دین خادیمی din xadimi

+0 به یه ن

دین خادیمی وئبلاگیندا دین و موختلیف موضوعلاردا ال یازیلاریم و عرب دیلیندن چئویردیگیم یازیلار اولاجاق.

علامه جعفری نین دانیشیقلار

حقی مصلحته قوربان وئرمك اولماز

+0 به یه ن


بحارالانوار كیتابیندا بیر تاریخی ریوایت وار كی مضمونو بئله‌دیر: جماعت حضرت علی (ع) ایله بئیعت ائدن زامان اونلارا خبر وئردیلر كی معاویه بئیعت ائله‌میر مگر بو كی علی‌ابن‌ابیطالب ده عثمان كیمی اونو شام حیكومتینه منصوب ائده.

دئییرلر بو واخت «مغیره» گلدی حضرتین حضورونا و پیشنهاد ائله‌دی كی: «مصلحت بئله‌دی كی سن‌ده خیلافت ایشلری یولا دوشوب موستقر اولانا قدر, اونو شامین حیكومتینه منصوب ائلیه‌سن و سونرا ایسته‌سن اونو عزل ائلیه‌سن.» حضرت جواب وئردی: «سن منیم عؤمرومو او گونه‌دك ضمانت ائلیرسن كی من او زاماناقدر دیری قالام؟» مغیره جواب وئردی: «یوخ»

ایمام (ع) بویوردو: «من هئچ‌واخت قارانلیق گئجه‌ده ایكی نفر موسلمانا حیكومت ائله‌مگین جوابینی آللاها وئره‌بیلمه‌رم» و كهف سوره‌سی‌نین 51-جی آیه‌سینی شاهید گتیردیلر كی « وَ ما كُنْتُ مُتَّخِذَ الْمُضِلِّینَ عَضُدا؛ من هئچ‌واخت گومراهلاری اؤزومه قول(كؤمك) گؤتورمه‌رم.»

حضرت زینبین واقعی مزاری هاردادیر؟

+0 به یه ن

اقوال سه‌گانه درباره مزار حضرت زینب


حضرت زینبین (س) مزاری‌ باره‌ده اوچ نظر

حضرت زینبین(س) مزاری باره‌ده اوچ نظر «مدینه»، «قاهره» و «دمشق» وار, آما بو اوچ نظرین هانسی‌سی بنی هاشم عقیله‌سی‌نین مزاری باره‌ده دوزدور؟

حضرت زینب كبری سلام الله علیهانین یئری باره‌ده موختلیف ریوایتلر و نظرلر دئییرلر كی هر گروه بعضی دلیل‌لرله اؤز ایدّعالارینی ثابیت ائدیرلر. بعضیلری او حضرتین قبرین دمشق‌ده, بیر عیدّه قاهره‌ده و آیریلاری مدینه‌ده بیلیرلر. چالیشدیق بو نظریه‌لرین دوز و یا سهو اولماسینی آراشدیراق.

قاهره


بعضی نظرلرده اوخوروق كی حضرت زینب(س) بنی امیه دستگاهی علئیهینه ائتدیگی آچیقلامالارا گؤره, مجبور قالدی مدینه‌دن مصره گئتسین. اوردا ساكین اولوب و نهایتاً اوردا دونیاسین دگیشیب. ایندی قاهره ده «سیده زینب» موجلل و عظمتلی زیارتگاهدیر. (حضرت فاطمه(س) و قیزی‌نین یاشاییشی. هاشم رسولی محلاتی)

نسابه عبیدلى «اخبار الزینبات‏» كیتابیندا ائله ریوایتلر نقل ائلیر كی اونلارین مضمونونا گؤره گرك حضرت زینب (س) مصرده قویلانمیش اولا. آما بیز بو ریوایتلره سند و مؤحتوا باخیمدان اعتماد ائلیه‌بیلمیریك, نییه كی«مرقد العقیله زینب (س)» كیتابی‌نین یازانی محمد حسنین سابقى بو حدیثلره ایشكال وارید ائله‌ییب و دئییر كی بو راویلارین چوخو كی عبیدلی بو ریوایتلری اونلاردان نقل ائدیب, مجهولدولار و ریجال و تراجوم و نسب كیتابلاریندا اونلاردان بیر اثر یوخدور. بو بیر حالدادیر كی بو ریوایتلرین اؤزلری‌ده ایشكالسیز دئییل‌لر.

بعضیلری دئییرلر: قاهره‌ده قویلانان زینب, زینب بنت ‏یحیى المتوج بن الحسن الانور بن زید بن حسن بن على بن ابیطالب‌دیر, آما اوردان كی اینسان نئچه نفرین آراسیندا موشترك بیر آدی ائشیدنده اونلارین ان مشهورو ذهنه گلر, جماعتین چوخو بئله بیلیبلر كی بو همان مشهور زینب یعنی على بن ابیطالبین (ع) قیزیدیر. حال بو كی بو گومان اساس‌سیزدیر. البته اشخاصی اؤز بؤیوك جدّلرینه نیسبت وئرمك معمولدور, نئجه كی بیزیم ایماملاریمیزا پیغمبرین اؤولادی دئییلر. بونا گؤره  زینب بنت ‏یحیى‌نی, زینب بنت على علیهما السلام اوخوسالار, هئچ ایشكالی یوخدور.

مدینه

بعضی ریوایتلرده گلیب كی حضرت زینب(س) مدینه‌یه گلیب و ایل یاریم بویو آغلاماق و عزادارلیغا مشغول اولوب و نهایتده همان شهرده وفات ائدیب و قویلانیب و ایندی او مؤحترم خانیمین قبریندن اثر قالماییب. بو نظری علامه سید محسن امین دئییر و آیری نظرلردن اعتیبارلیدیر.

گرچه حضرت زینبین (س) مدینه (بقیع)ده قویلانماسی كامیلاً طبیعی و مومكون نظره گلیر, چون قارداشی ایمام حسنین(ع) و بنی هاشمین بیر چوخ بؤیوكلری بو قبریستاندا قویلانیبلار. آما بوكی حضرت زینبین(س) او عظمت و شخصیتی‌اینن قبری موشخص اولماسین سوآل یئری وار. بیر حالداكی مدینه شهری و قبریستانلاری باره‌ده یازیلان كیتابلاردا او حضرتین قبریندن آد گلمه‌ییب. بونونلا بئله كی  «ام البنین‏» كیمی خانیملارین آدلاری كی بو قبریستاندا قویلانیبلار«وفاء الوفاء» كیمی كیتابلاردا یازیلیب.

 

دمشق

بعضیلری‌ده دئییرلر: حضرت زینب (س) مدینه‌یه وارید اولوب مجلیسلر و محفیل‌لرده یزدیلرین جینایتلرین آچیقلایاییردی. مدینه‌نین فرمانداری ماجرانی یزیده یازیر و یزید اونا دستور وئریر زینبی _مكه و مدینه‌دن سووای_ هر هانسی شهره ایسته‌سه یوللاسینلار. حضرت زینب(س) شاما گئدیر و بیر مودّت سونرا اوردا دونیاسین دگیشیر. رحمتلیك شیخ عباس قمی اؤز اوستادی رحمتلیك محدث نوری و آیریلاریندان نقل ائله‌مكله شام احتیمالینی داها گوجلو بیلیر. حسنین سابقى «مرقد عقیله زینب» كیتابیندا یازیر كی حضرت زینبین (س) قبری دمشقین یاخینلیغیندا زینبیه‌ده‌دیر.

بو نظرین طرفدارلاری اؤز دلیل‌لرین بئله بیان ائلیرلر: مدینه‌ده قیتلیق و یوخسوللوق اولدو, عبدالله جعفر تصمیم توتدو خانیمیسی حضرت زینبله (س) شاما –كی اوردا اكین یئری واریدی- كؤچسون, شاما سفر ائلیه‌ندن سونرا حضرت زینب(س) دونیاسین دگیشدی.

شاید بو نظریه‌ده بو مسأله‌نین مطرح ائله‌مه‌سی دوشونمه‌لی اولا چون كی هئچ تاریخی كیتابدا دمشقده بئله‌ اكین یئریندن بیر سؤز گلمه‌ییب و آیری طرفدن عبدالله ائله الی آچیق آدامیدی كی اونون الینده مال اموال تاب گتیرمزدی, پس نئجه ایمكانی وار كی بئله بیر كندی و مزرعه‌سی اولسون؟

سؤزون خولاصه‌سی بو كی مصر احتیمالی‌نین ایشكالی چوخدور, مدینه احتیمالی دلیل‌سیزدیر و نهایتده دمشق احتیمالی نظره داها دوز گلیر. گرچی یئنه یقینی صورتده دئمك اولماز كی حضرت زینبین(س) قبری هاردادیر. آما بونا دیقت یئتیرمكله كی اهل بیت خانیدانینا منسوب اولان زیارتگاه بو شریفه آیه‌نین میصداقیدیر«فِی بُیُوتٍ أَذِنَ اللَّهُ أَن تُرْفَعَ وَیُذْكَرَ فِیهَا اسْمُهُ», بیر ده اهل بیتین (ع) دفن اولان یئری هر هارا اولسا, یاد و خاطیره‌لری دیریدیر و عاشیق جماعتین سینه‌لرینده یئرلری وار.

آذربایجان دیلینه دینی ترجومه

+0 به یه ن

din.jpeg


بو مقاله نی دینی ترجومه چیلره موناسیب گؤردوم و دوستلارین ایستیفاده سی اوچون بوردا درج ائتدیم.

یازار ووصال محمدوو

بیلدیگیمیز كیمی، ترجومه حدسیز مسئولیت، باجاریق طلب ائدن ساحه‌لردن بیریدیر. ایلكین متنین اورژینال‌لیغی‌نین ساخلانیلماسی ترجومه‌نین اساس شرط‌لرین‌دن‌دیر. بو پرینسیپه عمل ائدن ترجمه‌چی بیر چوخ پروبلئملرله قارشیلاشا بیلر.

بونلارین عؤهده‌سیندن گلمك اوچون موترجیمدن حدسیز بیلیك، قابلیت و سئمانتیك چالارلیغی وئره بیلمه اوستا‌لیغی طلب اولونور. دونیانین فرق‌لی-فرقلی یئرلرینده یاشایان خالقلارین بو موختلف‌لیگین منطیقی نتیجه‌سی كیمی اؤزلرینه مخصوص دیللری واردیر. دیللرین بیر-بیریندن فرقلنمه‌سی اؤز نؤوبه‌سینده عینی حادیثه و اشیا‌لارا دیل پریزماسیندان موختلف اصول‌لارلا یاناشیلماسینا سبب اولور. سؤز احتیاطی باخیمیندان زنگین دیللرده عینی اشیا و حادیثه‌لر داخیلی سئمانتیك چالارلیقلارینا گؤره بیردن چوخ مادی ایفاده‌یه مالیك‌دیرلر. لئكسیكونو باخیمدان كاسیب دیللر ایسه یا بو اشیا و حادیثه‌لری بیر سؤزله ایفاده ائدیر، یا دا اؤزونده بیر مادی ایفاده تاپا بیلمه‌یرك دیگر دیللردن سؤز آلیر.

آذربایجان دیلی‌ده مونومیللی دیل دئییلدیر. بو دیلین لئكسیكونونون خیلی حیصه‌سینی عرب سؤزلری تشكیل ائدیر. عرب دیلیندن ترجومه زامانی بو عامیلین بؤیوك رولو واردیر. آنجاق بیر شئیی قید ائدك كی، عرب دیلیندن آلینان سؤزلرین بیر چوخو دیلیمیزه كئچدیكدن سونرا اؤز حقیقی معناسینی ایتیره‌رك علاوه، فرقلی معنا كسب ائتمیشدیر. مثلاً، موناقشه، موباحثه، موذاكره، اینقیلاب، رحمت، جماعت، قصد، ریقابت، اینكشاف و س . سؤزلرده اولدوغو كیمی. آذربایجان دیلینی دریندن بیلمه‌ین موترجیملر ترجومه زامانی بو باخیمدان بعضی یانلیشلیقلارا یول وئریرلر.

بیلدیگیمیز كیمی، كومونیزمین سوقوطوندان سونرا اؤلكه‌میزده اینسان‌لارین دینه ماراغی آرتمیش، دینی ساحه‌ده ترجومه‌لر ائدیلمه‌یه باشلانیلمیش‌دیر. دینی ادبیاتین سوركلی ترجومه‌سینه رغماً، ترجومه‌لرین دیلی‌نین آغیرلیغی، مؤوجود پسیخولوگیایا، آتمسفره موناسیب اولمایان فاكت و متن‌لرین ترجومه‌سی، آذربایجان قارشیلیغی‌نین اولماسینا باخمایا‌راق بیر چوخ سؤز و ایفاده‌لرین اولدوغو كیمی ساخلانیلماسی، پیغمبرین (ص)، صحابه‌لرین قارشی‌سیندا یازیلان «آللاهین سلام و خئییر- دوعاسی (صلواتی اونا اولسون، «آللاه اوندان راضی اولسون!» ایفاده‌لری‌نین یئرینه عرب حرف‌لری ایله یازیلمیش فورما‌لارا اوستونلوك وئریلمه‌سی، قارشیلیغی آذربایجان دیلینده اولمایان دینی تئرمینلرین آهنگ قانونو باخیمیندان دیلیمیزه مناسیب اولمایان شكیلده ایشلدیلمه‌سی، و س. كیمی حال‌لار دا ایستثنا دئییل‌دیر.

توركیه‌ده چاپ اولونموش دینی ادبیاتین ترجومه‌سی زامانی‌دا بو پروبلئملر اؤزونو گؤستریر. سون واختلار قارشیلیغی تورك دیلینده اولمایان بیر چوخ عرب سؤزلری‌نین آذربایجان دیلینده قارشیلیغی‌نین اولماسینا باخمایا‌راق، دیلیمیزه تطبیق ائدیلمه‌سی گئنیش وسعت كسب ائدیب. مثلاً، اینفاق، آبدست، سوجود، ایشراك و س.

یوخاریدا قید ائتدیگیمیز بوتون بو حاللار سون نتیجه‌ده دیلیمیزین ساده‌لیگینه خلل گتیریر، اونو لزومسوز ایفاده و تركیبلرله «یوكله ییر»، ساده جماعت اوچون آنلاشیلماز حالا سالیر. بوتون بونلاری نظره آلا‌راق، ترجومه زامانی باشقا دیللردن یئنی سؤزلرین آلینماسیندا آشاغیداكی شرط‌لره عمل ائتمه‌یی ضروری حساب ائدیریك:

1- باشقا دیللردن سؤزآلما او زامان مومكون حساب ائدیلیر كی، یا آذربایجان دیلینده اونون بیرباشا قارشیلیغی یوخدور، یا اونون تصویری یوللا اوپتیمال، لاكونیك ایفاده‌سینه راست گلینمیر، یاخود دا حرفی یوللا ترجومه ائدیلمیش قارشیلیغی بو معنادا همتایینی تاماملامیر. مثلا، حدیث، سونّت، آذان، ایقامه، تیمّوم و س. سؤزلرده اولدوغو كیمی.

2- باشقا دیللردن آلینمیش سؤزلر دیلیمیزین آهنگ قانونونا اویغونلاشدیریلما‌لیدیر. آنجاق بیر شئیی قید ائدك كی، بو زامان موقدس‌لیك مفهومونو اؤزونده اختفا ائدن آدلارین جدی تحریفلره معروض قالماسینا یول وئرمك اولماز. مثلا، موتقّی muttəqi دئییل  müttəqi  سؤزو داها موناسیبدیر و س.

3- اخذ ائدیلمیش یئنی سؤزون قارشیسیندا اوخوجولارا ایلكین تانیشلیق مقصدیله و آیدین اولسون دئیه مؤعتریضه ایچریسینده سؤزون یا اوغورلو قارشیلیغینی، یا تصویری یوللا ترجومه‌سینی، یا دا معنا‌لارینی قید ائتمك لازیم‌دیر. مثلا، مفسر (قورآن كریمی شرح، تفسیر ائدن عالیم)، تقوا («آللاهدان قورخما»، «روحا و نفسه نظارت»، «آللاها یاخینلاشما» و «نفسی تمیزلمه» ) روحاً، داخیلاً صافلاشما، ایمانجا كامیللشمه، معنوی تربییه( كیمی معنا‌لاری اؤزونده بیرلشدیرن گئنیش معنا‌لی تئرمین)، تؤوحید («آللاهین تكلیگینی بیلدیرمك، اعتراف ائتمك» و«اوندان باشقا هئچ بیر تانری‌نین اولمادیغینی قبول ائتمك» كیمی معنا‌لاری اؤزونده بیرلشدیرن دینی تئرمین)، ایخلاص (هر بیر ایشین یالنیز الله اوچون گؤرولمه‌سی و بیر عملین صمیمیت و صیدق-اوركدن گؤرولمه‌سی معنا‌لارینا گلن دینی اصطیلاح )، طلاق (بوشاما)، كوبه (اودا بنزر موسیقی آلتی) و س سؤزلرده اولدوغو كیمی.

ائدیلمیش ترجومه‌لرده بعضی سؤزلرین دیلیمیزه یاد معنا‌لاردا ایشلدیلمه‌سینی نظره آلا‌راق، بیر نئچه میثالا مراجعت ائتمك ایسته‌ییریك:

مثلاً، هدف و ایختلاف سؤزلرینین آذربایجان دیلینه ترجومه‌سینده جیدی یانلیشلیقلارا یول وئریلیر. ایشیمیزه هدف سؤزو ایله باشلاییریق. بو سؤز عرب دیلیندن ترجومه‌ده مقصد، غایه، هدف كیمی ترجومه اولونور. دیلیمیزده ایسه بو سؤزون اساس قارشیلیغی «مقصد» سؤزودور. ترجومه‌لرده «ایسلامین هدفلری»، «اوروجون هدفی»، «موسلمانین هدفلری» كیمی ایفاده‌لره راست گلیریك. طبیعی كی، بو سهو‌دیر. بو، اصلینده بئله اولما‌لی ایدی: «اسلامین مرامی»، «اوروج توتمادا مقصد»، «موسلمانین مقصدی». چونكی، دیلیمیزده هدف سؤزو نشان معناسیندا ایشلندیكده جمعده ایشلنیر. مثلاً، «قارشیداكی هدفلری وور» جومله‌سینده اولدوغو كیمی. بیر سؤزله، «هدف» سؤزو عرب دیلینده اینسانین مرامی، مقصدی، ایسته‌یی معنا‌لاریندا ایشلنسه‌ده دیلیمیزده اساساً «مقصد، غایه، مرام » كیمی ایشلنمه‌لی‌دیر. بو زامان سؤزوگئده‌نین جمعده دئییل، تكده ایشلنیلمه‌سینه دقت یئتیریلمه‌لی‌دیر.

ایختلاف سؤزونه گلینجه، بو عرب دیلیندن ترجومه‌ده «فرقلی اولماق، فرقلنمك، موختلف اولماق» كیمی لوغوی معنا‌لاری اؤزونده بیرلشدیرن كلمه اولوب، دینی تئرمین باخیمیندان «بیر مسأله‌ده فرقلی گؤروشه، فیكره، رأیه مالیك اولما، دوشونجه طرزینده فرقلنمه» كیمی ایشله‌نیر . آذربایجان دیلینده ایسه بو سؤز اساساً «كانفلیكت، موناقیشه» معنا‌لارینی وئریر. لاكین، سون واختلار بو سؤز دینی ترجومه‌لرده اولدوغو كیمی ایشلنمه‌یه باشلانیلمیش‌دیر. مثلاً، «عالیملر بو مسأله‌ده ایختلافدادیرلار»، « مسح باره‌سینده عالیم‌لر آراسیندا ایختلاف واردیر» و س. فیكریمیزجه، بو سؤزون بوجور ایشلنمه‌سی دوغرودور و اونون دینی تئرمین‌لر سیراسینا عایید ائتمك منطقیدیر.

سوندا بیر شئی قید ائتمك ایسته‌ییریك كی، حال-حاضیردا جمعیتیمیزده دینی تئرمینولوگیانین ایشلنیب حاضرلانماسینا بؤیوك احتیاج واردیر. آللهین كؤمگیله.

آللاهین سلامی، لوطفو و بركتی اوزرینیزدن اسكیك اولماسین

ووصال محمدوو!

سنت آگوستین و آللاهین ابدی و ازلی اولماغی

+0 به یه ن

توجه آگوستین به زمان برای رمزگشایی از ازلی و ابدی بودن خداست


مسیحی فیلسوف و موتألّیه سنت آگوستینین زامان حقّینده كی دوشنوجه‌سیندن عصرلر سووشور آما اونون زاماندان تلقّی‌سی باره‌ده یئنه‌ده موختلیف نظرلر وئریلیر.

آگوستین یارانیش مذهبی نظریه‌سینه توتولان ایرادین توضیحینده یئنه‌ده زامان مسأله‌سینه یئتیشیر.

ایراد بئله‌دیر: آللاه یئر و گؤیو یارالتمامیش نه ائدیردی؟ اگر ساكین ایدی؛ نیه او حالدا قالمادی؟ اگر یارالتماق ایراده‌سی تازا بیر ایراده‌ایدی؛ بو حالدا آیا یئنه ازلی اولماقدان سؤز دانیشماق اولار كی اوندا بیر ایراده تاپیلدی كی قاباقجادان یوخیدی؟

آما اگر ایراده ازلی‌دیر, نیه یارانیش ازلی دئییلدیر؟ آگوستین جواب وئریر كی زامان قئیدینده اولان موجودات اوچون آللاهین ازلیّتینی درك ائتمك ایمكانسیزدیر او زامانادك كی اؤزلرینی تغییر و دگیشمكدن قورتارماییبلار. اصلاً یئر و گؤیون یارانیشیندان قاباق «زامان» یوخیدی كی سوروشولسون آللاه او حالدا نه ائدیردی.

موقدس كیتابدا دئییلیر كی جهنّمی یارالدیردی, آما بو او كسلره جواب ساییلیر كی بو مؤعضلی راحاتلیقلا حل ائلیه بیلمیرلر. یارانیش و دونیانین تاریخی بیر درین شعرین تدریجاً تشریح اولماسی و آشكار اولماسیدیر؛ بیر شعر كی اونداكی هر كلمه كولّی معنادا شریك اولماقلا یاناشی اؤز تكلیگینده كامیل و خاص معناسی وار.

ائله بیل بیر شعردیر كی بوتون كلمه‌لری بیرلیكده و بیر یئرده ذهنده حاضیر اولور. پس بوتون عصرلر آللاهین قاباغیندا آچیقدیر و آللاهین علمی بیزیم علم‌میزدن داها اسرار انگیزدیر و داها آرتیق گوجو و احاطه‌سی وار. بو آرادا مسیح بشر و آللاه آراسیندا واسیطه‌دیر, او كی كلمه‌نین تجلّیسی‌ایدی و حقیقتده بشرین اولما زامانی و آللاهین ابدیّتی آراسیندا رابیطدیر. او كلمه كی آتانین حیات باغیشلایان و ازلی دوشونجه‌سیدیر. آیری سؤزله, كلمه, آتانین اؤزونو تانیماقدان عیبارتدیر و دقیق معنادا كلمه آتانین اوزو و تماماً اونا اوخشاردیر.

كلمه كاملاً موطلق وارلیغا اوخشور و هر وارلیغین و مومكونون نمونه‌‌سیدیر. كلمه موجوداتین بوتون معقول اولگولرینی اؤزونده داشیر؛ یا آیری سؤزله كلمه اؤزو اونلارین هامیسیدیر. بو ازلی معقول اولگولر و یا همان نمونه‌لر, ایلاهی موثول آدلانیرلار. كلمه‌ دونیانین ایشیغی و گؤزل‌لیك و خیردین منبعیدیر. آما آگوستین كئچمیش و گله‌جكده‌كی زامان آراسیندا مونقطیع اولوب و روحو تیكه پارچا اولوب. دگیشمه‌لر دونیاسیندا اولماغین بو نتیجه‌لری‌ده وار و اوندان قیریلماغین و حیات وئرن ابدیّتده ساكین اولماغین تكجه یولو آللاهدیر.

آگوستین بونا خاطیر زامانین ماهیّتینه دوشونوردو كی, اونون سیرّینی آچماقلا آللاهین ازلی و ابدی اولماق معناسیندان باش چیخارتسین. و بیر یول آختاریر كی ابدیّته دویونله‌نسین. او آللاه كی بیزیم حافیظه‌میزده وار و بیز ایچه‌ری‌یه دیقّت یئتیرسك اونا بیر یول تاپاریق. حافیظه روحون ایچه‌ری‌یه دؤنمه‌سی‌نین نوماینده‌سیدیر, تا دونیا لذّتلریندن اوز چئویرن –كی حواس یولو ایله اله گلیر- خیر و ابدیّتی اؤز ایچینده آختارسین.

گؤروروك كی آگوستینین ایستیدلالی افلاطونون ضیافت ریساله‌سینده كی ایستیدلالا بنزیر, كی نئجه اینسان محسوس عالمدن داییمی خیره یول تاپسین. افلاطون دونیایی عشقدن باشلاییب و آددیم-آددیم حقیقی عشقه و نهایتده موطلق علمه آددیم قویور.

بیز داخیلی صورتده دئیتالارین اِعمالینی یوكسلده بیله‌ریك. آگوستینین دوشونجه‌سی اساسیندا بو مسأله‌یه یاناشساق, ایتّیفاقلارین گئدیش زامانی قیسسا اولمالیدیر. آما بئله نظره گلیر كی زامان ذهنی بیر قالیبدیر كی ایتّیفاقلار اونون قابینا تؤكولور. پس بیزیم معاریفیمیزین یولوندان داها چوخ تصویر كئچسه, ثابیت و موشخص قابا تؤكولنده ایتّیفاقلارین سورعتی آزالار, آما زامان داها اوزون اولار.

بوگونون سینما كامئرالاری موشخص زاماندا داها چوخ قابلاردا عكس سالا بیلرلر, آما اونلارین متحرّیك حالتده پخش زامانی, تصویرلر آهیسته گؤروشرلر و اونون سیپری اولما واختی اوزونلاشار. بیزیم ذهنیمیز آگوستینین دئدیگی كیمی مثلاً اوّلده بیر شعرین هامیسینی ذهنده حاضیرلیر و سونرا سسلندیریر.

سسلندیرمه زامانی سكوت یارانسا یئنه همان واخت كئچه‌جك, آما سسلندیرمه زامانی اوزاناجاق. ایندی فرض ائله‌یین بیز گئدیب-گلن تصویرلرین آراسیندا بوش قابلار یئرلشدیرك, آما بو تَوالی صیرفاً عاریفلیگه باغلی دئییل و گاهدان بیزیم عاریفلیك گوجوموزدن ائشیكده‌دیر.

دئمك اولار كی یوخاریداكی فرضلره گؤره آگوستینین نظری‌نین خیلافینا زامانین موشخص جوهریّتی وار. آگوستینین نظرینده بیزیم ذهنیمیز خاطیره‌لری خطله‌‌ییب ابدی امره قووشا بیلر آما زامانین جوهریّت فرضی بو گوجو بیزدن آلیر. بیز زامان داخیلینده بیر وارلیقیق و آگوستینین نظریه‌سی كی دئییر اوندان قوپماق اولار, دقیق ایستیدلالی یوخدور و نظری بیر آتلاماغا بنزیر.