din xadimi دین خادمی

شرقی آذربایجانین اوستانداری: تبریز-باكی رابیطه‌لرین تقویتی‌نین اولویّتی وار

شرقی آذربایجانین اوستانداری اومیدوارلیق ایبراز ائله‌دی كی بو اوستانین ظرفیتلرین اؤلكه‌ خاریجینده تانیتدیرماقلا, ایرانین خاریجی رابیطه‌لری و مخصوصاً ایقتیصادی حوزه‌ده قونشو اؤلكه‌لرله چوخالا. فارسین وئردیگی خبره گؤره, احمد علیرضابیگی شرقی آذربایجان و آذربایجان جومهوریسی آراسیندا رابیطه‌لرین چوخاتماق ایجلاسیندا -كی جومهوری ایسلامی‌نین بو اؤلكه‌ده‌كی تازا سفیری‌نین حضوری‌ایله بو اؤلكه‌ده برگوزار اولونوردو- تبریز و باكی‌نین قدیم رابیطه‌لرینه ایشاره ائله‌مكله دئدی: موختلیف زمینه‌لرده بو رابیطه‌لری و همكارلیقلاری گوجلندیرمك, اوستان مودیریتی‌نین اولویّتینده‌دیر و بو زمینه‌ده آذربایجانلی طرفله یاخشی موذاكیره‌لر و ییغینجاقلار اولوب. او بونا ایشاره ائله‌مكله كی جومهوری ایسلامی و آذربایجانین همكارلیقلاری‌نین چوخالماسی هر ایكی طرفین منفعتینه‌دیر, دئدی: شرقی آذربایجان اؤلكه‌نین شیمال غرب صنعتی و علمی قوطبی كیمی ائلیه بیلر بو زمینه‌ده تعیین ائدن همكارلیقلار ائله‌سین. علیرضابیگی ایرانین قاباقكی سفیری محمدباقر بهرامی‌نین زحمتلریندن قدردانلیق ائله‌مكله, موختلیف زمینه‌لرده آذربایجان جومهوریسی‌ایله رابیطه‌لرین گئنیشلندیرمكده شرقی آذربایجانین كامیل حاضیرلیگینی اعلام ائله‌دی و آرتیردی: شرقی آذربایجانین ایجرایی دستگاهلاری و خصوصی بخشی حاضیردی كی ایرانین باكیداكی سیفارتی‌ایله ایكی اؤلكه‌نین ایكی طرفلی رابیطه‌لرین گوجلنمه‌سی اوچون همكارلیق ائله‌سین. بو ایجلاسدا كی اوستاندارین برنامه‌ریزلیق موعاوینی و خاریجی ایشلری ویزارتی‌نین اوستانداكی نوماینده‌سی‌نین حضوری واریدی, ایقتیصادی و دارایی ایشلری, یول و شهر سالما, منطقه سویو, صنعت, معدن و تیجارت, حمل و نقل و ترمیناللار, گومروك ناظیرلری, تبریز و علوم پزشكی دانیشگاهلاری‌نین رئیسلری و مودیرلری, و هابئله جلفا, خداآفرین فرماندارلاری و آراز آزاد تیجاری صنعتی منطقه‌نین موعاوینی آذربایجان جومهوریسی‌ایله رابیطه‌لرین چوخالماسی باره‌ده نظرلرین دئدیلر.

	دونیانین اَن تمیز اؤلكه‌لری
بو اؤلكه‌لرده موحیطی تمیز ساخلاماق هامی‌یا واجیبدیر و هئچ كس شهر و یا طبیعتین تمیز ساخلاماسینی شهرداری‌نین بوینونا آتمیر. موحیطی ساخلاماق و اونو گله‌جك نسله چاتدیرماق بشریّتین موهوم هدفلریندن بیری ساییلیر كی بو هدف ایقتیصادی توسعه چوخالدیقجان خطره دوشور. قاباغا گئتمیش اؤلكه‌لرین بعضیسی موحیطه چوخلو ضررلر وورورلار كی اونلاردان چین, آمریكا و هندی نمونه سایماق اولار. آما دونیادا بعضی اؤلكه‌لر وار كی هم ایقتیصادی جهتدن قاباغا گئدیرلر و هم یاشاییش موحیطینی تمیز ساخلیرلار. بو اؤلكه‌لرده موحیطی تمیز ساخلاماق هامی‌یا واجیبدیر و هئچ كس شهر و یا طبیعتین تمیز ساخلاماسینی شهرداری‌نین بوینونا آتمیر. نمونه اولاراق اسكاندیناوی اؤلكه‌لرینده هر شخص اؤزو تولید ائله‌دیگی زیبلین محو اولان لحظه‌یه‌دك مسئولودور و زیبیللری آییرماق و مودیریتی بیر حدده‌دك اونون اؤز بوینونادیر. بو اؤلكه‌لرده موحیطی تمیز ساخلاماق بیر فرهنگدیر و بو اؤلكه‌لر دونیانین اَن تمیز اؤلكه‌لری ساییلیرلار. تأسوفله آسیا اؤلكه‌لری او جومله‌دن بیزیم اؤلكه‌ ده یاشاییش موحیطین دوزگون مودیریّتین اولماماسینا گؤره یاخشی روتبه‌ده یئر آلمیر.        ردیف اؤلكه یاشاییش موحیطین قالارگی توسعه شاخیصی 1 فنلاند 75.1 2 نروژ 73.4 3 سوئد 71.7 4 ایسلند 70.8 5 كانادا 64.4 6 سوئیس 63.7 7 اتریش 62.7 8 استرالیا 61 9 نیوزیلاند 60.9 10 ایرلند 59.2

فیزیك مؤعجیزه‌سی: هر شئیی سیندیرماق اوچون اونو دوندورماق كیفایت ائلر

امنیّتچی‌لرله اوغورلولارین ساواشی‌ همیشه داوام ائلیر؛ آما جالیب بوراسیدیر كی بیر ایش یوخدور كی قیفیل دوزلدنلر ائله‌سینلر و بو ساواشدا غالیب اولسونلار. مؤحكم, برك و اینعیطافلی؛ بونلار ائله سؤزلردیلر كی معنالاری دئییلن یئرلرینه گؤره دگیشیر. مثلاً اونلاری بیر چمدان باره‌سینده ایشلتسك, هامیسی‌نین تقریباً بیر معناسی اولور. آما موختلیف ماده‌لرین فیزیكی خصوصیتلری باره‌ده دئییلسه‌لر بو سؤزلرین هر بیری‌نین اؤز معناسی اولار. اَن یاخشی قیفیللارین‌دا ضعیف نوقطه‌لری وار. تقریباً بوتون ماده‌لر حتّا فولاد اؤز اینعیطافینی سویوق موقابیلینده الدن وئریر. یعنی اونو سیندیرماغا داها آز گوجه احتیاجیز اولار. فلیزلرین موقاویمتی مخصوص دمادان آشاغیدا آزالار. بو دمانین موعیّن اولماسی مئتالوژی علمینه مربوط اولور. شاید اینانمایاسیز, آما همین مسأله باعیث اولدو كی تایتانیك گمیسی بوز داغینا دَیماق اثرینده سینسین و غرق اولسون ! پولاد زنجیر ده بئله اولور. زنجیری سیخیلمیش هاوا ایله (دی فلوئور اتان) ایسپرئیله‌سیز اونون دماسی 25 درجه سانتی‌گراد صفردن آشاغی یئنر و بو حالتده اَن اینعیطافلی زنجیر او قدر سینان اولار كی بیر چكیشله چوخ راحات سینار. پس حقیقتده ائله بیر ایش یوخدور كی قیفیل دوزلدنلر ائله‌سینلر و اوغورلولارا غالیب اولسونلار.

بوش قارینا ورزیش ائتمه‌یین

بیر عیده‌ بئله دوشونور كی توخ قارینا ورزیش ائله‌مك اورك بولانما گتیرر و بعضیلری بئله اینانیرلار كی بوش قارینا ورزیش ائله‌مك داها چوخ یاغین اریمه‌سینه سبب اولار. آغیر غذادان سونرا ورزیش باعیث اولار معده ناراحات اولسون. چونكی بو زمان بدنین بوتون انرژیسی غذانین هضمینه صرف اولور و قان جریانی داها چوخ هضم سیستمینه طرف گئدیر و عضله‌لره آز گئدیر. یاخشیسی بودور كی پروتئنلی, یاغلی و فیبرلری آغیر غذا یئیندن سونرا اوچ-دؤرد ساعته‌دك ورزیش اولمایا. آما یونگول غذادان ایكی ساعت سونرا ورزیش ائله‌مك اولار.

۱,۰۰۰,۰۰۰,۰۰۰ دولار, یئری دلمك اوچون !

چوخداندیر كی عالیملر یئرین قابیغینی دلمگه مشغولدولار, آما هله یئرین اتی‌نین یاخینلیغینا بئله چاتماییبلار. ایندی شوجاعتلی بیر طرح جریاندادیر كی اینسانی یئرین بو یاپیشقان لایه‌سینه چاتدیرا. كیفایت قدر پول و شوجاعتین اولماسی‌ایله دونیانین اَن بؤیوك مته‌سی‌نین اوستونده ایشله‌ین عالیملر ائلیه‌ بیلرلر 2020-ده یئرین اتینه بیر دلیك آچالار و اوندان بیر سئری نمونه‌لر گؤتوره‌لر كی شاید سیاره‌میزین منبعیندن ایپ اوجو تاپالار. پاپ‌ساینسین وئردیگی خبره گؤره, یئرین داخیلینه ال تاپماغا نیسبتاً نازیك قابیغینی دلمك لازیمدیر و اونون اوچون اوقیانوسون تكیندن هئچ اولماسا 6 كیلومتر آشاغی یئنمك گركلیدیر. بو ایش اوچون گرك بیر عظمتلی گمی اوقیانوسون اَن درین نوقطه‌سینده مهار اولا. عالیملرین قصینده اولان بو دلیگین اَنی تكجه 30 سانتی متر اولاجاق, بونونلا بئله بو ایش اوچون بیر میلیاد دولار هزینه لازیمدیر. بو ایش اوچون نظرده آلینان گمی ژاپونون Chikyu گمیسدیر كی ایندیه‌دك اوقیانوسون تكینده 3500 متر درینلیگینده دلیك قازیب. چیكونون بوندان آرتیق درینلیكلره چاتماغا گوجو وار. آما بونونلا بئله یئرین اریمیش مركزینه چاتمامیش گرك قازما تكنولوژیسی یاخشیلاشا. چیكونون مته باشی فقط 60-50 ساعت دوام گتیریر و اوندان سونرا یئرینه تازا مته قویماق لازیم اولور. دیمون تیگل, انگلستانین ساوت‌همپتون دانیشگاهی‌نین عالیمی بو ایشی چوخ چتین ساییر. او دئییر: «ایسته‌سك موقاییسه ائدك, بو ایش اونا بنزیر كی اینسانین توكو نازیكلیگینده بیر پولاد ساپینی بیر ایستخرین تكینه آپاراسان و سونرا اونونلا 0.1 میلی‌متر قالینلیغیندا اولان اوزوگو دله‌سن.» یئر قابیغیندا دلینمیش اَن درین دلیك 12376 متر اولوب كی روسیه‌نین شرقینده قازیلیب. بو دلیك یئرین اتینه چاتماییب و هم‌ده قاییم صورتده دلینمه‌میشدی.(بونو دلمكدن منظور نفته چاتماق‌ایدی.) آما بو دلیك و بونا تایلاری گؤرسدیر كی شاید یئرین مركزینه دلیك دلمك ایمكانلی بیر ایش اولسون.