یئمكدن بیلا فاصیله سونرا دیشلریزی میسواكلامایین*Yeməkdən bilafasilə sonra dişəlrizi fırçalamayın
یازار : میرزه عبدالصمد ملکی | بؤلوم : ساغلاملیق
+0 به یه ن
 |
||
|
یئمكدن سونرا یاریم ساعته قدر دیشلری میسواكلاماق اونلارا جیدّی ضرر یئتیره بیلر. اسیدلی ماده‌لر یئیه‌ندن سونرا, بو اسید دیشلرین میناسینی و اونون ایچ لایه‌سینی خرابلایا بیلر. تلگراف روزنامه‌سی‌نین وئردیگی معلوماتا گؤره, دیشلرین میسواكلاما واختی موناسیب اولماسا یعنی یئییب ایچمكدن سونرا یاریم ساعتدن تئز اولسا, غذاداكی اسید دیشلرین داها درین لایه‌لرینه نفوذ ائلر و اونو تئز چورودر. بونا گؤره دیش دؤكتورلری توصیه ائلیرلر كی مخصوصاً اسیدلی و ادویه‌لی غذالار یئیه‌نده, حتماً یاریم یا بیر ساعت دؤزون و سونرا دیشلریزی میسواكلایین تا اسیدلی مادّه‌نین اثری گئتسین. | ||
كندیوان یونسكودا ثبت اولور*Kəndıvan yunsekoda qeyd olur
یازار : میرزه عبدالصمد ملکی | بؤلوم : خبرلر
+0 به یه ن
|
|
||
|
شرقی آذربایجانین فرهنگی میراث, ال ایشلری و توریزم ایداره‌سی‌نین رئیسی بونو دئمكله كی چالیشیریق كندیوان كندی 2014-جن جهانی ثبت اولسون, دئدی: فرهنگی میراث, ال ایشلری و توریزم سازمانی گرك بو كندین ثبتی اوچون آیری كندلردن اوّل ایقدام ائلیه‌ایدی. تراب محمدی بونا ایشاره ائله‌مكله كی كندیوان هوتئلی دونیانین تایسیز مجموعه‌لریندن ساییلیر, آرتیردی: بو هوتئلین بیرینجی فازی شرقی آسیا و اوروپا تورلارینا -كی معمولاً 25-30 نفردیرلر- جواب وئره بیلمیردی كی اومودوموز وار ایكینجی فازین ایشه باشلاماسی‌ایله بو موشكول حل اولسون. او كندیوان هوتئلی‌نین ایكینجی فازی‌نین ایفتیتاح مراسیمینده بونو دئمكله كی شرقی آذربایجانین تاریخی و توریستی پوتانسیئلی یوخاریدیر, مهر خبرنیگارینا دئدی: بو اوستاندا ال ایشلری و توریستی شاخیصلرین هامیسی وار و بو اوستاندا ایكی جهانی ثبت اولموش اثر وار. تبریز بازاری دونیانین ان بؤیوك كرپیجدن دوزلمیش و سقفلی مجموعه و آیری تاریخی مجموعه‌لر كی بو اوستانین توریستی شاخیصلریندن ساییلیرلار. شرقی آذربایجانین فرهنگی میراث, ال ایشلری و توریزم ایداره‌سی‌نین رئیسی بونا ایشاره ائله‌مكله كی كندیوان كندی دونیادا اوچ داشدان یونولموش كندلرین بیریدیر, دئدی: بو كندلرین بیری شیمالی آمریكادا, او بیری توركیه‌ده و اوچونجوسو ده كندیوان كندی‌دیر كی فقط بو كندده عادی یاشاییش جاریدیر و 195 عاییله‌دن چوخ بو داشلارین آراسیندا یاشاییرلار.
او كندیوان هوتئلین ایكینجی فازی‌نین ایفتیتاحینا ایشاره ائدیب دئدی: كندیوان هوتئلی دونیانی تایسیز مجموعه‌لریندندیر كی اوّلجن قراریدی موزه اولسون آما فرهنگی میراث و توریزم سازمانی‌نین تصمیمینه گؤره هوتئل اولدو و اونون بیرینجی فازی 1386-دا ایشه باشلادی. اؤلكه‌نین توریستی مشورت شوراسی‌نین عضوی دئدی: خاریجی توریستلر سئویرلر كی شهرین های-كویوندن اوزاقدا, تاریخی و كند ائولرینده قالسینلار. محمدی بونو دئمكله كی بیز بو هوتئلی دوزلدنده شایعه سالدیلار كی بیزیم قصدیمیز وار كندلیلری بوردان كؤچورداق, ایدامه وئردی: گلن آیدان كندیوان یئرلری‌نین هامیسینا سند وئریله‌جك و كندیوان اؤلكه‌نین بیرینجی كندی اولاجاق كی رسمی سندی وار. او آرتیردی: بو كندده صنعتی فاضلاب سیستمی, سیم‌سیز اینترنت و برق وار آما تاریخی بینالاردان موغایات اولماق اوچون اورا گاز چكماق اولماز كی البته تازا كندده بو مسأله نظرده آلینیب. او ایدامه‌ده توریستلرین آرتیق جذبینه گؤره هوتئل‌لرین اوجوزلاشماسین ایسته‌دی. شرقی آذربایجانین فرهنگی میراث, ال ایشلری و توریزم ایداره‌سی‌نین رئیسی آرتیردی: كندیوانین داش هوتئلی‌نین ایكینجی فازیندا بیر میلیارد تومن خرجله‌نیب كی پیمانكارا تاپیشیریلسایدی 10 میلیارد تومنینن‌ده قورتولمازدی.
| ||
دونیانین ان قدیمی ساخسی‌سی چینده تاپیلدی*Dünyanın ən qədimi saxsısı çində tapıldı
یازار : میرزه عبدالصمد ملکی | بؤلوم : تاریخ
+0 به یه ن
|
|
||
|
باستان‌شیناسلار اعلام ائله‌دیلر كی چینین جیانگژی اوستانیندا ان قدیمی ساخسینی تاپیبلار. اتریش خبرگوزاریسی تخصوصی ساینس مجله‌سیندن وئردیگی معلوماتا گؤره, بو بین‌المیللی تحقیق تیمی ائلیه بیلیب چینده بیر ماغارادا دونیانین ان قدیمی ساخسی‌سین كی 20 مین ایل عؤمرو وار, سینیق شكیلده تاپسین. بو قطعه‌نین عؤمرو قاباقجادان تاپیلمیش سرامیك پارچاسیندان 2-3 مین ایل داها چوخدور. بو كشف بونو گؤرسه‌دیر كی موجود تصوّره گؤره ساخسی دوزلتمك, اكینچیلیكله بیرلیكده 10 مین قاباقدان باشلاماییب بلكه اوندان قاباقجادان‌دا واریدی. چوخلو نیشانه‌لر وار كی بوزلاق دؤورونون آداملاری موختلیف یوللارلا چالیشیبلار كی قیتلیغا دوشن یئمكلری داها یاخشی ذخیره ائله‌سیلر. | ||
شرقی آذربایجان یوللاری‌نین یوزده قیرخی‌نین تعمیره احتیاجی وار
یازار : میرزه عبدالصمد ملکی | بؤلوم : خبرلر
+0 به یه ن
|
|
||
|
شرقی آذربایجاندا 220 كیلومتر آزاد یول, 292 كیلومتر اوتوبان, 1036 كیلومتر اصلی یول و 1775 كیلومتر فرعی و كند یولو واردیر كی اؤلكه‌میزین اصلی حمل و نقل دامارلاریندان حئسابا گلیر. آذربایجان منطقه‌سی ژئوفیزیك و ژئوپولتیك شراییطه گؤره اؤلكه‌نین موهوم منطقه‌لریندن ساییلیر. آذربایجانین گؤزل چؤل‌لری, داغلاری و دره‌لری‌ده بو منطقه‌یه طبیعی جاذیبه‌لر وئریب و اونو عظیم توریستی منطقه‌یه چئویریب. اوندان علاوه آذربایجان, اؤلكه‌میزین موهوم اكینچیلیك و صنایع قوطبلریندن ساییلیر. شكسیز بو ایمكانلاردان ایستیفاده ائتمك اوچون موختلیف زمینه‌لرده آلت‌یاپیلاری بركیتماغا احتیاج وار كی اونلارین اصلیسی حمل و نقل شبكه‌سی‌نین تقویتی و اونون بین‌المیللی یوللارا باغلانماسیدیر. شرقی آذربایجانین شهرسازلیق و یول ایداره‌سی‌نین كول مودیری, اروجعلی علیزاده, فارس خبرنیگارینا دئدی: سویق بیر قیشی دالیدا قویدوغوموزا دیقّت یئتیرمكله كی ایلین لاپ یاغینتیلی فصلینه شاهید ایدیك, اوستان یوللاری مخصوصاً داغلیق منطقه‌لر و دؤنگه یوللاری‌نین اوزلری آرادان گئدیب و تعمیره احتیاجی وار. علیزاده آرتیردی: بو مسأله اوچون 40 ایلا 50 میلیارد تومنه احتیاج وار. او عئین حالدا اعلام ائله‌دی كی بو ایل اوستانی و سراسری اعتیبارلاردان فقط 10 ایلا 15 میلیارد تومن بو قیسمته ایختیصاص تاپیب. او آرتیردی: بو تخصیص تاپان بودجه چوخ آزدیر كی تعمیرلره كیفایت ائله‌میه‌جك. اونا خاطیر آرتیق ضررین قاباغین آلماقدان اؤترو تعمیر لازیم اولان یئرلره قیر سپمیشیك كی آسفالتین چاتی بؤیومه‌سین. او بونا ایشاره ائله‌مكله كی گرك بو بؤلومون اعتیبارلاری‌نین 6 درصدی ساخلاماق بخشینه ایختیصاص تاپا, دئدی: كئچن ایل بو بخشین اعتیبارلاری 12 میلیارد تومنیدی. | ||
نفس چكمه‌دن دیری قالماق مومكون اولدو*Nəfəs çəkmədən diri qalmaq mümkün oldu
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
آمریكالی عالیملر بیر یول تاپیبلار كی اوكسیژن بیر باشا قانا تزریق اولور و اینسانی, بؤحرانلی واختلار و نفس چكه بیلمه‌ین زمانلار دیری ساخلیر. ساینس دیلی‌نین وئردیگی معلوماتا گؤره, بو یول ائلیه‌بیلر موتخصیصلره كؤمك ائله‌سین كی جراحلیق زمانی و یا آیری بؤحرانلی واختلار تنفوس دستگاهی اولمادان, مصدومی 30 دقیقه بویوندا دیری ساخلاسینلار. دؤكتور جان خیر (John Kheir) و همكارلاری, بوستون اوشاقلار مریض‌خاناسیندا, بو ایشی گؤرمك اوچون, صوتی امواجدان ایستیفاده ائدیب اوكسیژنی چوخ نازیك یاغ سلول‌لارین(پیتید) ایچینه قویورلار و بو ماده‌نی بیر باشا قانا تزریق ائلیرلر. انگیزه‌یه تبدیل اولان اؤلوم دؤكتور خیر 2006-جی ایلده شیدّتلی ذات‌الریه اثرینده آغ جیگرلری صدمه گؤرن بیر اوشاغا یئتیشیردی كی قانی‌نین اوكسیژنی چوخ یئنمیشدی و دؤكتورلرین چالیشمالارینا رغماً, تنفّوس دستگاهینا یئتیشینه قدر اؤلدو. بو اوشاغین اؤلومو بیر انگیزه اولدو كی دؤكتور خیر, قانا اوكسیژن یئتیرمك اوچون داها یئیین یول تاپسین. البته 100 ایل قاباق بو ایش آزماییش اولموشدو آما خالیص اوكسیژنین قانا تزریق اولماسی دامارلاردا خطرلی گازلار تولید ائله‌مه‌سینه گؤره بو تجروبه شیكست یئمیشدی. بونا گؤره دؤكتو خیر چالیشدی كی بیر مادّه‌دن ایستیفاده ائلیه كی اوكسیژنی اؤزونده ذخیره ائلیه و سونرا دامارلاردا آزاد ائله‌سین. بئله‌لیكله دؤكتو خیر و همكارلاری 2 ایلا 4 میكرومتر اندازه‌سینده اولان پیتیدلردن ایستیفاده ائدیب اوكسیژنی بو میكرو مولكول‌لارین ایچینه یئرلشدیریب بیر محلول اله گتیردیلر. دؤكتور خیر دئییر: بیز بیر-بیرمیزین قانینی چكیب اوكسیژنین آلاندان سونرا آزماییش لوله‌سینه تؤكوردك. اوكسیژن تركیبین قانا آرتیراندا, فورآ اوكسیژنسیز آبی قانین رنگی, قیرمیزیا دؤنوردو و بو بیزیم ایشیمیزین موفق اولدوغونو گؤرسه‌دیردی. سونراكی ایللرده, اونلار موختلیف آزماییشلرله بو نتیجه‌نی داها دا یاخشیلاشدیردیلار. بو محلول حیوانلار اوستونده موفّقیّتله آزماییش اولدو و تزریقدن سونرا حیوانلاری 15 دقیقه دیری ساخلایا بیلدی. و نهایتده بو یول اینسان اوستونده‌ده آزماییش اولدو و اوكسیژنین اثری تقریباً 30 دقیقه اینسانین قانیندا قالدی. گر چی اوندان آرتیق ایستیفاده اولاندا قانا صدمه وورور. | ||
