حضرت علی (ع) فضیلتلری‌نین بیر گوشه‌سی
یازار : میرزه عبدالصمد ملکی | بؤلوم : دین
+0 به یه ن
 |
||
|
اومّتین ان چوخ بیله‌نی مناقب خوارزمی كیتابیندا گلیب كی پیغمبر اكرم (ص) بویوروب: حكمت و معرفت و عیرفانی اون یئره بؤلدولر و دوققوز قیسمتین علی‌یه وئردیلر و بیر قیسمتین خلقین هامیسینا وئردیلر. و بیر ده بویوردو: منیم اومتیمین داها چوخ بیله‌نی مندن سونرا علی بن ابی طالب(ع) دیر. علی‌نین (ع) زوهدی عبداللّه رافعدن نقل اولوب كی: علی‌نین باشماقلاری خورما لیفیندن‌ایدی و پالتارینی گاهدان خورما لیفی و بعضاً دری‌ایله یاماییردی و ایكی پالتاری اون دؤرد دیرهمه آلاردی, بیرینی قنبره وئرردی و بیرینی اؤزو گئیردی. او حضرتین چؤرك قاتیغی سیركه‌ایدی و یا دا دوز. ایسته‌سئیدی بونلارا بیر شئی آرتیرسین گؤی آرتیراردی. تئز-تئز ات یئمه‌زدی و یئسه‌ایدی‌ده آز یئیه‌ردی و بویوراردی: قارنیزی حیوانلارین قبری ائله‌مه‌یین. قیلینجی‌نین قینی خورما لیفیندن ایدی و پالتاری قیسا و برك اولاردی. علی (ع) عیبادتی حضرت علی (ع) عابیدلرین عابیدی ایدی و هئچ كسین عیبادتی اونا چاتمازدی. صائِم النهار و قائِم اللیل ایدی و گوندوزلری اوروج توتور و گئجه‌لری آییق قالیر عیبادت ائدردی و گئجه گوندوز مین ركعت ناماز قیلاردی. او حضرتین آنلی سجده‌نین چوخلوغوندان دَوه دیزی كیمی قابار چالمیشدی. او حضرتین عیبادتلریندن بیری بو ایدی كی اؤز ال زحمتی‌نین پولی‌ایله مین بنده آلیب آزاد ائله‌دی. علی‌نین (ع) جود و كرمی علی علیه السلامین مدینه‌ده هامی آرزیسیندا اولان باغی واریدی. اونو مین دینارا ساتدی و هامیسینی مسجیدده یوخسولار و كاسیبلار آراسیندا پایلادی و ائوه قاییتدی, بیر حالدا كی اوندان بیر وعده غذا پولو دا قالمامیشدی. فاطمه علیهاالسلام بویوردو: سن بیلیرسن كی حسنین ایكی گوندور بیر شئی یئمه‌ییبلر, سن ایله من‌ده همان حالداییق. بو باغدان بیر رَطل آرپا اونو منیم نصیبیم اولمازدی؟ مولا بویوردو: ایسته‌مك ذلالتینی اوزلرینده گؤرمگه طاقتیم اولمایان جماعت, اوندان ائوه بیر شئی گتیرمگه مانع اولدو. یارالدان: مقدس اردبیلی ، صفحه 66 |
||
|
+
نوشته | ||
قدر گئجه‌سی‌نین فضیلتی
یازار : میرزه عبدالصمد ملکی | بؤلوم : دین
+0 به یه ن
|
|
||
|
قدر گئجه‌سی موبارك اوروجلوق آیین چوخ فضیلتلی گئجه‌سیدیر كی بو گئجه آللاهین رحمت قاپیسی آچیلار و دونیا و آخیرت حاجت و ایستكلری اوچون ارزیشلی فورصتدیر. قدر سوره‌سی‌نین آیه‌لرینه دیقت یئتیرمكله قدر گئجه‌سی‌نین فضیلتین بیلمك اولار:
قدر گئجه‌سی ایسلامین موقدس و موبارك گئجه‌لریندندیر. آللاه قورآندا اونو كرامت‌ایله یاد ائدیب و بیر سوره ده اونون آدینا نازیل ائدیب. ایلین بوتونلویونده قدر گئجه‌سینه تای فضیلتی و یاخشی گئجه یوخدور. بو گئجه قورآنین نازیل اولماسی و روح و ملكلرین نازیل اولما گئجه‌سیدیر. قدر گئجه‌سینده عیبادت ائله‌مك مین آیین عیبادتیندن اوستوندور. بو گئجه اینسانلارین بیر ایللیك تقدیری: عؤمری, روزیسی و ساییر ایشلری بللی اولار. بو گئجه ملكلر یئره گلر و ایمام زمانین (عج) محضرینه گئدر و بنده‌لره موقدّر اولانی او حضرته عرضه ائدر. بو گئجه‌نی آییق قالماق, قورآن اوخوماق و موناجات ائله‌مك چوخ توصیه اولوب. بو گئجه‌نین آیری گئجه‌لره فضیلتی بو مسأله‌لردن بللی اولور:
«هر كس قدر گئجه‌سی آییق قالا و مؤمین اولا و جزا گونونه اعتیقادی اولا, بوتون گوناهلاری باغیشلانار.»
«آللاه كیتابیندان ایستیفاده اولور كی آللاه یانیندا آیلارین سایی اون ایكیدیر و آیلارین سولطانی رمضان آییدیر و رمضان آیین قلبی ده قدر گئجه‌سیدیر.»
| ||
ایمام حسن (ع) و معاویه‌نین صولحنامه‌سی
یازار : میرزه عبدالصمد ملکی | بؤلوم : دین
+0 به یه ن
|
|
||
|
ایمام حسن (ع) اوِّلده اؤزونو معاویه‌ایله جنگه حاضیرلادی, آما كؤمكلری‌نین ثابیت‌قدم اولمادیغی و ایسلام دینینه دَیَن ضربه‌یه گؤره مجبور قالدی معاویه‌ایله صولح ائلیه. ایمام حسن (ع) و معاویه‌نین صولحنامه‌سی بیرینجی مادّه: حسن بن علی حكومت و خیلافتی معاویه‌یه وئریر, بو شرطله كی معاویه قورآن دستوری و پیغمبرین سیره‌سی‌نه موطابیق حكومت ائلیه. ایكینجی مادّه: معاویه‌دن سونرا خیلافت حسن بن علی‌یه چاتاجاق و اونا بیر ایتّیفاق دوشسه حسین بن علی موسلمانلارین حكومتینی الینه آلاجاق. هابئله معاویه‌نین حقی یوخدور اؤزونه جانشین موعیّن ائلیه. اوچونجو ماده: ناماز واختی امیرمؤمنان علی‌یه(ع) لعنت اوخوماق و اهانت ائله‌مك دایاندیرمالیدیر و بوندان سونرا علی‌دن (ع) فقط یاخشی‌لیقلا یاد اولمالیدیر. دؤردونجو مادّه: كوفه بیت‌المالیندا اولان 5 میلیون دیرهم, معاویه‌یه تحویل وئریلمیه‌جك و گَرَك حسن بن علی‌نین (ع) نظری آلتیندا خرجله‌نه. هابئله معاویه اموال باغیشلاماقدا بنی هاشیمی بنی امیه‌دن اوستون توتمالیدیر. هابئله معاویه گرك «دارابگرد» خراجیندان بیر میلیون دیرهم, جمل و صفین جنگینده حضرت علی‌نین(ع) ریكابیندا ساواشیب شهید اولانلارین عاییله‌لری آراسیندا تقسیم ائلیه. بئشینجی ماده: معاویه تعهود وئریر كی جماعتین هامیسی, شاملی, حیجازلی, عراقلی و آیری میلّتلرین هامیسی تعقیب و اذیّتدن آماندا اولسونلار و اونلارین كئچمیشده‌كی سابیقه‌لرینه گؤز یومولسون. و اونلارین هئچ بیری كئچمیشده معاویه حكومتی علئیهینه ائتدیكلری فعالیتلره گؤره تعقیب اولماسینلار و مخصوصاً عراق اهلی كئچمیشده اولان كینه‌یه گؤره اذیّت اولماسین. اوندان علاوه معاویه, علی‌نین (ع) كؤمكلرینه, هر یئرده اولسالار آمان وئرسین و اونلاری اصلاً اذیت ائله‌مه‌سین. هر كسین حقّینی اؤزونه وئرسین و علی شیعه‌لری‌نین الینده, بیت المالدان اولان اموال اونلاردان آلینماسین. هابئله حسن بن علی و قارداشی حسین بن علی و پیغمبر خانیندانیندان هئچ كسه, معاویه طرفیندن هئچ جور خطر اولمامالیدیر و هئچ یئرده اونلار اوچون قورخو فضاسی یارادیلمامالیدیر.
صولحون آخیرینده معاویه تأكیدله تعهود وئردی كی صولحنامه‌نین بوتون مادّه‌لرینی دقیقاً ایجرا ائلیه‌جك. او بو مسأله‌یه آللاهی شاهید گتیردی و شامین بؤیوكلری‌ده شاهید اولدولار. بئله‌لیكله ایسلام پیغمبری‌نین(ص) حسن بن علی هله اوشاق اولاندا, دئدیگی فرماییش موحقق اولدو. پیغمبر بیر گون منبره‌ده اونو گؤرنده بویوردولار: «منیم بو بالام موسلمانلارین آغاسیدیر و آللاه اونون الی‌ایله موسلمانلارین ایكی دسته آراسیندا صولح یاراداجاق.» | ||
یالانچی مودعی‌لرین ایدعاسی: ایمام زمانلا(عج) رابیطه‌میز وار
یازار : میرزه عبدالصمد ملکی | بؤلوم : دین
+0 به یه ن
|
|
||
|
مهدویت اعتیقادینا سطحی باخماغین عاقیبتین بیلمك اوچون او حضرتله رابیطه ایدعالاری اولانلار و حتی بیر عیده اؤزونو او حضرت تانیتدیرانلارین پرونده‌سینه باخماق اولار. آشاغیدا بو یالانچی مودعی‌لرین بیر سئریسی ایله تانیش اولوروق. - بیر قیزین اهواز كندلری‌نین بیرینده, ایدعاسی وار كی ایماملارلا رابطه‌سی وار و ناخوشلارا شفا وئریر. «ز ـ ج» 21 یاشلی قیزدیر كی بیر مودت قاباق ایدعا ائله‌دی ایمام حسین(ع) اونون یوخوسونا گلیب و اونا ناخوشلاری شفا وئرمگه ایجازه وئریب. سونرا اونون قارداشی و عمیسی اوغلو, اونون تبلیغینده فیلیم و سی‌دی پایلادیلار. بو ایش اورا قدر بویودو كی چوخلو جماعت اوزاق-یاخین كندلر و شهرلردن او قیزین ائوینه گلدیلر و اونون فامیللری جماعتین نذیرلرین ییغماغا باشلادیلار. او بیر مودّت سونرا ایدعا ائله‌دی حیاطلارینداكی خورما آغاجی ناخوشلارا شفا وئریر. - عوام ایچینده بیر شایعه یاییلدی كی بیر تقلید مرجعی ایمام زمانین (عج) قاتیلین گؤروب. شایعه‌چیلر كی بیر عیده فرهنگی محصولات تهیه‌ائدنلر ده اونلارین ایچینده واریدیلر بیر پارا كاغاذلار و سی‌دی‌لر چیخاتدیلار و ایدعا ائله‌دیلر: آیت الله العظمی . . . دستاماز آلاندا هوشدن گئدیر و هوشه گلیب حالیندان سوروشاندا دئییر كی, ائله ایندی ایمام زمانین (عج) قاتیلی دونیایا گلدی و بی‌هوشلوقدا اونو اوزونو گؤره بیلدیم ! بو خبر اصفهاندا و آذربایجاندا گئنیش صورتده یاییلدی و بئله یاییلدی كی با قاتیل ایرانلیدیر و بو خبر دیندار جماعتین ناراحاتچیلیغینا سبب اولدو. بونا گؤره بو تقلید مرجعین شاگیردلریندن بیری اوندان ایستیفتاء ائتدی و او, بو مسأله‌نی شیدّتلی صورتده تكذیب ائله‌دی. - سیدعلی برزنجی اوغلو مصطفی, مهدویت مودعی‌لریندن ایدی كی كردستاندا اؤزونو تبلیغ ائله‌دی و ایندی اؤلندن سونرا كوبرا غئیبتینده باش آپاراریر ! ایكی اینترنت سایتی دؤرد دیلده بو شخصین یازیلاری و سؤزلرین تبلیغ ائلیر. او 1955 ده عراقین سلیمانیه‌سی‌نین كندلرین بیرینده دونیایا گلیب و 1988-ده مهدویت ایدعاسی ائدیب و جماعتی اؤزونه طرف چاغیردی. بو شخص ایرانا گلیب چالیشدی شیعه موجتهیدلرین نظرین جلب ائله‌سین كی اوخو داشا دَیدی و سونرا عراقا قاییتدی. برزنجی‌نین ایدعاسینا گؤره, آللاهین كلامی فیریشته‌لر طرفیندن اونا ایلهام اولور و بو یازیلار آللاه طرفیندن اونا گؤنده‌ریلیب. بیر عیده عوامین اینامینا گؤره بو شخص بیر گون ظهور ائده‌جك, البته مكه‌ده یوخ بلكه عراقین كردستانیندا. - سید احمد الحسنین ایدعاسی وار كی ایمام زمانین (عج) وصی‌سی و گؤندریلمیشیدیر. او اؤزونو یمانی آدلاندیریب اینترنتده گئنیش صورتده اؤزونو تانیتدیریر و حتّی ایدعا ائلیر كی شیعه عالیملرین چوخونا دعوتنامه گؤنده‌ریب و اونلاری موناظیره‌یه چاغیریب. بو شخصین سایتیندا گلیب: سید احمد الحسن, آیت الله سیستانینی خاص صورتده علمی موناظیره‌یه چاغیریب تا اونون قاباغیندا فقط قورآنا ایستیناد ائدیب جواب وئره, آما او قبول ائتمه‌ییب. یالانچی یمانی, بو ایدعادان علاوه اؤزونو بیرینجی مهدی آدلاندیریب و بیر سئری ریوایتلردن سوءایستیفاده ائله‌مكله اؤزونو موعود مهدی آدلاندیریر. بو شخص اینترنتده «بلغ مبین شیخ ناظم العقیلی قلمی« كیتابین نئچه دیلده یاییب و اوندا ایدعاسی‌نین دلیل‌لرین و وظیفه‌لرین ساییب و هامیدان ایسته‌ییب كی اونا قوشولسونلار. - علیرضا پیغان، بللی اولمایان بیر نفردیر كی مونجی آدیندا بیر سایت قویوب و اؤزونو موعود مهدی عنوانیندا تبلیغ ائلیر و قائم آدیندا 673 صفحه‌لیك بیر كیتابی دا بو سایتدا یاییب. بو كیتابین بعضی یئرلرینده بئله ایدعا اولوب: شیعه‌لرین 12-جی ایمامی كوبرا غئیبتین اوّل‌لرینده وفات ائله‌دی و قبری مكه‌ده‌دیر. بو مدعی ایدامه وئریر: اون ایكینجی ایمامدان سونرا علی آدیندا ایكی ایمام ظهور ائدیبلر كی او اونلارین آخیریدیر و لقبی سید حسنی‌دیر. - هرمزگان كندلرینده یر نفر ایدعا ائله‌دی كی یوخودا مأمور اولوب بندرعباس یاخینلیغیندا بیر كندده مسجید دوزتسین. ایمام زمان (عج) آدیندا بیر مسجید دوزلماق حالیندادیر كی اونون موتوّلیسی همان بو شخصدیر. كرامت و ناخوشلارا شفا وئرمك شایعه‌سی جماعتی بو نوقطه‌یه ییغیب. - دشتستاندا بیر 45 یاشلی آرواد ایدعا ائلیر كی ایمام زمانی (عج) گؤروب و ناخوشلارا شفا وئرمك گوجو وار. او بیر ایمام حسین (ع) عزا مجلیسینده ایدعا ائله‌دی كی ایمام زمانلا(عج) رابیطه‌سی وار و ایندیه قدر نئچه ناخوشا شفا وئریب. بونلار اخیراً مهدویت ایدعاسی ائدنلرین تكجه بیر آزیدیر. | ||
اوروجلوغون اون‌بئشینجی گونون دوعاسی*orucluğun 15-ci günün duası
یازار : میرزه عبدالصمد ملکی | بؤلوم : دین
+0 به یه ن
|
|
||
|
ائی آللاه بو آیدا منه اؤزلرینی سنین قارشیندا كیچیلدن موتیع اینسانلارین اطاعتینی نصیب ائت، قلبیمی توبه ائتمك اوچون سنین قارشیندا ایطاعتكار و تواضوعكار اولانلارین توبه‌لرینده اولدوغو كیمی آچ، پناه وئرمگینه خاطیر ائی قورخانلارین سیغیناجاغی!
اللهمّ ارْزُقْنی فیهِ طاعَةَ الخاشِعین واشْرَحْ فیهِ صَدْری بإنابَةِ المُخْبتینَ بأمانِكَ یا أمانَ الخائِفین.
Allahummərzuqni fihi taətəl-хaşiin vəş-rəh fihi sədri biinabətil-muхbitin biəmanikə ya amanəl хaifin! | ||
