صاباح دونیا داغیلیرمی؟

+0 به یه ن


ناسا گله‌‌جكدن قورخولو خبر وئریب.

صاباح دونیانین سونو اولا بیلر. ناسا 2009-جو ایلدن 2012-جی ایلین دونیانین سون اولا بیلجگی حاقیندا خبردارلیق‌لاری ائتمگه باشلاییب. او واخت هله گونشین فعاللیغینی اؤیرنن گروهون موتخصیصلری اؤزلری‌نین قورخودوجو حساباتلارینی درج ائتمیشدیلر: اونلار دونیا سطحینده خطری, گونشدن گؤزله‌دیك‌لرینی دئییب‌لر.

اونلارین سؤزلرینه گؤره، گؤرونمه‌میش سطحده اولان پارتلاییش, هسته‌ای ساواش ایله موقاییسه ائدیله بیلر. بو 2012-جی ایلین سپتامبرین 22-ده - یعنی صاباح باش وئرمه‌لیدیر.

گونشده‌كی پارتلاییشلارلا باغلی یئر كوره‌سی‌نین الكترو مغناطیس ساحه‌سینده‌كی دگیشیك‌لیك گوجلو الكتریك آخینی یارادا‌جاق. موتخصیص‌لرین حسابلاما‌لارینا گؤره، بوندان 90 ثانییه سونرا آمریكادا 300 اساس ترانسفورماتور یانا‌جاق. نتیجه‌ده 130 میلیون اینسان الكتریكسیز قالا‌جاق. قاتارلار، آسانسور‌لار و صنایع دایانا‌جاق، طیّاره‌لر یئره دوشه‌جك، سو و ایستیلیك تهجیزاتی دایانا‌جاق.

رادیو سوسا‌جاق، تیلویزیونلار گؤسترمه‌یه‌جك، رابطه ایته‌جك...

بو خطرلی گله‌جكدن قورخان آمریكا‌لی‌لار حتی 2010-جو ایلده فضایا مخصوص ماهواره - «سدو» گؤندریبلر. او، بئش ایل عرضینده گونشی ایزله‌یه‌جك، اونون تصویرلرینی گؤتوره‌جك و دقیقه‌ده 60 تصویر گؤندره‌جك. تصویرلرین كیفیتی  16 میلیون پیكسئلدیر.

دوزدور، هله‌لیك «سدو» قورخولو هئچ نه گؤندرمه‌ییب، بونا گؤره ده یئرده‌كی ساكینلری خطر باره‌ده خبردار ائتمه‌ییبلر. قاباقدا دا بیر گون وار.

روسیانین دولت دانیشگاهی‌نین رصدخاناسی‌نین مودورو، فیزیك-ریاضیات علملری دوكتورو سرگئی یازئو ناسانین پیش‌بینلیغینی غیری حرفه‌ای آدلاندیریب. "دونیادا هئچ كیم گونشده‌كی پارتلاییشلاری هئچ بیر آی اوّلدن دئیه بیلمز، هله قالدی 3 ایل اؤنجه‌دن".

اونون سؤزلرینه گؤره، ایندی گونشده فعاللیق چوخ یوكسك سطحده دئییل. "اعتراف ائدیم كی، بیر موتخصیص كیمی ایندی منه اورایا باخماق بئله ماراقلی دئییل. گونشده ایندی‌ده لكه‌لر وار، آنجاق اونلار ائله‌ده بؤیوك دئییل.»

روس موتخصیص بیلدیریب كی، هئچ بیر جیدی ژئوفیزیك موتخصیصی بو پیش‌بینلیقلا راضی‌لاشا بیلمز. بیزیم ایشیقسیز قالماغیمیز اوچون هله هئچ واخت گؤرمه‌دیگیمیز پارتلاییش لازیمدیر.»

سیگار چكنلرین یوخولاریندا ایختیلال چوخ اولور

+0 به یه ن

آلماندا ایكی مین نفردن چوخ اینسانین اوستونده آپاریلمیش تحقیق گؤرسدیر كی دوخانیات مصرف ائدنلرین گئجه‌لر یوخلاماقدا موشكوللری وار و آیریلارلا موقاییسه‌ده یوخولاری آرام اولمور. موحقیقلر بیلیبلر كی بو تحقیقده شیركت ائدنلرین 1100 نفری‌نین یوزده 17-سی گئجه‌لر 6 ساعتدن آز یاتیرلار و  یوزده 28-‌نین یوخو كیفیتی پریشاندیر.

استفان كوهرس بو تحقیق باره‌ده یازدیغی علمی مقاله‌ده دئییر: بو تحقیق بیرینجی دفعه‌دیر كی سیگار چكنلر و چكمه‌ینلرین یوخولارینی تحقیق ائدیر. تحقیق اولان گروه ائله آداملار ایدیلر كی هئچ جوره روحی ایختیلال سابیقه‌لری یوخیدی و ایطمینان اوچون بالقوه ریسكلی عامیللر ده كونترول اولوب.

بو تحقیقین نتیجه‌لری تكلیكده گؤرسده بیلمز كی سیگار چكمك موستقیم صورتده یوخونو موختل ائدر, نیه كی ایمكانی وار بو آداملارین بعضیسی‌نین آیری عادتلری ده اولسون كی اونلارین یوخولارینا تأثیر ائده. بو عادتلردن گئجه یاریسینادك تیلویزیون قاباغیندا قالماق و یا بیر آز فیزیكی فعالیت اولماقدیر كی راحت بیر یوخویا سبب اولار.

آما آیری طرفدن دئمك اولار بو تحقیق گؤرسدیر كی نیكوتینین تحریك ائدن اثری بو ایختیلالا سببی اولور.

یوخو كیفیتی چوخ آشاغی اولانلارین چاقلیق, دیابت و اورك ناخوشلوقلاری كیمی موشكوللری‌ده اولار بیلر.

بو تحقیقده 1071 نفر سیگار چكن و 1243 نفر سیگار چكمه‌ین كی بئیینلرینده هئچ موشكول یوخیدی, شیركت ائله‌میشدیلر. بئیین موشكولونه بو قدر تأكید ائله‌مك بونا خاطیر ایدی كی اولا بیلر بئیین موشكولو یوخودا ایختیلال یاراتسین و یا سیگار چكمگه ریغبت یاراتسین.

آغاج و اوغلان

+0 به یه ن


قدیم زمانلار بیر بؤیوك آلما آغاجی واریدی. و بالاجا اوشاق واریدی كی گلیب او آغاجین اطرافیندا اویناماغی سئوردی. اونون اوستونه دیرماشیب میوه‌سیندن یئیردی و كؤلگه‌سینده یاتاردی. اوغلان او آغاجی او قدر سئوردی كی ائله بیل آغاج‌دا اونونلا اوینور. زمان سووشدو و اوغلان بؤیودو و داها قاباقكیلار كیمی اونون اطرافیندا اویناماغا گلمه‌دی.

بیر گون جوان آغاجین یانینا گلدی و غملی گؤروشوردو. آغاج اونا دئدی: «گل منله اوینا!» اوشاق جواب وئردی: «من داها اوشاق دئییلم, من داها آغاج اطرافیندا اویناماغا گلمه‌میشم. آیری اویناتمالی ایستیرم و اونو آلماغا پولا احتیاجیم وار.» آغاج جواب وئردی: «موتأسیفم, منیم پولوم یوخدور. آما ائلیه بیلرسن منده اولان بوتون آلمالاری دره‌سن و اونلاری ساتماغینان پول قازاناسان.» جوان چوخ سئویندی و آلمالارین هامیسینی دریب سعادته چاتدی. جوان آلمالاری دریب گئدندن سونرا قاییتمادی و آغاج غوصّه یئییردی.

گونلرین بیر گونو همان جوان قاییتدی و ایندی كیشی اولموشدو. آغاج چوخ سئویندی و دئدی: «گل منله اوینا !» یئنه گؤزلنیلن جواب, ایمتیناع اولدو: «منیم اویناماق گوجوم قالماییب, عاییله‌مه گؤره ایشله‌مگیم لازیمدیر. بیزیم بیر ائوه احتیاجیمیز وار كی اوندا اوتوراق. منه كؤمك اولا بیلرسن؟» آغاج جواب وئردی: «موتأسیفم منده ائو یوخدور. آما ائلیه بیلرسن منیم بوداقلاریمی كسه‌سن و اؤزونه ائو دوزلده‌سن !» كیشی آغاجین بوتون بوداقلارینی كسدی و سئویندی. آغاج اونو سئوینجاق گؤرنده شاد اولدو. آما كیشی یئنه اونا قاییتمادی و آغاج تازادان تك قالدی و غوصه‌یه جومدو.

گونشلی و ایستی بیر گون كیشی قاییتدی و آغاج اونو گؤرمكدن سئوینیب همیشه‌یه تای, دئدی: «گل منله اوینا !» كیشی جواب وئردی: « من یاشلی بیر آدامام و ایستیرم ایستیراحت اوچون دریایا گئدم. منه قاییق وئره بیلرسن؟» آغاج جواب وئردی: «منیم گؤوده‌می قاییق دوزلتمگه ایستیفاده ائله. شاید اوزاق دریا سفرینه چیخدین و سعادتلی اولدون !» كیشی قاییق دوزلتمك اوچون آغاجین گؤوده‌سینی كسدی.  كیشی دریا سفرینه چیخدی و اوزون مودته‌دك قاییتمادی.

سون واختلار كیشی ایللر سونرا قاییتدی. آغاج اونا دئدی: « اوغلوم من موتأسیفم كی هئچ نه‌ییم یوخدور كی سنه وئرم. حتّا سنه بیر آلما دا وئره بیلمیرم.» كیشی جواب وئردی: «ناراحتچیلیغا یئر یوخدور منده اونو یئمگه دیش یوخدور.» آغاج دئدی: «گؤوده‌م ده یوخدور كی اونا دیرماشاسان.» كیشی جواب وئردی: «ایندی او ایشه بؤیوموشم.»

سونرا آغاج گؤز یاشلاری آخا-آخا ایضافه‌لتدی: «دوغرودان دا من سنه بیر شئی وئرمكدن عاجیزم. منده قالان تكجه ریشه‌لریمدیر كی اونلار دا اؤلمكده‌دیرلر !» سونرا كیشی دئدی: «منیم آرتیق بیر شئیه احتیاجیم یوخدور. منیم ایستدیگیم بیر یئردیر كی اوردا راحت اولام. بو قدر ایلی چتینلیق چكمیشم. قوجا آغاجین ریشه‌لری لاپ یاخشی یئردیر كی اونا دایانیب دینجلم.» آغاج دئدی: « گل اوتور یانیمدا و دینجل !» كیشی اوتوردو و آغاج سئوینج گؤز یاشلاری ایچینده گولومسه‌دی.

 

حیكمت: آغاج آتا-آنا كیمیدیر. اوشاق اولاندا اونلارلا اویناماغی سئویریك و بؤیوگندن سونرا اونلاری ترك ائدیریك و بیر شئیه احتیاجیمیز اولمادان قاییتمیریق.

و البته شك یئری یوخدور كی آتا-آنا صمیم قلبدن ارزیشلی زادلارینی اوشاقلارینا –كی اونلارین گؤزونده هله‌ده اوشاقدیلار- وئررلر.

ایسلام ضیدینه اولان بو حركتلر, دونیا اهلی‌نین موسلمان اولماسی‌نین قاباغین آلماغا گؤره‌دیر

+0 به یه ن



غربلیلرین ایسلاملا موباریزه‌سی بونا خاطیردیر كی همیشه نیگراندیلار مسیحی و یهودیلر ایسلاما اوز گتیرسینلر و ایسلام ضیدینه اولان بو حركتلر, دونیا اهلی‌نین موسلمان اولماسی‌نین قاباغین آلماغا گؤره‌دیر.

غرب دونیاسی‌نین ایسلاملا موباریزه‌سی, فیكری نظردن قرنلر قاباغا قاییدیر و ریشه‌سی یهودیتله مسیحیتین ایسلاملا ضیدّیتینه یئتیشیر. حقیقتده بو ضیدیت بو نیگرانچیلیقدان چیخیر كی اولمایا یهودیلر و مسیحیلر موسلمان اولسونلار.

توهین ائدن فیلیمده بو مسأله اساس هدف توتولوب. بونلارین ایشلتدیكلری یول ایسلامین تاریخ و مفهوملارینی تحریف ائله‌مكدیر و بو یولدا, تاریخ بویو چالیشیبلار كی ایسلامی خشین و شمشیرله یاییلمیش دین تانیتدیرسینلار و بئله ایلقا ائده‌لر كی ایسلامی تعلیمات موسلمانلاری غیری اینسانی حركتلره وادار ائدیر و ائله بو فیلیم‌ده ایستیر ایلقا ائله‌سین كی موسلمانچیلیق خشونت و غیری اینسانی رفتار صاحیبی اولماق دئمكدیر.

هرچند كی غربین موستشریقلر و ایسلام شیناسلاری چالیشیبلار كی بیر سئری ایسلامی مفهوملاری تحریف ائله‌سینلر و غیری موناسیب صورتده ایرائه وئرسینلر و میثال اوچون ایسلامدا اولان جهاد مفهومونو منفی تفسیر ائله‌سینلر. آما هر زمان كی موسلمان عالیملرین یازیلاری اونلارین یازیلاری‌نین كناریندا قویولدو ایدعالاری‌نین فایداسیز و بوش اولدوغو بللی اولدو.

اونلار همیشه چالیشیبلار پیغمبر اكرمین (ص) شخصیتینه حمله ائله‌سینلر و موبارك وجودی رحمةللعالمین اولان او حضرته, اهانت ائدیب تاریخ و سیره‌سینی تحریف ائله‌سینلر. بو فیلمده‌ده بو ایش لاپ كیفیر صورتده و اینسانی و ایسلامی معیارلاردان كنار, مطرح اولوب. ائله كی بو فیلمده پیغمبره (ص) نیسبت وئریلمیش عمللر هئچ كرامتلی اینسانا یاراشان دئییل.

غرب چالیشیر ایسلام مفهوملاری و تاریخینی منفی گؤرستمكله اؤز خیالینا خالیص ایسلامین دوشونجه‌سی‌نین یاییلماسی‌نین قاباغین آلسین. بو چالیشمالار ایندی چوخ آیدین آشكار گؤرونور و اگر بوندان قاباق شیطانی آیه‌لر كیتابی لفّافه‌سینده پیغمبره بو نیسبت وئریلیردی كی نعوذ بالله او حضرت وحی آلاندا شیطانین‌دا تلقینلرین آلیردی, ایندی ایش او یئره یئتیشیب كی آشكار صورنده او حضرته  لاپ كیفیر نیسبتلر نیسبت وئریلیر.

ائولنمكدن قاباق تردید اولسا بوشانماق احتیمالی چوخالار

+0 به یه ن


تازا بیر تحقیق گؤرسدیر كی خانیملار ائولنمكدن قاباق, آغالاری ایله ائولنمكده تردید ائله‌سه‌لر, ایمكانی وار گله‌جكده اونلارلا ایختیلافلاری چیخا.

لایو ساینسین دئدیگینه گؤره بو تحقیق ائدن آمریكالی موحقیقلر دئییرلر كی جماعت بئله اینانیر كی اولا بیلر كی هر بیر كس ائولنمكدن قاباق تردید ائله‌سین و بو نیگرانچیلیغا سبب اولا بیلمز.

آما بو موحقیقلرین تحقیقی گؤرسدیر كی بو جور تردیدلر راییج‌ده اولسا عاقیبتلری حتماً خوش اولمور. بو تحقیقده بللی اولدو كی ائولنمكدن قاباق تردیدلری اولان خانیملارین بوشانما احتیمالی آیریلارینا نیسبت 2.5 برابر ایدی.

هابئله ائولنمكدن قاباق تردیدلری اولان ار-آروادلار كی 4 ایل سونرا هله‌ده موشترك یاشاییشلارینا ایدامه وئریردیلر, یاشاییشلاریندان ریضایتلری تردیدسیز جوتلوقلاردان چوخ-چوخ آز ایدی.

بو موحقیقلر لوس آنجلسده 222 جوتلوغو ائولنمگین اوّل آیلاریندا و سونرا آلتی آیدان دؤرد ایله‌دك تحقیق ائله‌دیلر. بو موحقیقلر دئیرلر هر چند ائولنمكدن قاباقكی تردید حتماً آیریلماغا محكوم ائله‌مز آما اونلارین دئدیگینه گؤره زوجلار گرك ائولنمكدن قاباقكی تردیدلری حل ائده‌لر.