din xadimi دین خادمی

اوروجلوق آیی‌نین بیرینجی گونونون دعاسیندا اوخوروق: « اللهمَّ اجعل صِیامی فیهِ صِیامَ الصائِمین، وَ قِیامی فیهِ قِیامَ القائِمین، وَ نَبِّهنی فیهِ عَن نَومَةِ الغافِلین، وَ هَب لی جُرمی فیهِ یا اِلهَ العالَمین، وَاعفُ عَنّی یا عافِیاً عَنِ المُجرِمی ؛ ای الله! بو آیدا اوروجومو اوروج توتانلارین سیراسیندا یئر وئر، گئجه‌لر آییق قالمامی گئجه‌ آییق قالانلارین سیراسیندا و اوندا منی غافل‌لرین یوخوسوندان اویالت و منیم گناهیمی باغیشلا ای عالملرین معبودی و منی باغیشلا ای گناهلاری باغیشلایان»

روایتلرده گلیب: «غیبت، یالان، دال به دال [حرام] باخیش، یامان دئمك، ظلم ائتمك -آز و یا چوخ- اوروجو باطل ائلر. اوروج فقط یئییب ایچمكدن پرهیز ائله‌مك دئییل. اوروج انسانین قولاغی، گؤزو و هر بیر اعضاسی اوروج توتمالیدیر. ال- آیاغینی ساخلا و چوخ ساكت اول مگر خیر ایشده. نؤكرینله مدارا ائله. نؤكرینی اذیّت ائله‌مه و اوروجون وقارینی ساخلا و اوروج اولمادیغین گون ایله فرقین اولسون».

بیر آیری روایتده گلیب: «الله-ین اوروج توتانا واجب ائله‌دیگی لاپ راحت ایش یئییب ایچمكدن چكینمكدیر».

بو روایتلردن و چوخلو بونلارا اوخشار روایتلردن بیلینیر كی الله-ین انسانی كامل‌لتمكدن اؤترو اونا واجب ائله‌دیگی اوروج، بوتون اعضانین گناهدان اوزاق اولماسیندان عبارتدیر. و لاپ كامل اوروج قلبی الله-دان ساوایی هر شئیدن فارغ ائله‌مكدیر.

عبادت اؤز-اؤزلوگونده انسانی الله تعالایا یاخینلاتماز بلكه اونون اثریدیر كی انسانی مقرّب ائلر. عمومی اوروج انسانین اخلاق صاحبی اولماسی اوچوندور و ائله بونا گؤره الله تعالا بویورورو: «جزاسینی فقط اؤزوم وئردیگیم عبادت اوروجدور».

الله بنده‌لری، الله تعالانین عبودیّتینه و عبادتینه بویون وئرمكده، اخلاق صاحبلری و متّقی‌لردن اولورلار. ائله بونا گؤره اخلاق صاحبی اولماغین بیر یولو دا عبادته بویون وئركقدیر. انسانین اعضا و جوارحی عبادته عادت ائله‌دیگی زمان، الله بنده‌سی اولار. انسانین اَلی، گؤزو، دیلی و یا هر هانسی بیر اعضا و جوارحی عبادته عادت ائله‌دیگی زمان بو عبادتین اؤزو اونون اوچون حَسن اولوب اونو گناهدان اوزاق ساخلار. انسان گناهدان اوزاق اولدوغو زمان‌دا وجودی الاهی اخلاقا متخلّق اولار. الله تعالا عبادتی اؤزونه یاخینلاشماغا قاپی قویوب آما بو عبادتین اؤزو قرب گتیرمز، بلكه اونون اثریدیر كی انسانی الله درگاهیندا مقرّب ائلر.

مثلاً ««الصلاة معراج المؤمن» دئییلَنده، نماز تأثیرینده الله بنده‌سی اولموش انسان، داها ذوالجلال و الأكرامین قاباغیندان سونرا هئچ كسین قاباغیندا اَییلمز. و یا حقیقتاً الله ذكرینه دولانان دیل بیر داها یامان دئمز، غیبت ائله‌مز و تهمت وورماز. چونكی الله ذوالجلالین عبادتینه مشغول اولماغین وضعی اثری اعضا و جوارحین اخلاق صاحبی اولماقدیر.

قرآن كریمده بیان اولدغو كیمی: « یا أَیهَا الذینَ آمَنُوا كُتِبَ عَلَیْكُمُ الصیامُ كَما كُتِبَ عَلَى الذینَ مِنْ قَبْلِكُمْ لَعَلكُمْ تَتقُون‏»[ بقره/ 183]. ای ایمان گتیرنلر، سیزدن قاباقكیلارا یازیلدیغی كیمی اوروج سیزه‌ ده واجب اولدو، اولسون كی متّقی اولاسیز». ظاهری عبادت و اوروج اؤزو انسانی مقرّب ائله‌میر، بلكه تقوایا سبب اولور. و البته او دا حتمی دئییل و «لعل» لفظی ایله یعنی «اولا بیلر».

مبعث گئجه‌سی رجب المرجب آیی‌نین مبارك گئجه‌لریندندیر. بو گئجه‌یه بیر سئری عمل‌لر نقل اولوب.

امام جواددان (ع) نقل اولوب: «رجب آییندا گونش اوندا پارلایاندان داها یاخشی بیر گئجه وار و او گئجه سحرینده رسول الله، پیغمبرلیگه مبعوث اولان گئجه، رجبین 27-سی دیر. بیزیم شیعه‌لردن هر كیم او گئجه‌نین اعمالینی یئرینه یئتیرسه 60 ایلین اجرینی قازاناجاق». او حضرتدن سوروشدولار: «او گئجه‌نین عمل‌لری نه‌لردیر؟» امام بویوردو: «خفتن نمازینی قیلیب یاتاغا گئدندن سونرا، گئجه‌ یاراسیندان تئز هر هانسی ساعتده آییلیب 12 ركعت نماز قیلاسان و هر ركعتده حمد ایله مفصل قیسا سوره‌لرین (محمد سوره‌سیندن قرآنین آخرینا قدر) بیرینی اوخویاسان، هر ایكی ركعتدن بیر سلام وئرندن سونرا اوتوروب حمد، معوذتین، توحید، كافرون، قدر سوره‌لرینی و آیة الكرسی‌نی هر بیرینی یئددی مرتبه اوخویاسان و بو عمل‌لرین هر بیری‌نین آخرینده مخصوص دعا اوخویاسان». بو دعالا مفاتیح الجنان كتابیندا مفصل صورتده توضیح وئریلیب.

بو گئجه‌ده غسل ائله‌ماق‌دا مستحبدیر.

امیرالمؤمنین زیارتی بو گئجه‌نین فضیلتلی عمل‌لریندن ساییلیر. مفاتیح الجناندا او حضرته اوچ زیارت نقل اولونوب.

رحمتلیك شیخ عباس قمی مفاتیح الجناندا رجبین 27-جی گئجه‌سینده امیرالمؤمنین زیارتی‌نین اوخونماسی‌نین فضیلتینه چوخ تأكید ائله‌ییب. اونون یازدیغینا گؤره، نه فقط شیعه‌لر بلكه سنت اهلیندن بیر عده‌ده اونا اشاره ائله‌ییبلر. بو باره‌ده ابن بطوطه‌نین سفرنامه‌سینه اشاره ائدیب: . . او جمله‌دن سنت اهلی‌نین عالملریندن اولان، آلتی یوز ایل بوندان اوّل یاشامیش ابو عبدالله محمد بن بطوطه، «رحله ابن بطوطه» آدلی سفرنامه‌سینده مكه‌دن نجفه داخل اولماسی باره‌ده یازیر: «بو شهرین اهالیسی‌نین هامیسی رافضیدیلر و امیرالمؤمنین روضه‌سینه كرامتلر ظاهر اولوب. او جمله‌دن اورانین اهالیسی آراسیندا «لَیْلَةُ الْمَحْیا» آدینا معروف اولان رجبین ایرمی یئددینجی گئجه‌سی، عراق عجم و عراق عربدن و رومدان اوتوز قیرخ نفر چولاق و افلیج آدام ییغیشیب گلرلر و خفتن نمازیندان سونرا اونلاری مقدس ضریحین یانینا گتیررلر و جماعت ییغیشیب اونلارین ساغالماسینی گؤزلر. گئجه‌نین یاریسی و یا اوچدن ایكیسی گئدنه قدر بو جماعتین بیر عدّه‌سی نمازا مشغول اولار و بعضیسی ذكر دئیَر و بیر تعدادی قرآن تلاوت ائلر و بعضیلری‌ده روضه‌یه باخارلار. او آن حركت ائده بیلمه‌ین بو افلیجلر هئچ ناخوشلوقلاری اولمادان ساپ-ساغلام آیاغا دوروب  «لا اِلهَ اِلا اللّهُ مُحَمَّدٌ رَسُولُ اللّهِ عَلَىُّ وَلی ُّاللّهِ» دئیَرلر. بو مشهور و مستفیض مسأله‌دیر. من اؤزوم او گئجه‌نی درك ائله‌مه‌میشم آما سؤزلرینه ایناندیغیم ثقه انسالاردان ائشیتمیشم. هم ده بیر مدرسه‌نین مسافرخاناسیندا اوچ افلیج انسان گؤردوم. اونلاردان سوروشدوم: سیز نییه توخدامامیسیز و بوردا قالیبسیز؟ جواب وئردیلر: بیز ایرمی یئددینجی گئجه‌یه چاتمامیشیق و شفا آلماق اوچون بوردا قالیب گلن ایلی گؤزله‌ییریك. بو گئجه شهرلردن چوخلی جماعت ییغیشار و اون گونه قدر بؤیوك بازار قورولار. فقیر دئییر: آماندی بو مسأله نظرینه بعید گله!. بو مشرّفه مشاهددن گؤرونن معجزه‌لر سایا گلمز حدده چوخدور و متواتر اولوبلار . . .».

رجبین ایرمی یئددینجی گونونون عمل‌لری

بؤیوك بایراملاردان و حضرت رسول صَلَّى اللَّهِ عَلِیهِ وَ اله-ین رسالته مبعوث اولان گونو و جبرئیلین پیغمبریمیزه نازل اولان گونودور. بو گونون نئچه عملی وار:

غسل ائله‌ماق.

اوروج توتماق و بو گون ایل بویو ممتاز ساییلان دؤرد گوندن بیریدیر. بو گونون اوروجو یئتمیش ایلین اوروجو ایله برابردیر.

چوخلو صلوات چئویرمك.

حضرت رسول الله (ص) و امیرالمؤ منین (ع) زیارتینی اوخوماق.

شیخ، مصباح كتابیندا یازیر: رَیّان بن الصّلت‌دن نقل اولوب كی حضرت امام جواد علیه السلام بغداد دا اولان زمان رجبین اون بئشینده و ایرمی یئددیسینده اوروج توتدو و بوتون آداملاری‌دا اوروج توتدو. بیزه امر بویوردو 12 ركعت نماز قیلاق و هر ركعتده حمد و سوره اوخونا و هر نمازدان قورتولاندان سونرا حمد و توحید و مُعَوَّذَتین سوره‌لری‌نین هر بیری دؤرد دفعه اوخونا و دؤرد دفعه « لا اِلهَ اِلا اللّهُ واللّهُ اَكْبَرُ وَسُبْحانَ اللّهِ وَالْحَمْدُلِلّهِ وَلا حَوْلَ وَلا قُوَّةَ اِلاّبِاللّهِ الْعَلِىِّ الْعَظیمِ» دئییله و دؤرد دفعه «اللّهُ اللّهُ رَبِّى لا اُشْرِكُ بِهِ شَیْئا»  دئییله و دؤرد دفعه‌ده «لا اُشْرِكُ بِرَبِّى اَحَدا» دئییله.

هابئله شیخ، جناب ابوالقاسم حسین بن رُوح‌دان نقل ائلیر كی بویوردو: « او گون 12 ركعت نماز قیلارسان و هر ركعتده حمد و راحت سوره‌لرین بیرینی اوخویارسان و تشهد سلامدان سونرا هر ایكی ركعت آراسیندا بئله دئیَرسن:

اَلْحَمْدُ لِلّهِ الَّذى لَمْ یَتَّخِذْ وَلَداً وَلَمْ یَكُنْ لَهُ شَریكٌ فى الْمُلْكِ

وَلَمْ یَكُنْ لَهُ وَلِىُّ مِنَ الذُّلِّ وَكَبِّرْهُ تَكْبیراً یا عُدَّتى فى مُدَّتى یا

صاحِبى فى شِدَّتى یا وَلیّى فى نِعْمَتى یا غِیاثى فى رَغْبَتى یا

نَجاحى فى حاجَتى یا حافِظى فى غَیْبَتى یا كافِىَّ فى وَحْدَتى یا

اُنْسى فى وَحْشَتى اَنْتَ السّاتِرُ عَوْرَتى فَلَكَ الْحَمْدُ واَنْتَ الْمُقیلُ

عَثْرَتى فَلَكَ الْحَمْدُ وَاَنْتَ الْمُنْعِشُ صَرْعَتى فَلَكَ الْحَمْدُ صَلِّ عَلى

مُحَمَّدٍ وَآلِ مُحَمَّدٍ وَاسْتُرْ عَوْرَتى وَآمِنْ رَوْعَتى وَاَقِلْنى عَثْرَتى

وَاصْفَحْ عَنْ جُرْمى وَتَجاوَزْ عَنْ سَیِّئاتى فى اَصْحابِ الْجَنَّةِ وَعْدَ

الصِّدْقِ الَّذى كانُوا یُوَعَدُونَ

هر نماز و دعادان قورتولاندان سونرا حمد، اخلاص، مُعَوَّذَتَیْن، قُلْ یا اَیُّهَا الْكافِرُونَ، اِنا اَنْزَلناهُ و آیة الكرسى‌نی هر بیرینی یئددی مرتبه اوخویوب یئددی دفعه  «لا اِلهَ اِلا اللّهُ واللّهُ اَكْبَرُ وَسُبْحانَ اللّهِ وَلا حَوْلَ وَلا قُوَّةَ اِلاّ بِاللّهِ» دئیَرسن. سونرا یئددی دفعه «اللّهُ اللّهُ رَبَّى لا اُشْرِكُ بِهِ شَیْئا» اوخویاندان سونرا ایسته‌دیگین دعانی ائلرسن.