din xadimi دین خادمی

بوندان اوّل میوه سویونون اوشاقلارا آرتیق چکی‌یه سبب اولدوغو دوشونولوردو. آما تازا تحقیقلر اونون متعادل مصرفی‌نین ضررسیز اولدوغونو بللندیریب.

واشینگتونون سیاتل دانشگاهی‌نین محققلری، میوه سویو مصرفی و اونون چکی‌یه تأثیری باره‌ده، 34 میندن آرتیق اوشاغین اوستونده اجرا اولونموش 8 مطالعه‌نین نتیجه‌لرینی منتشر ائله‌دیلر.

تحقیق تیمی‌نین رئیسی دکتر براندون آئورباخ، بو باره‌ده دئییر: بیزیم ایندیکی اله گتیردیگیمیز نتیجه‌لره گؤره، گونده بیر وعده یوزده یوز طبیعی میوه سویونون مصرفی اوشاقلاردا چکی آرتیمینا سبب اولاجاغی اورتایا چیخمادی.

تحقیقلره گؤره 6 یاشدان آشاغی اوشاقلار گونده بیر وعده میوه سویو ایچمکله بیر آز آرتیق چکی تاپیرلار کی بالینی جهتدن گؤزه گلیم دئییل.

محققلرین دئدیگینه گؤره 7 دن 18-ـه قدر اوشاقلارین گونده بیر وعده میوه سویو ایچمکلری، اونلارین چکیسینده تأثیرسیز اولدوغو بیلینیب.

هابئله محققلرین دئدیگینه گؤره پرتغال سویونون گلوکوزی آزدیر و آرتیق چکی‌یه تأثیری آز اولور.

محققلر تأکید ائله‌دیلر کی بو تحقیقلر یوزده یوز طبیعی میوه‌لر باره‌سینده‌دیر و میوه اسانسلی ایچمه‌لیلر باره‌ده دئییل.

محققلری گونده120 دن 180 میلی‌یه قدر گونده‌لیک میوه‌ سویو ایچمگی 6 یاش و داها کیچیک اوشاقلارا مناسب گؤرورلر. 7 دن 18 قدر ده گونده 240 دان 350 میلی‌لیتره قدر مناسبدیر.

دوبی‌ین دولتی کومپانیسی، دونیانین لاپ بؤیوک گونش برق نیروگاهینی دوزلتمک هدفی ایله 200 مگاواتلیق گونش برق نیروگاهینی بیر آی واختیندان تئز تکمیل ائله‌ییب.

بلومبرگین وئردیگی خبره گؤره، امارات عمومی انرژیلری‌نین اجرایی مدیری اعلام ائله‌دی: 327 میلیون دولارلیق گونش نیروگاهی بیاباندا واقع اولوب و عربستانلی سرمایه‌گذار توسطی ایله ثمره چاتیب و قراریدی آوریل آییندا تکمیل اولسون.

الطایر آرتیردی: دوبی‌ین سو و برق شرکتی هر کیلووات برقی 5.6 سنته آلیر. بو مقدار هزینه، پروژه‌نین باشلانیش ایلینده یعنی 2015 ده دونیانین لاپ آشاغی هزینه‌سی ایدی.

دبی، بو مرکزین ظرفیتینی 2030-جو ایله قدر 5000 مگاواتا چاتدیرماق ایستیر. بو ایشین اساس هدفی بو اؤلکه‌نین گاز انرژیسینه باغلی‌لیغینی آزالتماق اوچوندور.

گئجه‌لر خیرداجا قیزیمی ناغیل ایله یوخویا وئره‌رم. دونن آذربایجان فولکلوروندان آیاغینا تیکان باتمیش بالاجا سئرچه‌نین ناغیلینی اونا دانیشدیم. بو ناغیلی سیزینله ده پایلاشماغی فایدالی گؤردوم. لطفاً نظرلریزی بو باره‌ده یازین

بالاجا سئرچه‌نین ناغیلی MP3 یوکله

بایرام و بیزیم عمروموزون چوخالماسی، یئرین گونش دؤره‌سینه دولانماسی ایله یوخ، بلکه حقیقت گونشی‌نین دؤره‌سینه دولانماقلا اولار.

الله تعالی گئجه گوندوزون اوزونلوغونو فرقلی یاراتماقلا یئر اوزونده یاشاماق و فصل‌لرین یارانماسینا سبب اولوب. بوردا دقّت یئره‌جگیمیز جالب بیر نکته وار؛ یئر، 365 گون چالیشیب گونشین دؤره‌سینه بیر دؤر دولاندی. بیز بئله دوشونوروق مثلاً یئر 40 دفعه گونشین دؤره‌سینه دولانیبسا بیز ده 40 یاش بؤیوموشوک. بیر حالداکی انسان 40 مطلبی اؤرگشدیگی زمان 40 یاشی اولار ! باخاق گؤرک بایرامیمیز ها زماندیر ! هر کسین عمرو اونون علمی و فایدالیلیغی قدردیر.

امام صادقین (ع) مفضله گؤزل بیر سؤزو وار کی بئله بویورور: «سن اوشاقلارینا ارث قالسین دئیه کتاب آلیب کتابخانا ییغما بلکه دؤرد کتاب یاز کی سندن سونرا اوشاقلارینا ارث یئتیشسین».

سون نفسیمیزه قدر جامعه‌نین دویونلرینی آچماغا علم اؤیرنیب اؤیرتمه‌لی‌ییک.

هندین قدیم داغلیقلاریندا یوسونا (جلبکه) اوخشار بیتگی تاپیلیب کی عالملرین نظرینه گؤره 1.6 میلیارد بوندان اوّله عایددیر.

بی‌بی‌سی‌نین وئردیگی خبره گؤره، سوئدین طبیعت تاریخی موزه‌سی‌نین عالملری 1.6 میلیاردلیق فسیل‌لر تاپیبلار. عالملر هندین مرکزینده یئرلشن «چیتراکوت» داغلیقلاریندا ایکی جور قیرمیزی یوسونا اوخشار فسیل تاپیبلار. اونلارین بیری ریشته – ریشته و او بیری اتلی قسمتلری اولان یوسوندور. عالملر بو فسیل‌لرین فرقلی مولکولی قورولوشونو گؤروبلر.

سوئدین طبیعت موزه‌سی عالملریندن استفان بنگستون بو باره‌ده دئییر: بو قدمتده فسیلین اونون دی ان آیی قالمادیغی اوچون مولکولی قورولوشونو بو راحتلیقدا تشریح ائتمک اولماز آما قیرمیزی یوسونون خصوصیتلری ایله عینیدیر.

بو یوسونون کشفی ایله نئچه مولکلوللی موجودلارین شکل تاپماسی، قاباقجادان تصور اولاندان چوخ داها تئز باش وئردیگی بللی اولوب.