امام خمینی (ره) نظرینده رادیو و تلوزیون
یازار : میرزه عبدالصمد ملکی | بؤلوم : اجتماعی
+0 به یه ن
امام خمینی (ره) نظرینده رادیو و تلوزیون
ایرنا: امام خمینی(ره) رادیو تلوزیونون اصلی وظیفه‌لریندن بیرینه اشاره‌ده دئدیلر: رادیو تلوزیون مستقل اولمالیدی و هر جور انتقادی طرفسیز اولاراق منتشر ائله‌مه‌لیدیر . . . . ( صحیفه نور، جلد 12، صفحه 23 )
متفكر جامعه‌نین دوزلتمه‌سی: بو دستگاه ائله اولمالیدیر كی نئچه ایلدن سونرا جماعتین هامیسینی آییق ائله‌سین هامیسینی مبارز بئجرتسین، بونلارین هامیسینی مستقل بارا گتیرسین، آزادلیق سئون بارا گتیرسین، غربه حیرانلیقدان چیخارتسین، جماعته استقلالی وئرسین . . . . (صحیفه نور، جلد 5، صفحه 203)
واقعیتلری منعكس ائله‌مك: رادیو تلوزیونون وظیفه‌لریندن بیری مسأله‌لری اولدوغو كیمی جماعته بیلدیرمكدیر. هر بیریزین خارجی برنامه‌ز اولسا اؤلكه‌میزین مسأله‌‌لرینی اولدوغو كیمی دئیین. او سؤزلر كی اونلار روزنامه‌لرینده و رادیولاریندا خارج جماعتینه بیلیدیرمك ایستیرلر كی بونلار یالان دئییرلر . . . (صحیفه نور، جلد 10، صفحه15)
نظرلرین مطرح اولماسینا مناسب محیط: هابئله رادیو تلوزیون مستقل اولمالیدیر و هر جور انتقادی تماماً طرفسیز اولاراق منتشر ائله‌مه‌لیدیر . . . ( صحیفه نور، جلد 12، صفحه 23 )
بیر داها یادا سالیرام كی اورانی سابق رژیمین عواملیندن تصفیه ائله‌یین. البته مصاحبه‌نین اشكالی یوخدور، هرچند بیر كومونیست گله سؤزلرین دئیه و همان زمان جوابینی آلا، بونون مانعی یوخدور. خلاصه رادیو و تلوزیون بیر عده مفسده آختاران الینده اولمامالیدیر. . . . ( صحیفه نور، جلد 12، صفحه 85 )
رادیو تلوزیونون استقلال و آزاد اولماسی‌نین گَرَكلی‌لیگی
من دفعه‌لرینن دئمیشم، رادیو تلوزیون تماماً مستقل اولمالیدیر، و استقلالی حفظ اولمالیدیر و هئچ كس اوندا دخالت ائله‌مه‌سین . . . . ( صحیفه نور،جلد 17، صفحه 157 )
بو ایكی دستگاهدی كی اسلامی اولمالیدیر. استقلالینی ساخلاسین. بیری گلیب بیر شئی تحمیل ائله‌مك ایسته‌سه اونو اصلاً حسابا قویمایین و استقلال و قدرتله بو دستگاهی یولا سالین . . . ( صحیفه نور، جلد 12،صفحه 85 )
ائولی‌لیگین بوشانما حدّینه چاتماغی‌نین 6 علامتی
یازار : میرزه عبدالصمد ملکی | بؤلوم : اجتماعی
+0 به یه ن
ائولی‌لیگین بوشانما حدّینه چاتماغی‌نین 6 علامتی
بیر مشترك حیاتین بوشانما حدّینه چاتماسی اوچون بیر سئری علامتلر وار. بیز بو علامتلرین گؤزه گلیملرینی بیر یئره ییغمیشیق:
بیرینجی علامت: خشن و توند بحثلرین باشلاماسی
بوشانمانین بیرینجی علامتی بحثلرین خشونتلی باشلاماسیدیر. چونكی بحثلرین یوزده دوخسان آلتیسیندا سؤزون باشلاماسی نئجه اولسا آخری‌ده ائله بیتیر. زوجلارین بیری بحثی مقابل طرفی متهم ائله‌مك كیمی خشونتلی و تهاجمی باشلاسا او دانیشیغین آخری اوغورسوز اولار. آیری طرفدن، زوجلارین بیری بحثی آرام و یومشاق باشلایاندا او دانیشیغین مثبت نتیجه‌یه چاتماسی‌نین احتمالی چوخدور.
ایكینجی علامت: منفی حالتلر
بحثه خشن باشلاماق زوجلاری منفی تعامله چكه بیلر و بو منفی تعامل مشترك حیاتی سقوطا یؤنَلده بیلر. عموماً مشترك یاشاییشی داغیدان دؤرد جوره منفی تعامل وار: اشكال چیخارتماق، انتقادانه گؤزله باخماق، تحقیر ائله‌مك و تدافعی حالت توتماق.
اشكال چیخارتماق: بیرینجی خطرلی عامل مقابل طرفه اشكال چیخارتماقدیر. زوجلار بیر- بیرلری‌نین بعضی عمللرینی بَیَنمه‌یه بیلرلر، آما مقابل طرفین شخصیتینه حمله ائتمك باشقا بیر شئیدیر. مقابل طرفین شخصیّتی بَیَنیلمه‌سه اونون هر عملی منفی گؤرونر.
اونلار بیر- بیرلرینه دئیه بیلرلر كی سنین فلان گؤردویون ایشدن خوشوم گلمه‌دی، آما اگر بئله دئسه‌لر : «سن اؤز رفتاریوی باجارمیسان و سنی تحمل ائله‌مك چتیندیر»، اوندادیر كی خطر علامتلری باشلامیش اولور. بو مرحله‌ده زوجلار بیر- بیرلرینی مسخره ائله‌مگه، تحقیر ائله‌مگه و بیر- بیرلری‌نین اوستونه چیغیرماغا باشلیرلار. بونلارین ایچینده تحقیر ائله‌مك اَن منفی علامت ساییلیر چونكی مقابل طرفده نفرت و غضب یارادیر و یولو مسأله‌نین حلّینه باغلاییر.
تدافعی حالت توتماق: بو حالت معمولاً اهانت و تحقیر مقابلینده وجودا گلر. چوخلاری اونلاردان انتقاد اولان زمان بو حالتی اؤزلرینه توتارلار، آما بو رفتار مسأله‌نین حلّینه اصلاً كؤمك ائله‌مز.
تدافعی حالت حقیقتده مقابل طرفی گناهلاندیرماقدیر و بو پیامی وئریر: «بو منیم مشكلیم دئییل و سنین اؤز مشكلوندور».
فكر وئرمه‌مك: بو مرحله‌ده زوجلار بیر- بیرلرینه فكر وئرمیرلر و مقابل طرفی یوخدی حسابینا قویورلار. بو عمل مقابل طرفی داها دا آرتیق غضبلندیرر.
اوچونجو علامت: طغیان ائله‌مك
یاشاییشین بوشانماغا طرف گئتمه‌سی‌نین اوچونجو علامتی زوجلارین بیری‌نین طغیان ائله‌مه‌سیدیر. بو دا بو معنایادیر كی یوخاریدا سایدیغیمیز منفی حالتلر بیر آن ایچینده و شدّتلی بروز ائله‌یه و مقابل طرفه شوك وئره.
بعضیلری طغیاندان چكینمك اوچون اؤزلرینی لاقیدلیگه وورارلار كی بونون‌دا نتیجه‌سی عاطفی رابطه‌نین قیریلماسی و نهایتده طلاق اولار.
دؤردونجو علامت: بدن دیلی
طغیانلا عینی زماندا باش وئرن اورك چیرپینماسی، آدرنالین آخماسی و قان فشاری‌نین یوكسلمه‌سی كیمی بدنین فیزیولوژیك تغییراتی، بوشانماغا گئدن یولون علامتلریندن ساییلیر.
بدنین بو تغییراتی بحثین ادامه‌سینه امكان وئرمز، منطقی ایشدن سالار و شرایطی داها دا چتینلشدیریب عاغیلسیز حركتلره باعث اولار.
بئشینجی علامت: موفقیّتسیز اصلاح چالیشمالاری
وضعیتین قاریشدیغی نقطه‌ده زوجلارین بیری مشكلون اصلاحینا چالیشر و مثلاً بیر عذر ایسته‌مكله و یا گولومسه‌مكله جریانی یوموشالتماغا چالیشار، آما طغیان ائله‌میش بیری‌نین قاباغیندا بئله عمل‌لرین داها فایداسی اولماز.
آلتینجی علامت: آجی خاطره‌لر
بوشانمانین آخر علامتی، زوجلارین مشترك یاشاییشلاری‌نین فقط آجی خاطره‌لرینی یادلارینا سالماقلاریدیر. زوجلاری دالیدا قویموش خاطره‌لرینی نظردن كئچیردیكلری زمان، شیرین خاطره‌لر یوخ بلكه آجی خاطره‌لر گؤزلری‌نین قارشی‌سیندا جانلانیرسا بو، بیر- بیرلریندن خوشلری گلمه‌مكلری علامتی ساییلیر.
هدیه وئرمك آدابی
یازار : میرزه عبدالصمد ملکی | بؤلوم : اجتماعی
+0 به یه ن
هدیه وئرمك آدابی
جامعه‌لرده‌كی رابطه و تعامل‌لرین اهمیّتلی بؤلومونو هدیه وئرمك اؤزونه اختصاص وئریر. هدیه خانواده عضولری، دوستلار و حتّی تجاری طرفلرین‌ده رابطه‌لرینی محكم‌لدیر. انسانلارین بیر- بیرینه هدیه وئرمه‌سی‌نین بیرینجی معناسی اونلارین بیر- بیرلرینه دَیَر و اهمیّت وئرمكلریدیر. بونون نتیجه‌سینه اونلار بیر- بیرلرینه داها آرتیق فكرلشیب دقّت یئتیریرلر. هرچند مختلف فرهنگلرده و موقعیتلرده هدیه وئرمگین اؤزونه مخصوص معناسی اولا بیلر آما اوست- اوسته هدیه وئرمك مقابل طرفه دقت یئتیرمك معناسیندادیر.
هدیه وئرمك مقابل طرفه علاقه نشان وئرمگین اَن آیدین علامتی ساییلیر. حتیّ عكسینه بیری ایسته‌سه بیریله اَن آز صدمه ایله رابطه‌‌سینی قیرسین، بونو هدیه وئرمكله ده ائده بیلر. هدیه مسأله‌سینه دقت یئتیرمه‌ین انسانلار، معمولا بو اجتماعی علامتلر و اشاره‌لری الدن وئریرلر.
روانشناسلیق باخیمدان‌دا هدیه وئرمگین یوخاری اهمیتی وار. پای وئرمك هر ایكی طرفین روحی باخیمدان ساغلام اولماسینا كؤمك ائلر. بو عمل هر ایكی طرفده خوشا گلیم حسّ یارادار و صمیمیّتی چوخالتماقلا امنیت حسّینی‌ده چوخالدار. هدیه وئریب آلماق انسانلارین بئینینده شادلیغا سسب اولان «سروتونین» هورمونونون ترشح تاپماسینا باعث اولار.
هدیه وئرمك عوضسیز نیّت ایله اولدوغو زمان داها چوخ فایدالی اولور و هدیه وئرنین دئپرئسیوندان اوزاق اولماسینا سبب اولار.
هدیه وئرمك ساده ایش نظره گلسه ده اؤزونه مخصوص آدابی وار. هدیه وئرمگین بیرینجی چتین مقامی مقابل طرفین نه‌یه علاقه‌لی اولدوغو و نه‌یی سئودیگیدیر. حقیقتده بو راحتلیقدا اونون بئینینه نفوذ ائدیب نه ایسته‌دیگینی بیلمك اولماز. بعضاً ده بو مسأله هدیه‌نین، آلانین طرفیندن ارزشسیز گؤروندوگونه سبب اولور.
آشاغیدا یاخشی هدیه‌نین بیر سئری علامتلرینی ساییریق:
غرضسیز هدیه
هر شئیدن اوّل یاخشی هدیه، غرضسیز و توقّع اولمادان وئریلمه‌لیدیر. چونكی غرضلی اولسا و عوض-عوض نیّتی ایله وئریلسه مقابل طرف، اؤزونو عوضینده آیری بیر هدیه آلماق مجبوریّتینده گؤره‌جك، هم‌ده اونا وئریلن هدیه‌نین صمیمیت اوزو ایله اولمادیغینا ایناناجاق.
مناسب قیمتی اولان هدیه
وئریلن هدیه مقابل طرفده یوخسول‌لوق حسّی یاراتسا، حقیقی هدیه ساییلماز، بلكه بو ایش هدیه وئرنین وارلی اولماسینی گؤسترن عمل ساییلیر. انسانلارین هدیه آلماق همان، اونون جبرانینا فكرلشدیكلری اوچون باهالی هدیه اونلاری دردسره سالار و اَن آجی خاطره‌لرینه چئوریلر. بونا گؤره هدیه آلاندا آرتیق دقّت ائتمك لازمدیر.
مخصوص هدیه
بعضیلری هدیه‌نی مجبوری و بویونلاریندا بورج اولدوغو اوچون وئریرلر كی معمولاً بیر كؤینكلیك، جوراب و بو كیمی شئیلر اولار. بونلار لازم اولان شئیلر اولسا دا اونلاری هدیه وئرمك مقابل طرفده اهمیتلی اولماق و مخصوص اولماق حسّی یاراتماز. اوندا بو حس یاراتماق اوچون اونون چوخ سئودیگی شئیلر مثلاً آلماق ایسته‌دیگی بیر كتابی هدیه وئرمك لازمدیر.
هدیه نقد پول اولمامالیدیر
بعضیلری هدیه آلماق یئرینه پول وئریرلر. بو ایش مقابل طرفین هدیه وئرن اوچون اهمیتسیز اولدوغونو القا ائلیر. یعنی او شخصین او قدر اهمیتی یوخیدی كی اونون اوچون فكرلشیب بیر هدیه آلماغا زحمت چكیلسین. هدیه آلانین اهمتلی اولدوغونو بیان ائتمك لازم اولان یئرده، هئچ واخت هدیه نقد پول اولمامالیدیر.
هدیه‌نین ارزشینی پول ایله اؤلچمك اولماز. هدیه، مقابل طرفه علاقه‌نی بروزا وئرمك معناسیدندادیر. بونا گؤره همیشه بیر شئی آلماق لازم دئییل. بلكه اونون سئودیگی یئمگی حاضرلاماق و یا اونا مهم اولان بیر گون مثلاً تولّد گونونده، اونو قوناق چاغیرماق، اونون سیزه نه قدر اهمیتلی اولدوغونو ثابت ائلر.
هدیه‌نین دالیسینداكی دوشونجه
هدیه‌نین اؤزو، او قدر ده اهمیتلی دئییل بلكه اونون دالیسیندا اولان دوشونجه مهمدیر. بونا گؤره هدیه، مقابل طرفین سئودیگی بیر شئی اولمالیدیر. بو مسأله‌نی اونون دانیشیقلاریندان آنلاماق اولار. حتی بیر كنسرت، تئاتر بلیطینی‌ده هدیه كیمی وئرمك اولار. بئله‌لیكله اونون ذهنینده شیرین بیر خاطره یاراتماق اولار.
هدیه آلان باشی مشغول و واختی آز اولان آدام اولسا، اونا واخت ایسته‌ین هدیه مثلاً بئش مین قطعه‌لیك پازل آلماق دوز اولماز. آما اونون ایش واختی قولاق آسا بیله‌جگی سسلی كتاب آلماق یاخشی بیر هدیه ساییلار.
پیچَتلی هدیه آلماقدان گؤزل بیر شئی یوخدور. حتی بو هدیه بیر بلیط اولسا اونو بیر هدیه پاكتی‌نین ایچینده آلماق لذتلی اولار. هم‌ده بو پاكت هدیه آلانین سئودیگی طرحده اولسا لاپ یاخشی اولار.
گؤزل یازیلار
هدیه كاغذی‌نین اوستونده همیشه گؤزل سؤزلر یازماق لازمدیر. البته تكراری و كلیشه‌لی یازیلار یازماقدان چكینماق یاخشی اولار. چونكی او جمله‌لرین هدیه وئرنین اؤز ایچیندن گلمیش یازیلار اولماماسی بللی اولار. بونا گؤره هدیه وئرن حتی ساده جمله‌لرله اورك سؤزلرینی یازسا دا مقابل طرفه اهمیتلی اولار.
اونا واخت آییرماق
هدیه همیشه بیر شئی آلماق دئییل. اولا بیلر زمان و واخت هدیه كیمی مقابل طرفه وئریله. مثلاً اونون تولّد گونونده و یا اونا مهم ساییلان بیر گونده اونون گؤروشونه گئدیله و یا اونون اورك سؤزلرینه قولاق آسیلا.
«اؤزو بیلن یاخشیدی» آدلی كتاب یاییلدی
یازار : میرزه عبدالصمد ملکی | بؤلوم : اجتماعی
+0 به یه ن
«اؤزو بیلن یاخشیدی» كتابی جیبی قطعده 64 صفحه ده اخلاقی دَیَرلری داشییان ناغیللاری احتوا ائده رك تبریزده نباتی نشریاتی طرفیندن یاییلدی. بو كتابی آشاغیداكی لینكدن یئندیره بیلرسیز.
مایل اولساز كتابین هزینه سینی (1500 تومن) آشاغیداكی بانك كارت نمره سینه كؤچورده بیلرسیز:
صمد كامران آدینا ملت بانكی:
6104337105212110
كتابی یئندیر
واختین مدیریّتی
یازار : میرزه عبدالصمد ملکی | بؤلوم : اجتماعی
+0 به یه ن
واختین مدیریّتی
واختلاری قیزیلدان دَیَرلی اولانلار اونون مدیریتلی اداره اولونماسینی چوخ یاخشی بیلیرلر. فقط آیلار و ایللرین تلف اولماسینا واختین تلف اولماسی دئییلمز بلكه ائله ثانیه‌لرین و ساعتلرین تلف اولماسی‌دا بعضی ارزشلی فرصتلری الیمیزدن آلا بیلر. بونا گؤره هر كس واختی‌نین تلف اولمادان دوزگون استفاده‌سینه تصمیم توتوبسا بو یازینی اووخوسون.
اتفاقاتی دفترچه‌ده یازین:
ایندی گونده‌لیك زمانیزدان نئجه استفاده ائلیرسیز؟ بونو بیلمك زمان مدیریتی‌نین بیرینجی آددیمی ساییلیر. یعنی ایندی ایشه سالدیغی مئتودو تحلیل ائله‌مگیز لازمدیر. بو ایشین ائله‌ده تخصصه احتیاجی یوخدور یعنی سیز اؤزوز ده بو ایشی گؤره بیلرسز. باشلانیش اوچون گونده‌لیك ایشلریزی بیر دفترچه‌ده یازین. دئمه‌یین كی یادیمدا قالار یازماق لازم دئییل حتماً یازین. بو ایش سیزه لازم اولمایان ایشلری تاپماغا كؤمك ائلر. بو ایشلری تاپماق بیرینجی بؤیوك داشی قاباغیزدان گؤتوره‌جك.
مهمّ ایشلری تاپین:
هر گون نه ایشلر گؤرورسوز؟ هانسی ایشلره اولویّت وئریرسیز و هانسی ایشلرین اهمیتی داها آزدیر؟ زمان مدیریتینده بو ایكی سؤال چوخ مهم ساییلیر. زمانین مدیریتی اوچون بیرینجی آددیم ایشلری اولویت باخیمیندان دوزمكدیر. لذتلی ایشلرین حذف اولماسینا قورخمایین. عكسینه گوجوز چاتمایان ایشلری فوری ایشلرین لیستیندن حذف ائدین. گونده‌لیك مسئولیتلریزی معقول بیر مقدارا آزالداندان سونرا برنامه تؤكمك واختی چاتیر.
واختیزا مزاحم اولانلاری تاپین:
هر كسین دؤره‌سینده واخت مزاحملری اولا بیلر. اونلار گون بویو انسانلارین واختلارین تلف ائلیرلر. بئله سانمایین كی سیزین دؤره‌زده بئله انسانلار یوخدو. بیر آز دقتلی باخساز اونلاری تاپارسیز. اونلارا، مشغول اولدوغوزو و آرتیق واختیزین اولمادیغینی آنلاتمالیسیز. بو گونون حیاتیندا مزاحملرین چوخو تلفن و یا اجتماعی شبكه‌لر واسطه‌سی ایله واختیمیز تلف ائلیرلر. یاخشی اولار ایشیز اولان زمانلار تلفونوزو خاموشلایاسیز و یا سس‌سیزه قویاسیز.
واختی یاراتماق یاخشی یول ساییلیر:
«قراردی سیز زمانی مدیریت ائلیه‌سیز نه زمان سیزی» بو جمله‌نین معناسی بودور كی سیز اؤزوزه واخت یارادا بیلرسیز. تعجبلنمه‌یین، لازم دئییل ساعتین عقربه‌لرین دالی‌یا چكه‌سیز. سیز اؤلو واختلاری تاپیب اونلاری فایدالی واختلارا چئویره بیلرسیز. بو ائله‌ده بوروشوق ایش دئییل. بئش آلتی گون تمریندن سونرا بو ایشی باشاراجاقسیز. فقط دقتیز، واخت اوغورلولاریندا اولمالیدیر كی واختیزی سرقت ائله‌مه‌سینلر.
ایشیزی دوزگون گؤرون:
چوخلاری ایشلری یئیین گؤرومكله داها چوخ واختلاری‌نین اولماسینی دوشونورلر. لطفا سیز بو اشتباهی ائله‌مه‌یین و اؤزوزدن داها آرتیق راضی اولماغیز اوچون ایشلرین دوزگون یئرینه گتیرمگینه فكر وئرین.
ایشلری یئرسیزجه‌سینه یئیین گؤرنده، دقّتیز آزالیر و چوخ واختلار همان ایشی تازادان گؤرمك مجبوریتینده قالیرسیز. ائله بیر ایشی تازادان گؤرمك واختی تلف ائلیر.
گونده‌لیك ایشلرین نوعلرینی تانیین:
زمان مدیرتینده ایشلرین نوعلرینی بیلمك چوخ مهمدیر. ایشلری اوچ مهم، آز اهمیتلی و اهمیتسیز یئره بؤلمك اولار. مهم ایشلری تعویقه سالمایین چونكی اونلاری واختیندا گؤرمه‌سز سونرا سیزین داها چوخ واختیزی آلاجاقلار و هئچ واخت‌دا همان ایش اولامایاجاقلار. اهمیتی آز اولان و اهمیتسیز ایشلری سونرایا ساخلایا بیلرسیز.
چتین و واخت توتان ایشلره بیر چاره تاپین:
نظریزه بیر ایش چتین و یا واخت توتان گلسه اونون آلتیندان قاچمایین مخصوصاً مهم ایشلرین سیراسیندا اولسا. بئله ایشلری واختیندا یئرینه گتیرمك لازمدیر. یاخشی اولار امكان داخلینده بو ایشلرین گؤرمه‌سینه تازا و فرقلی یول تاپیلسین آما سونرایا ساخلانیلمالاری اصلاً مصلحت دئییل.
واختیزین مدیری اولماغا نئچه توصیه:
زمانین دوزگون مدیریتی اوچون خصلتلریزین بیر سیراسینی اصلاح ائتمه‌لی و یا حتی دَییشمه‌لیسیز. سیزین بعضی قاباقكی خصلتلریزی زمان مدیریتی اوچون ضررلی اولا بیلر.
1ـ برنامه تؤكن اولون:
ایش بیلنلرین دئدیگینه گؤره بیزیم قازانجلاریمیزین یوزده هشتادی چالیشماغیمیزین یوزده ایگیرمیسی ایله اله گلمه‌لیدیر. بو سیزین دوزگون برنامه تؤكدوگوز زمان اله گلر. برنامه تؤكه بیلمه‌سز مطمئناً زمان مدیریتینده موفق اولا بیلمیه‌جاقسیز.
2ـ اعتمادیز اولسون:
ایشلرین گؤرولمه‌سینده آیریلارینا اعتمادیز اولماسا زمان مدیریتی سیزه چوخ چتین اولاجاق. بعضاً سیز بونا گؤره ایشلریزی واختیندا گؤره بیلمیز سیز كی ایشین بیر قمستینی آیریسینا تاپیشیرماغا جرأت ائله‌میرسیز. شاید ایشی تاپیشیردیغیز شخص او ایشی سیزین كیمی یاخشی و دقتلی یئرینه گتیره بیلمه‌سین آما ایشین اونلارین طرفیندن گؤرولمه‌سی اونون یئرده قالماسیندان و یا سیزین استراحت واختلاریزی آلماقدان داها یاخشیدیر.
3ـ یوخ دئمگی باجارین:
هر سؤزون و ایستگین قاباغیندا تسلیم اولماق و «گؤزوم اوسته» دئمك نیّتیز اولسا، یاخشی اولار زمان مدیریتیندن واز كئچه‌سیز. سیز زمان مدیریتینی اله گتیرمك اوچون «یوخ» دئمگی باجارمالیسیز. بونون آیری یولو یوخدور. بیر ایشی گؤرمگه واختیز اولماسا چوخ احتراملا بونو مقابل طرفه چاتدیرین. مقابل طرف نه قدر ده اصرار ائله‌سه گوجوز و یا واختیز چاتمایان ایشی عهده‌زه گؤتورمه‌یین.