اینترنتسیز, اؤزومو ایتمیش حیس ائدیرم
یازار : میرزه عبدالصمد ملکی | بؤلوم : اجتماعی
+0 به یه ن
 |
||
|
انگلیستاندا 25 یاشدان آز جوانلاردا بیر آراشدیرما نیشان وئریب كی هر بئش نفردن دؤرد نفری اینترنتسیز اؤزونو «ایتمیش» حیس ائدیر. تلگرافین وئردیگی خبره گؤره, بو آراشدیرما لندنین علوم موزه‌سی طرفیندن مین نفر 25 یاشدان كیچیك جوانلار اوستونده اولوب كی وئبله بؤیوموش نسله, اینترنتین قویدوغو تأثیرینی گؤرسدیر. آیری طرفدن 25 یاشدان یوخاری اولانلارین بئشده اوچو اینترنت باره‌ده بو نظرلری وار. بو تحقیقده‌كی آداملارین اوچده بیری اینترنتی تیلویزیونا ترجیح وئریرلر و یوزده آلتمیشی اینترنتی, ایرمیجی عصرین اَن بؤیوك ایختیراعسی بیلیرلر. تحقیقده‌كی آروادلارین یاریسی و 25 یاشدان آشاغی آروادلارین یوزده آلتمیشی اینترنتدن ناخوشلوقلارین تانیماق اوچون ایستیفاده ائدیرلر. هابئله تحقیقده‌كیلرین یوزده قیرخی اینترنتدن آشپزلیگی اؤیرنمك اوچون ایستیفاده ائدیرلر و اوچده بیری‌ده وساییل تعمیرینی اؤیرنمك اوچون بو وسیله‌دن ایستیفاده ائدیرلر. |
||
طلاقین چوخالماسی و ائولنمگین آزالماسی
یازار : میرزه عبدالصمد ملکی | بؤلوم : اجتماعی
+0 به یه ن
|
||
|
كئچن آلتی آیدا باش وئردی: بوشانمانین چوخالماسی و ائولنمگین آزالماسی اؤلكه‌نین سند و املاك ثبت ایداره‌سی‌نین رئیسی كئچن آلتی آیدا بوشانمانین یوزده آلتی چوخالماسی و ائولنمگین یوزده بئش آزالماسیندان خبر وئردی. احمد تویسركانی زنجاندا خبرنیگارلار جمعینده دئدی: بو ایلین ایلك آلتی آییندا اؤلكه‌میزده 70 مین 841 بوشانما ثبت اولوب كی كئچن ایل ایله موقاییسه‌ده یوزده آلتی چوخالیب. همن زماندا 415 مین 620 ائولنمك ثبت اولوب كی كئچن ایلین اوخشار زمانینا نیسبت یوزده بئش آزالیب. |
||
اینسانین منفعتی هاردادیر؟
یازار : میرزه عبدالصمد ملکی | بؤلوم : اجتماعی
+0 به یه ن
|
||
|
اینسان هر گون اؤز احتیاجلارینی تأمین ائتمگه چالیشیر و بو چالیشمانین نتیجه‌سی تكجه اونون اؤزونه فایدا وئریر. ساییر حیوانلار دا بئله‌دیر آما اینسانین اونلارلار فرقی بودور كی اولا بیلر كی اینسانین چالیشماسیندا, تكجه مقصد مادّی فایدالار اولماسین, بلكه اینسان داها گئنیش فایدالارین دالیسیجا اولسون. او بوتون كاییناتی اؤزو بیلر و ساییر اینسانلارا دا كؤمك ائتمگه چالیشیر. اینسان بو حاللاردا اؤز واقعی هویّتینی تاپیر و واقعی اینسان اولور. فیلسوفلارین هامیسی بو مسأله‌ده كی اینسان لذّت و منفعت قازانماق و درد و آغریدان اوزاق اولماق دالیسجادیر, بیر عقیده‌ده‌دیلر. آما اونون نوعوندا ایختیلافلاری وار. بیر عیدّه فردین اصالتینه اینانیرلار و بیر عیدّه جامیعه‌نین اصالتینی قبول ائدیرلر. بیر عیده‌ده هم فردین و هم جامیعه‌نین منقعتینی نظرده آلیر كی ایسلام دینی‌ده دقیقاً بو مسأله‌نی اؤیردیر. اینسان بو كمالا چاتسا كی بو مسأله‌نی بیله كی كایینات او اؤزودور, داها شخصی منفعتلرله جامیعه منفعتلری بیر خط اوستونده اولاجاق و بیر بیریندن آیری اولمایاجاق. عیناً دریانین سویو كیمی كی دریا همان سودور و سو همان دریادیر. دریا اولماسا سو اولماز و سو اولماسا دریا اولماز و بو دریانین هر قطره‌سینه صادیقدیر. و یا آیری بیر میثال: قویوغون هر تیكه‌سی قویوق اؤزودور و قویوق او تیكه‌لردن عیبارتدیر. اونون هر تیكه‌سی صدمه گؤرسه قویوق دلینمیش ساییلیر و داها اؤزو اولمور. |
||
آتا آنا اعتیادی‌نین اوشاقلاردا بوراخان تأثیری
یازار : میرزه عبدالصمد ملکی | بؤلوم : اجتماعی
+0 به یه ن
|
||
|
عاییله عضولری‌نین سیقار, موخدیره مادّه‌لر و ...اعتیادی اوشاقلارا اثر قویور. هر چند بیر نفرین اعتیادیندان عاییله‌نین بوتون عضولری ناراحات اولارلار, آما اونون منفی تأثیری اوشاقلارا داها چوخ اولار. بو اوشاقلار ائوده هركی-هركیلیك و اؤندن بللی اولمایان شراییطله اوز به اوزدولر و بو مسأله اونلارین ایندیكی و گله‌جك یاشاییشلاریندا موشكول یارادار. آتا آناسی مؤعتاد اولان اوشاقلار بو موشكول‌لرله اوز به اوز اولارلار: اؤرگشمه گوجونون آزالماسی, فیزیكی ناخوشلوقلار, روحی ناخوشلوقلار, چاقلیق و اطرافا گؤره دیقّتین آزالماسی اوشاغین كیرداریندا منفی تأثیر آتا آنانین اعتیادی اوشاغین كیرداریندا پیس تأثیر قویار كی اونلارین بعضی‌سینه ایشاره ائدیریك: مؤعتادلارین یاشاییشی عادی اینسانلارلا چوخ فرقلی اولور. بوجور عاییله‌لرده اوشاقلار ائوده خشونت, جیسمی و جینسی سوءایستیفاده, روح دوشگونلویو, روحی ناخوشلوقلار, طلاق و . . .زادلارا شاهید اولورلار و اونلاردا بو ایشلری گؤرماغا تمایول, چوخ اولار و شیدتلی صورتده ایضطیراب, روح دوشگونلویو و حتّا اینتیحار معرضینده اولارلار. اكثر زمانلار اونلارین بو رفتارلاری ائودن ائشیگه‌ده مونتقیل اولار و اونلار اؤز یاشیتلاری‌ایله چوخ چتین رابیطه قورا بیلرلر و معمولاً غیر ایجتیماعی و اوتانجاق افرادا تبدیل اولارلار. اوشاقلیق دؤره‌سینی یاددان چیخارتماق وضعیت چوخ پیس اولان زمان, آتا آنا اوشاغین اساسی ایستكلرینه دیقّت ائله‌مزلر و اونلار مجبور قالارلار مدرسه‌نی بوشلاییب و برنامه‌سیز یاشایالار. بعضاً بالاجا كیشیلره و خانیملارا چئوریلرلر كی مجبوردولار عاییله‌نین و یا كیچیك باجی قارداشین مسئولیّتینی بویونلارینا آلالار. گوناه حیسّی بعضاً آتا آنا اوشاغین اوستونه قیشقیراندا, او اؤزونو ائوین بوتون حادیثه‌لرینه گؤره گوناهلی بیلیر. بو حیسّ اونون گله‌جكده‌كی رفتارلارینا اثر قویور. آتا آنانین دیقّتسیزلیگی چوخ واختلار حتّا آتا آنانین فقط بیری مؤعتاد اولاندا, آتا و یا آنا اوشاغا كیفایت قدر دیقّت یئتیره بیلمیر, نیه كی بوتون دیقّتی اؤز موشكولونه مصرف اولور. اوشاغا دیقّتسیزلیك اونون روح دوشگونلویو و آیری موشكوللرینه سبب اولا بیلر. اوشاغین خشونتی بئله عاییله‌لرده اوشاقلار همیشه آتا آنانین داعواسینا شاهید اولورلار و اؤزلری‌ده جیسمی و یا روحی سوءایستیفاده معرضینده اولورلار و بو شراییط اونو روحی و یا جیسمی ناخوشلوغا چاتدیرا بیلر. اؤزونه اینمانماماق آتا آنانین بیری مؤعتاد اولان عاییله‌لرده, اوشاقلار همیشه ساكیت اولمالیدیلار كی آتا آنانی حیرصلندیرمه‌سینلر؛ بونا گؤره قورخاق و اؤزونه اینانمایان اولارلار و هر شئیدن و هر كسدن قورخارلار. اؤزگه‌نین ریضایتی مؤعتاد آتا آنانین اوشاقلاری چالیشارلار ساكیت اولسونلار و اونلاری راضی ساخلاسینلار. بئله اولاندا اونلار گله‌جكده ده هامینی اؤزلریندن راضی ساخلاماغا چالیشاجاقلار و هئچ كسه یوخ دئمك جورأتلری اولمایاجاق, مخصوصاً گوجلو آداملارا؛ بئله‌لیكله اؤز هویّتلرین الدن وئره‌جكلر. اوشاقلار بوجور عاییله‌لرده یالان دانیشماغی, خیانتی, اوغرولوغو و آیری جورملری اؤرگشیرلر. اوشاغین مؤعتاد اولما احتیمالی مؤعتاد آتا آنانین اوشاقلاری همیشه اعتیاد معرضینده‌دیلر و بونا گؤره اونلارین مؤعتاد اولما احتیمالی چوخ یوخاری اولور. آیریلارینا اینانماماق بو اوشاقلار اوتانجاق اولدوقلاری اوچون دوستلاری ایله چوخ آز رابیطه‌لری اولور و یاشاییشلاری معمولاً گیزلی اولار. بئله‌لیكله هئچ كسه اینانمازلار و بو اینانماماق اونلارین گله‌جكده‌كی رابیطه و یاشاییشلارینا منفی تأثیر قویار. |
||
بو ایشلر نیه چتیندیر؟ * لماذا هذه الأمور صعبة؟
یازار : میرزه عبدالصمد ملکی | بؤلوم : اجتماعی
+0 به یه ن
|
||
|
بیر حكیم كیشی‌دن سوروشدولار: كیمه حیكمتلی دئمك اولار؟ جواب وئردی: هر كس كی همیشه آیریلاریندان اؤرگشماغا بیر شئی تاپسین. اوندان سوروشدولار: كیم گوجلودور؟ جواب وئردی: اؤزونه موسلط اولا بیلن آدام. یئنه سوروشدولار: كیمی غنی‌دیر؟ اونون جوابی بوندان باشقا دئییلدی: هر كس كی اؤزونده اولان خزینه‌نی تانییا. اونون حیاتی‌نین گونلر و ساعتلری كی ائلیه بیلر اطرافینداكیلاری دگیشسین. سوروشدولار: كیم احتیراما لاییقدیر؟ یئنه وئردیگی جواب خارق‌العاده اولمادی: هر كس كی اؤزونه و قونشوسونا احتیرام قویا. اورداكیلارین بیری آرتیردی: بونلارین هامیسی آیدیندیلار كی! حكیم كیشی دانیشیغینی بو سؤزله قورتاردی: ائله بونا گؤره اونلارا عمل ائتمك چتین اولور. حیكمت: بللی كی یاشاییشیمیزدا اَن چتین ایشلر, آیدین اولان زادلاردیر. بونون اوچون اَن بؤیوك میثال سیقار چكن آدامدیر او بیلیر اؤزونو اؤلدورور و فسادا ایدامه وئرندیر كی بیلیر فاسید ایشدیر آما یئنه دوام ائدیر . .. آشكار زادلارا بعضاً چتین اَل چاتیلیر. لماذا هذه الأمور صعبة؟
سئل رجل حكیم ذات یوم "من هو الحكیم؟" فأجاب: "من یجد دائماً شیئاً لیتعلمه من الآخرین." فسألوه : "من هو القوی؟" فأجاب : "الرجل القادر على السیطرة على نفسه." ثم سألوه : "من هو الغنی؟" فما كان منه إلا أن أجاب : "من یعلم بالكنز الذی لدیه. أیام وساعات حیاته التی یمكن أن تغیر كل شیء یجری حوله." فسألوه : "من یستحق الاحترام؟" فكان جوابه مرة أخرى غیر مبهر فقال : "من یحترم نفسه وجاره" فعلق أحد الحاضرین قائلاً: "هذه الأمور جمیعها واضحة جداً." فاختتم رجل الدین حدیثه بالقول: "لذا فمن الصعب التمسك بها." حكمة : من الواضح جداً فی حیاتنا أن الأمور الواضحة هی صعبة التطبیق ، وأكبر مثال لنا المدخن الذی یعرف أنه یقتل نفسه ویواصل والفاسد الذی یعرف أنه فاسد ویواصل .. فالوضوح بعض الأحیان صعب للغایة. |
||