حضرت آدم (ع) هانسی دیلده دانیشیردی؟
یازار : میرزه عبدالصمد ملکی | بؤلوم : دین
+0 به یه ن
 | ||
حضرت آدیمین (ع) هانسی دیلده دانیشدیغینا دایر هئچ تاریخی روایت الده یوخدور. آما قرآن کریمده بو باره‌ده بیر سئری توضیحلر وار. قرآن کریم ابراهیم سوره‌سی‌نین 4-جو آیه‌سینده بویورور: «و ما أرسلنا مِن رسول إلاّ بلسان قومه لیبین لهم ...» بیز هر رسولو اؤز ملّتی‌نین دیلینده گؤندردیک کی حقیقتلری اونلارا آچیقلاسین. اولا بیلر الله‌ین حضرت آدمله دانیشدیغی دیل آدم و حوانین دانیشدیقلاری دیل اولسون. بیر عده‌نین نظرینه گؤره الله تعالی بوتون دیللری حضرت آدمه اؤیرتدی: «و علّم الادم الأسماء کلّها» (بقره 31) آدمه بوتون اسماءنی اؤیرتدی. بیر سئری مفسرلرین نظرینه گؤره بو آیه‌نین تفسیری بئله‌دیر: الله تعالی آدم اوغول‌لاری‌نین قیامته قدر دانیشاجاق بوتون دیللری حضرت آدمه اؤیرتدی. (علامة المجلسی، بحار الأنوار، بیروت، دار إحیاء التراث العربی، ۱۴۰۳ - ۱۹۸۳ م، ج ۱۱، ص ۱۴۶.) آیری مفسرلر بئله دئییرلر: قدیم سریانی دیلی یعنی سامی و عرب دیل‌لری‌نین آناسی، حضرت آدمین دانیشدیغی دیل ایدی. (عبدالحجت بلاغی، حجه التفاسیر و بلاغ الاکسیر، ناشر: اهل البیت معارفی تحقیقات و نشر موسسه‌سی ، ج۱، ص۷.) بو ایکینجی نظر عاغلا داها مناسب گلیر. یعنی حضرت آدمین دیلی قدیم سریانی دیلی اولوب و سونرالار انسانلار مختلف جغرافی مکانلارا کؤچمکله مختلف شرایط اونلارین دیللرینی تدریجله دَییشیب و بو گونکی دیل‌لر یارانیب. | ||
شیعه‌یه گؤره امام زمان آغانین (عج) ظهورونون اَن مشهور شرطی نه‌دیر؟
یازار : میرزه عبدالصمد ملکی | بؤلوم : دین
+0 به یه ن
| ||
او حضرتین ظهورونون بیرینجی و اَن مهم شرطی واقعی و خالص کؤمکلرین ساییسی بدر جنگی‌نین اصحابی قدره چاتماسیدیر. یعنی حضرتین کؤمکلری اوچ یوز اون اوچ نفره چاتمازسا ظهور تحقق تاپمایاجاق. او حضرتین کؤمکلری ایکی دسته‌دیر: بیر دسته خاص الخاص کی 313 نفردیلر و ایکینجی دسته خاص کؤمکلریدیلر کی اون مین نفردیلر. بو ایکی دسته آراسینداکی نئچه فرق وار: بیرینجی دسته او حضرتین خروج زمانی دونیانین مختلف یئرلرینده حاکم عنوانیندا او حضرت طرفیندن منسوب اولاجاقلار کی بونلارین 50-سی خانم اولاجاق. آما ایکینجی دسته، بیرینجی دسته مکه‌ده بیر یئره ییغیشمایینجا، اؤزلرینی آشکار ائله‌مز لر. بیرینجی دسته مکه‌یه ییغیشیب مسجد الحرامدا بیعته حاضرلاشاندا ایکینجی دسته یعنی 10 مین نفر ده آشکار اولاجاقلار. البته هر ایکی دسته‌نین‌ده آدلاری و اولدوقلاری یئر بللی اولوب اونلارین لیستی آقا ولی‌عصرده (عج) اولاجاق. | ||
علامه طباطبایی المیزانی یازماق اوچون بحارلانوار اوچ دفعه اوخویوب
یازار : میرزه عبدالصمد ملکی | بؤلوم : دین
+0 به یه ن
| ||
علامه طباطبایی‌نین اَن عظیم اثری «المیزان فی تفسیرالقرآن» کتابی اولوب که المیزان تفسیری آدینا تانینیب. بو تفسیرین قرآندان قرآنا اولدوغو مشهوردور یعنی علامه بو تفسیری یازاندا قرآنین آیری آیه‌لرینه مراجعه ائله‌ییب و قرآنین تفسیرینه اونلاردان استفاده ائله‌ییب. بئله اولاندا اهل بیتین (ع) قرآنداکی تفسیر نقشلری هارا گئتمه‌لیدیر. قرآن اؤز دلالتینده تام و کامل ایسه بس ائمه‌نین (ع) تفسیرده‌کی نقشی هارا گئتسین؟ بونلار ذهنه گلن سؤآل‌لاردیلار. علامه طباطبایی قرآنی تفسیری یازماغا، احادیثه مسلط اولماغی شرط بیلدیگی اوچون المیزانی یازمادان بحارالانوار کتابینی اوچ دفعه اوخوموشدو. علامه طباطبایی‌یه گؤره اهل بیت (ع) و اونلارین روایتلری بوتون ایشلرده او جمله‌دن قرآنین تفسیرینده حجت ساییلیر. او «وَأَنْزَلْنَا إِلَیْکَ الذِّکْرَ لِتُبَیِّنَ لِلنَّاسِ مَا نُزِّلَ إِلَیْهِمْ وَلَعَلَّهُمْ یَتَفَکَّرُونَ»(نحل/۴۴) آیه‌سی‌نین تفسیرینده یازیر: بو آیه رسول الله‌ین سؤزونون آیه‌لرین تفسیرینده حجت اولدوغونا دلالت ائلیر، ایستر مدلول‌لارینا صراحتی اولان و ظهورو اولان آیه‌لرده، ایستر متشابه اولان آیه‌لرده و ایستر ایلاهی اسرار اولان آیه‌لرده. (المیزان ترجمه‌سی، ج ۱۲، ص ۳۸۰) بونا گؤره اهل بیتین و او حضرتین حجیّتی بوتون عرصه‌لرده محفوظدور. | ||
مناسب سئچیم نئجه اولمالیدیر؟
یازار : میرزه عبدالصمد ملکی | بؤلوم : دین
+0 به یه ن
| ||
هر انسان عمرو بویو نفرلری سئچیب اونلارلا ارتباط قورمالیدیر. یولداش، حیات یولداشی، کوره‌کن، گلین، شریک و . . . سئچمک هر انسانین باشینا گلن سئچیملریدیلر. آما چوخ اولور کی انسانلار سئچدیکلریندن پشیمان و اونونلا ارتباطدا اولماقدان ناراضی‌دیرلار. پشیمان شخصدن سوروشسان کی « بو قدر ناراضی اولارکن نه‌دن اونو سئچدین؟» معمولا بئله جواب وئرر: «اوّلدن بوجور دئییلدی کی. اوّل‌لر چوخ ادبلی و خوش صحبت ایدی. یالان دانیشان دئییلدی و . . .» بو جوابلار گؤزو آچیق سئچیملرین‌ده کیریخا بیله‌جکلرینی گؤستریر. هله قالسین کی گؤزو باغلی و شیفته‌لیکله سئچن انسانلار. سئچیمین لاپ یاخشی اولماسی اوچون پیغمبریمیزدن (ص) نقل اولان بیر روایته باخاق. ابن عباس پیغمبردن (ص) سوروشور: هانسی یولداش یاخشیدیر؟ پیغمبر (ص) بویوردو: «مَنْ یُذَکِّرُکُمُ اللَّهَ رُؤْیَتُهُ وَ یَزِیدُ فِی عِلْمِکُمْ مَنْطِقُهُ وَ یُرَغِّبُکُمْ فِی الْآخِرَةِ عَمَلُهُ» ائله انسان کی 1. اونو گؤرنده الله یادینا دوشه‌سن. 2. دانیشیغی سنین علمینه آرتیرا. 3. عملی سنی آخرته ترغیب ائله‌یه. (اصول کافی، ج۱، ص۳۰) پیغمبر بو درین سؤزلری ایله بؤیوک سؤزلری بیان بویورور. بویورمور اوزو گولر اولسون و یا مرتب اولسون بلکه مقابل طرفی تانیماق اوچون اساس آچارلاری اؤیردیر. مرتب اولماق یاخشیدیر آما حقیقتین اؤلچوسو ظاهر دئییل. انسانین نه قدر ظاهری وضعی الله‌ین ذکری ایله سنخیتلی اولسا بیر او قدر قابل اعتماد اولار. ایکیمینجی آددیمدا باخاجی‌یوقی اونون علمی نه‌قدردیر. اونونلا دانیشاندا علمیمزه آرتاجاق یا یوخ. نیاز دئییل مقابل طرفیمیز علامه دهر اولسون بلکه سؤزلری‌نین علمه دایانماسی کفایت ائلر. اوچومونجو آددیم مقابل طرفین عملیدیر. باخ گؤر عمل‌لری فقط شخصی منفعت دالیسیجا گئدیر یوخسا آخرتی و جامعه‌نی‌ده نظرده آلیر. جامعه‌نین و انسانلارین سعادتیندن دانیشماق چوخ راحت ایشدیر آما باخ گؤر عملده ده دئدیگی کیمی وار یا یوخ؟ بیر انسان سئچدیکلرینده بو اوچ مفهومو درین شکلده رعایت ائله‌یه بیلسه سئچدیگی یولداشدان هئچ واخت پشیمان اولماز. | ||
اهل بیت کریمه‌سی‌نین (س) یاشاییشی
یازار : میرزه عبدالصمد ملکی | بؤلوم : دین
+0 به یه ن
| ||
امام رضا (ع) هجرتیندن بیر ایل سونرا عزیز باجیسینا بیر نامه یازیر. حضرت معصومه (س) نامه‌نی آلاندان سونرا زینبی رسالتینی یئرینه یئتیرمک اوچون قارداشلاری و قارداشی اوشاقلاری ایله یولا دوشور. ائله بو مقامدا ملعون مأمون بو سفرین هدفلریندن خبردار اولوب بو رسالتین یئرینه یئتیریلمه‌سینه مانع اولدو. مأمونون کؤمکلری ساوه شهرینده خانم معصومه‌نین (س) کروانی ایله ساواشدی و نامردلکله کروانین کیشیلری‌نین چوخونو او جمله‌دن خانم معصومه‌نین (س) قارداشلارینی شهید ائله‌دی. حضرت معصومه (س) بو حادثه‌دن سونرا ناراحتلیق شدیتیندن و بیر نظره گؤره مسمومیت تأثیرینده ناخوشلادی و سفرین ادامه‌سی امکانسیز اولدو و قم شهرینه گئتمگه امر ائله‌دی. قم شهری‌نین بؤیوکلری بو خبری ائشیدن کیمی او حضرتین استقبالینا گلدیلر. بیر حالداکی موسی بن خزرج او حضرتین دوه‌سی‌نین یوینی‌نی توتموشدو 201 هجری قمری ایلی‌نین ربیع الاول آییندا چوخلو همراه جمعیت ایله بیرلیده قم شهرینه وارد اولدولار. او حضرت بو شهرده 17 گون موسی بن خزرجین ائوینده قوناق اولدو و نهایتده ربیع الثانی‌نین اونوندا شیعه‌لرین گؤز یاشی ایچینده دونیایا گؤز یومدو. خانم معصومه‌نین دفنیندن سونرا موسی بن خزرج مقبره‌نین اوستونه بوریادان بیر کؤلگه‌لیک دوزلدیر. سونرالار امام جوادین (ع) بالاسی عمه‌سی قبری اوستونه بیرینجی گونبذی دوزلتدیریر و بئله‌لیکله او حضرتین شریف مزاری اهل بیت عاشقلری‌نین قبله‌گاهینا چئوریلیر. | ||