یئر قورتو كیچیلدی !! * إحتقرت دودة الأرض !!
یازار : میرزه عبدالصمد ملکی | بؤلوم : اجتماعی
+0 به یه ن
 |
||
|
یئر قورتو كیچیلدی و كیچیلدی !! سونرا گولوب دئدی: ائی اینسان آلچاق كؤنول اول و موتكبیر اولما . . سیز قبیرده منیم یئدیگیم طعامدان سونرا هئچ نه دئییلسیز . . .!!
إحتقرت دودة الأرض !! إحتقرت دودة الأرض ,,!! فضحكت و قالت تواضعووا یا بشر و لا تتكبروا ,,, فما أنتم سوى وجبة طعامی فی القبر ,,, !!! |
||
ایسلام دونیا گؤروشونده خانیملارین مقامی
یازار : میرزه عبدالصمد ملکی | بؤلوم : دین
+0 به یه ن
|
||
|
ایسلام فلسفی نظردن و خیلقتین تفسیرینده خانیما تحقیر گؤزو ایله باخمیر و بوجور نظریه‌لری ردّ ائدیر. تاریخ بویو آروادلارا ظولم اولاندان سونرا و اونلار كولفتلیگه چكیلندن سونرا, ایسلام گونشی پارلاماغا باشلادی و اونا عادیلانه حقلر وئردی و اونا اولان ظولملری اوندان اوزاقلاتدی. آروادی اسارتدن قورتاردی و اونونلا اینسانی و یاراشان رفتار ائتدی. ایسلام اون‌دؤردونجو عصرده موسلمان خانیما یاشاماق, ایرث آپارماق, مالكیت و تعلیم حقّی باغیشلادی. آما مخلوقاتین گله‌جگینه حكیم اولان آللاه بویورور: كیشیلرین آروادلارا نیسبت تسلّوطی واردیر اونا گؤره كی آللاه بعضیلرین بعضیلره اوستون ائدیب و هم اونا گؤره كی كیشیلر اؤز ماللاریندان آروادلارا نفقه وئره‌لر. عین حالدا آللاه تعالا بویوروب: كیشی و آرواد بیر جینسدندیلر و آرالاریندا تقوا و یاخشی عمللردن سونرا فرق یوخدور. آللاه هئچ بیر‌ی‌نین عمللرینی ضایع ائله‌مز. قورآن آدامین (ع) بهشت ناغیلینی دئییر, آما هئچ‌واخت دئمیر كی شیطان و یا ایلان حوّانی و سونرا حوّا آدامی توغلادی. قورآن نه حوّانی اصلی گوناهكار تانیتدیریر و نه اونو حسابدان چیخاردیر. بئله‌لیكله قورآن راییج اولان غلط بیر فیكیرله موباریزه ائدیر و بو معنا ایله كی آرواد بالاجا شیطاندیر موباریزه ائدیر. ایسلام صراحتله دئییر كی یئر-گؤی, بولوت و یئل, بیتكی و حیوان هامیسی اینسان اوچون یارانیب. ایسلام دئییر آرواد و كیشی بیر بیرلری اوچون یارنیب. آروادلار سیزین بزك و اؤرتوكلریز و سیز اونلارین بزك و اؤرتوكلریسیز. |
||
نیه قیزلار ائولنمیرلر؟
یازار : میرزه عبدالصمد ملکی | بؤلوم : اجتماعی
+0 به یه ن
|
||
|
اطرافیمیزدا اولان سوبایلارین چوخ آزی منطیقلی و مؤحكم سببلره گؤره سوبای قالماغی ترجیح وئریرلر و او بیریلری بو شراییطی مجبوراً و یالانچی سببلره گؤره تحمّول ائدیرلر. بو افرادین فورصتلره «یوخ» دئمكلری‌نین اصلی عامیلی عادتلر و قورخولاردان قایناقلانیر. سیز ده اوخشار دلیل‌لره گؤره سوبایلیق عالمینده قالمیش اولساز, یاخشی اولار یاشاییشیزا بیرده باخاسیز و منطیقلی دلیل‌لر اساسیندا تازادان تصمیم توتاسیز. ایشله‌مگی حددن آرتیق سئویرسیز؟ شاید ایشله‌مگی او قدر سئویرسیز كی ایش موفقیّتینی هر شئیدن اوستون توتورسوز. بیر عیده وار كی قیرخ-اللی یاشلارینادك میزلری اوستونده‌كی پرونده‌ایله یاشیرلار, گؤره‌سن اونلار دوغرودان‌دا خوشبختدیلر؟ چاره‌سی نه‌دیر؟ سیز بیر خانیم اولساز كی ایندیه‌دك بوتون یاشاییشیز ایشیز اولوب. قرار دئییل كی ائولنمك همن خانه‌نیشین اولاسیز. اؤزوزه ائله بیر كیشی سئچمه‌لیسیز كی سیزین ایشیزی درك ائده و شراییطی نظرده آلا. اگر ایسته‌میرسیز كی یولون یاریسیندا هم اؤزوزو و هم اونو نا اومید ائده‌سیز, پس چالیشین كی سیزه گلن ائلچی‌یه هدفلر و شراییطیزدن دقیق تصویر وئره‌سیز. و البته بو كیفایت ائله‌مز. سیز اؤزوز ده دگیشمگه حاضیر اولمالیسیز. سیز قبول ائله‌مه‌لیسیز كی ائولَنَندن سونرا شراییط دگیشه‌جك و قاباقكینا تای اولمایاجاق. ائله ایستانداردلاریز وار كی اونلاری دگیشمگه حاضیر دئییلسیز؟ شاید گله‌جك یولداشیز باره‌ده مؤحكم معیارلاریز وار كی اونلار سیزین اوچون حیاتی ساییلیرلار. احتیمالاً سیز اطرافیزداكی كیشیلرین ایرادلارین گؤرورسوز و اورگیزده دئییرسیز كی من اولسام بئله كیشی ایله ائولنمزدیم. و اوردان كی سیزین ده ائلچیلریز همن بو یئر كوره‌سیندندیلر و اونلارین‌دا بوجور عیبلری اولا بیلر, اونلارا «بلی» دئیه بیلمیرسیز. چاره‌سی نه‌دیر؟ صؤحبت بیر عؤمور یاشاماقدان گئدیر. حتماً سیزین معیارلاردان بیگانه بیرینه «بلی» دئیه بیلمزسیز. آما بو معیارلارا گؤره تك قالماغی بوینوزا آلمامیشدان قاباق اؤزوزه و معیارلاریزا دیقّتلی باخین. اوّلده اؤز ضعفلریزی و ایرادلاریزی نظرده آلین. سونرا سیزی بیر عؤمور تك ساخلایان معیارلاری اهمیّت ترتیبی ایله یازین. باخین گؤرون بو خصوصیتلرین هانسی‌سیندان واز كئچه بیلرسیز. و هانسیلاری واز كئچمه‌لی دئییل. ایندی ائلچیلریزه باخین. شاید اونلارین بیرینده منفی خصوصیتلرین نئچه‌سی اولا آما اونون شخصیتی‌نین اساس حیصه‌سی اولمایا. اوندا اولان بو خصوصیتلرین رنگی آز اولسا شاید یاخشی اولار بو موریدده آرتیق دوشونه‌سیز. دوستلاریزلا اولماق سیزه كیفایت ائلیر؟ دوستلارسیز یاشایا بیلمه‌ین اینسانلار اوچون ائولنمك محدودیّت معناسیندادیر. اونلار قبول ائیله بیلمزلر كی ائولنَندن سونرا, دوستلاری‌نین دؤره‌سینه خط چكمه‌لیدیلر. چاره‌سی نه‌دیر؟ بئله بیر اینسان اولساز, ائولنمك سیزه چتین گلر. آما یاخشی اولار بیر مودّت سونرانی دوشونه‌سیز. بو صمیمی دوستلار ها واختادك سیزینن اولاجاقلار؟ تجروبه نیشان وئریب كی اینسانلاری بیر-بیرینه باغلاماغا داییمی و موشترك منفعتلر لازیمدیر كی دوست گروهوندا بو مسأله دواملی اولماز. البته ائولنمك دوستلاردان قیریلماق معناسیندا دئییل. داها یاخشی موقعیّت آختاریرسیز؟ نظریزه بئله گلیر كی بیرینه «بلی» دئمك او بیریلره «یوخ» دئمك معناسیندادیر و بونا خاطیر تصمیم توتانمیرسیز؟ شاید بئله گومان ائلیرسیز كی داها یاخشی فورصتلر قاباغا گله‌جك و سیزین لیاقتیز بوگونه‌دك اولان ائلچیلریزدن داها یوخاریدیر. چاره‌سی نه‌دیر؟ داها یاخشی موقعیته قطعی حؤكم صادیر ائله‌مك اولماز. شاید سیزین حقّیز اولا و ایندی‌كی ائلچیلریزدن داها لیاقتلیسی اولا. آما بیر آز منطیقلی باخساز گؤره‌جكسیز كی اولا بیلر همان لیاقتلی ائلچی گله و سیز اوندان‌دا لیاقتلینی گؤزله‌مك باهانیسنا اونا دا یوخ دئیه‌سیز! اَن یاخشی اولماق فیكرینی باشیزدان آتین. یازدیغیز اولویّتلره باخین و چالیشین او اساسدا اینتیخاب ائده‌سیز. بوندان كی بیر واقعیتی بیلسین قورخورسوز؟ شاید سیزین و خانیواده‌زین چوخلی فرقی اولا. شخصی عقیده‌لردن توتدی ایجتیماعی یاشاماق سبكلرینه‌دك. خانیواده‌نین سیزه پیشنهاد ائله‌دیگی ائلچی سیز دئیَن دئییل و سیزی تانییان آیری ائلچی خانیواده‌زی تانیمیر. نظزریزه بئله گلیر كی خانیواده تانیتدیران ائلچی‌یه «بلی» دئسز بیر عؤمور یازیق اولاجاقسیز و خانیواده‌زی تانیمایان ائلچی‌یه «بلی» دئسز خانیواده‌زدن آیری و اوزاق قالمالی اولاجاقسیز. چاره‌سی نه‌دیر؟ كیریخمایین. ائولنمك بوتون بیر پاكت كیمیدیر كی ایچینده‌كیلرین بعضیسینی سئچه بیلمزسیز. سیزین دوستلاریز و خانیواده‌ز و اونون دوستلاری و خانیواده‌سی بو پاكتین ایچینده‌دیر. ایسته‌سز كی موفّق یاشاییشیز اولسون بو شراییطین هامیسی ایله اوز به اوز اولمالیسیز. ائلچیلریزه خانیواده‌زین شراییطی باره‌ده دانیشین و فرقلری آیدینلادین. اونا دئیین كی خانیواده و رابیطه‌لریزی ساخلاماق سیزه اساسلی اهمیتی وار و سیزین كناریزدا خوشبخت اولماق ایسته‌سه بو فرقلری قبول ائتمه‌لیدیر. بئله فیكیر ائله‌مه‌یین كی بو خط نیشان چكمكله اؤزوزو ارزیشدن سالیبسیز. عزیزلریزه و شراییطیزه وئردیگیز اهمیّت, اونون نظرینده سیزین ارزیشیزی نئچه برابر ائلیر. |
||
تراختور سوپر لیگ جاده‌سینده, یولونا احتیاطلی باشلادی
یازار : میرزه عبدالصمد ملکی | بؤلوم : عمومی
+0 به یه ن
|
||
|
تراختورو 11 هفته بویونداكی اویونلارینا بیر باخیش سالاندا, تكجه ایكی اویون اودوزسا دا اوست-اوسته مطلوب نتیجه‌لر آلمادیغی اورتایا چیخیر. آما اوچ ایمتیاز آلیب, جدولین یوخاری باشیندا اوتوران تیمله فاصیله‌سینی یوخ ائتمك بو پارلاق تیمدن گؤزلنیله بیلن مسأله‌دیر. گلین تراختورون 11 هفته بویونداكی اویونلارینا بیر نظر سالاق: بیرینجی هفته: تراختور سایپایا بیر ایمتیاز وئردی. تراختور اؤز ائوینده اویناسا دا اویونا احتیاطلی باشلادی و سایپا موقابیلینده هئچ هئچه برابر اولدو. ایكینجی هفته: تراختور پیكاندان بیر ایمتیاز آلدی. تراختورسازی پیكانلا بیر-بیره اولدو آما یئدیگی قول تراختورچولاری ناراحات ائتدی چونكی بو جور قول یئمك تراختورا یاراشمیردی. اوچونجو هفته: تراختور كرمان میسی‌نی آیاقلادی. اویونون ایكینجی یاریسی‌نین باشلانیشیندا تراختور 10 نفر اولسا دا حریفین عؤهده‌سیندن گله بیلدی و ایكی بیره غالیب گلدی. دؤردونجو هفته: تراختور تهرانین راه‌آهنین بیر هئچه دالیدا قویدو. بو اویوندا احسان حاج صفی گؤزل بیر قول ووردو. بئشینجی هفته: تراختور آبادانین نفتینه غالیب گلدی. بو اویونون آخیرلرینده تراختور ایقتیدارلا آبادانین نفت تیمینه اوچ ایكی‌یه غالیب اولدو و جدولین ایكینجی روتبه‌سینده یئر آلدی. آلتینجی هفته: تراختور بو اویوندا داور و ذوب آهن تیمینه اوتوزدو. اصفهاندا اوینانان بو اویون تراختورون ضررینه اولان آجی نتیجه ایله یعنی اوچ بیره باشا چاتدیریلدی. بو اویوندا تراختورون موسلّم پئنالتیسی توتولمادی. یئددینجی هفته: تراختور بو اویوندا قومون صبا تیمی‌نین قارشی‌سیندا دایاندی. بو اویون تبریزه اولسا دا هئچ هئچه باشا چاتدی. سككیزینجی هفته: تراختور و انزلی‌نین ملوان تیمی, بیر بیره موساوی اولدولار. ملوان تیمی اؤز قولونو پئنالتی نوقطه‌سیندن وورسا دا تراختور ایكینجی یاریدا اونو جوبران ائتدی. دوققوزونجو هفته: تراختور زاگروسون «گهر» تیمینی دارما-داغین ائتدی, بئش هئچه ! بو تیمین داها آرتیق قول یئمگه ایشتهاسی واریدی آما رقیب سوپر لیگدن كوسمه‌سین دئیه, تراختور اوندان آرتیق قول وورماق ایسته‌مه‌دی. اونونجو هفته: تراختور بیرینجی دفعه اولاراق شیرازین فجر سپاسی تیمینه اوتوزدو, بیر هئچه. شراییط او جومله‌دن اویون میدانی تراختور سئون شراییط دئییلدی. اون بیرینجی هفته: تراختور یئنه‌ده تهرانین نفت تیمینی اودانمادی, بیر بیره. اویونون باشلانیشیندا تراختور بیر هئچه قاباغا دوشموشدو آما بو غالیبیّتی ساخلایا بیلمه‌دی. تراختور دالیدا قویدوغو 11 اویوندا: 4 اویون اودوب 5 اویون موساوی اولوب 2 اویون اودوزوب و بو گون تراختور 15 قول ووروب و 10 قول یئمكله 17 ایمتیاز الده ائدیب و جدولین یئددینجی روتبه‌سینده دایانیب. تراختور اون ایكینجی اویونونو تبریزده و تهرانین ایستیقلال قارشی‌سیندا اوینایاجاق.تراختور و ایستیقلال بیرینجی دفعه 1354-ده اویناییبلار و او اویوندا تراختور بیر هئچه غالیب اولوب. اون ایكینجی لیگده تراختور 17 ایمتیازلا جدولین یئددینجی روتبه‌سی و ایستیقلال 19 ایمتیازلا جدولین دؤردونجو روتبه‌سینده یئر آلیبلار. |
||
وبلاگ اوغرولاری نین برنامه سی
یازار : میرزه عبدالصمد ملکی | بؤلوم : عمومی
+0 به یه ن
|
|||||||||||||
|
بیر عیده اؤز عالملرینده وبلاگلاری چالیب اوغرولاماق اوچون نقشه برنامه تؤكورلر بیری ده بودور:
اونلار بو پیامی منه گؤندریرلر كی شاید یوزرنئیم پسووردومو اؤرگشسینلر
|
|||||||||||||