تفسیرده صیرفاً ریوایتلره دیقّت ائله‌مك, بیزی قورآنی معاریفین بیر بؤلوموندن محروم ائلر
یازار : میرزه عبدالصمد ملکی | بؤلوم : دین
+0 به یه ن
 |
||
|
معصوم ایماملار (ع) زمانیندا گئنیش رابیطه یوخیدی و وارید اولان ریوایتلر فرقلی آنلاقلی اولان موختلیف افرادین جوابیندا مطرح اولوردو؛ بونا گؤره قورآنین تفسیرینده فقط ریوایتلره دیقّت ائله‌مك محدود ائدیجیدیر و بیزی قورآنی معاریفین بیر بؤلوموندن محروم ائلر. معصوم ایماملاردان (ع) گلن بعضی ریوایتلرین ظاهیرده قورآنلار تعاروضی وار آما دیقّت یئتیرمه‌لی نوكته بوراسیدیر كی ریوایتلر قورآنی بیان ائدیرلر. بیز بیر جور باخساق كی ذهنیمیزین هامیسی ریوایتلرله مشغول اولا و قورآنین اؤزونه آنلاشیلا بیلمه‌ین بیر كلام كیمی باخاق و تكجه ریوایتلرله اونو آنلاماغا چالیشاق, بو مسأله قاباغا گلر كی موتعاریض و موتناقیض ریوایتلر وار. بو تعاروضون پیغمبر (ص) بویوردوغو كیمی حل یولو بودور كی بیزدن بیر سؤز ائشیتسیز كی قورآنلا تعاروضو اولا, اونو دیوارا چیرپین. پس بللی اولور كی قورآن اؤزو ده بیان ائدیجیدیر و هیدایت كیتابی كیمی آنلانا بیلندیر. بو اسادا قورآندان چوخلو مؤحكمات آنلاماق اولار و اونون سایه‌سینده, قورآنین ظاهیری و یا نصی‌ایله آشكار تعاروضو اولان ریوایتلری طرد ائلیه بیلریك. پس نتیجه بو اولور كی قورآنلار ریوایتلر آراسیندا بیر تعاومول و دیالكتیك قورمالی‌ییق, یعنی بیر گؤزوموز ریوایتلرده اولسون و بیر گؤزوموز ده قورآنین اؤزونده و بئله اولاندا ریوایتلر چوخ آیدینلادان اولارلار. شاید سونّتی و موتعارف عاغیللا باخاندا, قورآنین آیه‌لرینده معصوملارین (ع) ریوایتلریله موتعاریض معنالار اله گله و یا بالعكس. بو تعاروضلر اینسانلارین آنلاییش سطحی و زمان بسترینده طبیعی مسأله‌دیر. قورآن كریم نساء سوره‌سی‌نین 82-جی آیه‌سینده بویورور: «أَفَلاَ یَتَدَبَّرُونَ الْقُرْآنَ وَلَوْ كَانَ مِنْ عِندِ غَیْرِ اللّهِ لَوَجَدُواْ فِیهِ اخْتِلاَفًا كَثِیرًا؛ آیا قورانین [معنالاریندا] دوشونمورلر؟ و اگر آللاهدان غیریسندن اولسایدی, حتماً اوندان چوخلو ایختیلاف تاپاردیلار» بو اساسدا موختلیف زمانلاردا موختلیف آنلاییش سطحینده اولان اینسانلارین, فرقلی اولماسی طبیعی مسأله‌دیر. رحمتلیك علامه طباطبایی مؤحكم, موتشابه و تأویل بحثی‌نین آخیرینده «تفسیر بِرأی» باره‌سینده بیر بحثی وار. اوردا ریوایتلردن نتیجه آلیر كی «تفسیر بِرأی» بو معنایادیر كی بیز اؤز آنلاییش سطحیمیزی قورآنا تحمیل ائدك؛ یعنی آللاهین قورآنی نازیل ائله‌مكدن هدفی بو ایدی كی بیزیم ذهنیمیزی اوشاقلار كیمی آددیم آددیم تعالا باغیشلایا. البته آللاه قورآنی نازیل ائله‌مكله اؤز كلامینی, بیز بیله‌جك قدر آشاغی یئندیریب, آما اونون هدفی بیزیم آددیم آددیم تعالا تاپماغیمیزدیر و بو اوشاق اؤز آنلاییش سطحینده دونوب قالسا یوخاری قالخا بیلمیه‌جك و شاید ده چوخلو معاریفی اینكار ائده. بونا گؤره بیز ذهنیمیزی یوخاری چكمه‌لی‌ییك. |
||
اؤلندن سونرا وادی‌السلام قبریستانیندا گؤروشریك
یازار : میرزه عبدالصمد ملکی | بؤلوم : دین
+0 به یه ن
|
||
|
وادی‌السلام قبریستانی بقیع و ابوطالب قبریستانیندان سونرا دونیا موسلمانلاری‌نین اَن موهوم قبریستانیدیر. ریوایتده گلیب كی مؤمینلرین روحلاری اؤلندن سونرا اورا مونتقیل اولار و دسته-دسته بو قبریستاندا بیر-بیرلریله دانیشار. وادی‌السلام قبریستانی بقیع و ابوطالب قبریستانیندان سونرا دونیا موسلمانلاری‌نین اَن موهوم قبریستانیدیر و خاص موقدّسلیگی واردیر. اورا بیر یئردیر كی ریوایتلره گؤره مؤمینلرین روحلاری اؤلندن سونرا اورا اینتیقال تاپار و اوردا دسته-دسته بیر-بیریله دانیشار و بؤیوك قیامته‌جن اوردا قالار. بو قبریستان جنوبدان ایمام علی‌نین (ع) موطهر حرمینه و نجف-كوفه‌نین اصلی خیابانینا (شارع علی بن ابیطالب), شرقدن نجف – كربلا جادّه‌سینه, شیمالدان حی المهندسین منطقه‌سینه و غربدن سابیق نجف دریاسینا دایانیر. ایمام صادق (ع) بو قبریستانلیق باره‌ده بویوروب: هر مؤمین كی غربده و شرقده دونیادان گئدیر, آللاه اونون روحونو وادی‌السلاما مونتقیل ائدیر. دئیه‌سن گؤرورم مؤمین اینسانلار دسته-دسته بیر-بیرینین یانیندا اوتوروب دانیشیرلار. بؤیوك پیغمبرلرین پاك مزاری بو قبریستانلیقدا بللی‌دیر. ایمكانی وار آیری پیغمبرلر ده اوردا اولسونلار آما حضرت هود و حضرت صالح پیغمبرین مزاری قبریستانین اوّلینده گونبذ آلتیندا بالاجا بیر اوتاغین وسطینده یئرلشیب. بحارالانواردا گلیب كی حضرت نوح و ابراهیمین (ع) و حدوداً 370 پیغمبرین قبرلری ایمام علی‌نین (ع) مزاری كناریندا یئرلشیب. |
||
دین اینسانین سعادت یولودور
یازار : میرزه عبدالصمد ملکی | بؤلوم : دین
+0 به یه ن
|
||
|
علمین سولطه‌سی و اوندان اله گلن نتیجه‌لر گؤرستدی كی علمه ایفراطی تأكید ائله‌مكله اینسانین سعادتینه یئتیشمك اولماز. كئچمیش زمانلارا مخصوصاً اؤز عصرمیزه باخیش سالساق گؤره‌ریك كی دین اینسانین معریفت منبعی كیمی قیراغا قویولوب. قاباقلار دیندن ایستیخراج اولان اصوللارین چوخو آیری منبعلردن آلیندی و عاغیللا مونافاتی اولان اصول قیراغا قویولدو. چوخلو دینه باغلی اولان ایناملار او جومله‌دن دونیانین یارانما باره‌ده اولان ایناملار علمله سوآل آلتینا گئتدی. اعتبارلی اولان تكجه علمی یوللاری ایدی. ائله بو اساسدایدی كی تكامول, خیلقت و یارانمانین یئرین توتدو و اونو اعتیبارسیز ائله‌دی و علمی شواهید وارلیغین یارانماسی‌نین منبعی باره‌ده دینی باخیشلاری ایشتیباه حسابلادی. آما علمه ایفراطی صورتده تأكید ائله‌مگین نتیجه‌لری‌ده بللی اولدو. بو دوران ائلیه بیلمه‌دی دینی اینام و اعتیقادلاری آرادان آپارسین. علمین سولطه‌سی و اوندان اله گلن نتیجه‌لر گؤرستدی كی علمه ایفراطی تأكید ائله‌مكله اینسانین سعادتینه یئتیشمك اولماز. دوز یول بودور كی هر ایكی موضوعیا دیقّت اولسون و اونلاردان ایستیفاده ائدیلسین. |
||
«خیلافتین مشروعیت بؤحرانی» مأمونون ایمام رضانی(ع) ولیعهد ائتمه‌سی‌نین اصلی عامیلی
یازار : میرزه عبدالصمد ملکی | بؤلوم : دین
+0 به یه ن
|
||
|
مأمونون ایمام رضانی(ع) ولیعهد ائتمه‌سی‌نین عامیلی اونون شیعه گیراییشیندن یوخ بلكه مؤتزیله اولماسینا گؤره ایدی كی اونو مشروعیت بؤحرانینا دوچار ائله‌میشدی و دئیه‌سن بو بؤحران ایمام رضانین (ع) شهادتیندن سونرا حل اولور. ویلایت عهدلیگین مأمون طرفیندن ایمام رضایا (ع) وئریلمه‌سی‌نین سببلری باره‌ده اوچ فرضیه مطرح ائدیبلر: بیرینجی بو كی مأمون جیدی سیاسی انگیزه‌ایله صحنه‌یه گلمیشدی و علوی‌لرین شوریشلری كیمی بیر پارا موشكوللرین حلی اوچون بو ایشه ال وورموشدو. ایكینجی فرضیه كی چوخ آز عیده‌نین طرفیندن مطرح اولور بودور كی مأمون بو مسأله‌ده جیدی سیاسی انگیزه‌سی یوخیدی, بلكه اونون شیعی تعلوقاتی واریدی و ایمام رضایا (ع) علاقه‌سی اولدوغو اوچون بو ایشه ال وورموشدو. اوچونجو فرضیه بودور كی مأمون چوخ شیدّتلی حالدا مؤعتزیله دوشونجه‌سینه اعتیقادی واریدی و بونا گؤره خیلافتی‌نین مشروعیتینده بؤحران واریدی. ایمام رضا (ع) زمانیندا اوچ فیكری-سیاسی جریان واریدی. بیرینجی جریان شیعه ایمامتی ایدی كی «دینی دوشونجه«یه دایانیردی و بو جریان پیغمبر (ص) زمانی جوجَریب سقیفه جریانیندا اصولی قورولدو و ایمام علی‌نین (ع) قیسا خیلافتی عهدینده ایدئولوژی صاحیبی اولدو و حسینی عاشورادا موستقیل هویّت تاپدی و بو زماندا ایمام رضا (ع) بو جریانین نوماینده‌لیگینی ائدیردی. ایكینجی جریان «سونّتلره دایانماق» دوشونجه‌سی ایدی كی ایمامتی ایجتیماعی بیر ایش بیلیردی و سونّت اهلی بو دوشونجه‌نی تابعیت ائدیردیلر. اوچونجو فیكری جریان «عقله دایانان» مؤعتزیله جریانیدی كی نه شیعه‌ایله و نه اهل سونّتله موافیق ایدی و ایمامتی, اینسانی عقله تابع بیلیردی و بئله اینانیردی كی ایمام, اینسان عقلی و اخلاق, سیاسی و ایجتیماعی معیارلار اساسیندا سئچیلمه‌لیدیر. ایمام رضانین (ع) عصرینده بو اوچ جریانین داعواسیندا مأمون اؤز خیالیندا چالیشیردی ان یاخشیسینی سئچسین. او مؤعتزیله دوشونجه‌سینه گیراییش تاپیب و جیدّی صورتده بؤحرانا دوشموشدو و بو بؤحران, مشروعیت بؤحرانی‌ایدی و شاید او اؤز-اؤزونه فیكیرلشیردی كی آیا ایمام رضا(ع) كیمی شخصین اولماسی‌ایله یئنه او ایمامت ایدعاسی ائده بیلر یا یوخ؟ ایمام رضانین(ع) شهادتیندن سونرا بو بؤحران حل اولور و مأمون اعتیزالدان ال چكیر و معتصمی اؤزونون یئرینه سئچیر. مأمون نه شیعه ایدی و اهل سونّتین ایناملارین قبول ائدیردی و خیلافت اوچون هئچ شرط-شروط قاییل دئییلدی. مأمون مؤعتزیله‌لرین عقل محور اینامیله چالیشیردی مشروع بیر حكومت تشكیل وئرسین كی باشارا بیلمه‌دی. |
||
آیت الله علامه محمد تقی جعفری + مجموعه سخنرانی
یازار : میرزه عبدالصمد ملکی | بؤلوم : دین
+0 به یه ن
|
|
||
|
آیت الله علامه محمد تقی جعفری اوستاد علامه محمد تقی جعفری(ره) نین یاشاییشیندان خولاصه
اوستاد علامه محمد تقی جعفری(ره) 1304-جو ایلده تبریزده دونیایا گؤز آچدی و تبریز، تهران، قوم و نجف اشرف شهرلرینده ایسلامی علملرین عالی تحصیلاتیندان سونرا بؤیوك عالیملرین محضرینده او جومله دن آیات عظام، میرزا فتاح شهیدی، شیخ محمدرضا تنكابنی، شیخ كاظم شیرازی، سید عبدالهادی شیرازی، سید ابوالقاسم خویی و سید محسن حكیم كیمی بؤیوكلردن فئیض آپاردی. ایندیه كیمی اوستادین اثرلریندن 80 اثر چاپ اولونوب و اونلارین بعضیسی نین چاپی مثنوی شرحی كیمی كی 15 جیلدده نئچه دفعه تجدید چاپ اولوب. هابئله اونلارین نیظارتی آلتیندا 12 ایل بویوندا مولانا مثنویسی نین كشف الآیاتی 4 جیلدده «دریادان دریایا» عونوانیندا یایلیبدیر. اوستادین گؤركملی اثرلریندن نهج البلاغه شرح و تفسیریدیر كی 27 جیلدده چاپ اولوب. اوستاد جعفری نین آیری نفیس اثری مولانانین دوشونجه لری، شرق و غرب جهانبینی و فلسفه لری نن موقاییسه سی زمینه سینده دیر كی «مولانا و جهانبینی لر» عونوانیندا چاپ اولوب. اینسان حاقلاری و اونون ایسلامدا اولان اینسان حاقلاری نن موقاییسه سینده، موفصّل و شرحلی كیتاب اوستادین قلمی اینن مونتشیر اولوب كی اونون تازا نظرلری ایسلامی كونفرانسدا مطرح و ایستیفاده اولوب. بو كیتاب اینگیلیسی دیلینه ترجومه و چاپ اولوب و ژاپونی دیلینه ده ناكویا دانیشگاهین اوستادلاری نین بیرینین الیله ترجومه اولماقدادیر. اوستاددان 60 دان آرتیق كیتابیدا هله چاپ اولماییب و گله جاقدا چاپ اولاجاق. كی بو ترتیب اینن چاپ اولمامیش اثرلری 150 عونوان اولور. اوستادین كیتابلاری بو زمینه لرده دیلر: فیقه ، سیاسی علملر ، روانشیناسی، تربیتی علملر ، ایسلامی معاریف، ایسلامدا هونر و گؤزللیك نظریه سی، فلسفی و كلامی بحثلر كی دولودور تازا و بدیع نظریه لری نن. دونیانین باشا باشیندان اونلارجا اوستاد و دوشونجه صاحیبلری اوستاد جعفری نن علمی موذاكره لری واریدی كی بو دانیشیقلارین 50دن چوخو 2 جیلد كیتابدا «دوشونجه لر تكاپوسو» آدیندا یاییلیب. علامه جعفری نین دانیشیقلارین بو لینكلردن دانلود ائده بیلرسیز: علامه جعفری نین تورك دیلینده دانیشیغی 41 مگابایت اینسانین گؤزللیگی و روحانی شخصیتی موختلیف زمینه لرده دانیشیقلار 1 260 مگابایت 2 250 مگابایت 3 240 مگا بایت 4 265 مگابایت 5 113 مگابایت 6 131 مگابایت | ||