گؤزله كونترول اولان تیلویزیون دوزلدی
یازار : میرزه عبدالصمد ملکی | بؤلوم : تكنولوژی
+0 به یه ن
 |
||
|
گؤزله كونترول اولان تیلویزیون دوزلدی تاماشاچی موختلیف آیكونلارا باخماقلا اونو كونترول ائدیر. برلینین ایفای نوماییشگاهیندا, گؤزونن كونترول اولان تیلویزیون نوماییشه قویولدو. گؤزونن كونترول اولان تیلویزیون توبی شیركتی‌نین تكنولوژیلارینداندیر. بو سوئدلی شیركت بیر مودتدیر كی گؤزونن ایشله‌ین كامپیوتر دوزلتمك تكنولوژیسی اوستونده چالیشیر. تیلیویزیونا تاماشا ائدن گؤزلرینی صفحه‌نین آشاغی و یا یوخاریسینا زیلله‌مكله گؤزله ایشله‌ین قیسمتی فعال ائدیر. سونرا تاماشاچی ائلیه بیلر ظاهیر اولان آیكونلارا باخماقلا كاناللاری دگیشه, سسی آزالدیب-چوخالدا و یا اوخشار ایشلر گؤره. بو تكنولوژی هله ایبتیندایی مرحله‌ده‌دیر و آزماییشی نوسخه‌لر دوزلدیلیر و هردن ایشتیباه ائدیر. آما بو گوجو وار كی قدیمی كونتروللی تیلویزیونلارین یئرینده اوتورسون. ایندیلیقدا بعضی هوشلو تیلویزیونلار ال حركتی و یا دانیشیق یولو ایله كونترول اولورلار. آزماییش مرحله‌سینده, اصلی سنسور تیلویزیونون ایچینده یوخ بلكه تیلویزیونلا تاماشاچی آراسیندا یئر آلیر كی اونون گؤزلری‌نین حركتینی آراشدیرسین. بو سنسور تاماشاچی‌نین گؤزون تعقیب ائله‌مكله اونا ایجازه وئریر كی بیر شئیه ایشاره ائله‌سین, تصویری یاخینا چكسین, بیر شبكه‌نی سئچسین و تیلویزیونون منولاری آراسیندا دولانسین. بو دستگاه هر بیر شخص اوچون تنظیم اولمالیدیر و تاماشاچی‌نین عینكی اولسا دیقّتی آزالار. توبی شیركتی بو تكنولوژینی معلول‌لارا كامپیوتردن ایستیفاده ائتمك اوچون دوزلتمیشدی. بو شیركتین برنامه‌لری و سنسورلاری‌نین مینلر پوند قیمتی وار كی باعیث اولور بو تازا محصولون بازارا چیخماسینا فاصیله اولسون. توبی دئییر كی اومیدی وار 2013-جو ایله جن بیرینجی محصولونو بازارا وئرسین. | ||
موباریز و مشروطه‌چی روحانی شیخ محمد خیابانی‌نین شهادت گونو
یازار : میرزه عبدالصمد ملکی | بؤلوم : تاریخ
+0 به یه ن
|
|
||
|
| ||
استانبولون سلیمانیه مسجیدی؛ ایسلامی معمارلارین یادیگاری
یازار : میرزه عبدالصمد ملکی | بؤلوم : تاریخ
+0 به یه ن
|
|
||
|
سلیمانیه مسجیدی بؤیوك عثمانلی معماری, «سینان»ین تایسیز اثریدیر كی عیبادت یئری اولماقدان علاوه, خیریه مركزی كیمی بوتون دینلرین یوخسوللاریندان حیمایت ائدیر. سلیمانیه مسجیدی استانبول شهری‌نین جامیع مسجیدلریندن ساییلیر كی 1557-1550 ایللرینده بؤیوك عثمانلی معماری سینانین الی ایله دوزلیب. بو مسجیدین دوزلمه‌سی بیرینجی سولطان سلیمانین دستوری ایله باشلاندی. سلیمانیه مسجیدی‌نین گونبذی‌نین اوجالیغی 53 متر و قوطری 27.5 متردیر. عثمانلی معمارلیغینا گؤره بو مسجیدین 4 میناره‌سی وار كی سولطان دستوری ایله دوزلمیش مسجیدین علامتی ساییلیر. اونون معمارلیق سبكی, سینان و عثمانلی معمارلارین آیری ایشلرینه تای ایسلامی و بیزانس معمارلیق سبكیدیر. او دؤره‌نین رسمینه اساساً بو مسجیدین اطرافیندا مدرسه, حامام, كیتابخانا, مریض‌خانا, عمومی آشپزخانا و كروانسرا كیمی جانیبی ساختیمانلار دا دوزلتدیلر و بو ساختیمانلارا «جامی كولیه‌سی» دئییلر. بو مسجید عیبادت یئری اولماقدان علاوه خیریه مركزی‌ده ساییلیردی. ائله كی مین نفردن چوخ یوخسول موسلمان, مسیحی و یهودی اینسانا ریفاهی سیستم حاضیرلیردی. بو مسجیدین دالیسینداكی باغدا بیرینجی سلیمان, اونون آناسی, عیالی و باجیسی‌نین قبری و هابئله ایكینجی سلیمان و ایكینجی احمدین قبری وار. | ||
ایمام صادقین (ع) دونیا و آخیرت موریدینده دؤرد نصیحتی
یازار : میرزه عبدالصمد ملکی | بؤلوم : دین
+0 به یه ن
|
|
||
|
ایمام صادق (ع) اینسانین نعمتلر موقابیلینده غفلتی باره‌ده بیر حدیثده بویورور كی آللاه سنه نعمت وئردی و اؤرگتدی كی اوندان نئجه ایستیفاده ائده‌سن, آما سن همیشه بونلاری بیر-بیری‌نین اوستونه قالیرسان. یئری وار آللاه تعالا دئیه كی سنه وئردیگیم بو قدر نعمتی نه ائدیرسن؟ رُوی أَنَّهُ جَاءَ رَجُلٌ إِلَی الصَّادِق (ع) فَقَالَ لَهُ:«بِأَبِی أَنْتَ وَ أُمِّی یَا ابْنَ رَسُولِ اللَّهِ عَلِّمْنِی مَوْعِظَةً فَقَالَ لَهُ علیه السلام إِنْ كَانَ اللَّهُ تَبَارَكَ وَ تَعَالَى قَدْ تَكَفَّلَ بِالرِّزْقِ فَاهْتِمَامُكَ لِمَا ذَا وَ إِنْ كَانَ الرِّزْقُ مَقْسُوماً فَالْحِرْصُ لِمَا ذَا وَ إِنْ كَانَ الْحِسَابُ حَقّاً فَالْجَمْعُ لِمَا ذَا وَ إِنْ كَانَ الثَّوَابُ عَنِ اللَّهِ حَقّاً فَالْكَسَلُ لِمَا ذَا» بیر ریوایتده گلیب كی بیر شخص ایمام صادقین (ع) محضرینه گلیب عرض ائدیر: یا بن رسول‌الله آنا-آتام سنه قوربان اولسون! منه بیر نصیحت وئر! «بِأَبِی أَنْتَ وَ أُمِّی یَا ابْنَ رَسُولِ اللَّهِ عَلِّمْنِی مَوْعِظَةً»، حضرت بویوردو: اوّل؛ «إِنْ كَانَ اللَّهُ تَبَارَكَ وَ تَعَالَى قَدْ تَكَفَّلَ بِالرِّزْقِ فَاهْتِمَامُكَ لِمَاذَا» آللاه روزی‌نین ضامینیدیر و دئییب: سنین روزینی ضمانت ائدیرم و اونو سنه چاتدیریرام؛ پس نه اوچون غوصّه یئییرسن؟ بیر اوشاق كی آتاسی اونون روزی‌سینه ضامین اولوب, روزی غوصّه‌سی یئیَر؟ او دئیر: آتام خرجیمی وئریر, داها غوصّه‌نین معناسی یوخدور. غوصّه یئسه, دلیدیر. اولار كی بیر آتانین الی بوش اولسون, آما هر شئی بو آتانین الینده‌دیر. ایكینجیسی ؛«وَ إِنْ كَانَ الرِّزْقُ مَقْسُوماً فَالْحِرْصُ لِمَاذَا»، ریزقی پایلایان, رزّاق اؤزو اولسا و سن اونو آزالدیب چوخالدا بیلمه‌سن, نیه حیرص یئییرسن؟ اوچونجوسو؛ «وَ إِنْ كَانَ الْحِسَابُ حَقّاً فَالْجَمْعُ لِمَا ذَا»، قیامت گونون حسابی حقّ اولسا, نیه بو قدر آنبار ائلیرسن؟ حضرت حسابین فقط حلالی‌نین صؤحبتین ائلیر, «فی حلالها حساب» و حرام موریدینده كی عیقابی وار بحث ائله‌میر. دئییرلر كی بهلول ساجی اود اوستونه قویاردی و داغلاناندان سونرا چیخاردی ساجین اوستونه و بئله دئیردی: بهلول, جوببه, آرپا چؤرگی و سیركه. سونرا آتیلاردی یئره. اوندان سوروشدولار: نیه بئله ائدیرسن؟ دئدی: چونكی دئییرلر قیامت چؤلونون یئری داغلانمیش اولار. قیامت گونو اوچون تمرین ائدیرم كی نه قدر تئز حسابیمین جوابینی وئرسم آیاغیمین یانماسی آز اولاجاق؟ دؤردونجو؛ «وَ إِنْ كَانَ الثَّوَابُ عَنِ اللَّهِ حَقّاً فَالْكَسَلُ لِمَاذَا»، اگر ایطاعتین قیبالیندا آللاهین وئردیگی پاداش حقّدیر و بو پاداش قیامت گونو وئریله‌جك, پس نیه آللاهین ایطاعتینده سوستلوق ائدیرسیز؟ بیر حالداكی تله‌سمك لازیمدیر و گرك تنبللیگی و سوستلوغو كنارا قویاسیز. | ||
عینادكار اوشاقلا نه ائدیم؟
یازار : میرزه عبدالصمد ملکی | بؤلوم : اجتماعی
+0 به یه ن
|
|
||
|
ایكی یاشلی اوشاغیز, قیشقیرماغی‌ایله سیزی باشا سالیر كی ایستیر اؤزو لیوانا سوت تؤكسون؟ یا سیز ایستیرسیز ائوه گله‌سیز آما او آغلاییب آیاقلارینی یئره چیرپماقلا ایستیر پاركدا قالسین؟ سیز تله‌سیرسیز كی قوناقلیغا گئتمك اوچون وساییلی آلیب گئده‌سیز آما اوشاغیزین كؤنلو ایستیر فروشگاهین پیلّه‌لرین یئنیب قالخا و اوینایا. احتیمالاً سیزین‌ده بئله تجروبه‌ز وار و اوشاغیز ایستیر سؤزون یئریتسین و اونا چاتماق اوچون هر جور قیشقیرماق و های-كویدن ایستیفاده ائلیر. آما سیز بیلمیرسیز اونونلا نه ائده‌سیز؟ بو قیسا یازیدا اوشاقلارین كؤنزلیگی و اونون قاباغین آلماق یوللاریندان بحث ائدیریك. اوشاغیزین رفتارینا دیقّت ائله‌سیز گؤره‌جكسیز كی چوخ واختلار ائله‌دیگی رفتاردان هئچ منظورو یوخدور آما بیزیم نظریمیزه گلیر كی بیزیمله عیناد ائلیر. بو مسأله اوشاغین بالاجالیق واختیندا چوخ اولار. مثلاً ایكی یاشلی اوشاغیز ایستیر تازا تجروبه‌لر ائله‌سین. او ایستیر بیلسین كی نئجه سوت لیوانا تؤكولور و اونون شكلینه دوشور. بونا گؤره سیز صوبحانه‌یه سوت حاضیرلایاندا چالیشیر قابی سیزین الیزدن آلیب و اؤزو سوتو لیوانا تؤكسون. او دئییر: اؤزوم تؤكورم! و البته سیز اونا بو ایشه ایجازه وئرسز هئچ موشكول قاباغا گلمز فقط شاید بیر آز سوت یئره تؤكوله. عَوضینده اونون تازا بیر تجروبه‌سی اولار كی بونون چوخ اهمیّتی وار. آما سیز سوتون تؤكولماغیندان و میزین باتماغیندان قورخساز و نتیجه‌ده اونا بو ایشه ایجازه وئرمه‌‌سز, اوندا عینادكارلیق موشكولو قاباغا گلر و او چالیشار قیشقیر-باغیرلا اؤز ایستگینه یئتیشسین. بیرینجی نوكته بودور كی اوشاغیزین طبیعی ایستكلرینه اهمیت وئره‌سیز و اونا تازا تجروبه‌لر ایمكانی یاراداسیز. مگر او زمان كی خطرلی ایش اولا كی بوردا گرك مؤحكم اولاسیز و ایجازه وئرمه‌یه‌سیز كی اونون عینادكارلیغی سیزی تسلیم ائده. اوشاغیز ایكی یاشیندان سونرا ایستیر كی موستقیل اولماغی تجروبه ائله‌سین. بو یاشدا طبیعیدیر كی اوشاق خرابكارلیق ائله‌سین و سیز گركمز اونا مانع اولاسیز و اونداكی ایستیقلالین جوجرمه‌سینه مانع اولاسیز. بو یاشداكی اوشاغا طبیعیدیر كی همیشه موناسیب رفتاری اولماسین, آما سیز بونو عینادكارلیق حسابینا قویمامالیسیز. اونو درك ائدین و مومكون اولان قدر اونا ایستیقلال وئرین و ایجازه وئرین تازا تجروبه‌لر ائله‌سین. اوندا گؤره‌جكسیز كی نئجه قاباغا گئده‌جك و داها بؤیوك ایشلری ایشتیباهسیز انجام وئره‌جك. نه ائتمك لازیمدیر؟ 1. اونو درك ائدین اوشاق آغلاییب قیشقیر-باغیر سالاندا و اویون زمی‌سیندن چیخماق ایسته‌مه‌سه, اونونلا ساواشماق عَوضینه یاخشیسی بودور كی اونو قوجاغیزا آلاسیز و دوست‌یانا لحنله دئیه‌سیز كی بیلیرسیز كی اویناماقدان و بو خوش لحظه‌لردن آیریلماق چتیندیر. اونا ایناندیرین كی سیز اونون طرفینده‌سیز و اورگیز ایستیر كی قالاسیز آما مجبورسوز قاییداسیز. یادیزدا اولسون كی بو جور واختلار اصلاً حیرصلنمیه‌سیز و اوشاغیزین رفتارینا گؤره اوتانمیاسیز. مهریبان و عینی حالدا مؤحكم اولون و اونا دئیین كی اورگیز ایسته‌میر آما گرك پاركدان گئده‌سیز. ال-آیاغیزی ایتیرسز اوشاغین گلن دفعه‌لر ده بئله ائله‌مك احتیمالی واردیر. آما اگر قاطع و آرام اولساز اوشاق بیلر كی تسلیم اولمالیدیر. 2. جیزیقلاری موعیّن ائدین اوشاقلارین محدودیته احتیاجلاری وار. یعنی گرك جیزیقلاری اونلارا توضیح وئره‌سیز و بیله‌لر كی كی آیاقلارینی بو جیزیقدان ائشیگه قویسالار رفتارلارینا موناسیب تنبیه اولاجاقلار. آز یاشلی اوشاقلار كی ایستكلرینی دانیشیقلا دئیه بیلمیرلر, اونلاردا آیریلارین وورماق و قیشقیرماق كیمی غیر موناسیب رفتارلار چوخ اولا بیلر. آما بو سیزسیز كی اونلارا اؤرگتمه‌لیسیز كی ایستكلرینه چاتماق اوچون دانیشیقدان كؤمك آلمالیدیلار نه اینكی قیشقیر-باغیر سالسینلار. مثلاً اوشاغا دئیین كی حقی یوخدور آیریسینی وورسون. «بیز هئچ كسی وورماریق, اگر حیرصله‌نیبسن یولداشینا دئ كی اویناتمالینی ایستیرسن و او گرك اونو سنه قایتارا.» یا مثلاً خیاباندان كئچمه‌نین قایداسی بودور كی خیاباندان كئچنده منیم الیمی توتاسان. ایمكانی وار اوشاق بو قایدا-قانونلاری یاددان چیخاردا, آما سیز قاطع اولساز و ثابیت قانونلاری اونون یادینا سالساز, بیر زاد چكمز كی اونلاری اؤرگه‌شر. بعضی واختلار اوشاق بیر سئری دلیل‌لره گؤره, قانونو آیاقلار. بیز او دلیل‌لره دیقت یئتیرمیریك و فقط چالیشیریق كی اونو تنبیه ائدیب قانونو رعایت ائله‌مگه مجبور ائدك. مثلاً اوشاق قارانلیقدان قورخسا موشخص ساعتده گئدیب اؤز اوتاغیندا یاتماز. ایندی سیز هر نه قدر اونو اویناماقدان و كارتوندان محروم ائده‌سیز یئنه‌ده قارانلیقدان قورخور. سیز تنبیه یئرینه اونون قورخوسونو آزالتماغا بیر یول تاپمالیسیز. مثلاً اونا بیر گئجه چیراغی آلاسیز و یا بیر ایپ اولا كی بیر اوجوندان او یاپیشا و او بیری اوجوندان سیز یاپیشاسیز و احساس ائلیه سیز اونون یاخینلیغینداسیز و اوندان موغایات اولورسوز. 4. یاخشی رفتاری گوجلندیرین آتا-آنالارین چوخو اوشاقلا او واخت دانیشیرلار كی ایستیرلر اونونلا ساواشالار. آغیزلاریندان چیخان كلمه‌لرین چوخو بئله اولور: ائله‌مه! اَل وورما! او دا اؤرگه‌شیر كی شولوقلوق ائله‌مكله والدینین دیقّتینی جلب ائلیه حتّا اگر بو دیقّت ائله‌مك كؤتك وورماق و دئیینماق اولا. بونا گؤره چالیشین اوشاغیزلا امر-نهی‌دن سونرا شیرین دانیشیغیز دا اولسون و اونونلا اوینایین و گؤزل ایش گؤرنده اونو تشویق ائدین. اوندا اوشاق اؤرگه‌شر كی یاخشی ایشلرله‌ده سیزین دیقتیزی جلب ائله‌سین. یادیزدا اولسون كی اوشاقلار قولای ایش گؤرنده اؤزلریده ناراحات اولارلار و یاخشیسی بودور كی سیز اونلاری دیلیزله شاللاق وورمایاسیز. موتخصیصلر اینانیرلار كی اوشاقلارین رفتارین پیسدن یاخشی‌یا تبدیل ائله‌مك اوچون, اوّلده گرك بیر ایش گؤرك كی اوندا یاخشی حیسّ یارانسین و یاخجیلیغا طرف تشویق اولسون. چونكی بو پیس احساس سیزین داعوازلا داها پیس اولسا اوشاغین رفتارین پیسلتمكدن سونرا آیری نتیجه‌سی اولمایاجاق. بیر آیری نوكته‌ده وار كی یادیزدا اولسون اوشاغا نظم اؤرگتمك اونو كونترول ائله‌مك معناسیندا دئییل. بلكه بو معنایادیر كی اونا اؤز رفتارینی كونترول ائله‌مگی اؤرگه‌ده‌سیز. یاخشی رفتار ائله‌مگه, ایكی یاشلی اوشاغین‌دا انگیزه‌یه احتیاجی وار. او بیلسه كی یاخشی رفتاری باعیث اولاجاق سیزله گؤزل بیر گون سووسون, اونون اوچون بؤیوك انگیزه اولار. 4. موثبت پیشگیرلیكدن ایستیفاده ائدین روانشیناسلار اینانیرلار كی ایكی یاشدان اون یاشا قدر اوشاقلار اوچون تك قالماق موناسیب تنبیه ساییلیر. تك قالماق مودتی 2 دقیقه‌دن 10 دقیقه‌یه قدر دگیشه بیلر. بو مودّتده اوشاغین حقی یوخدور دانیشا, بیر شئی یئیه و یا اوینایا. یاخشیسی بودور كی اوشاق بیر صندل اوستونده و یا اوتاغین گوشه‌سینده اوتورا و بو مودّتده هئچ كسله دانیشمایا, یوخسا تنبیه مودّتی چوخالار. آما بعضاً لازیم اولور كی بو مودّتدن موثبت صورتده اوشاغی آراملاتماغا ایستیفاده اولا. مثلاً حیس ائله‌سز كی اوشاغین حؤصله‌سی گئدیب و ایندی‌دی كی های-كوی سالا, پاتلامانین قاباغین آلماق اوچون اونو خلوت بیر مودّته تشویق ائدین. بو خلوتده او اؤزو ایله كیتاب, پتو و آیری شئیلر ده آپارا بیلر. بو ایشه بویون وئرمه‌سه آرامیشیزی ساخلایین. سیز گرك اوشاغیز اوچون بیر اولگو اولاسیز و شاید پیس اولمایا كی ناراحاتلیغیزی آرادان آپارماق اوچون خلوت بیر اوتاغا گئده‌سیز كی اوشاغین پیس رفتارین گؤرمیه‌سیز. سیز و اوشاغیز آرامیشه چاتاندان سونرا موناسیب رفتار باره‌سینده بیر-بیریزله دانیشا بیلرسیز. 5. اوشاغا قودرت و ایختیار وئرین سیز ده مجبور قالساز رئیسین سؤزونه قولاق آساسیز و اؤزوزدن ایختیاریز اولماسا, نهایتدا یورولارسیز و عوصیان ائدرسیز. اوشاغا اینتیخاب حقّی وئرسز, او ائلیه بیلر كونترول اولموش بیر موحیطده ایسته‌دیگی ایستیقلالا ال تاپسین و بو ایش اونا آرامیش وئرر. اوشاغیزی سیز سئچدیگیز پالتاری گئیمگه مجبور ائله‌مك یئرینه, اونون قاباغینا ایكی دست پالتار قویساز كی بیرینی اینتیخاب ائله‌سین چوخ یاخشی اولار. یئمك و حتّا گئجه ناغیلین واختی‌نین اینتیخابینی اونا وئره بیلرسیز. اوندا گؤره‌جكسیز كی اوشاغین عینادكارلیقلاری باشا چاتدی. ایمكانی وار دئیه‌سیز كی او همیشه ایشتیباه اینتیخاب ائلیر. آما یاخشیسی بودور كی جریانا بئله باخمیه‌سیز. باخین گؤرون هانسی یاخشیدیر؟ بو كی سیز اونا ایجازه وئره‌سیز صوبحانه‌یه ژئله یئسین یا بو كی سیزدن خبرسیز تختی‌نین آلتیندا ژئله یئسین؟ . . . پس چوخدا چتین توتمایین و ایجازه وئرین ضررلی اولمایانا قدر ایختیار صاحیبی اولسون و اوندان لذّت آپارسین. 6. اوشاغیزین یاشینا و شراییطینه احتیرام قویون اوشاقلارین هر یاشدا بیر سئری خصوصیتلری وار كی گونده‌لیك برنامه‌لریزی اونونلا تنظیم ائله‌سیز داها آز موشكوله چاتاسیز. مثلاً 2 یاشلی اوشاق پاركدا غذا یئمگی, آرام رستوراندان داها چوخ سئور. پس ائشیكده غذا یئمك قصدیز اولسا و یا بیری‌ایله قرار قویساز اوشاغین یاشینی نظرده آلین و ائله بیر شراییط اینتیخاب ائدین كی او راحت اولسون. شاید سیز ده ائله بیر شراییطده اولاسیز كی اوشاغین دیر-دیرینا حؤصله‌ز اولمایا. والدینین‌ده بیر سئری موشكوللری اولا بیلر كی آرامیشه احتیاجلاری اولار. سیز ده بو شراییطده اولساز و اوشاغیز آز یاشلی اولسا و سیزین شراییطیزی درك ائله‌مه‌سه, ائلیه بیلرسیز اوشاغین سئودیگی زادلارلا باشینی قاتاسیز. یادیزدا اولسون كی 2 یاشلی اوشاقدان اینتیظاریز اولمامالیدیر سیزی درك ائده. سیز كی توكلریزی بو دونیادا آغاردیبسیز, اونا دا فورصت وئرین سیزین كناریزدا شیرین یاشاییشی تجروبه ائله‌سین. | ||
