زیتون یاغی‌نین تانینمامیش خاصیتلری

+0 به یه ن

العالمین وئردیگی خبره گؤره، زیتون یاغیندا اولان هیدروکسی استرول، حیوانی یاغین منفی تأثیراتینی آزالدار. بو ماده‌نین ضد اوکسیده اولماق خاصیتی وار که بئیین و اورگین ساغلیغی اوچون فایدالیدیر.

محقق‌لر بو معلوماتی سیچانلار اوستونده آزمایشدن اله گتیریبلر. بو آزمایشده سیچانلارین هامیسینا چوخ مقداردا حیوانی یاغ وئریلرکن اونلار 4 یئره بؤلوندولر و فقط بیر دسته‌سینه حیوانی یاغدان علاوه زیتون یاغی وئردیلر. 12 هفته‌دن سونرا بو سیچانلارین هامیسیندان نمونه آلیندی. نتیجه‌ده بللی اولدو کی زیتون یاغی یئیه‌ن سیچانلاردا کلسترول آرتیمی یوخدور آما او بیریلرده کلسترول چوخالیب.

محقق‌لرین نظرینه گؤره بو آزمایشین نتیجه‌سی انسانلاردا دا همان اولار. اونا گؤره توصیه ائلیرلر هیدروکسی استرول‌لی ماده‌لرین مصرفی چوخالسین.

علمی افسانه‌نین واقعیت تاپماسی؛ کؤک سلول‌لارینی، یارانین اوستونه شلیک ائدن اسپری

+0 به یه ن

RenovaCare کومپانیسی یارالارین اوستونه کؤک سلول‌لارینی شلیک ائدن توفنگ دوزلدیب. کؤک سلوللار سایتی‌نین وئردیگی خبره گؤره، SkinGun آدلانان بو محصول 10 ایل مطالعه‌نین نتیجه‌سینده اله گلیب.

بو توفنگ، یانیغی اولان مریضلرین اؤز کؤک سلول‌لارینی اونلارین یارالاری‌نین اوستونه اسپری ائلیر و یئری قالمادان توختاماسینا کؤمک ائلیر.

محقق‌لری بو محصولون مریضخانالاردا استفاده‌سینه داها آرتیق مطالعه‌یه احتیاج گؤرورلر و هابئله اونون تجاری‌لشمه‌سی اوچون FDA-نین تأییدینی گؤزلورلر.

موفق اوشاغین تربیت یول‌لاری

+0 به یه ن

ایش بیلن‌لر اوشاقلارا گونده‌لیک ایشلری گؤردورمگی اونلارین یاشاییش مهارتلری‌ ایله تانیش اولماسی اوچون یاخشی یول بیلیرلر.

یاخشی آتا-آنا همیشه اوشاقلاری‌نین مشکل‌سوز و موفق اولماقلارینی ایستیرلر. آما بونون اوچون نئت و آیدین بیر یول یوخدور. آنجاق محققلرین بیر تعدادی بعضی ایشلری اوشاقلارین داها گوجلو و داها باشاریلی بؤیومه‌لری اوچون گؤرمگی مصلحت گؤرورلر:

اوشقالارا گونده‌لیک ایشلری گؤردورمک

اوشاقلارا گونده‌لیک ایشلری گؤردورمک اونلاری داها مهارتلی و اؤزگوون‌لی بارا گتیرر. بیر اوشاق ائوده قاب یوماسا بو، آیریسی‌نین اونون اوچون یومالی اولدوغو معناسیندادیر. بئله‌لیکله او نه اینکی بو ایشی بلکه ائوده ایش بؤلومونون گرکلی اولدوغونو اؤیرنه بیلمیر.

گونده‌لیک ایشلرده مشارکت ائدن اوشاقلار بؤیوینده آیریلاری ایله داها یاخشی ایش بیرلیگی آپارا بیلرلر.

اوشاقلاری گونده‌لیک ایشلره تشویق ائتمکله اونلار، یاشاییشدا پایلاری اولماق اوچون بیر سئری ایشلر گؤرمه‌لی اولدوقلارینی بیلیرلر.

یاشاییش مهارتینی اوشاقلارا اؤیرتمک

اوشاقلارا یاشاییش مهارتلری‌نین اؤیردیلمه‌سی

اوشاقلارین موفقیتی اوچون یول‌لارین بیری‌ده اونلارا یاشاییش مهارتلری‌نین اؤیردیلمه‌سیدیر.

پنسیلوانیا و دوک دانشگاه‌لاری‌نین محقق‌لری آمریکانین باشا باشیندا 700 اوشاق باخچاسی و 25 یاش آراسی اوشاقلار اوستونده آپاردیقلاری تحقیق گؤستریر کی اوشاقلیقدا اجتماعی مهارتلری اؤیرنیلمه‌سی اونلارین 20 سونراکی یاشاییشلاریندا مستقیم تأثیری اولور.

بو 20 ایللیک مطالعه، اجتماعی مهارته صاحب اولان اوشاقلارین یعنی تشویقسیز اؤز یاشیتلارینا کؤمک ائتمک، اونلارین احساسلارینی بیلمک و اؤز مشکل‌لرینی حل ائده بیلمگی باشاران اوشاقلار، اجتماعی مهارتلری داها آز اولان اوشاقلارا گؤره داها موفق گله‌جگه صاحب اولماغا امکانلاری اولور.

اوشاقلاردان یوخاری انتظارین اولماسی

کالیفورنیا دانشگاهی‌نین محققلری 2001-جی ایلینده 600 اوشاق اوستونده اولان تحقیقلری گؤستردی کی والیدنلری‌نین اونلاردان انتظارلاری یوخاری اولان اوشاقلار داها آرتیق موفق اولورلار.

اوشاقلارنی گله‌جکده یوخاری یئرلرده گؤرمک انتظاریندا اولان آتا آنا حقیقتده اونلاری بو سمته هدایت ائلیرلر.

آشاغی یاشلاردا اوشاقلارا ریاضیات اؤیرتمک

نورث وسترن دانشگاهی‌نین محققلریندن اولان «گرگ دانکن» 35 مین اوشاغین اوستونده‌کی تحقیقده بیلدی کی اوشاقلارا آشاغی یاشلاردا ریاضیات اؤیرتمک اونلارا یوخاری امتیاز وئریر.

بو محققین نظرینه گؤره یاشاییشین اول ایللرینده ریاضیات و عددلر نظمی ایله تانیش اولماق اونلاری داها موفق ائتمکدن علاوه اونلارین اوخوما قابلیتینی‌ده گوجلندیریر.

شاغل آنالارا صاحب اولماق

هاروارد دانشگاهی‌ محققلری‌نین نظرینه گؤره آنالارین ائودن ائشیکده اولماقلاری اوشاقلارین حالینا فایدالی اولور.

بو تحقیقه گؤره آنالاری ائشیکده شاغل اولان قیزلارین یوزده 23-و او بیری اوشاقلارا گؤره یوخاری تحصیل آلماق احتمال‌لاری داها چوخ اولور. هابئله بو مطالعه‌یه اساساً آنالاری ائشیکده ایشله‌ین اوغلانلار بؤیوکلوکده ائو ایشلری گؤرمگه داها میل‌لی اولورلار و هفته‌ده 7.5 ساعت داها آرتیق اوشاق ساخلاییر و 25 دقیقه داها آرتیق ائو ایشی گؤرورلر.

اوشاقلارا مناسب آد قویماق

اوشاقلارا تلفظی راحت آدلارین قویولماسی اونلارین موفقیتینده مستقیم تأثیری اولدوغونو گؤستریر.

قوم اوستونده گئتمگه عجیب غریب تکرلر

+0 به یه ن

ماشین دوزلتمه شرکتلرین بیری قوملو منطقه‌لره مناسب اولان عجیب غریب تکرلر طراحلیق ائله‌ییب.

علمی مجله «گیزمگ»ین وئردیگی خبره گؤره، نیسان شرکتی 2015-جی ایلینده قار و بوز اوستونده مطمئن سوروجولوک اوچون مخصوص ماشین ارائه وئردیلر. آما بوزلار ارییَندیلر و ایندی قوم اوستونده مطمئن سوروجولوگه بیر فکر ائتمک لازمدیر.

یئنه ده نیسانین طراحلاری Rogue Trail Warrior آدیندا ماشینی ارائه وئریبلر. بو ماشین نیویورک ماشین سرگیسینده سرگی‌یه قویولاجاق.

بو تازا محصول‌دا بیلدیگیمیز تکرلردن خبر یوخدور بلکه بو ماشین تازا تکنولوژی ایله دوزلمیش نقاله‌ نوارلارین توسطی ایله حرکت ائدیر.

نیسانین تازا محصولو 2.5 لیترلیک 4 سیلندرلی نسبتاً گوجلو موتورا مجهزدیر. بو موتور 170 بوخار آتی گوجو ایله قوم تپه‌لرینی چوخ راحت آشیب گئده بیلر.

بو ماشینین نمونه‌سی‌نین ظاهری نظامی ایدی و اطراف رنگلرله اویغون رنگلنمیشدی. آما بو ماشینین رسمی ارائه‌سینی نیویورک سرگیسینه گؤزله‌مک لازمدیر.

شرقی آذربایجان سئل تلفاتی 30 نفره چاتدی/یکشنبه گونو عمومی عزا گونو

+0 به یه ن

شرقی آذربایجان استانداری بحران مدیر کلّی بو اوستاندا اولان سئلین نتیجه‌سینده ایندی‌یه قدر 30 نفرین جسدی‌نین تاپیلماسینا اشاره ائتمکله دئدی: بحران مدیریتی عضولری بوتون امدادرسان دستگاهلارین کؤمگی ایله آختاریش و نجات عملیاتینی انجام وئریرلر.

دوننین یاغیشی نتیجه‌سینده شرقی آذربایجانین مختلف منطقه‌لرینده سئل گلدی.

هرچند اوستانین هواشناسی اداره‌سی بو سئلین گله‌جگینی قاباقجادان خبر وئرمیشدی آما یاغیش تأثیرینده تبریز شهرینده و شرقی آذربایجانین مختلف منطقه‌لرینده سئل چوخلو خسارتلره و تلفاتا سبب اولدو. الده اولان معلوماتا گؤره ایندی‌یه قدر 30 نفرین جانسیز بدنی تاپیلیب.

تبریز شهرینده عباسی خیابانی‌نین آخرینده 5 ائو سئل اثرینده تخریب اولدو آما خوشبختلیکله ائولرین تئز بوشالدیلماسی نتیجه‌سینده بو بئش ائوده جانی تلفات اولمادی.

آما آیری منطقه‌لرین وضعی داها پیس اولدو. گلن سئلین تأثیرینده اکین ساحه‌لرینه و مال داوارا چوخلو خسارت دَیدی. صوفی چای، موغانجیق و سهندین جنوبونداکی اوچ چایین طغیانی نتیجه‌سینده کؤرپولر تخریب اولوب منطقه‌نین یولو باغلاندی.

آذر شهر، اوسکو، هشتری، عجب شیرده ده اوخشار حادثه‌لر باش وئریب.

بوتون اکیپلر آختاریش و نجات عملیاتینا مشغولدولار و ایکی هلیکوپتر و نئچه دیری تاپان ایت بو عملیاتدا استفاده اولونور و بو عملیاتین ایتنلرین آخر نفرین تاپانا قدر ادامه‌سی اولاجاق.

بو فاجعه‌یه گؤره یکشنبه گونو فروردین آیین 27-سی شرقی آذربایجاندا عمومی عزا اولوندو.