتاج اولدوغونا اینانیردیلار. بونا گؤره، شمن مركّب بیر آیینده، تكلیكده و یا آیری ایكی روحون كؤمگی ایله، اؤلموش شخصین روحونو اؤلومدن سونراكی چتینلیكلری دالدا قویماقدا و اورا چاتماق اوچون كؤمك ائلر. (الیاده، «آیین ...1»، 205-214؛ بروس لانگ، همان یئر؛ مكالك، «نزول»، 649؛ مینوا، 43-44؛ مبیتی، 309-310). ابتدایی انسانلارین چوخو، اؤلولر دنیاسی‌نین و یا یئر آلتی دنیانین، گون باتان یئرده و یاشادیقلاری یئرین غربینده اولدوغونا اینانیردیلار. (بروس لانگ، نیز مكالك، «یئر»، همان یئر؛ مبیتی، 309).
قدیم بین النهرینده: سومرلریلره گؤره، اؤلولرین اؤلكه‌سی یئرین آلتیندا «كور» آدلی بیر یئرده اَپْسو سولاری‌نین اوستونده‌دیر. بو اؤلكه‌یه چاتماق اوچون، قاییقچیسی كوبود اولان بیر قاییقا مینیب «آدامی اؤزونه چكن» چایدان كئچمه‌لیدیلر. بابل‌لیلر ده بو دوزخی كیگَل، ایریشتو یا كوتو كیمی آدلارینان و یئرینی، یئرین اَن آلت طبقه‌سینده تانیردیلار. «قاییتماز اؤلكه» و «چیخیلماز ائو» آدلانان بو منطقه، اؤلو روحلارین یئری ساییلیردی. 7 دروازاسی اولان 7 اوجا دیوار اونو حاصارا سالمیشدی و دئوه اوخشار نگهبانلار اوندان موغایات اولوردولار. بو دنیانین گیریش قاپیسی‌دا اوزاق غربده، گونون باتان یئرینده ایدی و نِرگَل الهه‌سی و خانیم اِرِشكیگَل الهه‌سی شاه و ملكه كیمی اوردا حكمرانلیق ائلیرلر. چایدان و 7 دروازادان كئچن روحلار بوتون پالتارلارینی، وار-یوخلارینی و بزكلرینی الدن وئریرلر و نهایتده لوت-چیلپاق صورتده، اَنونكیلر یا دوزخین 7 قاضیسی اؤنونده حاضر اولاردیلار كی حسابلارینا یئتیشسینلر. بو یئر آلتی دنیاسی، غم، مأیوسلوق و قارانلیقلا دولو بیر دنیا ایدی كی اورا گونش شعاسی یول تاپمازدی و روحلارین اوردا یاریم آییق یاشیردیلار.
یهود دینینده: یهودیلرین تاریخ بویو اؤلومدن سونراكی حادثه‌لری مختلف اعتقادلاری اولوب. اونلارین مقدّس كتابلاریندا، شئول (مزار)، بور (چالا)، اَبَدّون (یوخلوق یئری)، ماوِت (اؤلوم) و عافار (تورپاق) اؤلوم و اؤلومدن سونراكی دنیا آنلامیندا گلیب. (باخ: هایدل، 177, 181؛ گیلمن، 198) آما بو سؤزلرین اَن مهمّی شئولدور كی هم مزار و هم اؤلولرین آلت دنیاسی آنلامیندادیر. مقدّس كتابین یازدیغینا گؤره، شئول، دنیانین اَن آشاغی مرتبه‌سینده یئرلشن قارانلیق و توزلو بیر یئردیر (عاموس، 9: 2؛ ایوب، 10: 21-22، 11: 7- 8) كی اوندان قورتولماق اولماز (ایوب، 7: 10)، هئچ وقت دویماز (امثال، 30: 16) و بوتون انسانلار ایستر یاخشی و ایستر پیس، نهایتده اورا گئده‌جكلر. اؤلولر هئچ بیر شئی بیلیب یادا سالمیه‌جكلر و بوتون انسانی عشق و نفرت كیمی حسّلرینی الدن وئره‌جكلر (جامعه، 9: 4-6).
بونونلا بئله بعضی محققلر مقدس كتابین آیری آیه‌لرینه (مزامیر كتابی‌نین 49 و 73-جو بابلارینا) استناد ائدیب، شئولو یالنیز پیس انسانلارین یئری بیلیبلر و الله، یاخشی انسانلاری گؤیلره اؤز یانینا آپاراجاق معناسینی اونلاردان استخراج ائدیبلر (هایدل، 184-186؛ بروس لانگ، 130).
هر حالدا بللی اولان بودور كی مقدّس كتابین یازیلدیغی زمان یهودیلرین اؤلولرین گله‌جگی باره‌ده انسجاملی اعتقادلاری یوخیدی.
مسیحیت دینینده: اوچ اوخشار انجیلین آیه‌لرینه باخاندا، عیسی‌نین عهد عتیقده‌كی سؤزلرله مخاطبلرینی انذار ائله‌دیگینی گؤروروك، گناه‌كارلاری و ایمانسیزلارا شوم گله‌جگی وعده وئریر و بو انذاری بوتون گوج و شدّتله ائلیر. آما نظره گلیر اؤلولرین ایستر یاخشی و ایستر پیس گئتدیكلری یئر، شئول باره‌ده (باخ : متى، 11: 23؛ لوقا، 10: 15، 16: 23)، و گناه‌كارلارین عذاب اولدوغو یئر گهنّا، باره‌سینده نسبی فرق قویور (باخ : متى، 5: 22، 29، 10: 28، 18: 9، 23: 15، 33؛ مرقس، 9: 43- 45، 47؛ لوقا، 12: 5). بو اخطارلاردا توصیف اولان جهنّم همیشه‌لیك اود، قارانلیق و توستو، آغلاماق و دیش فشاریدیر.
هندو دینینده: ریگ ودا متنلرینده اؤلومدن سونراكی دنیادان آیدین تصویر وئریلمیر. بو متنلره گؤره، اؤلوم یولونا گئدن بیرینجی انسان یَمه ایدی كی اوندان سونرا اؤلولر دنیاسی‌نین آغاسی اولدو (رادلار كریشنان، I/84-85؛ مك دانل، 617). اورا، یاخشی انسانلاری و مراسملری و قربالیقلاری دوزگون یئرینه گتیرن انسانلارین یئریدیر كی الهه‌لر و یَمه ایله بیرلیكده خوشبختلیكله یاشیه‌جكلر. قارشیدا پیسلر و اَیری گئدنلر، درین، قارانلیق و سونسوز بیر چوخورا آتیلاجاقلار كی اوندان چیخماق امكانسیزدیر (رادلار ـ كریشنان، I/114-115؛ گریزولد، 318-319).
«اتهروه ودا» دا جهنّم مفهومو آچیلیر و قارانلیق و دئولرله دولو بیر یئردن سؤز گئدیر كی آشاغیدادیر و «نارَكه لوكه» آدلانیر كی پیس انسانلار اوردا یَمه‌نین نؤكرلری طرفیندن جور به جور شكنجه‌لره معروض قالیرلار.
بودا دینینده: بودا دینی‌نین ایدئولوژی‌سینده اوّلدن كرمه، سمساره و تناسخ كیمی عقیده‌لر قبول اولونوب و انسانین یاشاییشی، سایسیز دؤرلرده تازادان دوغولماقلا نیروانه و سمساره‌دن قورتولماقدا فرض اولوب. بئله‌لیكله جهنّم مفهومو نه قدر ده چتین، قورخولو و اوزون اولسا دا نهایتده موقّت و قورتولاندیر و او بیری دنیالار كیمی اوّلكی حیاتدان سونراكی حیاتا انتقال مرحله‌سیدیر (توبر، 241 ؛ الیوت، I/338).
بو فرض ایله بودانین دنیا اوچون تصویر ائتدیگی كیهان‌شناسلیق اوچ منطقه‌دن عبارتدیر: ایستك منطقه‌سی (كامه-لوكه)، شكلی اولان منطقه (روپه لوكه) ، شكلی اولمایان منطقه (اَروپه لوكه). ایستك منطقه‌سی اؤزو آلتی جنّت و چوخلو جهنّمدن عبارتدیر كی بو جهنّملر كیهانین آشاغی مرتبه‌لرینده یئرلشیرلر (باخ: واله پوسَن، 130-134؛ ویلیامز، 75-77؛ توبر، همان یئر؛ تامس، 829-832).
اوستاد علامه محمد تقی جعفری، آیریلارین گؤزونده
یازار : میرزه عبدالصمد ملکی | بؤلوم : دین
+0 به یه ن
اوستاد علامه محمد تقی جعفری، آیریلارین گؤزونده
آتن دانشگاهی‌نین فلسفه اوستادی پروفسور موچوپولوس:
اوستاد جعفری‌نین اساس دغدغه‌سی، بشریّتین مقصدی و گله‌جگیدی. معاصر جامعه‌نین معضل‌لری و مسأله‌لریندن چوخلو تجربه‌سی اولان بیر محققیدی و اؤزونو بو مسأله‌لردن گیزلتمگه چالیشمیردی.
اونونلا بحثه و دانیشیغا عادتیمیز واریدی، مخصوصاً تكنولوژی باره‌سینده كی بو بحث ساعتلر اوزاناردی. اونا گؤره تكنولوژی، انسان تمدّنینده منفی تأثیر قویور، چونكی باطنده‌كی كمالا بروز امكانی وئرمیر. تكنولوژی فقط وسیله و ابزار اولدوغو تقدیرده بشریّته كؤمك ائلیه بیلر.
او، همیشه دقیق دوشونمك و یوخاری اراده سمبولی ایدی. اونون اورگه یاتیم رفتارینی آتنده‌كی شاگردلریمله یادیما سالیرام. یونانلی شاگردلر كلاسی بیر-بیرینه وورموشدولار و من اونلارا، بیر روحانی ایله بئله رفتار ائله‌مكلرینه گؤره، حرصلنمیشدیم. آما دانیشیق بویو، شاگردلر اونون دانیشیغینا چوخ دقّتله قولاق آسدیلار. سونرا بونو آنلاماقلا كی چوخلو تازا سؤزلر اؤرگشیرلر، تئز-تئز ال چالماقلا اونو تشویق ائلیردیلر. او گون او، اونلارلا الهاملی شكلده ارتباط قوردو. بو اوزدن بیر اوستادین بو قدر حیرت آمیزلیگینی، الهی بیر وئرگی اولدوغونو بیلدیم.
آتن دانشگاهی‌نین
محقق و اوستادی پروفسور دلی كاستاپولوس:
ایللر اوّل، نئچه نفر یونانلی دوستلاریملا، علامه جعفری‌نین ائوینده گؤروشوب و چوخلو دانیشیقلاریمیز اولوردو. اونون باخیشلاری بیزه تأثیر قویاردی. رحلتیندن اوچ ایل اوّل (1374-ده) یونانا گلمیشدی و من بیر مجلسده ایكی ساعتدن آرتیق اونونلا دانیشدیم. من شخصاً اونون یوخاری فیلسوف اولدوغونو آنلادیم.
اونونلا، آخرت باره‌سینده دانیشغیمیز اولدو و بو اساسدا «دنیا واقعیّتینده، ایمانین عقل و الحاددان یوخاریلیغی» آدیندا بیر مقاله یازدیم. بیز هابئله ارتدوكس مسیحی‌لرین و مسلمانلارین داها یاخشی دنیا اوچون چالیشماسی باره‌ده توافقه چاتدیق.
آتن دانشگاهیندان
پروفسور ولقاریس:
. . . عمروم بویو هئچ كس منه اوستاد جعفری كیمی تأثیر قویماییب. قدیم آتن شهرینده خیابانلارا آد قویماق یئرینه، جماعتین هدایتی اوچون شهرین هر گوشه‌سینه ستون یاپیشدیریب و هر ستونون اوستونه «هرمه» قویوردولار.
هرمه‌لر همان زماندان یوخاری انسان و جماعتلرین هدایتچیسی كیمی تانیندیلار. عاغیللی فرزانه‌لر كی الله آداملاری ایدیلر و مقصدلری خلقه خدمت ائله‌مك ایدی. اونلار، همیشه تحقیق و اوخوماقدادیدیلار و اؤزلرینی انسانلارین معنویّتی و خدمتینه حصر ائله‌میشدیلر. بو نادر شخصلردن اوستاد محمد تقی جعفری‌یه اشاره ائلیه بیلرم. بو كیشی دنیانین اونا فخر ائلیه بیله‌جك قدر بؤیوك بیر انسان ایدی.
... اوست-اوسته دئمك اولار كی جعفری دنیانین نادر انسانلاریندان ایدی. او پیغمبر كیمی بیر مرجع ایدی. شدّتلی مذهبی میلی اولدوغونا رغماً، اوستاد جعفری‌نین نداسی بو گونكی وحشی دنیانین اورگینه آییقلیق وئرن بیر ندا ایدی.
جعفری هئچ وقت بیرینی محكوم ائله‌مزدی. او قاضی دئییلدی، او بیر معلم ایدی. یادیما گلیر بیر گون اوندان غرب دنیاسی باره‌ده نظرینی سوروشدوم. بو سؤالی گؤزله‌میردی آما دئدی: غرب انسانی، فوق بشر اولماغا چالیشماقدا، غیر بشر اولماقدان باشقا هئچ بیر نتیجه آلانماییب. چونكی الله-دان اوزاقلاشیب و صرفاً اؤز گوجونه و منطقینه دایانیب. اوستاد جعفری الله-ـا اینانماغی بشری منطق ایله مخلوط ائله‌میشدی. الله اونا رحمت ائله‌سین
ناگویا
دانشگاهی‌نین اوستادی پروفسور هیسائه ناكانیشی:
استاد جعفری‌نین عظمتی‌نین جنبه‌لری سایسیزدیر. بونونلا بئله هر شئیدن اوّل اونون اسلام تمدّنی و آیری تمدّنلر باره‌ده گئنیش علمینی و حكمت و درین باخیشینی دئیه بیلرم كی باعث اولدو معاصر و گله‌جك انسانلار اوچون اورك یاندیران اثرلرین یاراتماسینا امكان اولسون.
اونلارلا دانیشاندا بیلدیم كی: اونون اورك ایستیلیگی و روح عظمتی باعث اولدو صلحلی دنیانین یارانماسینا بو قدر اهمیّت وئرسین و بیزیم اوچون بوجور بؤیوك میراث قویسون.
. . . دنیا دا گؤزه گلیم دگیشیكلیلر باش وئریب و دنیا خطرلی شرایطه طرف گئدیب. شرافت، انسان كرامتی كیمی بؤیوك مفهوملارا اعتناسیزلیق اولور و حتّی انكار اولورلار. انسان حیاتی اوچون واجب اولان بوتون بو مفهوملاری دیریلتمك اوچون، علامه جعفری‌نین بوتون اثرلری دقّت آلتینا گئتمه‌لیدیر. اونون فلسفه‌سی تازادان تفسیر اولمالیدیر كی داها امن و داها صلحلی بیر دنیا یارانسین.
هاشمی رفسنجانی: معظم رهبرلیك مقامی اوچ یئرده دادیمیزا چاتدیلار
یازار : میرزه عبدالصمد ملکی | بؤلوم : خبرلر
+0 به یه ن
هاشمی رفسنجانی: معظم رهبرلیك مقامی اوچ یئرده دادیمیزا چاتدیلار
آیت الله هاشمی رفسنجانی آرتیردی: الله-ین كؤمكلیگی ایله تازا تحریملر اعمال اولونمادی. بیر عدّه بئله دوشونور كی، بیز بو وضعیّتی یاراتدیق آما ائله دئییل. جماعت بیلدی كی پیس شرایطده‌ییك، یا گرك تسلیم اولاق یا دا ساواشا حاضرلاناق، بئله بیر شرایطده میدانا گلدیلر و لازم اولان شخصی سئچدیلر و ایندی اؤلكه‌میز اعتدالا چاتیب.
هاشمی رفسنجانی ادامه وئردی: انتخاباتین یاخشی اولماسی بونا گؤره ایدی كی معظم انقلاب رهبری رأیلرین دوزگون اوخونماسینا امر بویوردولار و اعلام ائله‌دیلر كی رأیلر حق الناسدیر.
او آرتیردی: مذاكره‌لره باشلایاندا بیر عدّه اعتراض ائله‌دیلر و بونو تسلیم اولماق معناسینا بیلدیلر آما رهبر بویوردو بو مذاكره ائله‌ینلر انقلاب اوشاقلاریدیلار و ایشلرینی گؤرورلر، اونلارا سازشكار دئمه‌یین.
تشخیص مصلحت مجمعی‌نین رئیسی دئدی: توافق‌لرده بیرینجی امضانی آتاندا، یئنه بیر عدّه اعتراض ائله‌دیلر كی نیه امضالادیز. آما رهبر جوابلارینی وئریب دئدی گزارشده گلن، موفّقیّت ایدی و تشكر ائلیرم.
هاشمی رفسنجانی بونا تأكید ائله‌مكله كی معظم رهبرلیك مقامی معترضلرین آغزینی باغلادی، تصریح ائله‌دی: حقیقتده رهبر اوچ حساس مقطعده دادیمیزا چاتدی و ائله ولایت فقیهین‌ده خاصیّتی بودور كی چیخیلماز وضعیّتلری سیندیرا و طغیان اولمایا.