din xadimi دین خادمی

	بهشتی آختارانلار و جهندمدن قاچانلار
ایمام علی (ع) نهج‌البلاغه‌ده بویوروبلار: دونیانین اوزو گئتمكده‌دیر و ویداع آهنگینی چالیر و آخیرتین اوزو گلمكده‌دیر. بیلین كی بویون آتلاری حاضیرلاماق گونودور و صاباح موسابیقه گونو. كیم قاباغا دوشرسه بهشت اونوندور, و هر كیم دالی‌یا قالیرسا, اونون یئری اود اولاجاق. كیمسه یوخدور كی اؤلومو چاتمامیش اؤز خطاسیندان توبه ائده؟ كیمسه یوخدور كی بدبختلیكدن قاباق اؤزونه بیر ایش گؤره؟ بیلین كی سیز عؤمور گونلرینده اومیدلر و آرزولاردا بوغولورسوز, بیر حالدا كی اؤلوم سیزین آرخازدا كمین قوروب. هر كس بو گونلر و اؤلوموندن قاباق اؤزونه بیر ایش گؤره, عملی اونا فایدا وئره‌جك و اؤلومو اونا ضرر وورمایاجاق و هر كس كی بو گونلر كمكارلیق ائده و اؤزو اوچون بیر ایش گؤرمیه, عملی‌نین فایداسی اولماییب اؤلومو ضرر ووراجاق. وحشت و قورخو گونونده اولدوغو كیمی امنیّتده و آساییشده ده آللاه ایشینه قوشولون. بیلین كی من بهشته تای بیر شئی گؤرمه‌میشم كی اونو آختاران غفلت یوخوسوندا یاتسین و جهنم كیمی بیر شئی گؤرمه‌میشم كی اوندان قاچان, قاچماق و اؤزونو قورتارماق یئرینه راحات یوخویا گئتمیش اولسون. بیلین كی هر كس اؤز حقّیندن فایدا آپارمایا, باطیل اونا ضرر یئتیرر و كیمسه كی هیدایتله دوز یولا گئتمیه, ضلالت اونو اؤلدورر. بیلین كی سفر یوكونو باغلامالیسیز و سیزه دئییبلر كی سفر یوكوز نه‌دیر و هاردادیر! سیز اوچون ایكی شئیدن قورخورام: بیر نفسین ایستكلری‌نین دالیسیجان گئتمك و او بیری باشدا اوزون آرزولار بئجرمكدیر. بو دونیادا, ائله بو دونیادان توشه گؤتورون كی صاباح او بیری دونیادا اؤزوزو موجازاتدان قورتاراسیز.

موسلمانلارین ایسلاما گؤره درین گیراییشلری و غربین چالیشماسی

موسلمانلارین ایسلاما گیراییشلری, مودئرنیته‌نین تأثیری آلتیندا قالمادی و بیر حالدا كی غرب اؤلكه‌لری‌نین چوخوندا كلیسالار باغلانیر, همن اؤلكه‌لرده چوخلو موسلمان ناماز جومعه‌ده حاضیر اولورلار و دیقّته لاییق معنویّتی نوماییشه قویورلار. غربلی‌لرین ایسلاما گؤره منفی باخیشلاری‌نین تاریخی, اونلارین ایسلاملا جیدّی صورتده اوزلشماقلاری گونلره قاییدیر. بو اوزلشماق ایكینجی عصرده و او گونون ایسپانیاسیندا باش وئردی و اونلارین ذهنینده ناقیص و ایشتیباه بیر تصویر یاراتدی. نظره گلیر كی یهودیلر و مسیحیلرین, دوز معلوماتلاری اولمایان چوخ گوجلو آیری بیر دینله اوزلشماقلاری, ایسلام ظهوری‌نین ایجتیماعی و سیاسی ویجهه‌سی‌نین جیدّی اولماسیندا موهوم رول اوینور؛ كی البته قورآنین بویوردوغونا گؤره بو مسأله‌ده یهودیلر داها آرتیق خصومت و دوشمن‌چیلیك نیشان وئردیلر. طبعاً تانیشلیغین اولماماسی و اوندان علاوه اؤزونو یوخاریدا و اوستون گؤرمك بئله بیر دوشونجه یاراتدی كی مسیحیّتدن یوخاری معنویّت و دوشونجه اولا بیلمز. ائله بونا گؤره اونلار بئله دوشونورلر كی ایسلام غیر موستقیل بیر دین و فقط مسیحیتین نامربوط و بدل نوسخه‌سیدیر. ایسلامدان قورخو كی اونون جذابیّتی و منطیقی قارشیسیندا, بیر جور خباثته آلوده اولموشدو باعیث اولدو پیغمبرین (ص) زوجه‌لری‌نین چوخلوغو كیمی بعضی خصوصیّتلرینی بهانه ائدیب و بو زاویه‌دن اهانتله قاریشیق اینتیقادا ال وورالار. كارن آرمسترانگین muhammad a biography of the prophet آدیندا بیر كیتابی وار كی مسیحیّتین ایسلاملا ایلك اوزلشمه‌سی و او زمان پیغبره(ص) ائتدیكلری توهینلر باره‌ده بیر گوزاریشدیر. غالیبی موسلمانلار اولان صلیبی جنگلرده, ایسلام و مسیحیّتین سیاسی اوزلشمه‌لرینده, كلیسا اربابی موسلمانلارا نیفرتین چوخالماسی یولوندا چالیشمالاری, اوروپانین عثمانلی ایمپراتورلوغو طرفیندن اوزون مودّت تهدیدی (ائله كی بیر مقطعده ایمكانی واریدی اوروپانین بوتونلویو عثمانلی طرفیندن فتح اولا), اوروپالیلار ایچینده موسلمانلارا نیسبت بیر جور قورخو یاراتدی. ایسلامین ظهوری كلیسانین اوروپایا حاكیم اولدوغو اورتا عصرلرده باش وئردی. طبیعتاً هر دین كی بو مسیحیتین قارشیسیندا باش قالدیرسا ایدی بیر رقیب كیمی تانیناردی كی گرك منطیق و ایستیدلال یولیله و بونلار جواب وئرمه‌سه توهین و گوجله, او دین میداندان قوغولسون. آما كلیسا كی منطیق و عقل یولیله ایسلام قارشی‌سیندا دایانا بیلمه‌دی, قاباغا گئتدیكجن بو موقابیله‌یه سیاسی رنگ وئردی و اونو اوروپالیلارین ذهنینده بیر تاریخی ذهنیّته چئویردی. البته بو ذهنیّت یایقین و هامی اوچون دئییل. علم و موطالیعه اهلی اولانلار, واقعیّتلردن خبرلری وار. غرب دونیاسیندا یاشایان موسلمانلارین چوخو اصالتاً غربلی‌دیلر و بو موسلمانلارین تكجه بیر بؤلومونو موهاجیرلر تشكیل ائدیر. اولا بیلر 50 ایله‌دك اوروپالیلارین بؤیوك قیسمینی موسلمانلار تشكیل وئرسینلر. غربلیلر ایندیدن فیكره دوشوبلر كی موسلمانلارین حساسیّتینی آزالتسینلار و پیغمبرین(ص) شخصیّتینه توهین ائله‌مكله اونو سیندیرسینلار كی بلكه بو گئدیشین قارشیسی آلینسین.

ایسلام دونیا گؤروشونده خانیملارین مقامی

ایسلام فلسفی نظردن و خیلقتین تفسیرینده خانیما تحقیر گؤزو ایله باخمیر و بوجور نظریه‌لری ردّ ائدیر. تاریخ بویو آروادلارا ظولم اولاندان سونرا و اونلار كولفتلیگه چكیلندن سونرا, ایسلام گونشی پارلاماغا باشلادی و اونا عادیلانه حقلر وئردی و اونا اولان ظولملری اوندان اوزاقلاتدی. آروادی اسارتدن قورتاردی و اونونلا اینسانی و یاراشان رفتار ائتدی. ایسلام اون‌دؤردونجو عصرده موسلمان خانیما یاشاماق, ایرث آپارماق, مالكیت و تعلیم حقّی باغیشلادی. آما مخلوقاتین گله‌جگینه حكیم اولان آللاه بویورور: كیشیلرین آروادلارا نیسبت تسلّوطی واردیر اونا گؤره كی آللاه بعضیلرین بعضیلره اوستون ائدیب و هم اونا گؤره كی كیشیلر اؤز ماللاریندان آروادلارا نفقه وئره‌لر. عین حالدا آللاه تعالا بویوروب: كیشی و آرواد بیر جینسدندیلر و آرالاریندا تقوا و یاخشی عمللردن سونرا فرق یوخدور. آللاه هئچ بیر‌ی‌نین عمللرینی ضایع ائله‌مز. قورآن آدامین (ع) بهشت ناغیلینی دئییر, آما هئچ‌واخت دئمیر كی شیطان و یا ایلان حوّانی و سونرا حوّا آدامی توغلادی. قورآن نه حوّانی اصلی گوناهكار تانیتدیریر و نه اونو حسابدان چیخاردیر. بئله‌لیكله قورآن راییج اولان غلط بیر فیكیرله موباریزه ائدیر و بو معنا ایله كی آرواد بالاجا شیطاندیر موباریزه ائدیر. ایسلام صراحتله دئییر كی یئر-گؤی, بولوت و یئل, بیتكی و حیوان هامیسی اینسان اوچون یارانیب. ایسلام دئییر آرواد و كیشی بیر بیرلری اوچون یارنیب. آروادلار سیزین بزك و اؤرتوكلریز و سیز اونلارین بزك و اؤرتوكلریسیز.

یئرین جنوبی یاریم كوره‌سی‌نین لاپ بؤیوك مسجیدی تیكیلدی

جنوبی آفریقانین «میدراند» شهرینده یئرین جنوبی یاریم كوره‌سی‌نین لاپ بؤیوك مسجیدی 55 مترلیك میناره‌ایله تیكیلدی. المنار شبكه‌سی‌نین وئردیگی خبره گؤره, جنوبی آفریقانین اَن بؤیوك مسجیدی كی تورك سرمایه‌قویانلارین حیمایتی ایله دوزلیب, كئچن پنجشنبه آچیلدی. جنوبی آفریقانین «میدراند» شهرینده دوزلمیش بو مسجید, ایسلامی بیر موجتمعین اورتاسیندا دوزلیب و بیر 55 مترلیك میناره‌سی وار و ائله بونا گؤره یئرین جنوبی یاریم كوره‌سی‌نین اَن بؤیوك مسجیدی تانینیب. بو مسجیدین گونبذی‌نین قوطری 24 متردیر و 16-جی قرنده توركیه‌نین «ادرین» شهرینده تیكیلمیش «سلیمانی» مسجیدین اولگوسی ایله تیكیلیب. جنوبی آفریقانین اَن بؤیوك مسجیدی‌نین تیكیلمه‌سی 3 ایل چكدی و ایقتیصادی پایتخت اولان ژوهانسبورگ شهری و سیاسی پایتخت پرتوریا آراسیندا یئرلشیب. بو مسجیدین یئرلشدیگی موجتمعین مدرسه, ورزشی میدانلار و هابئله بیر مریض‌خاناسی وار كی نلسون ماندلانین حیمایتی ایله دوزلیب. جنوبی آفریقانین رئیس جومهوری جاكوب زوما بو مسجیدین آچیلیشندا دئدی كی بو مسجیدین تیكیلمه‌سی دینلر آراسیندا آنلاییشا كؤمك ائده‌جك. جنوبی آفریقا مسیحی بیر اؤلكه‌دیر كی  50 میلیون جمعیتی‌نین فقط 650 مین نفری موسلماندیر.