معروفا چاغیریب منكردن نهی ائتمك، حقّی و قانونو قوروماق آنلامیندا
یازار : میرزه عبدالصمد ملکی | بؤلوم : دین
+0 به یه ن
معروفا چاغیریب منكردن نهی ائتمك، حقّی و قانونو قوروماق آنلامیندا
معروفا چاغیریب و منكردن نهی ائتمك اسلاما چاغیرماق، تجاوز و ظلمدن ساخلاماق، عمومی ثروتلرین دوزگون بؤلونمه‌سی معناسیندادیر.
جماعتین دقّت و فكری‌نین رشد تاپماسی باعث اولار قانونون دوزگون اجرا اولماسی‌نین هامی اوچون فایدالی اولماسی بیلینسین. نتیجه‌ده انسانی و دینی عاطفه‌لر اونلاری حقسیز و قانونسوزلوق قارشیسیندا دایانماغا وادار ائدر و جامعه انسانلارینی معروفا چاغیریب و منكردن نهی ائتمگه و حقدن دفاع ائدیب قانونو قوروماغا وادار ائلر.
اسلامین اجتماعی نظامیندا بو مسأله‌یه چوخلو تأكید اولوب و هامینی اونون اهمیّتینی بیلمگه چاغریلیب. اسلامین بو مسأله‌یه وئردیگی اهمیّتی بیلمك اوچون نئچه آیه و روایته اشاره ائدیریك:
- سیزدن یاخشیلیقلارا چاغیران و پیسلیكلردن اوزاقلادان بیر امّت یارانمالیدیر و یالنیز بئله انسانلار سعادت و خوشبخلیگه چاتاجاقلار.
- سیز بشریّتین اَن یاخشی امّتی‌سیز. یاخشی ایشلری ترویج ائلیرسیز، قولای و پیس ایشلرین قارشیسینی آلیرسیز و الله-ـا اینانیرسیز. كتاب اهلی‌ده ایمان گتیرسه ایدی، اونلار اوچون داها یاخشی اولاردی. البته اونلارین بعضیسی‌نین ایمانی وار آما چوخو تبهكاردیلار.
- اونلارین هامیسی بیر دئییل، كتاب اهلی ایچینده حقّه باغلی اولانلار دا واردیر. گئجه یاریسیندا سجده ائدیب الله آیه‌لرینی اوخویورلار و الله-ـا و قیامته اینانیرلار، دوزگون ایشلر گؤرورلر و پیس ایشلرین قارشیسینی آلیب و خیر ایشلرده قاباغا دوشورلر. البته بونلار یاخشی آداملار سیراسیندادیلار و هئچ خیر ایش اجرسیز قالمایاجاق. الله، تقوالی انسانلاری تانی‌ییر.
- ایكی اوزلو آروادلار و كیشیلر بیری بیرلری‌نین بئزلری‌نین ایكی رنگی و اوزودولر. بونلار پیس ایشلری ترویج ائدیب یاخشی ایشلرین قارشیسینی آلیرلار.
- ایمانلی و دینلی آرواد و كیشیلر ده بیری بیرلرینه كؤمكدیلر. بونلار خیر ایشلری ترویج ائلیرلر، نماز قیلیرلار، زكات وئریرلر و الله و رسولونونون سؤزونه باخیرلار. الله‌ین رحمتی بونلارا شامل اولاجاق. الله یوخاری مرتبه‌لی و ایش بیلندیر.
اسلامی روایتلرده ده بونون اهمیّتینی بیلدیرن بو باره‌ده چوخلو حال‌لارا راست گلیریك.
پیغمبر (ص) بویورور: منیم امّتیم معروفا چاغیریب و منكردن نهی ائتدیگی گونه قدر همیشه یاخشی وضعیّتده اولاجاق آما بو ایكی عملدن ال چكن آندان اعتباراً بوتون بركتلردن محروم اولاجاق. بیر دسته آیری دسته‌نی استثمار ائلیه‌جك، نه یئرده بیری اونلارین هارایینا چاتاجاق نه گؤیده.
امیرالمؤمنینعلی(ع) بویوروب: الله، اسلام عالملرین او اوزدن دانلادی كی متجاوزلرین فساد و تبهكارلیقلارین عیاناً گؤروردولر آما اونلارین قارشیسینی آلماغا بیر ایش گؤرموردولر چونكی اونلارین باغیشلادیقلارینا طمع سالمیشدیلار غلبه‌سیندن قورخوردولار. بونونلا بئله كی الله دئییب مندن سووای هئچ كسدن قورخمایین. الله دئییر: ایمانلی كیشیلر و آروادلار بیری بیرلرینه كؤمكدیلر، یاخشی ایشلری ترویج ائدیب پیس ایشلرین قارشیسینی آلیرلار.
الله، اونون طرفیندن مقرّر اولان مهم وظیفه كیمی، اوّلده معروفا چاغیریب و منكردن نهی ائتمگه چاغیردی. چونكی بیلیردی بو وظیفه‌یه عمل اولونسا بوتون آیری وظیفه‌لره ده عمل اولوناجاق. ایستر راحت ایستر چتین، معروفا چاغیریب و منكردن نهی ائتمك اسلاما چاغیرماق، ظلم و تجاوزین قارشیسینی آلماق، ظالمله چالماق، عمومی ثروتلرین دوزگون بؤلونمه‌سی، وئرمه‌لی اولدوقلاری مالی، اونلاردان آلماق و مصرف اولمالی یئرده مصرف ائتدیریلمه‌سی معناسیندادیر.
امام صادقین (ع) سكوتو قرآندا تفكّر ایدی
یازار : میرزه عبدالصمد ملکی | بؤلوم : دین
+0 به یه ن
امام صادقین (ع) سكوتو قرآندا تفكّر ایدی
امام صادقین (ع) اوزونه باخان انسانین نظرینده قرآن تجلّی تاپاردی، قرآنی گؤرنده ده امام صادق (ع) گؤزونون اؤنونه گلردی. او، قرآن آیه‌لری‌ایله دانیشاردی، قرآنلا استدلال ائلردی و سكوتو قرآندا تفكّر ایدی.پیغمبرین (ص) بویوردوغونا اساساً قیامته قدر بیری-بیریندن آیریلمایان ایكی امانت وار؛ بیری قرآن و او بیری، پیغمبر عترتی (علیهم السلام). بو ایكی یادگار الهی پیغمبرلرین بوتون علملرینی یادا سالیرلار و هر زاد اونلارین نزدینده‌دیر. اماملار الهی كتابین حقیقتلرینه عالم و وارلیق عالمی سرّلاری‌نین وارثلریدیلر. امام صادق (ع) كتاب علمی‌نین وارثی، سینه‌سی قرآن سرّلری ایله دولو اولان اونلارین بیریدیر كی مبارك وجودی قرآنلا بیرلشیب.
امام جعفر صادق(ع) بویورور: «وَ اللهِ إنِّی لَاعْلَمُ كِتَابَ اللهِ مِنْ أوَّلِهِ إلَی آخِرهِ كَأنَّهُ فِی كَفِّی. فِیهِ خَبَرُ السَّمَاءِ وَ خَبَر الارْضِ وَ خَبَرُ مَا كَانَ وَ خَبَرُ مَا هُوَ كَائِنٌ. قَالَ اللهُ عَزَّوَجَلَّ: فِیهِ تِبْیَانُ كُلِّ شَیْءٍ؛
آند اولسون الله-ـا من الله كتابینی اوّلدن آخره بیلیرم، ائله بیل كی منیم اووجومدادیر. اوندا گؤیون و یئرین خبری، كئچمیش واقعه‌لرین خبری، ایندی‌نین و گله‌جگین خبرلری وار. الله تعالا بویوروب؛ قرآندا هر شئیه آیدینلیق گتیریلیب.»
منصوربن حازم دئییر: «امام صادقه (ع) عرض ائله‌دیم: «الله، مخلوقلاری واسطه‌سی ایله تانینماقدان داها یوخاریدیر، بلكه مخلوقلار الله-ین واسطه‌سیله تانینیرلار».
امام صادق (ع) بویوردو: «دوز دئییرسن.» دئدیم: «هر كیم اونو یارادان تك الله‌ین وارلیغینی اینانسا، بیلمه‌لیدیر كی او الله-ـا رضا وار و او فقط وحی و پیغمبر یولو ایله تانینار. نتیجه‌ده بیرینه وحی اولونماسا، دوزو بودور الله رسوللاری‌نین اتگینه ال آتا، اونلاری گؤرسه، گؤره‌جك كی اونلار حجّتدیلر و اونلاردان اطاعت ائتمك واجبدیر.
سونرا امام صادقه (ع) دئدی: جماعتدن، رسول الله‌دان سونراكی حجّت باره‌ده سوروشدوم. جواب وئردیلر: «قرآن» آما من اونلاری آییق سالدیم كی قرآن قیّم‌سیز كفایت ائله‌مز، چونكی مرجئه، قدریه و حتّى زنادقه كیمی قرآنا اینانمایان مختلف دسته‌لر ده، اؤز سؤزلرینده قرآنا استدلال ائلرلر و ائله بونا گؤره قرآنا قیّم لازمدیر كی اونون باره‌سینده دئدیكلری‌نین هامیسی حقّ اولسون.
بو آرادا ابن مسعود و عمر و حذیفه كیمی انسانلار قیّم آدینا دئییلدیلر. آما من سوروشدوم: «اونلار قرآنین هامیسینی بیلیردیلر؟» جواب وئردیلر: «یوخ فقط علی (ع) قرآنین هامیسینا عالم ایدی». من دئدیم: نتیجه‌ده شهادت وئریرم علی (ع) قرآنین قیّمی‌دیر و اوندان اطاعت ائتمك واجبدیر و پیغمبردن (ص) سونرا جماعته حجّت ساییلیر و او، قرآن باره‌سینده هر نه دئسه حقّدیر.
امام صادق (ع)اونون سؤزلرینی و محكم و گؤزل استدلال‌لارینی ائشیدندن سونرا اونا «رحمك الله» دئمكله دعا ائله‌دی. (اصول كافى، ج 1، ص 168)
امام صادقین (ع) صحابه‌سیندن بیری دئییر: « ائشیتدیم امام صادق (ع) بئله بویوردو: « نحن ولاه امر الله و خزنه علم الله و عیبه وحى الله؛ بیز امامتین و الله خلیفه‌لیگی‌نین و الله علم خزانه‌سی‌نین ولی امری و الله-ین وحی صاندیغی‌ییق. (اصول كافى، ج 1، ص 192)انسانین تعالاسیندا نافله و گئجه نمازلارین تأثیری
یازار : میرزه عبدالصمد ملکی | بؤلوم : دین
+0 به یه ن
انسانین تعالاسیندا نافله و گئجه نمازلارین تأثیری
آیه‌لر و روایتلره گؤره، انسان گوجلو اراده‌یه صاحب اولماق و قرار وئرمكده چتینلیكلرله اوزلشمه‌مك اوچون، گئجه‌لر و ایكی آراسیندا آییق اولوب الله-ین عبادتینه مشغول اولمالیدیر.پیغمبردن (ص) روایت اولوب كی بویوروبلار: «جبرئیل گئجه نمازینی او قدر منه تاپیشیردی كی بئله بیلدیم امّتیمین یاخشیلاری گئجه‌لر یاتمایا‌جاقلار». بونا اساساً نافله‌لرین چوخلو فضیلتلری وار، حتّی بعضی روایتلر اونو تركیتمگی معصیت ساییبلار.
گئجه نمازی انسان اراده‌سی‌نین گوجلندیرمه‌سینده چوخ مهم تأثیری وار. قرآن كریم فجرین دوغماسینا، گئجه آییقلیغینا و دان اولدوزونا، اونلارا آند ایچماق قدر یوخاری اهمیّت وئریر. ائله كی فجر سوره‌سینده بویورور: «آند اولسون فجرین دوغماسینا، آند اولسون اونلو گئجه‌لره، آند اولسون گئجه‌نین درینلیغیندا قیلینان گئجه نمازینا، آند اولسون ایكی ركعت شفع نمازینا و بیر ركعت وتر نمازینا و آند اولسون گئجه‌نین گئدیشینه». و آیری یئرده بویورور: «آند اولسون گئجه‌یه و ایكی طلوع آراسینا».
قرآنین آیری سوره‌لرینده بو جور جمله‌لره راست گلمك اولار. قرآنداكی بو آند ایچمه‌لر سؤزون اهمیّتینی بللی ائلیر و گئجه آییقلیغی‌نین انسانین روحوندا فوق‌العاده تأثیرینه اشاره ائلیر. گونلوك مسأله‌لر انسانین دقّتینی اؤزونه جلب ائلیر و اونون فكرینی مختلف وادی‌لره چكیب نماز اوستونده حضور قلبدن اوزاقلادیر. آما گئجه‌نین درینلیغیندا و فجرین دوغدوغو زمان، نئچه ساعت یاتاندان سونرا، مادّی حیاتین غوغاسی‌نین یاتدیغی آنلاردا، آرام بیر محیطده، هر جور ریاكارلیقدان اوزاق، انسان خاص دقّت و حضور قلب تاپیر كی بو آنلارین عبادتی و راز و نیازی فوق‌العاده روح پرور و كمال یارادان اولور.
علامه مجلسی امام صادقدن (ع) بئله بیر حدیث نقل ائلیر: «مؤمنین شرفی گئجه نمازی قیلماقدا و عزّتی اؤز ناموسونو جماعتدن ساخلاماقدادیر».
گئجه‌نین یاریسی، یوخودان قالخیب كبریایی عرشین قاباغیندا دایانماق نماز قیلان انساندا ائله بیر حال یارادار كی اونو كمالا طرف چكیر. كمالا طرف آددیم آتیب منیّتدن اوزاقلاشان انسانین اورگی‌نین حالی « وجهت وجهی للذی فطر السموات و الارض» (اوزومو یئری و گؤیلری یاردانا چئویردیم) اولسا، اونون نجاتینا اومید باغلاماق اولار.
امام صادقدن بئله روایت اولوب كی بویوروبلار: «گئجه قیامیندان ال چكمه، یازیق او آدام كی گئجه‌نین قیامی و عبادتیندن محرومدیر».
امیرالمؤمین (ع) كتابخاناسیندا علامه مجلسی‌نین مزاریندان تصویرلر
یازار : میرزه عبدالصمد ملکی | بؤلوم : دین
+0 به یه ن
امیرالمؤمین (ع) كتابخاناسیندا علامه مجلسی‌نین مزاریندان تصویرلر
«علامه امین» آدینا تانینان آیت‌الله حاج شیخ عبدالحسین تبریزی نجفی 1320-جی هجری قمری ایلده علم و تقوا مركزی اولان تبریز شهرینده دنیایا گؤز آچدی.
عبدالحسین، تبریز شهرینده سید محمد مولانا، سید مرتضی خسروشاهی و آتاسی (میرزا احمد نجفی) كیمی بؤیوك عالملرین محضرینده تحصیل آلاندان سونرا نجفه گئدیب میرزا نائینی، شیخ محمدحسین آل كاشف الغطا، و شیخ محمدحسین كمپانی كیمی بؤیوك عالملرین محضرینده اولوب اوزون چكمه‌دی كی یوخاری فقاهت مقامینا ال تاپدی.
«علامه امینی»نی «الغدیر» كتابی ایله تانییریق. بو عظمتلی كتابی یازماق اوچون مختلف سفرلره قاتلانان عالم كی شیعه و سنّی روایتلرینه و سندلرینه استناد ائله‌مكله غدیر خم واقعه‌سینی یازماغا، 10 مین حدیث كتابینی اوخودو.
امیرالمؤمنین (ع) حرمی‌نین قبله قاپیسیندان چیخاندا «شارع الرسول» خیابانینا چاتیرسیز. بو خیابان اؤزونده شیعه‌نین معاصر تاریخی اندازه‌سینده عظمتلی خزانه‌لر یئرلشدیریب. امام خمینی‌نین (ره) ائوی و آیت الله حكیمین (ره) مزاریندان توتوب علامه امینی‌نین (ره) كتابخاناسی و مزارینا قدر.
علامه امینی‌نی داها چوخ سلیس عرب دیلینده 20 جلدده یازیلان عظمتلی كتابی، الغدیرله تانیریق. او بو كتابی یازماق اوچون 24 ساعتین 17 ساعتینی گئجه گوندوز مطالعه‌یه صرف ائدیب. او الینده اولمایان كتابلاری اوخوماق اوچون مختلف سفرلرین رنجینی جانینا آلیب.
علامه امینی بو كتابین یازماسیندا اوزلشن چتینلیقلارا اشاره ائدیب دئییر: «من الغدیر كتابینی یازماغا 10 مین كتابی بسم الله-ین «باء» سیندان تمّت-ین «تاء»سینا قدر اوخودوم و 100 مین كتابا تكراراً باش ووردوم».
شبهه‌سیز بو بؤیوك كیشی‌نین یوخاری همّتیندن علاوه بو عظمتلی اثرین یارانماسیندا آیری عامللر ده واریدی. علامه امینی و اطرافینداكیلاردان تكراراً نقل اولوب كی هر واخت بو كتابین یازماسیندا چتینلیغا راست گلیردی، حضرت علی(نین) حرمینه پناه آپاریدی و عالمی ایشیقلاندیران گونشدن كؤمك ایستیردی.
بو ربّانی عالم، هجری قمری ایلین ربیع‌الثانی آیی‌نین 28-ده جمعه گونو (1349 شمسی 12 تیر) فانی دنیادان كؤچدو و مطهر جسدی مولاسی حضرت علی (ع) كناریندا تورپاغا تاپیشیریلدی.
عالمه بنزر جاهل !
یازار : میرزه عبدالصمد ملکی | بؤلوم : دین
+0 به یه ن
عالمه بنزر جاهل !
اسلام دینی انسانلاری یئر به یئر علم اؤیرنمگه و دوشونمگه چاغیریر. دینی متنلر مختلف یئرلرده علمین اهمیّتی و عالمین منزلتینه تأكید ائدیبلر و علمین یوخاری رتبه‌یه مالك اولدوغونا تأكید ائدیبلر.حضرت علی (ع) علمین درجه‌سی و رتبه‌سی باره‌ده بویوروب: «علم فضیلتلرین لاپ یوخاریسندادیر».[1]
بیر گون بیر نفر او حضرتدن دولاما سؤل سوروشور. (یعنی قصدی اؤیرنمك یوخ بلكه امتحان ائلهمك ایدی.) حضرت جوابدا بویورور: «اذیّت ائلهمك اوچون یوخ بلكه اؤیرنمك اوچون سوروش؛ چونكی اؤیرنمك قصدی ایله سوروشان جاهل، عالم كیمیدیر. و اَیری یولا آددیم قویان عالم، سهو آختارماقدان اؤترو سوروشان جاهل كیمیدیر».[2]
امیرالمؤمنین علی علیه السلام علم و ادب اؤیرنمگه بئله چاغیریر: «ای مؤمن، علم و ادب سنین قیمتین و دَیَریندی، اونلاری اؤیرنمگه چالیش كی علم و ادبین چوخ اولدوقجا سنین قدرین و قیمتین چوخالار».[3]
هابئله الله پیغمبری (ص) علم و بیلگی‌نین رتبه‌سی باره‌ده بویوروبلار: «بیلگی، بوتون یاخشیلیقلارین باشیندا گلیر و جهالت بوتون پیسلیكلرین باشیندا گلیر».[4]
حضرت علی‌ده (ع) بو باره‌ده تأكید بویورورلار: «البته علم، اوركلری یاشادان، كور گؤزلری ایشیقلاندیران و گوجسوز بدنلری گوجلندیرندی».[5]