یاخشی قولاق آسان اولاق
یازار : میرزه عبدالصمد ملکی | بؤلوم : اجتماعی
+0 به یه ن
یاخشی قولاق آسان اولاق
لاپ یاخشی قولاق آسان، سؤزون آراسیندا هردن بیر بحث اولان موضوعدان سؤال‌لار سوروشار. البته بو مسأله دانیشانین سؤزونو کسماق آنلامینا گلمز بلکه اونون، جمله‌لر آراسیندا مکث ائله‌دیگی زمانلار اولمالیدیر.
یاخشی رابطه قورماق اوچون، یاخشی قولاق آسان اولماق لازمدیر. آشاغیداکی دؤرد ساده یول ایله یاخشی قولاق آسان و یاخشی دانیشان اولا بیلرسیز:
مناسب محیط سئچمه‌لیسیز
دوست، همکار و یا هر کسله دانیشماق ایسته‌سز مناسب محیط یاراتمالیسیز. مثلاً دقتیزی آزالدا بیلن هر شئیی گؤز قاباغیندان گؤتورون. یاخشی اولار ایش میزیزین دالیسندان قالخیب تفلونوزو دا سؤندوره‌سیز. دانیشاندا بوتون دقّتیز موضوعدا اولمالیدیر.
دانیشانا دقت ائله‌یین
بعضیلری سؤز دانیشیلان زمان، دوز دورانمازلار و اللرینده بیر شئی اوینادارلار. مثلاً اللرینده مداد و یا تسبیح دولاندیرارلار. بونلار، اذیت ائله‌ین و مکالمه‌نین کیفیّتینی آزالدان حرکتلردیلر. بو ایشلری هئچ واخت گؤرمه‌یین. بو حرکتلر دقّتسیزلیک علامتی اولاماقدان علاوه مقابل طرفه، سؤزلری‌نین اهمیتلی اولمادیغینی و یوروجو اولدوغونو القا ائدیر.
واختیندا سوروشون
لاپ یاخشی قولاق آسان، سؤزون آراسیندا هردن بیر بحث اولان موضوعدان سؤال‌لار سوروشان شخصدیر. البته بو مسأله دانیشانین سؤزونو کسمه‌مه‌لیدیر بلکه اونون، جمله‌لر آراسیندا مکث ائله‌دیگی زمانلار اولمالیدیر.
پئشه‌کار قولاق آسانلار، عین حالدا سؤال‌لاری ایله دانیشانی داها آرتیق شوقا گتیررلر. بو ایش ایله سیز ده آز یورولاسیز و دقّتیز آزالماز و یاخشی قولاق آسان موقعیتینده قالا بیلرسیز.
دوزگون نفس چکین
دانیشیغیز اوزون اولان زمان یورولماق احتمالی وار. بونا گؤره درین نفسلر چکین کی بدنیزده مخصوصاً بئینیزده قان دوزگون دولانسین. درین نفس چکمک مئتودونو قاباقجادان اؤیرشمه‌لیسیز کی دانیشیق نورمال گؤروشسون و یوروجو اولماسین.
کیشیلرین ائولنمکدن واز کئچمه سببلری
یازار : میرزه عبدالصمد ملکی | بؤلوم : اجتماعی
+0 به یه ن
کیشیلرین ائولنمکدن واز کئچمه سببلری
بوتون قرارلار قویولوب و رابطه‌نین رسمیلشیب نشانلی‌لیغین اعلامینا آز قالیر، آما نه اولور کی بیردن بیره کؤره‌کن قارداش «ائولنمگه هله حاضر اولمادیغینی» اعلام ائلیر. بو صحنه‌یه چوخ راستلاشماساق‌دا هر دن بئله صحنه‌لره شاهدلیک ائدیریک.
اوغلانین دالی قاییتماسی‌نین سببی نه اولا بیلر؟ مینلر سببین ایچینده آشاغیداکی سببلر داها چوخ شایع اولانلاردیلار. اولا بیلر بو سببلر خانیملارین نظرینه قانع ائله‌ین سبب اولمایا آما بونو دا نظرده آلمالی‌ییق کی خانیملارین و آغالارین باخیش زاویه‌لری فرقلی اولا بیلر.
مسئولیتدن قورخو:
بعضاً اوغلان هر شئیی ساده و عاشقانه گؤرور آما رابطه رسمیلشیب جدّی ایستکلر مطرح اولاندا، اؤزونو اجتماعی و مالی لحاظدان چتین شرایطده گؤرونجه، مشترک یاشاییشا هله حاضر اولمادیغینی دوشونور. تکلیک و گوجسوزلوک حسّی، بیر کیشینی عاطفی رابطه‌سیندن قاچیردان اَن بؤیوک عاملدیر. بئله وضعیتلرده عایله و مقابل طرف اونا اورک وئریب دایما کناریندا اولدوقلارینی اونا حسّ ائتدیرمه‌لیدیلر. آما بو حمایتله بئله، یئنه‌ده قاچماق ایسته‌سه بو اونون روحی جهتدن ائولنمگه هله حاضر اولمادیغی‌نین علامتیدیر.
مجبوری ائولنمک:
بعضاً اوغلان عایله‌نین فشاری آلتیندا ائولَنیر و یا اونلار ایسته‌ین قیزلا ائولنمگه مجبور قالیر. بئله‌نچی وضعیتده ایشین هر یئرینده اوغلانین پئشمان اولوب دالی اوتورماق احتمالی وار. بو وضعیتده اوغلان عایله‌سی‌نین فشارینی آزالتماق اوچون اوّلده ائولنمگه راضی اولار آما هر آن پئشمان اولماق احتمالی یوخاریدیر. بئله‌نچی ائولنمکلر باش توتسا بئله دوام گتیرمک احتمالی آز اولار.
قیزین آرتیق تاماحلیغی:
قیزلارین یئرینه گتیریلمه‌میش چوخلو آرزیلاری وار. بعضی قیزلار بو آرزیلارین ائولنمکله یئرینه گتیریلمه‌سینی ایستیرلر و بئله بیلیرلر کی ائولندیکلری کیشی‌نین اونلاری آرزیلارینا چاتدیرماق گوجلری و وظیفه‌لری وار.
قیزلار بو انتظارلا اوغلانا یاخینلاشاندا، ایستر ایسته‌مز اوغلان اؤزونو حددن آرتیق فشاردا حسّ ائدیب قاچماغا و اؤزونو قورتارماغا چالیشاجاق.
واقعیتلرین اوزه چیخماسی:
هر رابطه‌نین قیریلماسی‌نین ایلک سببی صداقتسیزلیکدیر. آما انسانلارین چوخو، کیچیک یالانلارین بؤیوک خیانتلر کیمی رابطه‌نین قیریلماسینا باعث اولا بیله‌جگینی آنلامیرلار. یالان، کیچیک‌ده اولسا، صداقسیزلیک علامتیدیر. هله قالسین کی بو یالان تانیشلیغین باشلانیشیندا دئییلمیش اولا.
مسموم رفتارلار:
خانیملارین چوخو، تانیشلیق پروسه‌سی‌نین نورمال گئتمه‌لی اولدوغونو بیلمیرلر. اونلار بئله بیلیرلر کی نیشانلی‌لارینی بیر آن بئله تک بوراخمامالیدیلار. بیر حالدا کی کیشیلرین دوره‌ای صورتده خلوته احتیاجلاری وار. بو گئدیشه خلل یئتیشسه اوغلان ائولنمکدن واز گئچه بیلر.
مقابل طرفی درک ائله‌مه‌مک:
خانیم و آغانین انتظارلاری و باخیش زاویه‌لری فرقلی اولا بیلر. اوست- اوسته هر ایکی انسان، دنیایا ایکی مختلف زاویه‌دن باخیرلار و اولویّتلری بیر- بیرلری ایله فرقلی اولا بیلر. بونا گؤره مقابل طرفی درک ائله‌مک و اونون ایستکلرینه اهمیت وئرمک و هئچ اولماسا اونو آنلاماغی حسّ ائتدیرمک، بو زمینه‌ده اهمیتلی رول اویناییر. کیشی‌نین ایستکلری خانیم طرفیندن هئچه ساییلماسی نتیجه‌سینده او، انتخابی‌نین سهو اولدوغونا اینانا بیلر.
شرقی آذربایجان نفوسونون یاریسی تبریزده یاشیر
یازار : میرزه عبدالصمد ملکی | بؤلوم : اجتماعی
+0 به یه ن
شرقی آذربایجان نفوسونون یاریسی تبریزده یاشیر
تبریز فرمانداریسی‌نین برنامه و عمران معاونی، شرقی آذربایجان نفوسونون یاریسی‌نین تبریزده یاشاماسینا اشاره ائتمکله دئدی: شهرستانلاردان تبریزه اولان کؤچمه‌لرین چوخلو فرهنگی و اجتماعی ائتگیسی اولوب.
او استانداکی ایشسیزلیک میزانینا اشاره ائتمکله دئدی: شهرستانداکی ایشسیزلر تبریزه کؤچورلر و بو، شهرده ایشسیزلیگین میزانین آرتیریرلار.
اوشاغین اوستونه قیشقیرمایین
یازار : میرزه عبدالصمد ملکی | بؤلوم : اجتماعی
+0 به یه ن
اوشاغین اوستونه قیشقیرمایین
اوشاغین اوستونه قیشقیرماق سیزدن «اؤزوندن چیخمیش بیر حیرصلی» تصویری یارادیر.
جسارتلی اوشاقلار اؤزلرینی بؤیوکلرله بیر گوجده و یا حتی اونلاردان داها گوجلو بیلرلر. سیزین غیر مناسب رفتاریز، اونلارین بو فکرینی داها دا آلوولاندیرار. یادیزدا اولسون اوشاقلار آتا آنالارنی کنترلدان چیخمیش گؤرنده گوونسیزلیک حسّ ائلرلر.
مطالعه‌لر اوشاقلارین تربیتینده قیشقیرماقدان استفاده ائله‌ین والدینلرین، بو عمل ایله اونلارا روحی صدمه ووردوقلارینی گؤستریر.
سیز، اوشاغین اوستونه قیشقیراندا اونو دا منفی عکس العمل گؤرستمگه سوق وئریرسیز. اونون بو عملی مقابلینده سیز داها دا آرتیق قیشقیریرسیز و بو دعوا بؤیویونجن دالیسی گلیر و مشکل‌ده حل اولمور. آما بو مسأله‌نین حلّی وار:
اطلاعاتیزی چوخالدین: بیرینجی آددیمدا سیزین قیشقیرماغیزا سبب اولان مسأله‌نی تاپین. اویناتمالی‌لارینی ائوه داغیدیب؟ نه‌منه سیزی غضبلندیریب؟ اونو تاپیب و وضعیتی آراملاتماق اوچون الیزدن گلن یولو آختارین.
اؤزوزه بیر داها قیشقیرماماغا سؤز وئرین: بو ایده ساده و فایداسیز نظره گله بیلر، آما هر رفتار دَییشیمینی، اؤزوزده مثبت خصوصیتلری تقویت ائله‌مکده اولدوغونو بیلین.
آرام دانیشین: بعض اتفاقلار دؤزولمز اولسا دا، آرام دانیشماغا چالیشین. اوشاقلارین‌دا ایشلریندن ال چکیب سیزه دقت ایله قولاق آسماقدان ساوای چاره‌لری یوخدور. بئله‌لیکله سیز آرام قالیرسیز و اوشاقلار و هامی بیر-بیرلری‌نین سؤزلرینه نئجه قولاق آسماغی اؤیرنیرلر.
انتظارلاریزی مدیریت ائله‌یین: قیشقیرماماغیزی ایسته‌سز، یولونو دا هامارلامالیسیز. عاغیللی حرکت ائله‌سز چتین ایش گؤرمک لازم گلمیه‌جک. اویناتمالیلارین داغیناقلیغینا گؤره اونا غضبلنیرسیزسه، اوینایا بیلدیگی اویناتمالیلارین ساییسینی آزالدین. نتیجه‌ده هم قیشقیرمازسیز و هم زحمتیز آزالار.
هر شئیی اورگیزه آلمایین: اوشاقلاریزین ایشلری باره‌ده اوتوروب دوشونورسز، اونلارین بعضاً سیزی غضبلندیرمه‌لری‌نین، قصد و غرضسیز اولدوغونو آنلایاجاقسیز.
مقایسه ائله‌مه‌یین و شاکر اولون: اؤزوزو آیری والدینلر و یا اوشاقلاریزی آیری اوشاقلارلا مقایسه ائله‌مک سیزی، خوشا گلمزلیکلره چاتان اوتوبانا سالار. یاشاییشا شاکرانه باخارساز داها آرتیق پوتانسیل‌لرین اولدوغونو گؤره‌جکسیز. اوشاقلاری سیزین اوشاقلار کیمی سالم اولمایان و قیشقیرمادان و اعتراض ائتمه‌دن یئرلرینی سیزینله دَییشمک آرزیسیندا اولان آتا آنالارا دوشونون.
منبع: psychologytodayhear
اؤلکه ائولنمه‌لرین بئشده بیری بوشانماقلا باشا چاتیر
یازار : میرزه عبدالصمد ملکی | بؤلوم : اجتماعی
+0 به یه ن
اؤلکه ائولنمه‌لرین بئشده بیری بوشانماقلا باشا چاتیر
جوانلار و ورزش وزارتی‌نین معاونی دئدی: ایندیلیقدا 10 میلیون نفر ائولنمک یاشیندا اولان جوانیمیز وار کی سوبای یاشاماغی ترجیح وئریرلر.
او سؤزلری‌نین آیری بؤلومونده دئدی: اؤلکه‌ده ائولنمکلرین بئشده بیری، قم شهرینده دؤردده بیری و تهراندا اوچده بیری بوشانماغا چاتیر. ائله کی بوشانانلارین یوزده هشتادی 30 یاشدان کیچیکدیلر.
او آرتیردی: زوجلارین بوشانما آمارینا باخاندا، جوانلارین ائولنمه‌سی‌نین اساس مسأله‌سی یاشاییشین ایلک بئش ایلی‌نین ثباتسیز اولماسیدیر کی بونون حلی اوچون فرهنگی و آموزشی برنامه‌لر قویمالی‌ییق.