din xadimi دین خادمی

کلام رابطه‌سی انسانلارین گونده‌لیک رابطه‌سی‌نین بیر بؤلومونو تشکیل ائدیر. بو رابطه انسانلار آراسیندا احساسلارین منتقل اولماسیندا چوخ مهم نقشی اولور.

بیر موضوع باره‌ده نئجه دانیشماغیز، سیزین اجتماعی آگاهلیغیزین مقداری، نئجه دوشوندوغوز و آیدین اولدوغوز باره‌ده اطلاعات وئریر. مؤثر و مطلوب بیر دانیشیقدا مسأله‌لر و مشکل‌لر باره‌ده دانیشماق اضطرابی آزالدار و انسانی یونگول‌لشدیرر. دانیشیق اولماسا، یاشاییشین گؤزل‌لیغی آزالار. چونکی حسّلریمیزین چوخونو دانیشیق یولو اینن انتقال وئریریک. بیر دانیشیغین هر ایکی طرفه ‌ده مطلوب اولماسینی ایسته‌سک، اوچ نکته‌نی رعایت ائتمه‌لی‌ییک: سوروشماق، فعال قولاق آسماق و اؤز باره‌ده بیر شئیلر دئمک.

سوروشماق

ایلکین تانیشلیق اوچون اوست اوسته ایکی جوره سؤال سوروشماق اولار. تشریفاتی سؤال‌لار مثلاً طرفین آدی نه‌دیر، هارالیدیر و نه ایش گؤرر. بیر ده داها خاص معلوماتی هدف توتان سؤال‌لار کی مقابل طرفین احساسلاری و اینانجلارینی بیلمک اوچون سوروشولار. مثلاً  اوشاقلارلا باش باشا وئرمک باره‌ده نظری نه‌دیر. بوجور سؤال‌لار صمیمیتی آرتیرار و مقابل طرفین شخصیتینی تانیتدیرار. جذاب بیر دانیشیغین رمزی، ادبلی و مناسب صورتده ماراقلیلیغیزا ادامه وئرمگیزده‌دیر. چونکی هر سؤال، شکل توتماقدا اولان صمیمیتی داها دا چوخالدار.

فعال قولاق آسماق

یاخشی مخاطب مقابل طرفین سؤزلرینه قولاق آسماغی باشارمالیدیر کی او، سؤزلری‌نین قولاق آسیلدیغیندان مطمئن اولسون. قولاق آسان شخص اؤزونه مخصوص عبارتلرله عکس العمل نشان وئرر و دانیشانا دقت مرکزینده اولدوغونو اطمینان وئرر. قولاق آسماق، آغزی باغلی اولماق معناسیندا دئییل.

مقابل طرفین سؤزلرینه قولاق آسین، اونلاری یاددا ساخلایین و اونا مناسب عکس العمل نشان وئرین. دوز قولاق آسماقدان عاجز اولان انسانلار مخاطبلرین الدن وئریب تک قالارلار.

اؤزوز باره‌ده دانیشماق

بیر دانیشیغین صمیمیته منجر اولماسینی ایسته‌سز حتماً اؤزوز باره‌ده بیر شئیلر دئمه‌لیسیز. عکس تقدیرده ائله بیل دیش چوپو ایله بیس‌بول اوینورسوز. لازم دئییل بوتون حسّیاتیزی اورتایا تؤکه‌سیز آما بیلین کی اؤزوز باره‌ده هر وئردیگیز معلومات تازا قورولان رابطه‌یه داد دوز قاتیر.

مخاطبله متناسب دانیشین

دانیشیقدا صرف اولان انرژی، دانیشیغین سرعتی و یا آلچاق و اوجا سسله دانیشماغی مقابل طرفله متناسب ائله‌مه‌لیسیز.

دانیشقدا صرف اولان انرژی

بعضیلری سؤزلرینی دئمگه و مقابل طرفین سؤزلرینی ائشیتمگه فرصت آختارارلار. بعضیلری چوخ دانیشارلار و دانیشماغا فرصت تاپاندا سئوینرلر. بیر عده ده آز دانیشارلار. دانیشیقدا داها چوخ تأثیر قویماق ایسته‌سز، اوّلده مقابل طرفین هانسی طیفدن اولدوغونو بیلمه‌لی و اونا مناسب دانیشیغا ادامه وئرمه‌لیسیز. بو، سیزین اؤزوز اولمادیغیز معناسیندا دئییل بلکه انعطافلی اولدوغوز آنلامیندادیر. بئله بیر شخصه اصطلاحدا «اوشاغینان اوشاق بؤیوگونن بؤیوک» دئییلر.

دانیشیغین سرعتی

هر کسین بیر دانیشیق سرعتی وار. بعضیلری یئیین و بعضیلری یاواش دانیشارلار. دانیشاندا مقابل طرفین حالتلرینه دقت یئتیرمک لازمدیر. چونکی انتظاریندان یاواش دانیشساق اونو کسالت باسار و یئیین دانیشساق‌دا عصبی اولار. یاخشی اولار مخاطبیمیزین سلیقه‌سینه مناسب دانیشیق سرعتیمیزی تنظیم ائدک.

سسین آلچاق اوجالیغی

دانیشغین اساس بؤلوملریندن اونون اوجا و یا آلچاق سسله اولماسیدیر. حددن آرتیق اوجا دانیشاندا اؤزوز اونو طبیعی بیلیب اعتماد بنفسین یوکسک اولدوغونو بیله‌ بیلرسیز آما مخاطبلریز اونو تکبّر معناسینا تفسیر ائلیه بیلرلر و یا چوخ یاواش دانیشساز اؤزوز اونو تواضع علامتی حسابلایا بیلرسیز آما مخاطبلریز سیزی اعتماد بنفس‌سیز بیله بیلرلر.

مقابل طرفینن هماهنگ اولماق

بو ایشین ساده یوللاریندان نوبه ایله دانیشماقدیر. بو ایش ساده نظره گلسه‌ده چوخلاری بونو باشارا بیلمیرلر. مثلاً 10 دقیقه‌لیک دانیشیقدا یاخشی اولار بئش دقیقه‌سینی سیز و بئش دقیقه‌سینی مقابل طرف دانیشسین. تانیشلیغین اوّلینده دانیشیقلار قیسا اولسا یاخشی اولار.

جامعه‌شناسلاری فکره سالان و جامعه‌میزی بوروین مشکل‌لرین بیری‌ده جوانلاریمیزین ائولنمگه رغبتسیزلیگی و ائولنمک یاشی‌نین چوخالماسیدیر.

بیر عدّه‌نین نظرینه گؤره بو مسأله‌نین اساس عاملی قیزلاردیر. اونلار بئله اینانیرلار کی اجتماعی استقلال و مالی امکانلارین اولماسی قیزلاریمیزی ائولنمگه رغبتسیزلندیریب.

اؤلکه‌میزین بؤیوک شهرلرینده آپاریلان تحقیقلره استناداً ائولنمه آماری‌نین آزالما سببلریندن بونلاری سایماق اولار: بوشانما، مخصوصاً ائولنمکدن آز فاصله ایله اولان بوشانمالارین چوخالماسی، خیانتین چوخالماسی، اقتصادی عامللر، فردی و اجتماعی فرهنگین دَییشیلمه‌سی، ایشسیزلیک و ایش امنیتی‌نین اولماماسی.

جامعه‌ده یارانان کاذب احتیاجلار انسانلاری آرتیق و داها آرتیق خرجله‌مگه مجبور ائلیر و اقتصادی وضعین یاخشی اولماماسی‌دا اونلاری بیر جور چیخیلماز یولا سالیر و نتیجه‌ده جوانلار بونلاری گؤرمکله ائولنمکدن چکینیر و عایله‌ دولاندیرماق مسئولیتی آلتینا گئتمیرلر.

قیزلاریمیز ائولنمکدن سونرا، سوبایلیقدا اللرینده اولان امکانلاردان داها آرتیغینی گؤزلورلر و عکس تقدیرده ائولنماغاگه رغبت گؤسترمیرلر. اونلارا گؤره خانواده تشکیل وئرمک اقتصادی وضعیتلرینی چتینلدیرسه و اونلاری دردسره سالیرسا نه یاخشی کی ائولنمه‌سینلر و سوبای قالسینلار.

گونده‌لیک یوللادیغیز ایمیل‌لر، قویدوغوز قرارلار، دانیشدیغیز تلفونلار، جماعت ایله دانیشیق و بحثسیز سیزین اجتماعی ارتباطیزی تشکیل ائلیر. بعضیلریمیزین گونو باشا باش ارتباطلا کئچیر. و بو ارتباطلارین نئجه‌لیگی یاشاییشمیزا چوخ تأثیر قویور.

اجتماعی رابطه‌نین بو قدر اهمیتینه گؤره، بو ارتباطلارین کیفیتی و نئجه‌لیگینه آرتیق دقّت یئتیرمه‌لی‌ییک. بو یازیدا دوزگون و یاخشی رابطه‌نین نئجه‌لیگی باره‌ده 7 یول تقدیم اولونور. بو یئددی قایدا، انگلیس دیلینده هره‌سی‌نین اوّلی C  ایله باشلایان بیر کلمه ایله نشان وئریلیب. اونا گؤره بو یئددی قایدایا «یئددی C» آدی وئریریک:

یاخشی بیر دانیشیق و ارتباط، بو «یئددی C»یه احتیاجی وار:

اؤنجه کی یازیدا قایدالارین ایکیسینی سایدیق ایندی یازی نین ادامه سی:

(Concrete) آیدین:

دئدیگیز سؤز آیدین اولسا، قولاق آسانلار سیزین نه دئمک ایسته‌دیگیزی بیلرلر. سؤزده آیدینلیق، فقط بیر نقطه‌یه متمرکز اولان لیزر اشعه‌سی کیمیدیر.

پیس ارتباطین مثالی: علی کیف تبلیغاتی اوچون بئله تبلیغات وئریب:

«بو ناهار کیفلری ایله سیزین بیر داها واخت پرابلمیز قالمایاجاق !»

بو تبلیغات آیدین دئییل و محصول باره‌ده هئچ بیلگی وئرمیر. احساساتدان بوشدور و آلانلاردا انگیزه یاراتمیر.

یاخشی ارتباطین مثالی: کیف تبلیغاتی بئله یازیلیب:

اوشاقلاریزا غذا حاضرلاماغا داها آرتیق واخت قویماق لازم دئییل. اوشاقلارین غذاسینی بو کیفلره قویون، ایستی و یا سرین، نئجه قویموسوز ائله‌ده قالاجاق.

(Correct) دوزگون:

ایشلتدیگیز کلمه‌لر دوز اولسا، مخاطب جذب اولار یوخسا اعتمادی سلب اولار. باشارمادیغیز تکنیکی و تخصصی کلمه‌لری ایشلتمه‌یین. سؤزلری اشتباه یازماق و یا دئمک بؤیوک فاجعه ساییلیر.

پیس ارتباطین مثالی:

«سیزین ذهنیزده‌کی آرزولاری حدیث ووروب اونلارا اساساً برنامه‌ قورموشوق. پول‌لاریزی بیزیم بانکا تاپیشیرین».

بو تبلیغی یازان، «حدس» سؤزو یئرینه «حدیث» سؤزونو یازیب کی اوخویانلارین اعتبارینی قازانا بیلمز.

(Coherent) ییغجام:

دانیشیغیز ییغجام و منسجم اولسا منطقلی‌ده اولار. اونون بوتون اجزاسی بیر-بیرینه و اصلی موضوعا مربوطدور. دانیشیق لحنی موضوعنون ییغجاملیغیندا دا چوخ تأثیری وار.

(Complete) بوتون و کامل:

بوتون و کامل دانیشقدا، سیزین مخاطبیز لازم اولان سؤزلری آرتیق-اسکیک اولمادان تحویل آلار. اونا ناقص بیلگی چاتماز و او سیزین سؤزلریزه فکرلشیب جواب اوچون تصمیم توتا بیلر.

مخاطبیزدن بیر ایشین گؤرمگینی ایسته‌سز، بو سؤزو اونا کامل انتقال وئرین کی او دا نه ائده‌جگینی بیلسین. مثلاً آدلاری، آدرسلری، تاریخلری و یئرلرین هامیسینی کامل صورتده انتقال وئرین کی او گیج قالماسین.

پیس ارتباط اوچون مثال:

«سلام دوستلار! ایندیدن صاباحین قرارینی یادیزا سالیرام!»

بو پیامدا هانسی قرار و هاردا اولدوغو بللی اولماییب.

یاخشی ارتباطین مثالی:

«سلام دوستلار! سیزه صاباحین قرارینی خاطرلادیرام. صاباح سحر ساعت آلتی‌دا عینالی داغی‌نین اتگینده اولمالی‌یوق. لطفاً گلیب گله‌میه‌جگیزی اعلام ائدین».

(Courteous) اردملی و ادبلی:

ادبلی ارتباط، دوستیانا رابطه‌دیر. عین حالدا صادقانه‌دیر. ادبلی ارتباطدا جمله‌لرین ایچینده گیزلی توهین و یا گوشه-کنایه یوخدور.

پیس ارتباطین مثالی:

«سلام علی! هفته‌لیک جلسه‌لریمیزده، دانیشانین فقط سیز اولدوغوندان خوشوموز گلمه‌مگی بیلمه‌لیسیز. بیزیم‌ده چوخلو پروژه و نظرلریمیز وار کی اونلار باره‌ده دانیشماق ایستیریک. بیزیم‌ اختیاریمیزدا کفایت قدر واخت قویماغا اطمینانین اولسا، جلسه‌یه گلک یوخسا گلمه‌یک».

گؤردویوز کیمی بو، ایمیلدن چوخ بیر دعوا مئساژینا اوخشور. اوندا، ادب رعایت اولمامیشدی و احساساتی‌دا یاخشی دئییلدی.

یاخشی رابطه‌دن مثال:

« سلام علی! کئچن هفته سیزینله اولان جلسه‌میزده، سیزین گروه اؤز طرحلری و برنامه‌لری باره‌ده یاخشی سؤزلر دئدی. سندن خواهش ائلیرم بو هفته‌ ده بیزیم گروها اؤز برنامه‌لری و طرحلرینی ارائه وئرمگه اجازه وئریله».

منبع: mindtools

گونده‌لیک یوللادیغیز ایمیل‌لر، قویدوغوز قرارلار، دانیشدیغیز تلفونلار، جماعت ایله دانیشیق و بحثسیز سیزین اجتماعی ارتباطیزی تشکیل ائلیر. بعضیلریمیزین گونو باشا باش ارتباطلا کئچیر. و بو ارتباطلارین نئجه‌لیگی یاشاییشمیزا چوخ تأثیر قویور.

اجتماعی رابطه‌نین بو قدر اهمیتینه گؤره، بو ارتباطلارین کیفیتی و نئجه‌لیگینه آرتیق دقّت یئتیرمه‌لی‌ییک. بو یازیدا دوزگون و یاخشی رابطه‌نین نئجه‌لیگی باره‌ده 7 یول تقدیم اولونور. بو یئددی قایدا، انگلیس دیلینده هره‌سی‌نین اوّلی C  ایله باشلایان بیر کلمه ایله نشان وئریلیب. اونا گؤره بو یئددی قایدایا «یئددی C» آدی وئریریک:

یاخشی بیر دانیشیق و ارتباط، بو «یئددی C»یه احتیاجی وار:

(Clear) دوم دورو و ساده‌

 (Concise) قیسا و خلاصه

(Concrete) آیدین

(Correct) دوزگون

(Coherent) ییغجام

(Complete) بوتون و کامل

(Courteous) اردملی و ادبلی

بو یئددی یولون هر بیرینی واقعی مثال‌لارلا توضیح وئریریک:

(Clear) دوم-دورو و ساده‌:

بیری ایله دانیشاندا منظوروزو دوم-دورو و ساده شکلده دئیین. سؤزو بوروشدورمایین نه‌یی دئمک ایسته‌دیگیزی ساده دئیین. اوندان نه ایسته‌دیگیزی شفاف دئیه بیلمه‌سز، او دا سیزه جواب وئرمکده تردید ائده‌جک.

دانیشغین ساده اولماسی اوچون هر جمله‌ده‌کی ایستک و ایده‌لریزی آزالدین. یعنی سؤزو و مطلبی مقابل طرفه تحویل وئردیگیزدان مطمئن اولون. انسانلار سیزین دانیشیغیزی بیلمک اوچون لغتنامه‌یه‌ مراجعه ائله‌مه‌مه‌لیدلر.

پیس ارتباطین مثالی؛ علی حسنه بیر ایمیل گؤندریب:

«سلام حسن! سیزین اداره‌زده ایشله‌ین جواد باره‌سینده سنه بیر سؤزلر دئمه‌لی‌یم؛ دقّتین اولسون بو جواد یاخشی اوغلاندی، اصلاً او بیر سرمایه‌دی. سنی گؤرنده اونون باره‌سینده داها آرتیق دایشماغی چوخ ایستیرم».

بو ایمیلین نه دئدیگی بللی دئییل. او اداره‌ده نئچه جوادین ایشله‌دیگی و اونون هانسی جوادی قصد ائله‌دیگی بللی دئییل. بیر ده بللی دئییل علی جوادی نییه تعریفله‌ییر. حسنین حقّی وار جواب یازیب اونون نییه بو قدر تعریفلندیگینی سوروشسون.

نهایتده بللی دئییل علی‌نین جوادی تبلیغ ائله‌مکدن منظورو نه ایدی.

یاخشی ارتباط: علی حسنه بیر ایمیل گؤندریب:

«سلام حسن! سیزین اداره‌ده ایشله‌ین جواد حسنی باره‌سینده سنینله دانیشماق ایستیرم. او یاخشی ایشله‌یندی چونکی خبریم وار نئچه IT پروژه‌سینی آز زماندا باشا چاتدیریب. بیز گلن آیداکی پروژه‌لریمیزده اونون کؤمگی و تخصصوندن استفاده ائلیه بیلریک. بو ایشه امکانیمیز وار؟ یاخیندا سنینله بو باره‌ده دانیشساق سئوینرم».

(Concise) قیسا و خلاصه:

بیر سؤزو خلاصه دئمک، داها آز انرژی و داها آز واختدا مطلبی یئتیرمک معناسنیدادیر. منظوروزو اوچ جمله‌ده دئمک امکانی اولان یئرده، ائشیدنین گناهی نه‌دیر اونو آلتی جمله‌ده ائشیتسین؟ داها خلاصه دانیشماق اوچون آشاغیداکی نکته‌لره دقّت ائدین:

دانیشیغیزدا آرتیق کلمه‌لری حذف ائله‌یین. دانیشیغیزدان «فرضی مثال»، «باخ بیر»، «ایستیرم دئیم» و «واختینی آلیرام» کیمی سؤزلری حذف ائله‌یین.

مقابل طرفیز آییق آدام اولسا منظوروزو بیر دفعه دئیین. لازم دئییل اونو نئچه دفعه مختلف شکلده بیان ائده‌سیز.

پیس ارتباطین مثالی:

«سلام حسن! بیر مسأله باره‌سینده سنله دانیشماق اوچون واختینی آلیرام. او دا کئچن هفته گزمکده اولاندا ذهنیمه گلن الکترونیک نامه یولو ایله ویزیتورلوق کمپینی یولا ‌سالماقدیر. من دوغرودان بونا اینانیرام کی بیزیم هدف بازاریمیز، آیدین و بللی شکلده، اؤز قبالیندا بیزیم سعلریمیزی گؤرمک ایستیر. من مطمئنم بیزیم شرکت طرفیندن گؤرولن بو ایش مثبت تأثیرلر قویا بیلر و بو ایش مشتریلرین ذهنینده هر سعی‌دن آرتیق نفوذ ائلیه بیلر. مثلاً دئمه‌لی‌یم کی شرکتی ثابتلشدیرمک باره‌سینده دانیشساق، یوللاری‌نین بیری محلی مدرسه‌لر طریقی ایله خیریه مؤسسه‌لره کؤمکلیک ائله‌مکدیر. بو جور کی بیز اونلارین دقّتینی جلب ائله‌مک ایسته‌دیگیمیز جماعت، بو طریق ایله بیزیم سسیمیزی ائشیده‌جکلر. سن بو باره‌ده نه دوشونورسن؟»

گؤردویوز کیمی بو ایمیل چوخ اوزون و تکرارلیدیر. اونون چوخ جمله‌لرینی حذف ائله‌مک اولار.

یاخشی ارتباطا مثال:

«سلام حسن! سنین نظرینی ایمیل یولو ایله ویزیتورلوق ائله‌مک باره‌ده بیلمک ایستیرم. بو یول، بیزیم شرکتین سطحینی قووزاماغا کؤمک ائلر. مخصوصاً محلی مدرسه‌لرین طریقی ایله خیریّه مؤسسه‌لره کؤمکلیک ائله‌مکله. بو ایشین مثبت تأثیرلری اولا بیلیب ذهنلرده داها اوزون زماندا قالا بیلر. ایندی قالیب سنین نظرینه»

ادامه‌سی وار . . .

مناسب حیات یولداشی سئچمک، یاشاییشین اَن مهم انتخابیدیر و بو زمینه‌ده بالاجا اشتباه انسانی بیر عمر پشیمان ائله‌یه بیلر. جماعتین چوخو اَن یاخشی تصمیم توتدوقلارینی دوشوندوقلاری زمان، اَن بؤیوک اشتباهلارینی ائله‌دیکلی زمان اولور. بونا گؤره حیات یولداشی سئچمک ایسته‌سز بو ایشی عقل اوزو ایله گؤرون و یولوزون اوستونده دوزولموش اشتباه قویولارینا دوشمکدن چکینین.

ائولنمک نیّتینده اولساز بو دوققوز مسأله‌ده توولانماماغا دقّتلی اولون:

بیرینجی قویو: گؤزللیک

هامیمیز گؤزللیگی سئویب اونا جذب اولاریق. آما حیات یولداشی سئچمکده بو مسأله‌نین حددن آرتیق نقشی اولسا ایشی اوتوزموسوز. یاخشی اولار ائولنمکدن اوّل سیزه نه‌لرین بیرینجیلیکده اولدوغونو بللی ائله‌یه‌سیز. هرچند گؤزللیگین سیزه اهمیتی وار، آما نه‌لرین گؤزللیکدن داها آرتیق اهمیتی وار؟ هانسی معیارلاری گؤزللیگه قربان وئره بیلرسیز و گؤزللیگی هانسی معیارلارا قربان وئرمگه حاضرسیز؟ بو انسان بو قدر گؤزل اولماسایدی یئنه‌ده اونونلا ائولنمگه حاضریدیز؟

ایکینجی قویو: اجتماعی موقعیت

اجتماعی موقعیت، حیات یولداشی انتخابیندا چوخلو اشتباهلارا سبب اولان مسأله‌لردندیر. گؤزه گلیم موقعیتلر، انسانلارین او بیری خصلتلرینی گیزله‌ده بیلر. بونا گؤره بئله انسانلاری حیات یولداشی سئچمک ایسته‌ینده آرتیق دقّت ائله‌مه‌لیسیز. دقّت اولونماسا سیز او طرفین «موقعیتی» ایله ائولنیب آما سیزه مجهول اولان «اؤزو» ایله بیر دام آلتیندا یاشاماغا مجبور اولاجاقسیز.

بونا گؤره بئله آداملا ائولننده دوشونمه‌لیسیز کی او انسانین بو موقعیتی اولماسایدی یئنه‌ده اونونلا ائولنمگه حاضر اولاردیز؟

اوچونجو قویو: حددن آرتیق سئومک

ائولنمگه لازم اولان ملزمه‌لرین بیری‌ده سئومکدیر، آما سئومک هر شئی دئییل. ائولنمگین انگیزه‌سی فقط سئومک اولسا، اونون نفرت اوزو ایله داغیلماسینی گؤزله‌مک اولار.

حیات یولداشی سئچمگین اَن قورخولو حاللاریندان بیری سئودالی اولماقدیر. بو حالدا، سیز احساسات و عشقین تأثیری آلتیندا واقعیتلری گؤرمگه گوجوز چاتماز. عاشق فقط گؤزللیکلری گؤرر. عاشق انسانا دئسن بیر آزدا عقل اوزو ایله باخ، اصلاً قبول ائلیه بیلمز. چونکی مغز، بو احساسات ایچینده طبیعی ایشینی گؤره بیلمز.

بئلنچی موقعیتلرده یاخشی اولار رابطه‌دن فاصله آچیب سئوگی حرارتی‌نین آزالماسینی گؤزله‌یه‌سیز، سونرا عقل اوزو ایله گله‌جگیز اوچون تصمیم توتاسیز.

دؤردونجو قویو: تکلیک و تنهالیق حسّی

سوبالیغین تکلیگی بعضاً دؤزولمز اولور. ائولی یولداشلار بیر یئره ییغیشاندا اولا بیلر سیز سوبای اولدوغوز اوچون اونلارین جمعینه داخل اولا بیلمیه‌سیز. فامیللیقجه گزمگه گئدیرسیز، هامی اؤز حیات یولداشی ایله بیردیر آما سیز تکسیز. همکارلاریزین هامیسی ایشدن ائوه قاییداندا اونلاری اهل عیالی گؤزلور آما سیزی در-دیوار. بو آندا خطر زنگی چالماغا باشلیر.

بو تکلیک حسّی، سیزی هر نه تئزراق ائولنمگه سوق وئره بیلر. سیز بو حسّین ایچینده اولان زمان ،بیری راستیزا گلسه اونو نجات فرشته‌سی بیله‌جکسیز و آغینا قره‌سینه باخمادان ائولنمک قراری وئره‌جکسیز.

بو حس چوخ راحت سیزی اشتباها سالا بیلر. بو حس سیزده یارانمیش اولسا یاخشی اولار اونو دوستلار و یا فامئل جمعینده اولماقلا آرادان آپاراسیز و سونرا ائولنمگه اقدام ائلیه‌سیز.

بئشینجی قویو: تلسمک

سیز، طایفانین سوبای قالمیش تک جوانیسیز، هامی‌نین گؤزو سیزده‌دیر کی هاواخت ائولنه‌جکسیز. سیز ائوین بؤیوک باجیسی‌سیز کیچیک باجیلار ائولنمک اوچون سیزی گؤزلورلر. آخی اونلارین‌ ائلچیسی وار! و یا ائولنمگه یوبانمیسیز و ایندی بیردن بیره باخیب گؤرورسوز کی ائی وای قوجالدیم، فوراً ائلنمه‌لی‌یم! بو مسأله‌لرین هئچ بیری سیزی تلسدیرمه‌مه‌لیدیر.

تَلَسیک زمانلاردا اولان انتخابلارین اشتباه احتمالی چوخ اولور. بونا گؤره، حیات یولداشی سئچمکده اصلاً تَلَسمه‌یین.

آلتینجی قویو: ناقص تانیماق

بیر انسانی کامل تانیمامیش اونونلا ائولنمک کاملاً اشتباه ایشدیر. اونو هفته باشلاری شام یئمکله و یا فقط تلفونلا دانیشماقلا تانیماق اولماز. بیری ایله 20 ایل‌ بویو بوجور رابطه اولسا دا اونو تانیماق اولماز. بیری ایله ائولنمک ایسته‌سز اونون یاشاییشینی، خانواده‌سینی، کئچمیشینی، اخلاقینی و دوشونجه‌سینی تانیمالیسیز.

یئددینجی قویو: روحی بحران

قایاقکی رابطه‌دن اورگیز سینیب، هله ده اونون یارالاری ساغالماییب و عادییاشاییشا قاییتمامیسیز، ایندی اؤزوزه بیر همدم آختاریرسیز. آما بو وضعیتده ائولنمگه تصمیم توتماق و حیات یولداشی سئچمک اشتباه حرکتدیر.

روحی بحران آیری مسأله‌لره گؤره‌ ده یارانا بیلر. اولا بیلر تازالیقدا یاخین آدامیزی الدن وئرمیش اولاسیز و یا ایشسیز قالاسیز و یا سیزی بحرانا سالان هر مسأله قاباغا گله بیلر. بحران شرایطینده حیات یولداشی سئچمک سیزه گله‌جکده مشکله سالا بیلر. چونکی سیز بحراندا اولاندا یاشاییشا باخدیغیز زاویه فرقلیدیر و او آندا نظریزه مناسب گلن شخص، بحراندان سونرا آیری جور گؤروشه بیلر. بحراندان سونرا آییلیب گؤره‌جکسیز کی بو آداملا اصلاً تناسبوز یوخدور و تعجب ائلیه‌جکسیز نه جور اولوب اونونلا ائولنمیسیز.

سککیزینجی قویو: سرخوشلوق و هیجان

سیزه خوش گئچن بیر قوناقلیقدا و یا تویدا نظریزه یوخولاردا آختاردیغیز و یئرده سیزه راست گلن بیری ایله تانیش اولموسوز. اونون باره‌سینده دوشوننده ایچیز سئوینجله دولور و هیجانلانیرسیز. یاخشی احساسدیر ! آما ال ساخلایین و ائولنمگه تلسمه‌یین کی اوچورومون قیراغیندا دایانمیسیز.

مثبت هیجانلار، منفی هیجانلار کیمی انسانی دوغرو تصمیم توتماقدان یاییندیرار. خوش لحظه‌لرین سرخوشلوغو انسانین باخدیغی زاویه‌نی دَییشر و انسان اؤز همیشه‌کی گؤزو ایله باخانماز. انسان او حالدا هر شئیی گؤزل گؤرر و هر شئیه مثبت باخار. یاخشی اولار بو حاللاردا ائولنمگه تلسمیه‌سیز. ذهنین آراملاشماسی اوچون بیر مدّت دؤزون.

دوققوزونجو قویو: بسه بسلیک

بسه بسلیک انسانین گؤزونو واقعیتلرین اوزونه باغلار. انسان بیری ایله بسه بسلیک ائله‌ینده تصمیملری‌نین چوخو اشتباه اولار. چونکی او آندا تکجه هدفی بسه‌بسلیک ائله‌دیگی شخصدن قاباغا دوشمکدیر و بو یولدا چوخ شئیلری قربان وئره بیلر.

شاید بیری‌نین گؤزونده یوخاری گؤروشمک اوچون خاص بیر انسانلا ائولنه‌سیز. و یا دوستوزون فلان طایفاداکی بیر شخص ایله ائولنمه‌سی، سیزی داها یوخاری بیر طایفادان ائولنمگه هوسلندیره.  آما ال ساخلایین ! یاخشی اولار بسه‌ بسلیگه آیری یئر تاپاسیز. ائولنمک، بوجور شوخلوقلار گؤتورمز.