din xadimi دین خادمی

امام زمانین (عج) كؤمكلری‌نین نئچه‌سی خانیمدی؟

امام باقردن (ع) بیر روایت و ام سلمه‌نین دیلیله پیغمبردن (ص) بیر حدیث اساسیندا امام زمانین كؤمكلری‌نین بیر تعدادینی خانیملاردی.

امام زمانین (عج) محضرینه گئدن خانیملارین بیرینجی دسته‌سی او زماندا یاشایانلارداندیلار كی او حضرتین الله‌ین امن حرمینده ظهورو زمانی او حضرتین خدمتینه چاتارلار. بو باره‌ده ایكی روایت وار:

بیرینجی روایت: امّ سلمه ظهور علامتلری باره‌ده بیر حدیث ضمنینده پیغمبردن روایت ائدیر: یعوذ عائذ من الحرم فیجتمع الناس إلیه كالطّیر الواردة المتفرقة حتّی یجتمع إلیه ثلاث مأة و أربعة عشر رجلاً فیه نسوة فیظهر علی كلّ جبّار و ابن جبّار...[1]

بیر سیغینان، الله‌ین امن حرمینه سیغینار و جماعت، دؤرد طرفدن هجوم ائدن قوشلار كیمی، اوچ یوز اون دؤرد نفر توپلانانا قدر، اونا طرف ییغیشارلار. اونلارین بعضیسی خانیملاردیلار كی هر جبّارا و جبّار اولادینا غالب اولارلار . . .

ایكینجی روایت: جابر بن یزید جعفی، امام باقردن (ع) مفصّل بیر حدیث ضمنینده ظهور علامتلری باره‌ده یازیب: و یجیی ء واللّه ثلاث مأة و بضعة عشر رجلاً فیهم خمسون امراة یجتمعون بمكة علی غیر میعاد قزعا كقزع الخریف یتبع بعضهم و هی الآیة الّتی قال اللّه : «أینما تكونوا یأت بكم اللّه جمیعا إنّ اللّه علی كلّ شی ء قدیر...[2]

الله‌ـا آند اولسون اوچ یوز اون اوچ نفر گله‌جك و اللی نفری خانیمدیر كی اوّلدن قرار قویمامیش مكّه‌ده بیر-بیری‌نین كناریندا توپلاناجاقلار. بودور شریفه آیه‌نین معناسی: «هر یئرده اولساز الله سیزی حاضر ائلر. چونكی او هر ایشه قادردیر».

اوچ یوز اللی نفردن اللیسی آرواد!

بو ایكی روایتین حیرت وئریجی مقاملاری وار. بیرینجی: اوچ یوز اون اوچ كیشی توپلانار و اونلارین اللیسی آرواددیر !

ایكینجیسی: او حضرتین كؤمكلری‌نین آدلاری ساییلان روایتده اصلاً خانیم آدی یوخدور.[3]

بو ایكی مقامی بئله توضیح ائتمك اولار: بو اللی نفر همان اوچ یوز اون اوچ نفرین ایچینده‌دیلر چونكی اولاً امام «فیهم» كلمه‌سیندن استفاده ائدیب. یعنی بو عدّه‌نین اللیسی خانیمدیر.

دوماً: اولا بیلسین «كیشی» تعبیری بونا گؤره اولسون كی سایی‌نین چوخو كیشیدیر و او جهتدن اكثرین آدیندان استفاده ائدیب.

ثالثاً: بو ساییدان كناردا، كؤمك نظرده توتولسایدی «معهم» كلمه‌سیندن استفاده ائدردی، «فیهم» یوخ. چونكی بو اوچ یوز اون اوچ نفر بدر اصحابی عددی كیمی ساییلیبلار و هامیسی یوخاری رتبه‌لی باشچیلاردیلار و قدرت جهتیندن چوخ یوخاری حدّده‌دیلر كی بعضیسی بولوتلا یئر به یئر اولورلار و شبهه‌سیز عادی جماعتدن فرقلنیرلر. بونا گؤره اونلاری اوچ یوز اون اوچ نفرین سیراسیندا بیلسك اونلارا مخصوص موقعیّت وئرمیش اولوروق یوخسا حضرتین آیری كؤمكلری سیراسیندا اولماقلارینی دئسك، اونلارا داها آز امتیاز وئرمیش اولوروق.

اینترنت بالونو، گوگلین تازا معجزه‌سی

گوگل شركتی سابقه‌سیز بیر اقدامدا، اینترنت آنتنی اولان مین بالونو گؤیه گؤندرمك نیّتینده‌دیر. بو اقدامین مقصدی جنوبی یاریم كره‌ اؤلكه‌لرینی، اینترنتله تأمین ائله‌مكدیر. ایندیه‌ قدر بو بالونلارین اوتوزو گؤیه گؤندریلیب.

Loon آدلانان بو پروژه، گوگلین اصلی لابراتواری (گوگل ایكس) طرفیندن طرّاحلیق اولوب.

پروژه‌نین تحقیق مركزی‌نین وئردیگی خبره گؤره، ایندیه‌ قدر یئنی‌ زلاند اؤلكه‌سینده اوتوز بالون گؤیه گؤندریلیب كی یئرله تماسلاری وار. بو بالونلارین بیر-بیریله رابطه‌لری طیّاره‌لرین اوچما خطیندن 20 كیلومتر اوجالیقدا، دنیانین محروم منطقه‌لرینی اینترنتله تأمین ائدن بیر شبكه یارادیر.

گوگلین اعلامینا گؤره بو شبكه‌نین سرعتی و كیفیّتی مخابرات اوچونجو نسل شبكه‌لری 3G كیمی اولاجاق. Loon پروژه‌سی‌نین مدیری‌نین دئدیگینه گؤره بو طرحین سیناق مرحله‌سی موفّقیّتله باشا چاتیب.

بو شبكه دنیانین باشا-باشیندا موبایل تلفونلارلا تماسا امكان وئره‌جك.

علی اكبر، شجاعت و سخاوت نمونه‌سی/ حضرت علی اكبرین (ع) یاشاییشی

حضرت علی اكبر (ع) شجاعتلر و سخاوتلر اوغلودور، نییه كی سخاوت رهبرلری اتگینده بؤیویوب و البتّه بو گؤزل خاصیّتی اونلاردان ارث آپاریب. حضرت علی اكبرین عظمتینی گؤرسدن نكته‌لرین بیری، حضرت اباعبدالله (ع)-ین اؤز جوانی‌نین نعشی اوسوتونه چاتان زمان دئدیگی معروف جمله‌دیر: سندن سونرا دنیانین باشینا كول اولسون.

بیر روایته اساساً حضرت علی اكبر هجری قمری ایلین 33-جو ایلین شعبانین اون بیرینده دنیایه گؤز آچدی. حضرت علی اكبرین دقیق ولادت تاریخی بللی دئییل.

حضرت علی اكبر، آتا طرفیندن وحی خاندانینا وصل اولور، كرامتلی جده‌سی حضرت فاطمه زهرادیر (س). صولت و عظمتده امیرالمومنین علی (ع) كیمی و گؤزللیكده و یوخاری اخلاقدا حضرت رسول‌الله (ص) كیمی ایدی.

او حضرتین آناسی ابی مره بن عروه بن مسعود ثقفی‌نین قیزی لیلا ایدی. او، شیعه‌لرین اوچون امامی یعنی حضرت اباعبدالله الحسین، سیدالشهدانین اوغلودور. شیعه مكتبی باخیشیندان او حضرتی توصیف ائله‌مك ایسته‌سك، یوخاریداكی مناقب و مزیّتلردن علاوه، او حضرت، جدّی‌نین دینی یولوندا شهید اولان كربلا شهیدلر سیراسیندادیر. آما فضایل باخیمیندان حضرت علی اكبر اسلام پیغمبرینه اوخشوردو. حضرت علی اكبر مخصوص فضیلتلری واریدی كی اونو سایر ائمه اولادیندان آییریردی.

او حضرت كرامتلی آتاسی حضرت حسین بن علی (ع) و مظلوم عمیسی حضرت امام حسن مجبتی (ع) اتگینده بؤیودو. حضرت علی اكبر (ع) شجاعت اولادیدیر.

حضرت علی اكبرین (ع) عمرونو سیاسی جهتدن اوچ یئره بؤلمك اولار: بیرینجی دوره، جدّی حضرت علی‌نین (ع) حیاتی ایله مصادف ایدی. اونون بو مقطعده 6-7 یاشی واریدی و حضرت علی‌نین (ع) شهادت ماجراسینا شاهد اولدو. او حضرت اوشاقلیقدان بنی امیّه‌نین كثیف فتنه‌لریله تانیش اولدو.

او حضرتین ایكینجی عمر دوره‌سی عمیسی امام حسن (ع)-ین دوره‌سی ایدی. او، عمیسینه او قدر یاخیندی كی كربلا قضیه‌سینه اوخشار قضیّه اوز وئرسه ایدی كربلادا گؤستردیگی شجاعتی اوردا دا گؤسترردی.

حضرت علی اكبرین پارلایان گونش كیمی ایشیق ساچان اوچونجو دوره، امام حسین (ع)-ین امامت دوره‌سی ایدی. او بو مرحله‌ده آتانین وزیری و ساغ الی كیمی وظیفه‌سینی یئرینه یئتیردی. بو رابطه او قدر قوی ایدی كی بیر عدّه بئله گمان ائدیردیلر امام حسیندن سونرا خلیفه و امام، او حضرت اولاجاق. بو مرحله‌ده اونون لیاقت و عظمتی بیر حدده ایدی كی معاویه فقط اونو اسلام امّتی‌نین رهبرلیگینه لایق گؤروردو.

حضرت علی‌یه (ع) عاشیق اولان مسیحیلر

حضرت علی (ع) نهج‌البلاغه‌نین 48-جی خوطبه‌سینده بویورورو: «گئجه چاتاندا و قارانلیق پرده‌سی اونا چكیلنده حمد آللاه مخصوصدور. اولدوزلارین طلوع و غروب زامانی حمد آللاها مخصوصدور. حمد او ذاتا مخصوصدور كی نعمتلری قورتولان دئییل و باغیشلادیقلارینی جوبران ائتمك اولماز. آما سونرا: قوشونومون قاراووللارینی اؤندن گؤندردیم و امریم اونلارا چاتانا قدر فرات قیراغیندا دایانمالارینی ایسته‌دیم. فرات چایینی اؤتوب سیزدن _دیجله چایی‌نین كناریندا ساكین اولان_ بیر جمعیّتین طرفینه گلمك قرارینا گلمیشم. ایستیرم اونلاری سیزینله برابر، دوشمنه طرف سفربر ائدم و سیزی گوجلندیرمك اوچون اونلاردان كؤمك آلام».

بو خوطبه‌نی او حضرت كوفه‌نین خاریجینده «نخیله» قرارگاهیندا «صفین» ساواشینا یوللاناندا هیجری قمری 37-جی ایلینده شوّالین 20-ده بویورموشدو. (ابن ابی الحدید شرحی جیلد 3، صفحه 201) هابئله بو خوطبه‌نی تاریخچیلرین بیر تعدادی او جومله‌دن «نصر بن مزاحم» نقل ائدیب.

صفین یولونداكی جریانلار: بو سفرده ایمام «آنبار» شهرینه چاتدی. بو شهرین اكینچیلیری و بؤیوكلری قارشیلاماغا گلیب دئدیلر: «سیزه قاطیر هدیه گتیرمیشیك و موسلمانلارا یئمك حاضیرلاییب حیوانلاریزا چوخلو یئم حاضیرلامیشیق». ایمام بویوردو: «آما حیوانلار باره‌سینده، اونلاری سیزدن آلماغا حاضیریق و خراجیزدان چیخاریق. یئمكلرین قیمتی بللی اولماسا اونلاری یئمه‌ریك». دئدیلر: «اؤزوموز قیمت ائدیب اونون پولونو وئره‌ریك». ایمام بویوردو: «سیز اونلارین حقیقی قیمتینی حسابلامایا‌جاقسیز». دئدیلر: «سیزین قوشونوزدا بیزیم تانیشلاریمیز وار. اونلارا باغیشلاماغا مانع وار؟»

ایمام بویوردو: «هامی سیزین دوستوزدور. موسلمانلارین هئچ بیری سیزین هدیه‌زی قبول ائله‌مه‌مه‌لیدیلر». سونرا بویوردو: «عسكرلردن هر بیری سیزدن بیر شئی غصب ائله‌میش اولسالار بیزه خبر وئرین». اونلار هدیه وئرمكده ایصرار ائله‌دیلر. ایمام بویوردو: «بیز سیزدن احتیاجسیزیق». بئله‌لیكله اؤز تایسیزلیق و بؤیوكلویونو ثبوت ائله‌دی. حقیقتده ایمام بو ایشی ایله هر جور تجاوزون قاقارشیسینی آلدی.

یولدا «رقه» دیارینا چاتاندا فرات كناریندا «بلیخ» آدیندا بیر یئرده اوتوراق ائله‌دیلر. ائله بوردایدی كی صومیعه‌دن بیر راهیب چیخیب او حضرتین محضرینه گلیب دئدی: «آتالاریمیزدان بیزه بیر كیتاب قالیب. بو كیتابی عیسی‌بن مریمین (ع) صحابه‌سی یازیبلار». سونرا اونو اوخوماغا باشلادی: «آللاه جزیرةالعرب جماعتی ایچینده  اونلارا كیتاب و حیكمتی اؤیرتمك اوچون و آللاه یولونو اونلارا گؤسترمك اوچون بیر پیغمبر مبعوث ائلر. اونون یولوندا خشونت یوخدور و او باغیشلار. اومّتی آللاهی تسبیح ائدن اینسانلاردیلار و وفاتیندان سونرا اونلارین آراسیندا داغیناقلیق یارانار. اومّتیندن بیر كیشی فرات كناریندان كئچر. او عدالته چاغیریب یاخشیلیقلارا امر ائدیب پیسلیكلردن نهی ائلر. دونیا اونون اوچون كولدن داها دَیَرسیزدیر. اؤلومو سو ایچمك كیمی راحات قبول ائلر. خلوتده آللاهدان قورخار و آشكاردا اونا خاطیر جماعته نصحیت وئرر. هر كس او پیغمبری درك ائدیب ایمان گتیرسه آللاهین جنّتینی آلمیش اولاجاق و هر كس او صالح بنده‌نی تاپسا اونا كؤمك ائله‌مه‌لیدیر چونكی اونونلا اؤلمك شهادتدیر». ایمام (ع) آغلاییب آللاها شوكر ائله‌دی. راهیب دئدی: «من سیزدن آیریلمایاجاغام.» او راهیب شهید اولانا قدر، گئجه گوندوز امیرالمؤمنینله (ع) اولدو. ایمام اونا ناماز قیلیب دفعه‌لرله اونون باغیشلانماسینی ایسته‌دی. (نهج‌البلاغه شرحی ابن ابی الحدید جیلد 3، صفحه 204 و 205)

حضرت علی‌نین (ع) ویلادتینی اوّلدن بیلن راهیب   

ابوطالب(ع) زامانی «مثرم بن دعیت بن شیتقام» آدیندا بیر راهیب واریدی. بو كیشی عبادتده معروف ایدی و آللاهی 190 ایل عیبادت ائله‌میشدی و آللاهدان هئچ ایستگی اولمامیشدی. نهایتده آللاهدان ایسته‌دی اؤولیادان بیرینی اونا نیشان وئرسین. آللاه تعالا ابوطالبی اونون نزدینه گؤندردی. مثرم اونو گؤرمك همن آیاغا قالخیب باشیندان اؤپدو و اونو اؤز قاباغیندا اوتوردوب دئدی: «آللاه سنه رحمت ائله‌سین. سن كیمسن؟» ابوطالب دئدی: «تهامه بؤلگه‌سیندن بیر كیشی». سوروشدو: «عبد منافین هانسی طایفاسیندان؟» جواب وئردی: «بنی هاشمدن». راهیب، یئنه دوروب ابو طالبین باشیندان اؤپوب دئدی: «آللاها شوكر اولسون كی آللاه منیم ایستگیمی وئردی و اؤلمه‌میشدن اوّل اؤز ولی‌سینی منه گؤستردی». سونرا دئدی: «سنه بشارت اولسون! آللاه منه ایلهام ائدیب كی سنه بشارت وار». ابو طالب سوروشدو: «او بشارت نه‌دیر؟» دئدی: «سندن بیر اوشاق اولاجاق كی ولی الله دیر. او آللاهین ولیسی، تقوالیلارین ایمامی و رسول الله‌-ین وصی‌سیدیر.او اوشاغی گؤرسن مندن اونا سلام یئتیر و اونا دئنه: مثرم سنه سلام یئتیریر و شهادت وئریر كی آللاهادا سووای تانری یوخدور. تكدیر و شریكی یوخدور و محمد (ص) اونون بنده‌سی و رسولودور و سن اونون حقلی خلیفه‌سی‌سن. نُبوّت محمدله و وصایت سنینله كامیل‌لشیر». بو حینده ابو طالب آغلاییب سوروشدو: «اونون آدی نه‌دیر؟» دئدی: «آدی علی‌دیر».

قوشونون سوسوزلوغو و مسیحی راهیب

صفّین یولوندا ایمامین (ع) قوشونو سوسوزلوغا دوچار اولدو. سو احتیاطی قورتولموشدو و هر طرفده سو آختاریشلاری نتیجه‌سیز قالدی. حضرت علی (ع) قوشونونو یولدان آزاجیق قیراغا چكیب بیر آز یول گئدندن سونرا چؤلون اورتاسیندا بیر صومعه آشكار اولدو. حضرت صومعه‌یه طرف گئدیب صحابه‌یه بویودو: «اورانین ساكینلرینی چاغیرین». جماعت چاغیردی. بیر راهیب باشینی صومعه‌دن ائشیگه چیخاردی. حضرت اونا بویوردو: «سیزین یاخینلیغیزدا بو جمعیّته جواب وئره بیله‌جك سو وار؟» راهیب دئدی: «موطلقا، منله سو آراسیندا ایكی فرسخ فاصیله وار منیم‌ده بیر آیلیق سویومو گتیرمه‌سه‌لر سوسوزلوغومدان اؤلرم». حضرت صحابه‌یه بویوردو: «راهیبین بو سؤزون ائشیتدیز؟» دئدیلر: «بلی ! ایندی كی گؤجوموز وار، امر ائلیرسن كی اورا گئدیب سویا ال تاپاق؟» حضرت بویوردو: «یوخ سیزین بو ایشه احتیاجیز یوخدور!» سونرا او حضرت قاطیری‌نین باشینی قیبله‌یه طرف چئویریب و صومعه یاخینلیغیندا بیر نوقطه‌یه ایشاره ائدیب بویوردو: «بورانی قازین». بیر عیدّه كولونگله قازماغا باشلادیلار. نهایت بیر پارلاق (آغ) داشا چاتدیلار (داها قازماق مومكون اولمادی). دئدیلر: «یا علی كولونگ بو داشا تأثیر ائتمیر». حضرت بویوردو: «سو او داشین آلتیندادیر. داشی ترپده بیلسز سویا چاتاجاقسیز. چالیشین داشی یئریندن قوپارداسیز».

موعاصیر مسیحی و حضرت علی (ع)

جورج جورداق، لوبنانین مشهور موحقیقلریندن و مسیحی مؤلّیف، دَیَرلی ««الامام علی صوت‌العداله الانسانیه» كیتابینی یازماقلا بو ایمامین دوشونجه‌لری و زیندگانلیغینا اولان عشق و علاقه‌سینی بیروزه وئریب. او، بو بئش جیلیدلیك كیتابدا حضرت علی‌نین (ع) اینسانی دوشونجه و حكومت زامانلارینا عاشیقانه شكلده ایشاره ائدیب.

«علی و اینسان حاقلری»، «علی و فرانسه اینقیلابی»، «علی و سقراط»، «علی و اونون عصری» و «علی و عرب میلّیِّتی» كیتابلاری، مسیحی جورج جورداقین «صوت العداله الانسانیه» كیتابی‌نین بئش جیلدینی تشكیل ائدیر. جورج جورداق جوانلیغی‌نین لاپ گؤزل ایللرینی، بو كیتابین تحقیقی و یازماسینا صرف ائله‌دی. لوبنانین جنوبوندا مرجعیون شهرینده 1926-جی ایلنیده دونیایا گلمیش جورج جورداق دئییر: «عربین مشهور شاعیری قارداشیم «فوآد جورداق» نهج‌البلاغه كیتابینی منه وئریب اونو درین اوخوماغیما تشویق ائله‌دی. نهج‌البلاغه‌نی اوخویاندان سونرا حضرت علی‌نین (ع) حالتلری، اخلاقی و ادبیّاتینا عاشیق اولدوم و اوندان سونرا او حضرت باره‌سینده سونّیلر و شیعه‌لر طرفیندن یازیلمیش كیتابلاری اوخوماغا باشلادیم».

ناماز قیلمایان شخصه شئیطانین جاوابی

كئچمیش زامانلاردا بیر نفر عربیستان چؤل‌لرینده تك‌باشینا اوزاق بیر سفره چیخیبمیش. شئیطان اونو یولوندان آزدیرماق اوچون تغییری-لیباس اولوب اینسان قیافه‌سینده اونون قارشی‌سینا چیخیر و دئییر:

- سلام، ائی دوست. گؤرورم، تك‌باشینا هاراسا سفر ائدیرسن. ایسته‌ییرسنسه، سنه یول یولداشی اولارام. منیم‌ده یولوم سن گئتدیگین طرفه‌دیر.

همین شخص چوخ سئوینیر و شئیطانین تكلیفینی قبول ائدیر. بو مینواللا ایكی یولداشی اوزون-اوزادی یوللارینا داوام ائدیرلر. نهایت قاش قارالیر، آخشام دوشور. بیردن شئیطان یولداشینا دئییر:

- من سنینله دوستلوق ائتمك ایسته‌میرم!

آدام بونون سببینی سوروشدوقدا شئیطان دیل‌لنیر:

- سحردن سنی موشاهیده ائدیرم. سنی بیر دفعه ده اولسون ناماز قیلان گؤرمه‌دیم. من اینسان قیافه‌سینه گیرمیش شئیطانام. سنی یولوندان آزدیرماق اوچون بئله ائتدیم. باخدیم كی، سنی آزدیرماغا احتیاج یوخموش. من آللاها یالنیز بیر دفعه سجده ائتمه‌ییب اونا عاصی اولدوم. بو عملیمه گؤره ده الله منی قیامته قدر لعنتله‌دی. سن ایسه گونده بئش دفعه آللاها سجده ائتمه‌یه تنبل‌لیك ائدیرسن. اونا گؤره ده سنینله اولماغیملا بیر داها آللاهین لعنتینه دوچار اولماقدان قورخورام و سنینله دوستلوق ائتمكدن ایمتیناع ائدیرم. سنین وضعیتین منیمكیندن بئترمیش كی!

Namaz qılmayan şəxsə şeytanın cavabı

Keçmiş zamanlarda bir nəfər Ərəbistan çöllərində təkbaşına uzaq bir səfərə çıxıbmış. Şeytan onu yolundan azdırmaq üçün təğyiri-libas olub insan qiyafəsində onun qarşısına çıxır və deyir:
- Salam, ey dost. Görürəm, təkbaşına harasa səfər edirsən. İstəyirsənsə, sənə yol-yoldaşı olaram. Mənim də yolum sən getdiyin tərəfədir.
Həmin şəxs çox sevinir və şeytanın təklifini qəbul edir. Bu minvalla iki yoldaşı uzun-uzadı yollarına davam edirlər. Nəhayət qaş qaralır, axşam düşür. Birdən şeytan yoldaşına deyir:
- Mən səninlə dostluq etmək istəmirəm!
Adam bunun səbəbini soruşduqda Şeytan dillənir:
- Səhərdən səni müşahidə edirəm. Səni bir dəfə də olsun namaz qılan görmədim. Mən insan qiyafəsinə girmiş şeytanam. Səni yolundan azdırmaq üçün belə etdim. Baxdım ki, səni azdırmağa ehtiyac yoxmuş. Mən Allaha yalnız bir dəfə səcdə etməyib Ona asi oldum. Bu əməlimə görə də Allah məni qiyamətə qədər lənətlədi. Sən isə gündə beş dəfə Allaha səcdə etməyə tənbəllik edirsən. Ona görə də səninlə olmağımla bir daha Allahın lənətinə düçar olmaqdan qorxuram və səninlə dostluq etməkdən imtina edirəm. Sənin vəziyyətin mənimkindən betərmişki!