din xadimi دین خادمی

	شیطان‌پرستلرین مراسیملری
شیطانپرستلرین مراسیملری/قره نامازدان قیزلاری قوربان ائله‌ماغا قدر شیطان‌پرستلرین بیر سئری مراسیملری وار كی دونیادا و مخصوصاً آمریكادا ایجرا اولور مثلاً قیزلاری شیطان نومادی‌نین قاباغیندا قوربان ائله‌مك كی دینله ضیدیت عنوانیندا ایجرا اولور. مودئرن شیطان‌پرستلیك تازا ظهور تاپمیش عیرفانلارین اَن نوفوذلی‌لاریندان ساییلیر. بو برنامه‌لرین بیری, اوكتوبرون 29-دا ایجرا اولان برنامه‌لردیر كی هالووین گئجه‌سی و یا قورخو گئجه‌سینه مشهوردور. شیطان‌پرستلر بو گئجه اوزلرینی گیریم ائدیب قورخولو ماسك تاخارلار و كوچه بازارا دوشوب جماعتی قورخودارلار. اونلار چالیشیرلار بیر ساده قورخونو دهشتلی بیر قورخویا تبدیل ائله‌سینلر. بو مسأله تفریحدن جیدّی و اؤلدوروجو بیر ایشه تبدیل اولوب و بو گئجه معمولاً بیر عیده قورخودان اورك و بئیین سكته‌سی اثرینده مریضخانایا یوللانیرلار. ائله كی 2011-جی ایلینده FBI-ین وئردیگی خبره گؤره بو گئجه‌نین قورخوسو اثرینده مین نفره یاخین مریضخانایا دوشوبلر. چوخ گؤروشوب كی شیطان‌پرستلر هالووین كلمه‌سینی خاص صورتده ماشینین دالی شوشه‌سینه یازیرلار. بو كلمه آغ رنگده و اَگری صورتده, شیطان‌پرستلرین مئتودی كیمی توت مدّین اوستونده یازیلار و بعضاً بو كلمه‌نین وسط حرفینده (O) دامجی عكسی چكیلر و یا دامجینی ماشینین وسط شوشه‌سی‌نین كونجونده داغیلمیش صورتده چكیرلر. بو دامجی ماویلرین (هم‌جینس‌بازلارین) موهوم نومادی ساییلیر. بو دامجی هالووین كلمه‌سی‌نین ایچینه سالیناندا شیطان‌پرستلیك و هم‌جینس‌بازلیغین ایتحادی معناسیندادیر. گونوموزده ماشینین فرهنگ اینتیقالیندا موهوم نقشی وار. بیر ماشین شهرین فرقلی بیر نوقطه‌سیندن آیری نوقطه‌سینه گئدنده او ناحیه‌نین فرهنگینی اؤزو ایله اینتیقال وئریر. چونكی ماشین اؤزونده چوخلو فرهنگی نیشانه داشی‌ییر و ماشینین بیر یئردن آیری یئره گئتمه‌سی‌ایله بو فرهنگ اینتیقال تاپیر. شیطان‌پرستلرین هالووین گئجه‌سیندن سونرا آیری مراسیملری وار كی اونلاردان قره‌نامازا ایشاره ائتمك اولار كی شیطان‌پرستلرین ان مشهور مراسیمی ساییلار. ربانی عشایا بنزر بو مراسیمده اونلار مسیحیتله اؤز ضیدّیتلیكلرینی گؤرستمك اوچون ربانی عیشا مراسیمینی ترسه ایجرا ائلرلر یعنی آخیردن اوّله. قوربانلیق كسمك شیطان‌پرستلرین آیری برنامه‌لریندن ساییلیر. قوربانلیق مراسیمی هر اوچ آیدان بیر و چوخ گیزلی صورتده ایجرا اولور. شیطان‌پرستلر بو مراسیمی اؤز نومادلاری‌نین قاباغیندا –كی بؤیوك شیطان موجسّمه‌سی و یا بیر ستون اولار- ایجرا ائلرلر و بعضاً چوخلی افرادین حضوری‌ایله بؤیوك جنگللرده ایجرا ائدرلر. قوربانلیق مراسیمی ایكی جور: یئددی یاشلی قیزلارین ذیبحی و یا 18 یاشلی باكیره قیزلارین ذیبحی ایله ایجرا اولار. بو مراسیمده قوربانلارین بدنین تیكه-تیكه ائدیب داغ سویون ایچینه آتارلار و یا اونلاری یاندیریب و بدنلری‌نین كولونو شرابین ایچینه تؤكوب ایچرلر. هابئله قوربانلیق مراسیمینده حاضیر اولانلارین هامیسی گرك قوربانین قانیندان ایچسین كی گلن ایل و یا گلن آیلاردا شیطانین صدماتیندان اماندا قالسین. بیرینه قان یئتیشمه‌سه وظیفه‌سی وار قوربانلیغین قانی قاتیلمیش سودان ایچسین.

	بقیع قبریستانی نئجه سؤكولدو؟
1344-جو هیجری قمری ایلین شَوالین سككیزینده ایسلام دونیاسی‌نین موهوم قبریستانی وهابیلر الیله سؤكولدو. چوخ آز اؤلكه‌ده حیجازداكی كیمی ایسلامین ایلكین عصرلریندن اثرلر وار. نییه‌كی ایسلامین دوغولان یئری اورادیر و ایسلام باشچیلاریندان موختلیف اثرلر اونون هر یئرینده گؤروشور. آما تأسوفله دوشونجه‌لری قورو موتعصیب وهابیلر, بو اثرلرین چوخونا شیرك اثرلری آدی قویوب آرادان آپاردیلار و بو ارزیشلی اثرلرین آزی قالیر. بو مسأله‌نین باریز نمونه‌سی بقیع قبریستانیدیر. بو قبریستان ایسلامین موهوم قبریستانیدیر كی ایسلام تاریخی‌نین موهوم بؤلومونو اؤزونده یئرلشدیریب و موسلمانلارین بؤیوك تاریخ كیتابی ساییلیر. بقیع قبریستانی‌نین قبرلری سؤكولمه‌میشدن قاباق, ایماملار و آیری ایسلام بؤیوكلری‌نین قبرلری اوستونده گونبذلر و بینالار واریدی. بقیع ایماملاری, سككیز ضیلعده دوزلمیش  و ایچه‌ریسی و گونبذی گژلنمیش بوقعه‌ده قویلانمیشدیلار. وهابیلر مدینه‌یه سولطه تاپاندان سونرا قبیرلری ییخماقدان علاوه اورداكی اثرلری‌ده آرادان آپاردیلار. بو واقیعه‌ده ایمام حسن موجتبی (ع)، ایمام سجاد (ع)، ایمام محمدباقر (ع) و ایمام جعفر صادقین(ع) مرقدلری ییخیلدی. اونلار ایماملاردان علاوه آیری قبرلری‌ده خرابلادیلار او جومله‌دن: فاطمه زهرایه (س) منسوب اولان قبر، عبدالله بن عبدالمطلب و آمنه (پیغمبرین آتا و آناسی) ، فاطمه بنت‌اسدین (ع) موطهر قبری (امیرالمومنین (ع)آناسی)، حضرت ام‌البنین (ع ) موطهر قبری ، پیغمبرین عمیسی عباسین قبری، پیغمبرین اوغلو ابراهیمین قبری, حضرت صادقین (ع) اوغلو اسماعیلین قبری، پیغمبرین اؤگئی قیزلاری‌نین قبری , پیغمبرین دایه‌سی حلیمه‌نین قبری و پیغمبر زمانی شهید اولانلارین قبری. بقیع بقیع ایماملارین قبری‌نین ایلك تخریبی وهابیلر الیله بقیع ایماملارین قبری‌نین ایلك تخریبی 1220 هیجری قمری ایلینده یعنی سعودیلرین بیرینجی حكومتلری‌نین عثمانلی ایمپراطورلوغو الیله ییخیلماسی زمانی اولدو. بو ایسلامی-تاریخی واقیعه‌دن سونرا ایران پادیشاهی رحمتلیك فتحعلی شاهین حیمایتی ایله سؤكولموش مرقدلر گؤزل صورتده تازادان دوزلدی و گونبذ و مسجید احداثی‌ایله بقیع, موسلمانلارین اَن گؤزل زیارتی-سیاحتی یئرینه چئوریلدی. بقیعین ایكینجی دفعه خرابلانماسی ایكینجی تاریخی-ایسلامی حادیثه 1344 هیجری قمری ایلین سككیزینده باش وئردی كی بو تاریخده وهابیلرین اوچونجو دفعه حكومته گلماقلاری ایدی. ائله بیر ایل كی وهابیلر بؤیوكلری‌نین فتواسی اساسیندا شیعه موقدسلرینی تحقیر ائله‌مك اوچون, ایماملارین و اهل بیتین (ع) قبرلرینه ایكینجی دفعه وحشیانه حمله ائله‌دیلر و بقیع قبریستانینی خرابلانمیش و تانینمامیش بیر قبریستانا چئویردیلر. مكه، مدینه، جده و كربلادا قبرلرین سؤكولمه سی وهابیلر 1343 هیجری قمری ایلینده مكه شهرینده حضرت عبدالمطلب (ع), ابی‌طالب (ع)، خدیجه (ع) و فاطمه زهرا (ع) قبری‌نین گونبذلرین, پیغمبرین ویلادت یئری و خیزرانی (پیغمبرین گیزلی عیبادت یئرین) توپراقلا بیر ائله‌دیلر و جده‌ده حوّانین قبری و آیری قبرلری داغیتدیلار. مدینه‌ده پیغمبرین گونبذین توپا باغلادیلار آما موسلمانلارین قورخوسوندان شریف قبره دَیمه‌دیلر. هابئله اونلار 1343-ون شَوالیندا بقیع قبریستانینی تورپاقلا بیر ائدیب دگرلی شئیلری تالادیلار و حضرت حمزه و اُحُد جنگی‌نین شهیدلری‌نین قبرلرینی تورپاقلا بیر ائله‌دیلر. همان ایل موتعصیب وهابیلر كربلایا حمله ائدیب و ایمام حسینین (ع) موطهر ضریحین سؤكوب اوندا اولان دگرلی شئیلری كی صفوی و قاجار شاهلاری‌نین هدیه‌لری ایدی تاراج ائله‌دیلر و جماعت و عالیملردن 7000 نفر جیواریندا آدام اؤلدوردولر. سونرا نجفه طرف گئتدیلر آما غارته موفق اولمادیلار و دالی اوتوردولار.

	1344-جو هیجری قمری ایلینده بقیع قبریستانی وهابی‌لر طرفیندن تخریب اولدو
وهابیلرین مدینه‌یه سولطه تاپماقلاریله, شیعه ایماملاری و ایسلامین چوخلو بؤیوكلری‌نین قبری بو مونحریف فیرقه طرفیندن تخریب اولدو. او گونه‌ قدر مدینه‌ده دفن اولان ایماملار و ساییر ایسلام بؤیوكلری‌نین قبری اوستونده گونبذ و ضریح واریدی آما او زماندان بویانا وهابیلر ایسلام بؤیوكلری و ایماملارین قبیرلر و ضریحلرین تخریب ائله‌ماغینان موسلمانلاری او حضرتلرین زیارت فیضیندن محروم ائله‌دیلر. بو واقیعه‌ده تخریب اولان قبرلردن ایمام حسن موجتبی(ع), ایمام سجاد(ع),  ایمام محمد باقر(ع) و ایمام جعفر صادق(ع) قبری‌ایدی. وهابیلرین بو وحشیانه حركتی, ایسلام دونیاسینی مخصوصاً شیعه‌لری ناراحات ائله‌دی. شیعه ایماملاری قبرلری‌نین داغیلماسیندان علاوه, حضرت عبدالله, حضرت آمنه (پیغمبرین آتا و آناسی), مالك, پیغمبرین عمیسی عباس, مالكی, ایمام جعفر صادقین (ع) اوشاقلاریندان اسماعیل و . . .قبرلری ده تماماً تخریب اولدو.

	مسجیدالحرام؛ دونیا موسلمانلاری‌نین اوركلرینی بیرلشدیرن یئر
موسلمانلارین اعتیقادینا گؤره مسجیدالحرام موسلمانلارین اوركلرینی بیرلشدیرن اوچ مسجیددن بیریدیر. مسجیدالحرام مكه شهری‌نین اورتاسیندا و ابراهیم (ع) وادیسینده یئرلشیب كی سودان 277 متر اوجادیر. بو مسجید شیمالدان «مروه»‌یه, شرقدن «سعی»‌یه و غربدن «باب عمره‌«یه دایانیر. مسجیدالحرامین دوزلمه‌سی ابراهیم (ع) و اوغلو اسماعیل (ع) كعبه‌نی دوزلدندن سونرا, آللاهین امری ایله حجازا گلدیلر. ابراهیم (ع) بیرینجی شخص ایدی كی حرمین حدودونو حضرت جبرئیلین (ع) دلیللری‌ایله قرار وئردی و اوندان سونرا اسماعیل (ع) اونو ایدامه و توسعه وئردی. دئییلیر كی بو بینا حضرت آدمین (ع) الیله دوزلیب و سونرالار ابراهیم (ع) اونو احیاء ائدیب. قصی بن كلابین رهبرلیگی زمانی كی كعبه قریشین الینده‌ایدی, كعبه‌یه یاخین یئری حرم ائله‌دیلر و اونا احتیرام و موقدسلیك قاییل اولدولار. او حریمده اؤلدورمك حرام ساییلدی و مسجیدالحراما بیت عتیق، بیت الحرام، بیت المعمور، حرم، حرم مكی كیمی آدلار وئردیلر. مسجیدالحرامین توسعه و آبادانلیغی هیجرتین سككیزینجی ایلینده, مسجیدالحرامین مساحتی 1490 متر موربع اولدو كی پیغمبر اكرم (ص) و بیرینجی خلیفه دؤورونده دگیشمه‌دی. هیجرتین 17-جی ایلینده ایكینجی خلیفه مسجیدالحراما آلچاق دیوار ایشله‌دی و قاپی قویدو و اورانی چیراقلا ایشیقلاندیردی. او بیرینجی شخص ایدی كی مسجیدالحراما دیوار چكدی. هیجرتین 26-جی ایلینده اوچونجو خلیفه, مسجیدالحرامین اطرافیندا اولانلاری ییخیب یئرینه ائیوان تیكدیردی و دامین‌دا اؤرتدو. هیجرتین 65-جی ایلینده عبدالله بن زبیر, اونو شرق, جنوب و شیمال طرفدن توسعه وئردی. هیجرتین 75-جی ایلینده عبدالملك بن مروان اونون ووسعتینه بیر شئی آرتیرماسادا, اونون دیوارلاری و سقفینه بزك و تزئین آرتیردی و اورانین گؤزللیك و آبادانلیغینا آرتیردی و مسجیدالحرامدا هر ستونون بویوندا 50 میثقال قیزیل ایشلتدی. ولید بن عبدالملك هیجرتین 91-جی ایلینده شرق طرفدن اونو توسعه وئردی و آتاسی دوزلتدیكلرینی ییخیب تازادان دوزلتدی. او بیرینجی شخص ایدی كی مصردن و شامدان مرمر داش گتیریب, سقفینی تخته و ساجدان دوزلدیب و مسجیدین داخیلی دیوارلارین مرمر داشلا اؤرتدو. هیجرتین 137-جی ایلینده ابو جعفر منصور مسجیدین شیمال و غرب طرفینی توسعه وئردی و غرب طرفده میناره قویدو و رواق دوزلتماقلا و جور به جور بزكلرله اونون گؤزللیگین ایكی برابر ائله‌دی. عباسی و معتضد و سونرا سولطان سلیم زامانیندا مسجید ترمیم و ایصلاح اولدو, آما بو بزكلر 1069-جو ایلینه‌ قدر دگیشمه‌دن قالدی. هیجرتین 1375-جی ایلینده سعود بن عبدالعزیز زمانیندا «سعی» طرفینده اولان ائولرین ییخیلماسی‌ ایله توسعه تاپدی. او جنوبداكی بینالاری ییخدی كی مسجیدالحرامی توسعه وئرسین و اوندا اساسی دگیشیكلیلر وئردی. هیجرتین 1409-جو ایلینده ملك فهد بن عبدالعزیز, غرب طرفدن مسجیده ایضافه‌لشدیردی و اوندان سونرا برقی پیلّه‌ایله نئچه طبقه اونا ایضافه‌لشدی. عمومیّتده مسجیدین مساحتی 256 مین 850 متر اولدو كی بیر میلیوندان چوخ اینسان اوردا ناماز قیلا بیلسین. مسجیدالحرامین 25 قاپی‌سی وار, دؤرد طرفده ائیوانلارین آلتیندا اولان ستونلارین سایی 545 عدددیر كی ستونلاردا بیر هن بیر یوخ چیراق وار. مسجیدین بؤیوك حیاطی وار كی كعبه اونو وسطینده‌دیر. 4 میناره‌نین اولماسی اورانین گؤزللیگینه آرتیریب.

مولانانین شعرلری ایمام علی‌نین (ع) معنوی مقامینی ان گؤزل حالتده تصویره چكیب

مولانانین امیرالمؤمنین حقّینده دئدیگی شعرلر تاریخ بویوندا او حضرت حقّینده دئییلن شعرلرین ان گؤزلیدیر. ایمام علینی(ع) معنوی جهتدن تحلیل ائدن و او حضرتین ایلاهی شخصیتین  دوزگون تفسیر ائلیه‌ن مولانا اولوب كی بو ایشی ان گؤزل صورتده یئرینه یئتیریب. مولانا ایمام علی‌نین (ع) عمر بن عبدودله ساواشی‌نین جریانینی نقل ائله‌مكله او حضرتی ایلاهی عرشین قوشونا تشبیه ائله‌ییب كی ایلاهی عرشه قدر اوجالیب. آی, گئجه‌ده گئدنلری هیدایت ائدر, آییین دیلی اولسایدی ایتَنلری داها تئز هیدایت ائلردی, چونكی حضرت محمد (ص) گونش و حضرت علی (ع) ویلایت آییدیر. مولانا حضرتی آیا بنزه‌دیر كی اونون ویلایت ایشیقی هر یئری ایشیقلاندیریب و دیله گلسه, حقیقت یولونون موسافیرلرینی داها یاخشی هیدایت ائلر. چون تو بابی آن مدینه علم را/ چون شعاعی آفتاب حلم را* باز باش ای باب بر جویای باب/ تا رسد از تو قشور اندر لباب* باز باش ای باب رحمت تا ابد/ بارگاه ما له كفوا احد* مولانا «أنا مدینة العلم و علی بابها» نَبَوی حدیثینه ایشاره ائدیب, مولا علینی (ع) سخاوت و كرامت نمونه‌سی بیلیر. او مینلر نفرین ایشینی گؤرن صف‌سیندیراندیر. مولانانین اعتیقادینا گؤره ایمام (ع) بیر پهلواندیر كی نفسینه غالیب اولوب و اونون قیلینج وورماسی فقط حقّه خاطیردیر. مولانانین نظرینه گؤره مولا علی (ع) اؤز قاتیلین تانییر و اونا رحم ائلیر و هئچ واخت اونا غضبلنمیر. مولانانین باخیشیندا ایمام علی (ع) عدالت و حقّین كامیل مظهریدیر و او قدر شوجاعتی‌ایله بئله, صبر و دؤزوم مظهریدیر. هر حالدا مولانا بو موضوعنی ایكی‌یوز بئیتده قوشوب و هئچ كسین باره‌سینده بئله گؤزل شعر دئمه‌ییب و حقیقتاً ده حضرت علی‌نین (ع) معنوی مقامینی چوخ گؤزل تصویره چكیب.