امامزادا موسی الجمال تبریزین گؤزل مكانلاریندان بیرینه چئوریلیر
یازار : میرزه عبدالصمد ملکی | بؤلوم : دین
+0 به یه ن
امامزادا موسی الجمال تبریزین گؤزل مكانلاریندان بیرینه چئوریلیر
تبریز شهرداری امامزادا سید جمالین تبریزین گؤزل مكانلاریندان بیرنه چئوریلمه‌سیندن خبر وئردی. تبریز شهرداریسی‌نین عمومی رابطه‌لری‌نین وئردیگی خبره گؤره، صادق نجفی تبریزین راستا كوچه محله‌سینده امامزادا ابوالحسن موسی الجمالین احیا و توسعه پروژه‌سیندن گؤروشده دئدی: دین بؤیوكلری و مجتهدلرین تأییدینه گؤره بو كرامتلی امامزادا‌نین نسبتی دؤرد نسل ایله امام موسی بن جعفره (ع) یئتیشیر. ائله بو سابقه، بو مكانین تبریزین تاریخی، مذهبی و گزمه‌لی یئرلریندن بیرینه چئوریلمه‌سینی واجب ائلیر.
تبریز شهرداری آرتیردی: بو مكانا كئچمیشده لازمینجه دقّت اولونماییب آما ایندی شهرداری و شهر شوراسی‌نین تعاملی ایله اونون احیا و توسعه‌سی سرعتله قاباغا گئدیر.
نجفی آرتیردی: تقریباً سككیز آی بوندا اوّل بو مكاندان گؤروش ضمنینده بو امامزادا‌نین احیاسینا قرار آلیندی و نظره گلیر یاخین گله‌جكده بورا تبریزین گؤزل یئرلریندن بیرینه چئوریله.
او، ایندیكی نسلین تبریزین كئچمیش افتخارلاری ایله تانیش اولماسی‌نین ضرورتینه تأكید ائله‌ییب دئدی: بیزیم بو طرحلرین اجراسیندان اساس هدفیمیز ایندیكی نسلی اسلامین افتخارلی تاریخی ایله تانیش ائله‌مكدیر. چونكی كئچمیش همیشه گله‌جگین چیراغی اولوب و كئچمیشی تانیماق قاباغا گئتمگه انگیزه یارادار.
نجفی، هابئه تبریز بازار محدوده‌سینده اجرا حالیندا اولان پروژه‌لره اشاره ائدیب دئدی: صادقیه‌نین احیاسی، راستا كوچه‌نین فلسطین خیابانینا متصل اولماسی طرحلری‌ده اجرا حالیندادیر كی بو گؤزل‌لندیرمه طرحلری ایله تبریزین تاریخی بازار منطقه‌سینی اؤزونه یاراشان رونقینه قاییتما‌سینا اومودوموز وار.
امامزادا موسی‌الجمال، امام موسی كاظمین (ع) نوه‌لریندندیر كی نَسَبی دؤرد نسل ایله او حضرته یئتیشیر.
بو امامزادا ابن‌اعرابی و صاحب طوق و صاحب حاجات آدینا دا تانینیر.
آیت الله مصطفی محقق داماد واتیكاندا پاپلا گؤروشدو
یازار : میرزه عبدالصمد ملکی | بؤلوم : دین
+0 به یه ن
آیت الله مصطفی محقق داماد واتیكاندا پاپلا گؤروشدو
آیت الله سید مصطفی محقق داماد دنیا كاتولیك مسیحی‌لری‌نین رهبری پاپ فرانسیس ایله واتیكاندا گؤروشوب دانیشدی. بو گؤروش «مؤمنلرین جامعه‌ده‌كی تربیتی رولو» موضوعسوندا مسلمان و مسیحی عالملری‌نین اوچونجو اجلاسی چرچیوه‌سینده و كاردینان تورانین دعوتی ایله اولدو.
حوزه آژانسی‌نین وئردیگی خبره گؤره، واشینگتونون بؤیوك اسقفو كاردینال توران، امیر حسین بن طلال اردن‌دا بین الادیان مطالعه‌لر مؤسسه‌سی‌نین هیأت امنا رییسی، لبنانین سابق مفتیسی شیخ محمد رشید قبانی و بیت المقدس، مالزی، اندوزی، الجزایر و انگلستانین كلیسا اسقفلاری حاضر اولان بو اجلاسدا، ایكی دین عالملری‌نین دانیشیقلاری ایله اجرا اولدو.
بو مراسمده پاپ دئدی: مقصده چاتماغا چتین یول قاباغیمیزدا وار آما بو یولون هامار اولماسینا دعا ائتمه‌لی‌ییك.
بو اجلاسدا مدرسه‌لرده و دانشگاهلاردا مناسب تعلیم یوللاری ایله دینی معارفی و معنویاتی جوان نسله انتقال وئرمگین ضروری اولماسینا تأكید اولدو.
امام حسینه (ع) بیرینجی عزا مجلیسی یزید طرفیندن قورولدو/ عزادارلیق هدف دئییل
یازار : میرزه عبدالصمد ملکی | بؤلوم : دین
+0 به یه ن
امام حسینه (ع) بیرینجی عزا مجلیسی یزید طرفیندن قورولدو/ عزادارلیق هدف دئییل
امام حسین (ع) بویورودولار: اسلام امتی یزید كیمی حاكمه مبتلا اولسا اسلاملا وداعلاشماق لازمدیر.
عزادارلیق اسلام و دین فرهنگینی ساخلاماق اوچون بؤیوك ایشدیر. مین ایلدن آرتیقدیر كی شیعه مذهبی اقلیتده و مظلوم موقعیتده واقع اولوب. بنی امیه زمانیندا اهل بیتین (ع) آدینی آپارماق جرم ساییلیر. چونكی دوشمنلر او حضرتلرین آدلاری‌نین دالیسینجا فرهنگلری‌نین‌ده گلمه‌سینی بیلیرلر. اونلارین فرهنگی‌ده چوخلو ایشلرین پرده‌سینی آچار و ریاكارلارین ریاسینی اوزه چیخارار.
آما عزادارلیقدا اسلام و اهل بیت (ع) فرهنگی و سیره‌سی بیان اولمازسا او عزادارلیق یزیدی عزادارلیقدیر. چونكی امام حسینه (ع) بیرینجی رسمی عزادارلیق مراسمی توتان یزید اؤزو اولدو. او دئدی من ابن زیادا بئله دئمه‌میشدیم او افراط ائله‌ییب. ایندی بو سهوین جبرانینا عزادالیق مراسمی قورمالی‌یام. بیلیرسیز كی كربلا اسیرلری شاما قدر شكنجه و تحقیرله آپاریلدیلار آما شامدان مدینه‌یه حكومتی احتراملا انتقال تاپدیلار.
یزید امام حسین (ع) اوچون عزادارلیق مراسمی توتاندان، عزادارلیق ایكی نوع اولوب. بیر دسته‌سینده صرفاً عزادالیق اولور و بیر دسته‌سینده عزادارلیقدان علاوه ائمه‌نین (ع) سیره و سؤزلری مطرح اولور. بو مسأله‌‌نین ایندی‌ده ادامه‌سی وار.
امام رضادان (ع) روایت وار كی شیعه یالان دانیشماز. مشهدین شیعه‌لری امام رضانین (ع) گؤروشونه گئتدیلر. امام اونلاری آلتی آی بویوندا قبول ائله‌مه‌ییب بویوردو: یالان دانیشان بیزیم شیعه‌میز دئییل. اونلار جواب وئردیلر: بیز امام حسینه (ع) عزادارلیق ائدریك و احسان وئره‌ریك. امام بویوردو: شیعه، ائوده و بازاردا یالان دانیشماز، بیری‌نین باشینا بؤرك قویماز، ربا وئرمز و نزول یئمز. شیعه باها ساتماز، صادق اولار. امام رضا بویوردو بو خصوصیتی اولمایان شیعه‌لر یالانچی شیعه‌دیلر و اسلامین آبروسینی آپاریرلار.
روایتلریمیزده وار كی امام حسینه آغلایان و یا آغلادان جنّته گئدر. دوزدور بیری واقعاً امام حسینه آغلایا بیلسه البته جنّت اهلیدیر. آما دوغرودان و حقیقتاً امام حسینه آغلایا بیلمك اوچون او شخصیتی تانیماق و اونون سؤزلرینه عمل ائله‌مك لازمدیر. چوخلاریمیز نماز قیلیریق آما كیمین نمازی واقعاً خالص اولور. انسانین بیر ركعت نمازی خالص اولسا الله‌لا رابطه‌سی قورولمازمی؟ پس بو آرادا نا خالصلیق وار! بیری‌ده خالصاً مخلص امام حسینه آغلایا بیلسه، یعنی بو آدام الله و اسلام دئیَنلره عمل ائلر كی امام حسینه آغلایا بیلیر.
مراغالی شاعر اوستاد میرزه حسین كریمی مراغه‌ای
یازار : میرزه عبدالصمد ملکی | بؤلوم : دین
+0 به یه ن
مراغالی شاعر اوستاد میرزه حسین كریمی مراغه‌ای
بو شاعر 82 ایل بركتلی عمرو بویوندا 150 مین بیتدن آرتیق اهل بیت (ع) مدحی و مرثیه‌سینده شعر یازیب كی 23 جلد كتاب قالیبیندا چاپ اولوب. اوستادین سون كتابی «مصیبت طوماری» آدیندا اهل بیتین (ع) مدحی و مرثیه‌سینده چاپا یئتیشیب.
اوستاد میرزه حسین كریمی مراغه‌ای اؤز شعرلرینی تورك دیلینده یازسا دا شعرلرینی كلاسیك وزنلرله یادیغینا گؤره اونلاردا عرب و فارس اصطلاحلارینا چوخ راست گلمك اولار. اوستادین شعرلرینه گؤره دكترا تئزی‌ده یازیلیب.
اوستاد مراغه‌ای اؤز طنز شعرلرینده زمانین رسوماتینی نقده چكیر. اونون طنز شعرلری 6 جلدده «رنگارنگ» آدلی كتابدا چاپ اولوب.
اوستاد میرزه حسین كریمی مراغه‌ای ایندی (1393) مراغه شهرینده كتاب ساتیجیلیغی ایله عینی زماندا اثر یاراتماغا دوام ائدیر.
عزادارلیقلاردان اوزاق اولمالی بدعتلر
یازار : میرزه عبدالصمد ملکی | بؤلوم : دین
+0 به یه ن
عزادارلیقلاردان اوزاق اولمالی بدعتلر
آما بو عمل‌لرین هئچ بیری اسلام دینی ایله اویغون گلمیر. اسلام دینی، انسانین مالینا و جانینا او قدر اهمیت وئریر كی هر شرایطده واجب اولان و هئچ واخت واجبلیغی آرادان گئتمه‌ین و اسلامین دیرَگی و ستونو ساییلان نمازی، انسانین مال و جانی خطره دوشن زمان سیندیرب قطع ائله‌ماق اولار. ایندی گؤره‌سن عزادارلیقدان اؤترو باش یاریب بدنه صدمه وورماق، انسانلارین یولونو باغلاماق، اونلارین دیوارلاری دیبینده طبیل وورماق و آسایشلرینی اللریندن آلماق و بعضاً ناخوشلارینی اوجا سسله اؤلوم حدّینه قدر شكنجه وئرمگی نئجه تفسیر ائله‌مك اولار؟
بو ایلدن‌ده جوربه‌جور بنر، بیلبورد، عكس و ... بو بدعتلره اضافه‌لشیب اوراجن كی حقیقی عزادارلار داها بو جمعلره قوشولماغا و اونلارلا چیگین- چیگینه عزادارلیق ائله‌مگه اورك ائلیه بیلمیرلر. عزادارلیق مراسملری‌نین اعلانلاری دینی مراسمینه یوخ بلكه داها چوخ انتخابات تبلیغاتینا بنزیر.
بونلار بیر طرفه، كربلا واقعه‌سی‌نین شرحینده عاشورا قیامی‌نین فلسفه‌سی و مقصدی‌نین شرحی یئرینه كربلاده اولانلارین قیافه‌لرینی –كی هئچ كس گؤرمه‌ییب و اعتبارلی سندلر ده بو زمینه‌ده یوخدور- وصف ائتمگه باشلاییرلار. هئچ كس اونلارین گؤركملری‌نین یاراشیقلی اولدوغونو دانمیر آما مسأله‌یه بئله سطحی باخماق و قاش- گؤز حدّینه یئندیرمك عاشورا مقصدی‌نین ترسینه اقدام ائله‌مك ساییلیر.
بو جور اقداملار و مسأله‌لر ضررلی زهر كیمیدیلر كی اونلارین قارشیسی آلینماسا قیسا بیر زمان ایچینده محرملیك عزادارلیقلاری‌نین مسیری تماماً دَییشَر و آیری بیر شئیه تبدیل اولار.