نمرود اودونون حضرت ابراهیمه (ع) گولوستان اولماسی
یازار : میرزه عبدالصمد ملکی | بؤلوم : دین
+0 به یه ن
نمرود اودونون حضرت ابراهیمه (ع) گولوستان اولماسی
حضرت ابراهیمین (ع) نسبی حضرت آدمه (ع) قدر تورات كتابیندا گلیب. توراتین نسب‌نامه‌لری اسلامی كتابلارا دا یول تاپیب و اصلینه و منشأینه دقّت ائله‌مه‌دن قبول ائدیلیب.
كتاب اهلی‌نین اینادیغینا گؤره، (توراتدا كی یازیلان حادثه‌لری حسابلایاندا) حضرت ابراهیم تقریباً میلاددان ایكی مین ایل اوّل، یعنی دؤرد مین ایل بوندان اوّل، اور شهرینده دنیایا گؤز آچدی. توراتدا یازیلانا اساساً او اوّل‌لر یوخاری مرتبه معناسیندا اولان «ابرام» آدلانیردی. دوخسان دوققوز یاشیندا اولاندا، الله تعالا اونون آدنیی «ابراهیم»ـه (ملّتلر آتاسی معناسیندا) چئویردی.
اور شهری یوز ایل بوندان اوّل عراقدا «فرات» قیراغیندا تورپاق آلتیندان چیخاردیلدی.
توراتین دئدیگینه اساساً حضرت ابراهیمین آتاسی[1] «تارح»، اوغلو ابراهیمی و اونون حیات یولداشی «ساره»-نی و اؤز نوه‌سی «لوط»-و گؤتوروب اؤزو ایله فلسطینین غربینده كنعان یوردونا یوللاندی. اونلار یولدا سفرین ادامه‌سیندن واز كئچیب، ایندی توركیه تورپاقلاریندا یئرله‌شن «حران» شهرینده قالدیلار.
حضرت ابراهیمین (ع) تاریخینده، ایندی‌كی توراتدا اونلارا اشاره اولمایان، ایكی مهم حادثه وار :
1. او حضرتین بت‌لاری سیندیریب اودا آتیلماسی.
2. كعبه‌نین بناسی.
قرآن كریم انبیاء و صافات سوره‌لرینده اونون بت سیندیرماسی و اودا آتیلیب اودون اونون اوچون گولوستانا چئوریلمه‌سی باره‌ده یازیب. بو جریاندا حضرت ابراهیم (ع) بت‌لارین گوجسوز اولدوغونو گؤسترمك اوچون اونلاری سیندیریب، بالتانی بؤیوك بُتین چیگنینه قویوب ثابت ائلیر كی بو جانسیز شئیلر عبادت ائله‌مه‌لی دئییل‌لر. اور پادشاهی نمرود، بؤیوك اودون قالانیب، حضرت ابراهیمی (ع) اونون ایچینه آتیلماسی‌نین امرینی وئریر. اونلارین حیرتلی گؤزلری قارشیسیندا الله-ین اذنی ایله اود سویویوب سؤنور و گولوستانا چئوریلیر.
[1]. قرآندا حضرت ابراهیمین (ع) آتاسی بت پرست آزر ده یازیلسا، شیعه‌نین ایناندیغینا گؤره حضرت ابراهیم (ع) حضرت محمد پیغمبرین (ص) اجدادلارینداندیر و پیغمبریمیزین (ص) بوتون بابالاری حضرت آدمه (ع) قدر بیر الله-ی عبادت ائدیبلر. و انعام سوره‌سی‌نین 74-جو آیه‌سینده صحبتی اولان آزر، حضرت ابراهیمین عمیسی اولوب. عرب دیلینده بعضاً عمی‌یه أب سؤزوندن‌ده استفاده اولونار.
نوح طوفانی‌نین بیتمه‌سی
یازار : میرزه عبدالصمد ملکی | بؤلوم : دین
+0 به یه ن
نوح طوفانی‌نین بیتمه‌سی
حضرت نوح (ع)، الله-ین بیرینجی اولو العزم پیغمبریدیر. اونون رسالت مدّتی قرآنین تصریحینه گؤره دوققوز یوز اللی ایل ایدی و بو مدّتده آز عدّه‌دن سونرا -كی دئییلنلره اساساً 40 نفر كیشی و قیرخ نفر خانیم ایدی- هئچ كس اونا ایمان گتیرمه‌دی و هامیسی كفر و الحاد یولونا گئدیب اونو چوخلو اذیّت ائله‌دیلر. حتّی حیات یولداشی و اوغلانلاریندان بیری اونا ایمان گتیرمه‌دیلر، اورا قدر كی حضرت نوح (ع) اؤز ملّتینی نفرین ائدیب الله-ـا بئله دئدی: «و قال نوح رب لا تذر علی الارض من الكافرین دیارا » ای الله كافرلردن بیر نفری‌ده یئر اوزونده باقی قویما. (نوح سوره‌سی). الله دا، نوحا اونون امری ایله گمی دوزلتماغی و كافرلر حقّینده شفاعت ائله‌مه‌مگی وحی ائله‌دی. «واضع الفلك باعینا و وحینا و لاتخاطبنی فی الذین ظلموا انهم مغرقون»گمی دوزلمه‌سی قورتولانا قدر كافرلر او حضرتی گمی دوزلدركن گؤرنده مسخره ائلیردیلر. دوزَلن گمی اوچ مرتبه‌دن عبارت ایدی: بیر مرتبه‌سی دؤرد آیاقلی‌لاردان اؤترو، بیر مرتبه‌سی قوشلاردان اؤترو و بیر مرتبه‌سی انسانلاردان اؤترو.
طوفانین باشلانما علامتی نوح پیغمبرین ائوی‌نین تندیریندن سو قایناماغیدی. «فلما جاء امرنا و فار التنور» امریمیز چاتاندان سونرا تندیر قاینادی (قرآن كریم) نوح گمیده اوتورماغا، مؤمنلری‌ده میندیریب حیوانلارین هره‌سیندن بیر جوت گمی‌یه میندیرمگه امر اولدو. «قلنا احمل فیها من كل زوج اثنین» اونا، هر زوجدان بیر جوت گمی‌یه میندیرمگی امر ائتدیك.
سو گؤیدن یاغیب یئردن قاینادی و داغلاری بورویه‌نه قدر چوخالدی. نهایتده الله-ین امری ایله گؤی یاغماقدن و یئر قاینماقدان دایاندی و نوح گمیسی آغری داغلاریندا یئر آلان جودی داغیندا آراملاییب، حضرت نوح (ع) مؤمنلرله برابر گمیدن چیخیب اوتوراق ائله‌دیلر. طوفان زمانی یئر-گؤیو سو توتان آنلاردا، نوح اوغلونو سو ایچینده گؤرنده اوندان ایسته‌دی گمی‌یه مینسین. اوغلو جواب وئردی: داغا گئدَرم و سودان آماندا قالارام. نوح دئدی: الله-دان سونرا ساخلایان یوخدور. بو آندا بیر دالغا گلیب اوغلونو غرق ائله‌دی. نوح، الله-ـا عرض ائله‌دی: ای الله بو بالا منیم اهلیمدندیر و سنین وعده‌ن حقدیر. (الله، كافرلری غرق ائدیب نوح اهلینی نجات وئرمگه وعده وئرمیشدی.) الله بویوردو: «انه لیس من اهلك» او سنین اهلیندن دئییل سنی موعظه ائلیرم كی نادانلاردان اولمایاسان. نوح الله‌دان عفو ایسته‌دی.
آیت الله «میرزا صادق آقا مجتهد تبریزی»
یازار : میرزه عبدالصمد ملکی | بؤلوم : دین
+0 به یه ن
آیت الله «میرزا صادق آقا مجتهد تبریزی»
غدیر بایرامی عمل‌لری/ قارداشلیق عقدی
یازار : میرزه عبدالصمد ملکی | بؤلوم : دین
+0 به یه ن
قارداشلیق عقدی، جامعه‌ده‌كی رابطه‌لری گوجلندیرمك اوچون، اسلامین بؤیوك ابتكارلاری‌نین بیری و غدیر بایرامی گونونون مخصوص عمل‌لریندندیر. اسلام پیغمبری (ص) ایكی خاص زماندا هجرتدن اوّل و هجرتدن سونرا مسلمانلارین انسجامینی ساخلاماق اوچون، مسلمانلار آراسیندا قارداشلیق علاقه‌سی یاراتدی و بوتون مسلمانلاری ایكی ایكی بیری بیری ایله قارداش ائله‌دی. پیغمبرین (ص) معیاری مسلمانلارین هر بیری‌نین قارداشینی معیّن ائتمكده، اونلارین خصلتلری‌نین متناسب اولماسی و ایمان درجه‌لری‌نین یاخینلیغی ایدی.
غدیر سؤزو «گؤل» و «یاغیش سویو ییغیشان یئر» آنلامیندادیر. خُمّ غدیری مكه و مدینه شهرلری آراسیندا و «جُحفه» آدلی بیر یئرده‌دیر. اسلام پیغمبری (ص) حجة الوداع حجّینده ذی الحجه‌نین 18-ینده، الله-ین امری اینن اوزون بیر خطبه‌دن سونرا حضرت علی بن ابی طالبی (ع) اؤز وصی‌سی و خلیفه‌سی كیمی جماعته تانیتدیردی.
اسلام پیغمبری (ص) غدیر گونو بیر ساعتلیق خطبه‌دن سونرا «من هر كیمین آغاسی‌یام، علی‌ده اونون آغاسیدیر» سؤزونو اوچ دفعه تكرار بویوردو كی مسلمانلارین و تاریخین قولاغیندا قالسین. حضرت بو گونو بایرام آدلاندیریب مراسمینی یئرینه گتیردی. چادیریندا اَیلَشیب تبریك دئیَنلردن قارشیلادی.
امیرالمؤمنین(ع) و آیری مطهّر اماملار دا (ع) بو گونو عزیز ساییب اونون اوچون عمل‌لر و فضیلتلر ساییبلار:
1. اوروج توتماق كی 60 ایل گناهین كفاره‌سی ساییلیر.
2. غسل ائتمك.
3. امیر المؤمنین (ع) زیارتینی اوخوماق.
4. ایكی ركعت نماز قیلماق.
5. بو گون ندبه دعاسینی اوخوماغا تأكید اولوب.
6. دین قارداشلارینی گؤرنده بو دعانی اوخوماق: الحمدالله الذی جعلنا من المتمسكین بولایه امیرالمومنین و الائمه علیهم السلام.
هابئله بوگونده گؤزل و تمیز پالتارلار گئیینمك، انسانلاری سئویندیرمك، اونلاری باغیشلاماق، صله رحم، پای وئرمك، جماعتین مشكل‌لرینی حل ائتمك، مؤمنلر و دوستلارلا گؤروشمك و پیغمبره (ص) صلوات گؤندرمگه تأكید اولوب.
قارداشلیق عقدینی اوخوماق
قارداشلیق عقدی‌نین اوخونماسی غدیر بایرامی گونونده تأكید اولسا دا بو گونه مخصوص دئییل و ایلین بوتون گونلرینده اونو اوخوماق اولار. بو عقدی هر دیل و سؤزله جدّی اولماق شرطی ایله اوخوماق اولار. آما معمول رسمی بئله‌دیر: انسان الینی دوستونون ساغ الینه وئره و دئیه:
واخیتك فی الله و صافیتك الله فی الله و عاهدت الله و ملائكته وكتبه و رسله و انبیائه و الائمة المعصومین علیهم السلام علی انی ان كنت من اهل الجنة و الشفاعة و اذن لی بان ادخل الجنة لا ادخلها الا و انت معی
سونرا دوست دئیه: قَبلت. سونرا او دئیه: اسقطت عنك جمیع حقوق الاخوة ما خلا الشفاعة و الدعاء و الزیارة.
بئله‌لیكله اونلار ایكیسی معنوی قارداش اولاجاقلار.
عقد صیغه‌سی‌نین متنینده گلدیگی كیمی بو قارداشلیغین اقتضاسی، فقط مقابل طرفی زیارت، دعا و شفاعتده شریك ائله‌مكدیر.
قارداشلیق عقدی اخلاقی بیر تعهّددیر بونا گؤره ایكی طرفین توافقی ایله لغو اولا بیلر و اونون لغوینه مخصوص صیغه یوخدور.
قارداشلیق عقدینده ارث، مَحرملیك و . . . كیمی فقهی احكام یوخدور. یعنی مثلاً ایكی نفر معنوی قارداش اولاندا بیری بیرلریندن ارث آپارمازلار و باجیلاری بیری بیرینه مَحرم اولماز و هابئله بو عقد آغا و خانیم آراسیندا اوخونماز.
سس‌سیزلیك رستورانی
یازار : میرزه عبدالصمد ملکی | بؤلوم : دین
+0 به یه ن
سس‌سیزلیك رستورانی
سس‌سیزلیك، نیویوركدا بیر رستورانی مشهور ائله‌ییب. بو رستورانین مشتری‌لری بیلرلر كی اورانین خصوصیّتی سس‌سیزلیكدیر. بونا گؤره سس‌سیز و های-كویدن اوزاق بیر یئرده یئمك یئمك ایسته‌ینلر بو رستورانا گئدیرلر. بو رستورانین صاحبی دئییر: دینجلیگین و استراحتین بیر یولو دا سس‌سیزلیكده یئمك یئمكدیر. ائله بونا گؤره ده مشتری‌لریمین استراحتی اوچون بو یولدان استفاده ائتمك قرارینا گلدیم و خوشبختلیكله انسانلار بو یولدان استقبال ائله‌دیلر. استقبال او قدر چوخ اولور كی گئجه‌لر رستوراندا بوش میز قالمیر.