حضرت معصومه‌نین (س) قم شهرینه سفری و ارتحالی
یازار : میرزه عبدالصمد ملکی | بؤلوم : دین
+0 به یه ن
حضرت معصومه‌نین (س) قم شهرینه سفری و ارتحالی
امام صادق (ع) بویوردو: «بو شهرده (قم شهرینده) منیم اوشاقلاریمدان بیر خانیم دنیادان گئده‌جك، اونون آدی فاطمه، موسی‌نین (ع) قیزیدیر كی اونون شفاعتی ایله منیم شیعه‌لریم جنّته گئده‌جكلر.
نه یاخشی كی او كرامتلی خانیمی اهل بیتین دیلی ایله تانیاق.
امام صادق (ع) بویوردو: «اللهین حرمی وار كی مكّه‌دن عبارتدیر. پیغمبرین (ص) حرمی وار كی مدینه‌دن عبارتدیر. امیرالمؤمنینین (ع) حرمی‌ده كوفه‌دیر . . . جنّتین سككیز قاپیسی وار كی اوچو قم شهریندندیر؛ بو شهرده بیزیم اوشاقلاردان بیر خانیم دنیادان گئدر، اونون آدی فاطمه، موسی‌نین (ع) قیزیدیر كی اونون شفاعتی ایله منیم شیعه‌لریم جنّته گئده‌جكلر. [1]
قم شهرینده امامزاده‌لرین چوخو دفن اولوب كی هر بیری‌نین یوخاری مقاملاری وار. آما اماملاریمیز (ع) فقط موسی بن جعفرین (ع) قیزی‌نین زیارتیندن دانیشیبلار. ائله بو مسأله بو كرامتلی خانیمین یوخاری معنوی مقامی‌نین علامتی ساییلیر.
او كرامتلی خانیمین شخصیّتی باره‌ده نئچه مسأله‌یه دقّت یئتیرمك لازمدیر:
1. قارداشی امام رضانین (ع) مروه مجبوری هجرتیندن سونرا، اونونلا گؤروشمك اوچون مروه طرف یوللانماسی. آما تاریخچیلرین یازدیغینا گؤره، بو سفر باشا چاتمادی و حضرت معصومه (س) ساوه شهرینده خسته‌لندی و قم شهرینه آپاریلماسینی امر بویوردو و ائله بو شهرده ده دنیادان گئتدی. [2]
او حضرتین بو اوزون مسیر و سفرین چتینلیكلرینه و مخصوصاً مأمون حكومتی طرفیندن اولان تهدیدلره رغماً مدینه‌دن مروه حركتی، بو كرامتلی خانیمین سیاسی و اجتماعی شخصیتیندن خبر وئریر.
2 . بو سفرده مریض اولاندان سونرا، و قارداشی امام رضایا (ع) چاتماقدان مأیوس اولاندان سونرا، قم شهری‌نین گله‌جكده‌كی فرهنگی موقعیّتینه گؤره بو شهره آپاریلماسینی امر بویورور كی صفالی حرمی اهل بیت (ع) عاشقلرین مأمنینه چئوریلسین.
بو تصمیم یعنی قم شهرینه گئتمك امری، او حضرتین فرهنگی باخیشا صاحب اولماقلاریندان خبر وئریر.
3. او حضرتین یاشاییشینی مطالعه ائله‌ینده، اونون مشهور لقبلریندن «محدثه»[3] اولدوغونو گؤروروك. او، طاهر اجدادیندان چوخلو روایت نقل ائدیب، هابئله حدیث عالملری‌نین بیر عدّه‌سی او حضرتدن حدیث نقل ائدیبلر. او جمله‌دن «مسلسل فواطم»ـه[4] مشهور اولان خبره اشاره ائدیریك كی او حضرت سندلر سلسله‌سینده وار:
بكر بن احمد قصری امام رضانین (ع) قیزی فاطمه‌دن، او دا امام كاظمین قیزلاری فاطمه (حضرت معصومه) و زینب و ام كلثومدن، و اونلاردا امام صادقین (ع) قیزی فاطمه‌دن روایت ائدیبلر و بو حدیثین سندی حضرت فاطمه زهرایا (س) چاتیر كی بویوردو: غدیر بایرامی گونو، رسول اللهین امرینی یاددان چیخاردیبسیز كی بویوردو: «من كنت مولاه فعلی مولاه».[5]
هابئله بو سلسله سندله آیری بیر روایت كی معراج حدیثینه مربوطدور. [6]
نتیجه‌ده:
1. اماملارین (ع) سؤزلریندن استفاده اولوندوغو كیمی، حضرت معصومه‌نین (س) یوخاری معنوی شخصیّتی وار.
2. او حضرتین یاشاییشیندان بللی اولدوغو كیمی، حضرت معصومه‌نین (س) سیاسی و فرهنگی شخصیّتی‌ده چوخ یوخاری ایدی.
منبعلر:
[1] . قمی، عباس، سفینة البحار، ج 2، ص 376.
[2] . قمی، عباس، همان، ص 376؛ حكیمی، محمد، حضرت معصومه و قم شهری ، معاصر، اسلامی تبلیغات دفتری‌نین انتشارات مركزی ، قم، ایكینجی چاپ، 1376، ص 41 ـ 40.
[3] . محمدحسون؛ ام علی مشكور، اعلام النساء المومنات، اسوه انتشاراتی ، بیرینجی چاپ، 1411 هـ . ق، ص 577.
[4] . قمی، عباس، همان، شیع و فطم سؤزلری.
[5] . شافعی، شمس الدین محمد، اسنی المطالب، مكتبه الامام امیرالمؤمنین، اصفهان، ص 50.
[6] . مجلسی، محمدباقر، بحارالانوار، داراحیاء التراث العربی، بیروت، ج 65، ص 76، ح 136.
امام رضانین (ع) دیلیندن پیغمبرین (ص) توصیفی
یازار : میرزه عبدالصمد ملکی | بؤلوم : دین
+0 به یه ن
امام رضانین (ع) دیلیندن پیغمبرین (ص) توصیفی
قرآن كریم دفعه‌لرله پیغمبردن آد آپاریب و اونو عظیم اخلاق صاحبی، رئوف و رحیم، حسنه اسوه و . . . آدلاندیریب. ائمه ده (ع) پیغمبریمیزین خصوصیّتلری باره‌ده دَیَرلی سؤزلر دئییبلر. او جمله‌دن امام علی بن موسی الرضا(ع) پیغمبرین شخصیتی و او حضرته احترام قویماغین واجبلیگی باره‌ده بویوربلار: «اذا سمیتم الولد محمداً فاكرموه و اسعوا له فی المجالس و لا تقبحوا له وجهاً؛ بیر اوشاغین آدینی محمد قویدوغوزدا، اونو عزیزله‌یین و مجلسلرده اونا یئر وئرین و اونونلا قباحتلی اوز به اوز اولمایین». (1)
او حضرت آیری یئرده بو باره‌ده بویوربلار: «ما مِن مائدةَ وُضِعَتْ فَقَعَدَ عَلَیها مَن اسمه محمّدٌ أو أحمدُ إلاّ قُدِّس ذلكَ المنزِلُ فی كُلِّ یَومٍ مَرَّتَین؛ احمد و یا محمد آدیندا اونون باشیندا اولمایان هئچ سفره آچیلماز، مگر او ائو گونده ایكی دفعه تقدیس اولار».(2)
امام رضا (ع) هابئله محمد آدی‌نین عظمتی و بركتی باره‌ده بویوروب: «لا یَدْخُلُ الفَقْرُ بَیْتاً فِیه اسمُ محمّدٍ أو أحمد أو علیٍّ أو الحسنِ أو الحسینِ أو جَعْفَرَ أو طالب أو عبداللهِ أو فاطمة مِنَ النساء؛ بو آدلار اولان ائوه یوخسوللوق داخل اولماز: محمد، احمد، علی، حسن، حسین، جعفر، طالب، عبدالله، و خانیملاردان فاطمه».(3)
امام رضا(ع) پیغمبرین (ص) و اونون اهل بیتی‌نین (ع) مقامی باره‌ده او حضرتین دیلی ایله بئله یویورور: «قال رسول الله صلی الله علیه و آله: یا علی، خلق الناس من شجر شتی، و خلقت أنا و أنت من شجرة واحدة، أنا أصلها، و أنت فرعها و الحسن و الحسین أغصانها... فمن تعلق بغصن من أغصانها أدخله الله الجنة..؛ رسول الله (ص) بویوردو: ای علی! جماعت مختلف آغاجلاردان یارانیبلار آما من ایله سن بیر آغاجدان یارانمیشیق. من او آغاجین ریشه‌سی، سن گؤوده‌سی، حسن و حسین اونون بوداقلاری و سئونلریمیز اونون یارپاقلاریدیلار. هر كس او آغاجین بوداقلاریندان بیرینه ال آتا، الله تعالا اونو جنتّه داخل ائلر». (4)
امام رضا (ع) آیری بیر روایتده پیغمبره نئجه صلوات گؤندرمك باره‌ده بویوربلار. ابن اَبى‌نَصْر دئییر: امام رضانین (ع) محضرینه عرض ائله‌دیم: نمازدان سونرا رسول الله-ا نئجه صلوات گؤرندرمك لازمدیر؟ جوابدا بویوردو كی دئیَرسن: «اَلسَّلامُ عَلَیْكَ یا رَسُولَ اللّهِ وَرَحْمةُ اللّهِ وَبَرَكاتُهُ اَلسَّلامُ عَلَیْكَ یا مُحَمَّدَبْنَ عَبْدِاللّه اَلسَّلامُ عَلَیْكَ یا خِیَرَةَاللّهِ اَلسَّلامُ عَلَیْكَ یاحَبیبَ اللّهِ اَلسَّلامُ عَلَیْكَ یا صِفْوَةَ اللّهِ اَلسَّلامُ عَلَیْكَ یا اَمینَ اللّهِ اَشْهَدُ اَنَّكَ رَسُولُ اللّهِ وَاَشْهَدُ اَنَّكَ مُحمَّدُ بْنُ عَبْدِ اللّهِ وَاَشْهَدُ اَنَّكَ قَدْ نَصَحْتَ لاِمَّتِكَ وَجاهَدْتَ فى سَبیلِ رَبِّكِ وَعَبَدْتَهُ حَتّى اَتاكَ الْیَقینُ فَجَزاكَاللّهُ یا رَسُولَ اللّهِ اَفْضَلَ ما جَزى نَبِیّاً عَنْ اُمَّتِهِ اَللّهُمَّ صَلِّ عَلى مَحَمِّدٍ و آلِ مُحَمِّدٍ اَفْضَلَ ما صَلَّیْتَ عَلى اِبْراهِیمَ وَ آلِ اِبْراهیمَ اِنَّكَ حَمیدٌ مَجیدٌ.
سنه سلام اولسون ای رسول الله و الله-ین رحمت و بركتلری. سنه سلام اولسون ای عبدالله اوغلو محمد. سنه سلام اولسون ای اللهین سئچیلمیشی. سنه سلام اولسون ای اللهین حبیبی. سنه سلام اولسون ای اللهین سئچیلمیشی. سنه سلام اولسون ای اللهین امینی. شاهد گئچیرم كی سن اللهین گؤندرمیشی‌سن و شاهد گئچیرم كی سن عبدالله اوغلو محمدسن و شاهد گئچیرم كی سن اؤز امّتین اوچون خیرخواه ایدین و الله یولوندا جهاد ائله‌ییب یقین (اؤلوم) سنه گلینجه اونو عبادت ائله‌دین. ای رسول الله، الله سنه اجر وئرسین، امتی طرفیندن پیغمبرلرینه وئریلن اَن یاخشی اجر. الله‌یم! محمد و اونون اهلینه، ابراهیم و اهلینه گؤندردیگین اَن یاخشی سلامدان گؤندر. البته كی سن حمید و مجیدسن».(5)
هایئله امام رضا (ع) بویوروب: «اِنّا اَهلُ بَیْتٍ نَرى وَعدَنا عَلَینا دَینا كَما صَنَعَ رَسولُ اللّهِ صلى الله علیه و آله؛ بیز اهل بیت وئردیگیمیز وعده‌لری اؤزوموز اوچون بورج و دین حسابلاریق، رسول اللهین ائله‌دیغی كیمی».(6)
هابئله امام رضا (ع) رسول اكرمین (ص) امامت و ولایت مقامی‌نین وصفینده بویوروب: «امامت، ابراهیم نسلینده قالیردی و بیر-بیر نسلدن نسله اونو ارث آپاریردیلار. اسلام پیغمبری (ص) اونو ارث آپاراندا الله تعالا بویوردو: «انّ اولی الناس بابراهیم للذین اتبعوه و هذا النبی والذین آمنوا والله ولی المؤمنین؛ البته ابراهیمه اَن یاخین اولان انسانلار، اونو تبعیّت ائدنلر و [هابئله] بو پیغمبر و ایمان گتیرنلر و الله، مؤمنلرین ولیسیدیلر». و بو امامت رسول الله-ا مخصوص ایدی كی اللهین امری ایله حضرت علی‌نین (ع) عهده‌سینه قویولدو سونرا او دسته، حضرت علی‌نین (ع) نسلیندن سئچیلدی و الله تعالا اونلارا علم و ایمان وئریب. . . بو امامت قیامت گونونه قدر علی‌نین (ع) اوشاقلاریندا قالاجاق.(7)
امام رضا (ع)، رسول الله باره‌سینده بویوربلار: «إن رسول الله(ص) یوم القیامة آخذ بحجزه تعالى ونحن آخذون بحجزه نبینا وشیعتنا آخذون بحجزتنا ثم قال: والحجزة النور وقال فی حدیث اخر: معنى الحجزة: الدین؛ قیامت گونو رسول الله (ص)، اللهین اتگیندن توتار، بیز ده پیغمبریمیزین اتگینه و بیزیم شیعه‌لریمیز ده بیزیم اتگیمیزه ال آتارلار». سونرا بویوردو: «اتكدن منظور ایشیقدیر». و آیری حدیثده بویوردولار: «اتكدن منظور دیندیر».(8)
امام رضا (ع) بیر آیری روایتده پیغمبریمیزین (ص) اخلاقی خصوصیتلری باره‌ده آتالاریندان و امام حسن مجتبی‌دن (ع) بئله نقل بویورور: «كانَ رَسولُ اللّه صلى الله علیه و آله فَخْما مُفَخَّما... یَتَـكَلَّمُ بِجَوامِعِ الكَلِمِ فَصْلاً لا فُضولَ فیهِ و لا تَقصیرَ. دمثا، لَیْسَ بِالجافى و لا بِالْمَهینِ تَعظُمُ عِنْدَهُ النِّعْمَةُ و اِنْ دَقَّت لا یَذُمُّ مِنها شَیئا غَیْرَ اَنَّهُ كانَ لا یَذُمُّ ذَواقا و لا یَمدَحُهُ و لا تُغضِبُهُ الدُّنْیا و ما كانَ لَها، فَاِذا تُعوطىَ الحَقّ لَم یَعْرِفهُ اَحَدٌ، و لَم یَقُمْ لِغَضَبِهِ شَى ءٌ حَتّى یَنتَصِرَ لَهُ...؛ رسول الله (ص) عظمتلی ایدی . . . آرتیق-اسكیكسیز جامع سؤزلر دانیشاردی. مهربان ایدی، هئچ كسه ظلم ائله‌ییب هئچ كسی تحقیر ائله‌مزدی. نعمتی آز دا اولسایدی عظمتلی سایاردی و اونو مذمّت ائله‌مزدی. یئمگین دادینی نه تعریفلردی و نه پیسلردی. دنیا و اونا مربوط اولانلار اونو غضبلندیرمزدی. حق ضایع اولان زمان، اونو حاكم ائلیه‌نه قدر هئچ زاد اونون غضبین سویوتمازدی و هئچ كسی تانیمازدی».(9)
__________________________________________________
1 ـ عیون اخبار الرضا،ج2، ص 16، ح 29
2 ـ صحیفة الرضا(ع)، ص88، ح20؛ عیون أخبار الرضا(ع)، ج2، ص29، ح31
3 ـ فروع كافی، ج6، ص19، ح18
4 ـ عیون أخبار الرضا(ع)، ج2، ص134، ح324
5 ـ مفاتیح الجنان، اسوه نشریّاتی ، قم، ص 56
6 ـ تحف العقول، ص 446
7 ـ عیون اخبار الرضا ج 1 ص 217 و 218
8 ـ عیون اخبار الرضا ج 1 ص 254 ح 20
9 ـ عیون اخبار الرضا، ج 2، ص 635،ح 1
پیغمبرین ولادت یئری
یازار : میرزه عبدالصمد ملکی | بؤلوم : دین
+0 به یه ن
پیغمبرین ولادت یئری
پیغمبریمیزین (ص) ولادت مكانی، ابی طالب شعبی‌نین اوّلینده‌دیر و ایندیلیكده میلاد مكانیندان مسعی‌یا قدر داش دؤشنیب.
رسول الله مدینه‌یه كؤچنده بو ائوی ابوطالب اوغو عقیلین اختیاریندا قویدو و اوندان سونرا اونون اوشاقلاری و نوه‌لری‌نین اختیاریندا اولدو. سونرالار هارونون آروادی خیزران اورانی آلدی.
مسلمانلار بو یئری عزیزلردیلر و مخصوصاً پیغمبریمیزین (ص) ولادت گئجه‌سی اوردا مراسیم قوراردیلار. سعودیلر ایش اوستونه گلنده، بونا تای یئرلرین ییخیلماسی ایله عین زماندا، مولد النبی ده خرابلاندی.
مكه‌نین او زمانكی شهرداری‌نین ایستگی ایله قرار اولدو همان مكاندا كتابخانا دوزلسین كی بو گون همان كتابخانا «مكتبة مكة المكرمه» آدی ایله فعالیّتده‌دیر.
حضرت محمد (ص) غرب عالملری نظرینده
یازار : میرزه عبدالصمد ملکی | بؤلوم : دین
+0 به یه ن
ربیع الاولین اون یئددینجی گونو، رحمت پیغمبری حضرت محمد (ص) و جعفری مذهبی‌نین مؤسسی امام جعفر صادقین (ع) ولادت بایرامی بوتون انسانلارا مبارك اولسون
حضرت محمد (ص) انسان حیاتی‌نین تاریخی بویو، مسیر تعیین ائله‌ین بیر شخصیّتدیر. بیری دوشونجه و منطق اهلی اولسا بو مسأله‌نین كناریندان اعتناسیز ردّ اولا بیلمز.
بو یازیدا حضرت محمدی (ص) نه بیر مسلمان گؤزو ایله یوخ بلكه غیر مسلمان عالملرین گؤزو ایله نظاره ائلیه‌جه‌ییك.
میخائیل. ه .هارت، Michael.H.Hart، (1932.م)، آمریكالی معاصر محقق «یوز» آدیندا كتابیندا تاریخ بویو یوز تأثیرلی انسانین آدینی یازاندا حضرت محمدی لیستی‌نین باشیندا یئر وئریب دئییر:
« محمدی تأثیرلی شخصیّتلر لیستی‌نین باشیندا یازماغیم بیر عدّه‌نی متعجب ائلیه بیلر آما او دین و دنیادا فوق العاده موفق اولان تكجه كیشی ایدی».[1]
توماس كارلایل،Thomas Carlayle، (1881-1795.م)، مشهور اسكاتلندلی تاریخچی، اؤز «قهرمان و قهرمان پرستلیك» (Hero And Hero worship) كتابیندا حضرت محمد (ص) باره‌ده بئله یازیر:
« غربین بو كیشی باره‌ده اولان معناسیز تعصبلردن قایناقلانان یالانلاری و تهمتلری، فقط بیزیم خفّتیمیزه سبب اولور.»
او آیری یئرده بئله یازیر:
«بو چؤل اوغلو، درین اورگی و نفوذلو قره گؤزلری و وسیع اجتماعی روحی ایله جاه طلبلیقدان سونرا بوتون فكرلری اؤزونده ییغمیشدی. نه قدر بؤیوك و آرام روح! او، عشق شورو و حرارتدن ساوایی آیری زادلا ایشی اولمایانلارداندیر. او كسلردندیر كی طبیعت اونلاری مخلص و صمیمی ائله‌ییب. آیریلاری اؤزلرینی شعارلار و بدعتلر یولوندا ایتیردیگی زماندا، بو كیشی اؤزونو او شعارلارا بورویوب محصور ائلیه بیلمیردی. وارلیغین بؤیوك رمزی اؤز جلال و جبروتی ایله اونون نظرینده پارلاییردی. هئچ بدعت و قارانلیق، وصف اولونماز حقیقتی اوندان گیزلده بیلمزدی و همان حقیقت نداسی ایدی كی دئییردی: «من وارام». ائله بیر كیشی‌نین سؤزو طبیعتین قلبیندن اولان مستقیم سسدیر. جماعت اونا قولاق آسمالیدیلار، ائله سسه قولاق آسماسالار هئچ سسه اعتماد ائله‌مك اولماز. چونكی هر شئی اونون قاباغیندا، یئل كیمیدیر».[2]
كارن آرمسترانگ ، Karen Armstrong، (م.۱۹۴۴ -)، 7 ایل بویو راهبه اولموش انگلیسلی یازیچی و محقق، اسلام پیغمبری زندگانلیغی باره‌ده یازدیغی كتابیندا بئله یازیر:
«بیز محمده تاریخین بؤیوك چهره‌لرینه باخدیغیمیز گؤزده باخساق، چوخ راحت اونون بشر تاریخی‌نین لاپ بؤیوك نابغه‌سینی اولماغینا ایناناجاییق. بو اینام اونون قرآن گتیرمه‌سی، بؤیوك دین یاراتماسی و یا اونون نظامی فتحلرینه گؤره یوخ بلكه اونون خاص شرایطده بؤیومه‌سی، مقاومت ائله‌مه‌سی و موفق اولماسینا گؤره بیزده یارانار».
«بیز عصرلر بویو محمددن خشن بیر چهره، رحمسیز ساواشچی و خودبین سیاستچی یاراتماق ایسته‌میشیك. بیر حالدا كی او چوخ احساسلی و مهربان كیشیدی. اونون مهربانلیغی او قدر ایدی كی حیوانلاری اینجیتمكدن بئله چكینردی».[3]
گوستاو لوبون، Gustave Le Bon ، (1931-1841.م)، فرانسه‌لی شرق شناس، «عرب مدنیّتی» كتابیندا محمد و اونون دینینی تحلیل ائدیب یازیر:
«پیغمبرین اَن بؤیوك معجزه‌سی اؤلمه‌میشدن اوّل داغینیق عرب قافله‌سینی بیر یئره ییغیب واحد بیر ملّت تشكیل وئرمه‌سی ایدی. ائله بیر ملّت كی هامیسی بیر دین قاباغیندا خاضع و بیر رهبره مطیع اولدولار».
سونرا یازیر: «انسانلارین دَیَرنی یاخشی ایشلری و اثرلری ایله اؤلچمك ایسته‌سك، محمد تاریخین اَن بؤیوك انسانی اولار».
او محمدین دینی‌نین اعتقادلاری باره‌ده یازیر:
«توحیدی فقط اسلام دینی دنیایه گتیردیگی اوچون بو باره‌ده اؤزونه اؤیونه بیلر».
او ادامه‌ده یازیر: «اسلامین تایسیز راحتلیگی، خالص توحید اساسیندادیر و اسلامین ترقّی رمزی ائله اونون آسان و راحت اولماغیندادیر. بونا گؤره اسلامی تانیماق چوخ راحتدیر. اسلام، سالم عقلین قبول ائله‌مه‌دیگی مطلبلردن اوزاقدیر آما آیری دینلرده اوجور زادلارا چوخ راستلانماق اولور. یعنی آیری دینلرده گؤرونن تناقضلر و بوروشوقلوقلار، اسلامدا یوخدور. هرنه دوشونسز اسلامین بو دئدیگیندن داها ساده اولا بیلمز كی: «الله بیردیر؛ انسانلار هامیسی الله قارشیسیندا برابردیلر؛ نئچه دینی واجباتی یئرینه گتیرمكله انسان جنّته چاتار و اونلاردان اوز چئویرمكله جهنّمه گئدر». هر هانسی طبقه‌دن اولان هر مسلمانا راست گلسز بوتون اسلام اصل‌لرینی و اونا واجب اولانلاری بیلیر و نئچه قیسا و ساده جمله فورموندا دئیه بیلر».[4]
لورا واكسیا واگلیری، Loura Vaccia Vaglieri ، (1989-1893.م)، ایتالیانین ناپل دانشگاهی‌نین اوستادی پیغمبریمیز باره‌ده یازدیغی رساله‌ده بئله دئییر: « عرب پیغمبر، الله-ی ایله رابطه تأثیرینده اوندا یارانان وحی سسی ایله، خرافات و جادوپرستلره و فسادا اوز قویموش مسیحیت و یهودیت دینلرین تابعلرینه اَن پاك و خالص وحدانیّتی ارائه وئردی».
«او آشكار اولاراق، سایر وارلیقلاری یارادانا شریك ائلیه‌ن بشرین ارتجاعی تمایلاتی و كهنه پرستلیك رغبتلری‌نین قاباغیندا دایاندی».
«بوتون تواضع ایله خودبینلیك و غرور سدّینی سیندیرماغا قیام ائله‌دی. محمد، الله دینی‌نین مبلغی كیمی اؤز شخصی دشمنلرینه مهربان و رحیم ایدی. اونون ذاتیندا ، انسان فكرینه محترم اولان، ایكی رحم و عدالت صفتلری قاریشمیشدی».[5]
آنه ماری شیمل، Anne marie Schimmel، (2003-1922.م)، آلمانلی شرق شناس «الله رسولو محمد» كتابیندا یازیر: «روانشناسلار و دین فئنومولوگلاری اسلام واسطه‌سی ایله اونلارین اختیاریندا قویولان پیغمبره عاشقانه اخلاص نمونه‌سینی گؤره‌جكلر. هامیسی بیله‌جكلر كی محمدین شخصیتی قرآن كنارنیدا، مسلمانلارین یاشاییشی‌نین مركزینده‌دیر. پیغمبر ابدیّته قدر اونون پیغمبرلیگینه اینانانلارا حسنه اسوه كیمی قالاجاق».[6]
[1]میخاییل.ه.هارت " تاریخین یوز تأثیرلی شخصیّتی " كتابیندا، صفحه 33، نیویورك ، 1978
M.H. Hart, THE 100: A RANKING OF THE MOST INFLUENTIAL PERSONS IN HISTORY, New York, 1978, p.33..
[2] THOMAS CARLYLE’S COLLECTEF WORKS,LIBRARY EDITION, IN THIRTY VOLUME, Vol. XII, Heros AND HERO_WORSHIP, London, Chapman and Hall,1869.p.53,64,65.
[3] محمد: اسلام پیغمبری‌نین یاشاییشی، ص 38و 201، كارن آرمسترانگ، كیانوش حشمتی‌نین ترجمه‌سی، حكمت نشریاتی.
[4] اسلام و عرب مدنیّتی ، ص 128، 129،141، 142، گوستاو لوبون، سید هاشم رسولی محلاتی‌نین ترجمه‌سی (هاشمی)، كتابچی نشریاتی.
[5] اسلامین سرعتلی ترقیسی ، ص338،332و337، لورا واكسیا واگلیری، «محمد و قرانین محضرینه تقصیر عذری» كتابی‌نین ضمیمه‌سی، جان دیون پورت، سید غلامرضا سعیدی‌نین ترجمه‌سی، اطلاعات نشریاتی.
[6] الله رسولی محمد، یازیچی‌نین مقدمه‌سی ص 7، آنه ماری شیمل، حسن لاهوتی‌نین ترجمه‌سی، علمی فرهنگی نشریاتی.
سؤال جواب: سلام حاج آغا «معوذتین»ین نه آنلامی وار؟
یازار : میرزه عبدالصمد ملکی | بؤلوم : دین
+0 به یه ن
سؤال جواب: سلام حاج آغا «معوذتین»ین نه آنلامی وار؟
سؤال جواب:سلام حاج آغا «معوذتین»ین نه آنلامی وار؟
جواب: معوذتین ایكی فلق و ناس سوره‌لرینه دئییلیر. اونلارین بو آدا آدلانماقلاری‌ین سببی هر ایكیسی‌نین‌ده «قل اعوذ» ایله باشلانماسیدیر.
بیر روایت حضرت محمددن (ص) نقل اولوب كی اوردا بویورور: «انزلت علی آیات لم ینزل مثلهن :المعوذتان» منه ائله آیه‌لر نازل اولوب كی اونلارا تای نازل اولماییب. اونلار معوذتین‌دیلر.